Kumara emyaka mikye eka yaitu ekatuuraho haihi na Leipzig, East Germany, haihi n’emyatano ya Czech na Poland. Aha myaka mukaaga eka yaitu ekafurukira Brazil bwanyima twaza Ecuador ahabw’omurimo gwa tata.

Aha myaka 14, baakanyohereza Germany kushoma ndikuraara aha ishomero. Ahabw’okugira ngu nkaba ndi hare munonga n’abazaire bangye abaabaire nibatuura South America, nkaba nyine kwereeberera. Nkahinduka omuntu orikweteekateekaho nyenka. Nkaba ntarikufayo oku ebi ndikukora birikukwata aha bandi.

Ku naahikize emyaka 17 abazaire bangye bakagaruka Germany. Nkabanza kutuura nabo. Kwonka ahabw’okwenda kuba nyenka kikangumira kweta ahansi y’obushoboorozi bwabo. Aha myaka 18, nkaruga omuka.

Nkaguma ninzegyereza, ndikusherura ekigyendererwa ky’okubaho. Bwanyima y’okuroza aha buri mbeera y’ebigombe bitari bimwe, nkahamiza kimwe ngu ekintu ekirikukirayo oburungi eki ndikubaasa kukora n’okurambura ensi nungi bantu batakagicwekyereize.

Nkaruga omuri Germany, naagura piki, naagumizamu naaza Africa. Kwonka bwanyima nkagira ekiteekateeko ky’okugaruka Europe kukanika piki yangye. Bwanyima nkeeshaga naahikire aha kirwa kimwe omuri Portugal. Nkatsigaho piki yangye naagyendera omu bwato.

Nkeegaita aha guruupu y’eminyeeto abaabaire nibetebeekanisa kwetoorora enyanja empango ey’Atlantic. Omuribo nimwo naaboine Laurie owaizire kuba omukazi wangye. Tukabanza kuza aha birwa bya Caribbean. Tukatuuraho kakye omuri Puerto Rico, bwanyima twagaruka omuri Europe. Tukaba twine amatsiko ngu nitubaasa kutunga obwato bw’okuguma nituraaramu turi aha maizi. Kwonka bwanyima y’okusherura kumara ameezi ashatu, titurabaasize kububona. Eihe rya German nikambarira aha baine kuza kutendekwa.

Nkamara ameezi 15 omu ihe rya German eririkukorera aha maizi. Omu bwire obwo, nyowe na Laurie tukataaha kumwe omu bushwere twagumizamu omu kurambura kwaitu. Omu kaire ako ntakagiire omu mahe, tukagura obwato. Obu naabaire ndi omu mahe, obwato obwo tukabukora bwaba oburikubaasa kumara aha maizi obwire buraingwa. Tukaba nitwenda kuguma nituraaramu n’okubugyederamu turikurabura ensi. Obu naabaire ndugire omu mahe, kandi nkiriyo ninkora obwato nibwo Abajurizi ba Yehova baatubona bakatandika kutwegyesa Baibuli.

Omu kubanza nkaba nindeeba ngu tikirikunyetengyesa kuhindura emitwarize yangye. Tukaba twaherize kushemeza obushwere bwaitu, kandi nkaba ntakireetsa. (Abaefeso 5:5) Omu kurambura ensi, nkaba ninteekateeka ngu okureeba ebyahangirwe ebirikutangaaza ebi Ruhanga yaahangire, n’ekigyendererwa ky’omugasho.

Kwonka, omu amazima, nkaba nyine kukora empinduka okukira munonga omu mitwarize yangye. Omwehuriro n’okwenda kwetegyeka bikandeetera kweyesiga, nkaba ninyebembeza okubaasa kwangye n’ebi nkozire. Nkaba ninyeteekateekaho nyenka.

Eizooba rimwe, nkashoma aha Rubazo rwa Yesu orw’aha Rushozi orurikumanywa gye. (Matayo, eshuura 5-7) Omu kubanza, nkatangaazibwa okushemererwa oku Yesu yaagambireho. Nk’eky’okureeberaho, akagira okushemererwa okwabuzima nikugirwa abaine enjara n’eiriho ry’eby’omwoyo. (Matayo 5:6) Nkaba niinyebuuza oku ekyo kirikubaasa kureetera omuntu okushemererwa. Ku naagumiizemu niinyega nkahika naayetegyereza ngu twena twine ekyetengo ekyo. Yesu akagira ati: “Baine omugisha nari [okushemererwa abaine ekyetengo ky’eby’omwoyo].”—Matayo 5:3.

Ku twaherize emishomo yaitu omuri Germany, nyowe na Laurie tukaza France, kandi bwanyima twaza Italy. Hoona ei twabaire nituza, tukaba nitushagayo Abajurizi ba Yehova. Okureeba nibakundana buzima kandi baine obumwe, kikashemeza. Nketegyereza ngu Abajurizi ba Yehova nibakundana nk’eishe-emwe. (Yohaana 13:34, 35) Ku haahingwireho obwire, nyowe na Laurie tukabatizibwa twaba Abajurizi ba Yehova.

Bwanyima y’okubatizibwa, nkagumizamu nimpindura emitwarize yangye. Nyowe na Laurie tukacwamu kuvuga obwato twaza aha bizinga bya Africa kandi twayetoorora enyanja empango ey’Atlantic twahika United States. Obu twabaire turi aha nyanja empango twembi twehinguririze amaizi maingi nibwo twayetegyereza oku turi bakye waatugyeragyeranisa n’Omuhangi. Ahabw’okugira ngu nkaba ntaine bingi by’okukora aha gati y’enyanja mpango egi, nkacwamu kuta omutima aha kushoma Baibuli. Ebirikukwata aha mbeera ezi Yesu yaarabiremu omu nsi bikanshemeza. Akaba ari omushaija ohikiriire aine okubaasa okurikukira ekintu kyona eki orikubaasa kuteekateeka, kwonka akaba atarikwetunguura. Akaba atarikwetaho omutima kureka akaba naaguta ahari Ishe ow’omu iguru.

Okuteekateeka aha ky’okureeberaho kya Yesu, kukampwera kwetegyereza ngu nyine kwebembeza Obukama bwa Ruhanga omu mwanya gw’okuta omutima aha byangye. (Matayo 6:33) Nyowe na Laurie ku twahikire omuri United States, tukacwamu kurekyera aho kuzengyerera reero twata omutima aha kuramya kwaitu.

Omu kubanza nkaba ncwamu ebintu ebimwe ntabandize kuteekateeka. Kwonka hati, mboine obukomooko bw’obwengye oburikunyebembera. (Isaaya 48:17, 18) Kandi nyine ekigyendererwa ky’okuramya Ruhanga n’okuhwera abandi kumwegaho eki naabaire ntaine ira.

Nyowe na Laurie, ahabw’okugyendera aha misingye ya Baibuli kihamize obushwere bwaitu. Kandi tutungire omugisha ogw’okworora muhara waitu kumanya Yehova n’okumukunda.

Embeera zitwire zitarikutugyendera gye. Kwonka ahabw’okuhwerwa Yehova, tumaririire kutahanika nari kurekyera aho kumwesiga.—Enfumu 3:5, 6.