Fernando * akaba atiinire. Abareeberezi babiri bakamugira ngu nibenda kugamba nawe omu mwanya ogwehereire. Bwanyima y’omureeberezi wa saketi kutaayaaya emirundi mingi, abareeberezi bakaguma nibagambira Fernando ebi aine kukora kubaasa kwongyerwa obujunaanizibwa omu kibiina. Bwanyima y’obwire Fernando akaba naayebuuza yaaba naabaasa kwija kutooranwa kuba omureeberezi. Kwonka ku haahingwireho obwire omureeberezi wa saketi akagaruka. Mbwenu shi abareeberezi bakaba nibaza kumugambira ki aha murundi ogu?

Fernando akahurikiza obu omureeberezi omwe yaatandika kugamba. Ow’eishe-emwe akagamba aha biri omu 1 Timoseo 3:1, reero yaagira ngu abareeberezi bakaba bamanyisiibwe ngu akaba atoorainwe kuba omureeberezi. Fernando akatangaara yaamubuuza ati: ‘Waagamba ki?’ Ow’eishe-emwe akagarukamu eki yaamugambira, reero Fernando yaamwenya. Bwanyima ku kyarangirwe omu kibiina, buri omwe akashemererwa.

Ni kibi kwenda kutunga obujunaanizibwa omu kibiina? Ngaaha. Kurugiirira aha biri omu 1 Timoseo 3:1, ‘Omuntu yaayenda omurimo gw’obureeberezi, naaba akunzire omurimo murungi.’ Abashaija Abakristaayo baingi nibagyendera aha buhabuzi obu, reero batunguuka omu by’omwoyo kubaasa kutunga obujunaanizibwa omu kibiina. N’ahabw’ekyo, abaheereza ba Ruhanga baine ab’eishe-emwe nyamwingi abarikuheereza nk’abareeberezi n’abaheereza. Kwonka ahabw’okugira ngu omubaro gw’ab’eishe-emwe nigweyongyera, n’abashaija omu kibiina baine kwongyera kukununkirira obujunaanizibwa. Mbwenu shi omuringo oguhikire ogw’okukora eki ni guuha? Kandi shi abo abarikwenda kwongyera kutunga obujunaanizibwa omu kibiina bashemereire kwerarikirira nka Fernando?

Ekigambo okukununkirira nikivunuurwa kuruga omu kigambo ky’Orugriika ekiine amakuru g’okwenda ekintu, akananuura omukono kukihikaho. Eki nikibaasa kukureetera kuteekateeka aha muntu orikwenda kucwa ekijuma kirikureebeka gye omu muti. Kwonka eki tikirikumanyisa omuntu kwenda ekitiinisa ky’okuba omureeberezi kyonka. Ahabw’enki? Ahakuba abacureezi abarikwenda kuheereza nk’abareeberezi bashemereire kuba nibenda kukora “omurimo murungi” kutari kutunga ekitiinisa.

Bingi ebi bashemereire kuhikiiriza nibishangwa omu 1 Timoseo 3:2-7 na Tito 1:5-9. Ow’eishe-emwe omwe oheereize nk’omureeberezi kumara obwire buraingwa akagamba aha byahandiikirwe ebyo ati: “Nyowe ningira ngu ekikuru n’eki turi omunda. Okugamba n’okwegyesa ni bikuru, kwonka ekikuru twine kutagira eki twagaywaho, tukaba abeerinzi, abanyabwengye, abarikukunira abagyenyi, kandi abarikutwaza gye.”

Teeraho kukununkirira orikukwatanisa n’ekibiina omu miringo etari emwe n’emwe. Ow’eishe-emwe orikukununkirira naateeraho kutagira eki yaagaywaho arikwetantara okubaiha nari ekigwire kyona. Naateeraho kuba omwerinzi kandi omunyabwengye, n’ahabw’ekyo ab’omu kibiina nibamwesiga kubeebembera, n’okubahwera baaba baine oburemeezi. Ahabw’okuba efura, naagaruramu ab’eishe-emwe amaani n’abasya omu mazima. Naahuumuriza abarwaire n’abakuzire kandi abahwera, ahakuba naateeraho kukora ebirungi. Naateeraho kugira emitwarize egi kugira ngu ahwere abandi, kutari kuheebwa obujunaanizibwa omu kibiina. *

N’obu abareeberezi barikushemererwa kumuhiga kandi bakamuha obuhabuzi, obujunaanizibwa bw’okuhikiiriza ebirikwetengyesa nibuguma buri aha w’eishe-emwe oriyo naakununkirira. Henry, oheereize nk’omureeberezi kumara emyaka mingi naagira ati: “Waaba nookununkirira, teeraho kworeka ngu noohikiiriza ebirikwetengyesa.” Kurugiirira aha biri omu Omubuurizi 9:10, naagira ati: “Kyona eki orikwenda kukora n’emikono yaawe, okikore n’amaani.” Emirimo yoona ei abareeberezi barikukuha, gikore nk’oku orikubaasa. Kunda emirimo yoona ei orikukora omu kibiina, otwariiremu n’okuboneza. Bwanyima y’obwire, ab’eishe-emwe nibaza kusiima emirimo yaawe. Waaba nooyenda kuheereza nk’omureeberezi, teeraho kukora n’amaani kandi obe ow’amazima omuri byona ebi orikukora. Kandi kora byona omu bucureezi, kutari kweyendeza ebitiinisa.—Mat. 23:8-12.

Bamwe abarikwenda kwongyera kutunga obujunaanizibwa omu kibiina nibabaasa kwohibwa kusimizaho abareeberezi kurabira omu bikorwa byabo nari kugyemesereza akakiiko k’abareeberezi. Ab’eishe-emwe nk’abo nibabaasa kuguubwa kubi abareeberezi baabaha obuhabuzi. Kwonka bashemereire kwebuza bati: ‘Ninyebeembeza ebi ndikwenda, nari niinyenda kuhwera entaama za Yehova?’

Abo abarikukununkirira tibashemereire kwebwa ekindi eki abareeberezi bashemereire kuhikiiriza, okuteeraho obusyo bwa Ruhanga ‘eky’okureeberaho.’ (1 Pet. 5:1-3) Omuntu orikuteeraho ekibiina eky’okureeberaho naayetantara emiteekateekyere n’ebikorwa ebitahikire. Naateeraho kugira okugumisiriza yaaba aine obujunaanizibwa omu kibiina nari atabwine. Okuba omureeberezi tikirikumanyisa ngu omuntu takiri otahikiriire. (Kub. 12:3; Zab. 106:32, 33) Kandi ow’eishe-emwe naabaasa kuba atarikwemanyaho kibi, kwonka abandi nibabaasa kuba nibamanya enshobe ze. (1 Kor. 4:4) Abareeberezi baakuha obuhabuzi barikwihirira aha Baibuli, teeraho kuhurikiza eki barikukugambira. Reero teeraho kugyendera aha buhabuzi obwo.

Ab’eishe-emwe abamwe nibategyereza obwire buraingwa batakoongyeirwe obujunaanizibwa. Waaba omazire obwire buraingwa orikukununkirira kuba omureeberezi, obumwe noogira amaganya? Kyaba nikwo kiri, teekateeka aha bigambo ebi: “Amatsiko gatahweire garusya omutima, kwonka ekirikwetengwa ku kiboneka, kiba ekiti ky’amagara.”—Enf. 13:12.

Omuntu naabaasa kuhurira obusaasi omu mutima kyaba nikireebeka ngu tarabaase kuhikiiriza ekigyendererwa kye. Abrahamu nawe akeehurira atyo. Yehova akaba amuraganiise omwana w’omwojo, kwonka nabwo, Abrahamu na Saara bakamara emyaka mingi bataine baana. (Kut. 12:1-3, 7) Abrahamu omu myaka ye ya bukuru, akashaba ati: “Ai [Yehova] Ruhanga, oryampa ki, obu naaguma ndi encwekye . . . Reeba torampaire ruzaaro.” Yehova akamuhamiza ngu eki yaamuraganiise ngu naaza kutunga omwana nikiza kuhikiirira. Kwonka nabwo emyaka erikurenga omuri 14 ekarabaho Ruhanga atakahikiriize ekiraganiso ekyo.—Kut. 15:2-4; 16:16; 21:5.

Mbwenu shi obu Abrahamu yaabaire ategyereize, akaba atashemereirwe arikuheereza Yehova? Ngaaha. Akaba atarikubangaanisa eki Yehova yaabaire amuraganiise. Akaguma ategyereize okuhikiirira kw’ekiraganiso ekyo. Entumwa Paulo akahandiika ati: “Nikwo Abrahamu yaahairwe atyo eki yaaraganisiibwe, ku yaaherize kugumisiriza obutaruha.” (Heb. 6:15) N’ekyarugiremu, Ruhanga ow’Obushoboorozi bwona akaha omushaija omwesigwa ogwo ekirikukira aha ki yaabaire naateekateeka. Noobaasa kwegyera ki ahari Abrahamu?

Waaba nooyenda kuheereza nk’omureeberezi kwonka otegyereize kumara emyaka mingi, guma nooyesiga Yehova. Otakaarekyera aho kumuheereza oshemereirwe. Warren, ohweraire ab’eishe-emwe baingi kutunguuka omu by’omwoyo naashoboorora ati: “Ow’eishe-emwe naatunguuka mporampora kubaasa kutooranwa kuba omureeberezi. Bwanyima y’obwire okubaasa kwe n’emiteekateekyere ye neereebekyera aha ku arikutwaza n’oku arikuhikiiriza obujunaanizibwa bwe. Bamwe nibateekateeka ngu baaba batatungire obujunaanizibwa bumwe nibaba batari basinguzi. Kwonka emiteekateekyere nk’egi egwire kandi neebaasa kurugamu akabi. Waaba nooheereza Yehova omu bwesigwa hoona ahu ori n’omuri byona ebi orikukora, nooba ori omusinguzi.”

Ow’eishe-emwe omwe akategyereza kumara emyaka ikumi atakatoorainwe kuba omureeberezi. Akashoma ebiri omu Ezekieli eshuura 1 kandi naagamba aha bi yaayegiremu ati: “Yehova naavuga ekigaari kye, nari ekibiina kye aha bwira obu arikwenda. Ekikuru ti bintu kukorwa omu bwire bwaitu kureka omu bwire bwa Yehova. Aha bikwatiraine n’okuheereza nk’omureeberezi, ekikuru t’eki ndikwenda. Yehova naabaasa kuba naamanya ngu eki ndikwenda tikyo nshemereire kutunga.”

Waaba nooyenda kukora omurimo murungi gw’okuheereza nk’omureeberezi omu kibiina, kununkirira orikwongyera aha kushemererwa omu kibiina. Obwire bwaba nibureebeka nk’oburikugyenda mpora, yetantare okugira amaganya nari okutagumisiriza. Raymond, owaaba yaagambirweho naagira ati: “Torikubaasa kugira okumarwa waaba nooyenda ebitiinisa. Abo abarikugira amaganya tibarikutunga okushemererwa okurikuruga omu kuheereza Yehova. Teeraho kwongyera kugira emitwarize y’omwoyo gurikwera, na munonga okugumisiriza. Yongyera kuba omuntu ow’eby’omwoyo orikwega ebiri omu Kigambo kya Ruhanga. Yongyera aha buheereza bwawe orikubuurira amakuru marungi, kandi orikwegyesa abantu Baibuli. Yeebembere ab’eka yaawe omu by’omwoyo n’omu kuramya kw’eka. Yesiime ahabwa buri mugisha gw’okuba n’ab’eishe-emwe na banyaanyazi-itwe. Waaba nookora ebintu ebi, nooza kushemererwa n’obu oraabe otakahikire aha kigyendererwa kyawe.

Okuteeraho kuhikiiriza ebirikwetengyesa kwongyera kutunga obujunaanizibwa omu kibiina n’omugisha kuruga ahari Yehova, kandi Yehova n’ekibiina kye tibarikwenda ngu ogire amaganya nari otashemererwa waaba noomuheereza. Ruhanga naashagika abo boona abarikumuheereza n’ebigyendererwa birungi kandi naabaha emigisha. Kandi yaatuha omugisha, ‘tarikugwongyeraho obusaasi.’—Enf. 10:22.

N’obu waakuba omazire obwire buraingwa orikukununkirira, noobaasa kwongyera kutunguuka omu by’omwoyo. Waaba nooteeraho kugira emitwarize mirungi, orikukora n’amaani omu kibiina, kandi otarikunagiirira eka yaawe, noija kutaho eky’okureeberaho kirungi omu buheereza ekitarikwija kweba. Nitukwendeza okushemererwa omu buheereza bwawe, n’obu waakutunga bujunaanizibwa ki.