Ntwire ninkunda ebihangirwe kuruga omu buto. Eka yangye ekaba neekira kuza kurambura omu bibira birikushemeza, enyanja nungi eziri haihi n’etauni yaitu eya Jyväskylä, omuri Finland. Kandi ninkunda n’enyamaishwa. Obu naabaire ndi muto, nkaba niinyenda kubumbatira buri njangu n’embwa yoona ei naareeba! Ku naakuzire, nkateganisibwa omuringo ogu abantu baabaire nibatwarizamu kubi enyamaishwa. Bwanyima y’obwire, nkaza omu kitongore ekirikurwanirira obugabe bw’enyamaishwa ei naashangire abaine emiteekateekyere nk’eyangye.

Tukeejumbira kimwe omu kurwanirira obugabe bw’enyamaishwa. Tukaba nitujanjaaza obutumwa tutebeekanisa obwesharingo kuhakanisa amaduuka agarikuguza ebyoya by’enyamaishwa n’amaceberero agarikucondooza aha nyamaishwa. Tukataho n’ekibiina kisya eky’okurinda enyamaishwa. Ahabw’okugira ngu tukatamu amaani maingi kumanyisa abantu enshonga yaitu, tukaba nitukira kweshanga omu mihondano n’ab’obushoboorozi. Nkakomwa naateebwa omu kihome emirundi mingi.

Okwongyera aha kufayo aha nyamaishwa, nkaba ninteganisibwa n’obundi buremeezi oburi omu nsi. Nkahendera ngiire omu bindi bitongore nk’ekya Amnesty International and Greenpeace. Nkatamu amaani maingi kushagika ebikorwa byakyo. Nkaba nindwanirira obugabe bw’abooro, abataine by’okurya, n’abandi enshoberwa.

Kwonka bwanyima, nkamanya ngu tindikubaasa kuhindura ensi. N’obu ebitongore ebyo byabaasize kwihaho oburemeezi bukye, oburemeezi obuhango bukaguma nibweyongyera. Okaba nooshusha ngu ensi yoona eshwekirwe ebikorwa bibi byonka, tihaine orikufayo aha kintu kyona. Nkahurira naahwa amaani.

Okwehurira kubi ahabw’okutagira kihwera, nkatandika kuteekateeka ahari Ruhanga na Baibuli. Enyima Abajurizi ba Yehova bakaba baanyegyeiseho Baibuli. N’obu ndaabe naabaire ninsiima Abajurizi ba Yehova ahabw’okuba abanyambabazi kandi abarikufayo, nkaba nteteekateekire kuhindura emitwarize yangye. Kwonka hati embeera zikaba zihindukire.

Nkaihayo Baibuli yangye naatandika kugishoma. Buzima ekampuumuriza. Nkashangamu ebyahandiikirwe bingi ebirikutwegyesa kutwariza gye enyamaishwa. Nk’eky’okureeberaho, Enfumu 12:10 nihagira ngu “abantu barungi nibareeberera gye amatungo gaabo.” (Good News Translation) Kandi nketegyereza ngu Ruhanga tiwe arikureetaho okubonabona omu nsi. Kureka, oburemeezi bwaitu bweyongyeire ahabw’okugira ngu abantu tibarikukuratira obuhabuzi bwe. Nkashemezibwa munonga rukundo ya Yehova n’okugumisiriza kwe.—Zaaburi 103:8-14.

Omu bwire obwo, nkatunga akakongi k’ekitabo Niki Eki Baibuli Buzima Erikwegyesa? naakaijuza naakohereza. Omu bwire bukye omushaija n’omukazi we Abajurizi ba Yehova bakaija aha rwigi rwangye baanshaba kunyegyesa Baibuli, reero naikiriza. Nkatandika n’okuza omu nteerane aha Kyombeko ky’Obukama. N’ekyarugiremu, amazima ga Baibuli gakatandika kukura omu mutima gwangye.

Buzima Baibuli ekampwera munonga kukora empinduka nyingi. Nkarekyera aho kureetsa n’okunywa amaarwa maingi. Nkaboneza endeebeka yangye n’emigambire yangye. Kandi nkahindura n’emiteekateekyere yangye aha b’obushoboorozi. (Abarooma 13:1) Nkareka n’emitwarize yangye y’obuhwanshoni, ahakuba nkaba ninshambagurikana.

Ekyangumiire kukaba kuri okuhindura emiteekateekyere yangye aha bitongore by’okurwanirira obugabe. Eki tikirabaireho ahonaaho. Omu kubanza, nkaba nindeeba ngu ninza kureebya ebigombe ebi naabirugamu. Kwonka, nketegyereza ngu Obukama bwa Ruhanga nibwo bwonka oburaiheho oburemeezi omu nsi. Nkatandika kuta amaani gangye goona omu kushagika Obukama obwo n’okuhwera abandi kwega ebirikubukwataho.—Matayo 6:33.

Ahabw’okwejumba omu bwesharingo, nkaba nimbaganisamu abantu omu muringo murungi nari omubi, nkaba mba nyeteekateekire kuhakanisa abu ndikureeba ngu ni babi. Kwonka ninsiima Baibuli, hati tinkiniire abandi enyehurira za rwango. Kureka, niinteeraho kugirira abantu boona rukundo y’Ekikristaayo. (Matayo 5:44) Gumwe aha miringo ei ndikworekamu rukundo egi, n’okugambira abandi aha makuru marungi g’Obukama. Ninshemererwa kureeba oku omurimo ogu gurikwenegyeza obusingye n’okushemererwa otwariiremu n’okuha abantu amatsiko.

Ntungire obuhuumure ahabw’okureka enshonga omu mikono ya Yehova. Nyine obwesigye ngu obu niwe Muhangi, tarikwija kureka enyamaishwa n’abantu kutwarizibwa kubi ebiro byona, nari kureka ensi egi nungi kucwekyerezibwa. Okutaana n’ekyo, arikukoresa Obukama bwe naija kutereeza ensi. (Isaaya 11:1-9) Nikindeetera okwesiima munonga kumanya amazima aga n’okuhwera abandi kugaikiriza. Tinkiteekateeka ngu nyine kuhindura ensi.