Teekateeka aha mbeera egi: Julia ku arikwereeba omu ndeeberwamu, naareeba ngu ni muhango munonga. Omu mutima gwe naagira ngu aine kutuubya aha buhango bwe, n’obu abazaire be na banywani be baraabe nimugira ngu “ni mukye.”

Julia akaba ataireho entebeekanisa y’amaani kugira ngu atuubyeho “kiro nka ibiri zonka.” Eki yaabaire aine kukora n’okumara ebiro bikye atarikurya . . .

Ku oraabe oraayehuriireho nka Julia, noobaasa kukora ki?

Ti kibi kuteekateeka aha ku orikureebeka. Buzima, Baibuli neegamba aha ndeebeka y’abakazi n’abashaija, otwariiremu Saara, Rakeeli, Abigaili, Yosefu, na Daudi. Baibuli neegamba aha mukazi orikwetwa Abishaagi ngu “akaba ari murungi munonga.”—1 Abagabe 1:4.

Kwonka, eminyeeto mingi nibateekateeka munonga aha ku barikureebeka. Ekyo nikibaasa kurugamu oburemeezi bw’amaani. Yetegyereze eki:

• Omu kucoondoza kumwe, abaishiki 58 ahari 100 bakagira ngu bagomokire ekirenga, kandi obwo omu mazima, 17 bonka nibo baabaire bagomokire.

• Omu kucoondoza okundi, abakazi 45 ahari 100 abaabaire batarikuremeera bakaba nibateekateeka ngu nibaremeera munonga!

• Eminyeeto abamwe ahabw’okwenda kutuubya emibiri yaabo, barwaire endwara y’okuhururuka ahabw’okutarya.

 Waaba ohururukire ahabw’okutarya, tunga obuhwezi. Gambira omuzaire waawe nari omuntu ondiijo omukuru ou orikwesiga. Baibuli neegira eti: “Munywani w’omuntu amukunda ebiro byona kandi ow’eishe-emwe azaarirwa okuhwera abantu omu bihikiirizi.”—Enfumu 17:17.

Buzima, eki omuntu ari omunda, nikyo kirikumureetera kukundwa nari kwangwa. Teekateeka ahari mutabani w’Omugabe Daudi Abusalomu. Baibuli neegira eti:

‘Boona tihariho waabaire naasiimwa nka Abusalomu ahabw’oburungi bwe akaba ataine kamogo.’—2 Samueli 14:25.

Kwonka, omutsigazi ogu akaba aine amaryo, ebigyendererwa bigwire, n’obugobya! N’ahabw’ekyo, Baibuli, terikugamba gye ahari Abusalomu; naagambwaho nk’omushaija otari mwesigwa, kandi omwitsi oine rwango.

Ahabw’enshonga nungi, Baibuli neeha obuhabuzi obu:

‘Mujware omuntu omusya.’—Abakolosai 3:10.

‘Okwecuma kwanyu kurekye kuba okw’aharuguru kureka okwecuma kwanyu kube okw’omunda omu mutima.’—1 Petero 3:3, 4.

Buzima ti kibi omuntu kwenda kureebeka gye, kwonka ekirikukira endeebeka yaawe n’emitwarize yaawe. Haahinguraho obwire, emitwarize mirungi ei oine niyo erikureetera abandi kukukunda okukira amaani gaawe nari ekyemerero kirungi! Omwishiki orikwetwa Phylicia akagira ati: “Oburungi bwawe bw’aha mubiri nibubaasa kureetera abandi kukukunda ahonaaho, kwonka eki ori omunda n’emitwarize yaawe mirungi nibyo abantu baraagume nibakwijukiraho.”

Obumwe nootamwa endeebeka yaawe?

Orateekateekire aha kukoresa emibazi nari kureka kurya kuhindura aha ndebeeka yaawe?

Kuri noobaasa, niki eki waakwenzire kuhindura aha ndeebeka yaawe? (Tooranaho eki orikwikirizana nakyo.)

• OBURAINGWA

• OKUREMEERA

• EISHOKYE

• ENKORA Y’OMUBIRI

• AHA MAISHO

• ERANGI YAAWE

Waagarukamu ngu eego ebibuuzo bibiri eby’okubanza kandi okatoorana ebintu bibiri nari ebirikukiraho ahansi y’ekibuuzo kya kashatu, teekateeka ahari eki: Abandi nibabaasa kuba batarikukureeba batyo nk’oku orikwereeba. Noobaasa kuba noorengyesereza aha ku orikwerarikirira aha ndeebeka yaawe.—1 Samueli 16:7.