EKIBUUZO 6
Nimbaasa Kwangira nta Okugyemeserezibwa Bagyenzi Bangye?
NOIJA KUKORA KI?
Teekateeka aha mbeera egi: Brian yaareeba abeegi bagyenzi be babiri nibamwizira yaatandika kutetema omunda. Omu sabiiti egyo, abeegi abo bamugyemesereize emirundi ebiri kureetsa. Ogu nigwija kuba omurundi gwa kashatu.
Omwojo ow’okubanza amugira ati:
“N’eri izooba ori wenka? Ka nkwanjurire munywani wangye ogu.”
Agamba ekigambo “omunywani” arikumwenya reero akwata omu nshaho ayihayo tsigara kugiha Brian.
Brian areeba omwojo aine tsigara omu ngaro. Brian ayeyongyera kutetema omunda.
Brian agira ti: “Tindikwenda. Mbaire naakugambire ngu tindikubaasa . . .”
Omwojo owa kabiri amushara ekirimi ati: “Reka kuba ekinyabwoba!”
Brian ayekwatirira agira ati: “Tindi kinyabwoba.”
Omwojo owa kabiri akwata aha ibega rya Brian. Amugambira mpora ati: “Reetsaho naiwe.”
Omwojo ow’okubanza ayiriza tsigara haihi na Brian reero amugambira omu kiho ati: “Tihaine ou turaagambire. Tihaine n’omwe orikimanya.”
Ku ogire ngu niiwe Brian, okaba noija kugarukamu ota?
TEEKATEEKA AHARI EKI!
Noogira ngu bagyenzi ba Brain bakateekateeka aha ki baabaire nibakora? Nibo baayecwereiremu? Ngaaha. Nibabaasa kuba bagyemesereziibwe abandi kutandika kureetsa. Nibenda kusiimwa abandi, n’ahabw’ekyo nibaikiriza abandi kubacweramu eki baine kukora.
Waayeshanga omu mbeera nk’egyo, noobaasa kucwamu gye ota kandi okeetantara okugyemeserezibwa?
-
YETEEKATEEKYE
Baibuli neegira eti: “Omwerinzi ku areeba akabi kaija, ayeshereka; kwonka otaine bwengye akeegyema, kamwita.”
—Enfumu 22:3. Nikibaasika kureeba akabi bukiri kare. Nk’eky’okureeberaho, ka tugire ngu waareeba bamwe aha beegi bagyenzi baawe omu maisho ahu orikuza barikureetsa. Waamanya ngu nihabaasa kubaho oburemeezi, noobaasa kubweteekateekyera.
-
TEEKATEEKA
Baibuli neegira eti: ‘Guma oine omutima ogutarikweshinja.’
—Ebyakozirwe 24:16. Yebuuze oti: ‘Ninyija kwehurira nta bwanyima naakuratira abaingi?’ Amazima gari ngu, noobaasa kushemeza bagyenzi baawe omu kaire ako. Kwonka noija kwehurira ota bwanyima? Mbwenu shi nooba nooyenda kusiisikara ahabw’okwenda kushemeza abu orikwega nabo?
—Okuruga 23:2. -
CWAMU
Baibuli neegira eti: “Omunyabwengye ayerinda.”
—Enfumu 14:16. Twena nituba twine kucwamu, kandi tukaikiriza n’ebirikuruga omu kucwamu kwaitu. Baibuli neeyoreka ngu abashaija nka Yosefu, Yobu na Yesu, bakacwamu gye. Kandi neegaruka egamba ahari Kaini, Esau, na Yuda, abaacwiremu kubi. Iwe noija kukora ki?
Baibuli neegira eti: “Oyesigwa omu bikye munonga, niwe ayesigwa n’omu bingi.” (Luka 16:10) Waaba waateekateekire aha biraarugye omu kucwamu kwawe kandi waamaririire, nikiija kukworobera kugamba eki ocwiremu kandi nikiija kurugamu ebirungi.
Otatiina, ahakuba tikirikukwetengyesa kuragiira ab’orwingano rwawe. Okugira ngu NGAAHA nikibaasa kumara. Nari noobaasa kubagambira emiteekateekyere yaawe etarimu kuramuza oti:
-
“Nyowe timbarimu!”
-
“Ekintu ekyo nyowe tindikukikora!”
-
“Niimwe nimukimanya ngu tindikubaasa!”
Ekikuru n’okugamba otarikweziringa kandi ohamize. Waakora otyo, noobaasa kutangaara kureeba boona baakurugaho!
OKU ORIKUBAASA KUTWAZA BAABA NIBAKUJUMA
Waikiriza ab’orwingano rwawe kukugyemesereza, nooba nk’eky’okuzaanisa kyabo
Ab’orwingano rwawe ku baakukujuma? Kandi shi ku baakugira bati: “Eki ti kigwire, ori ekinyabwoba.” Okimanye ngu bariyo nibakugyemesereza kukora ekigwire. Noobaasa kubagarukamu ota? Noobaasa kukora kimwe aha bintu bibiri ebi.
-
Noobaasa kwikiriza kujumwa obagire oti: (“Muhikire, nintiina!” Reero omu bugufu obagambire ahabw’enki.)
-
Noobaasa kubagarukamu otatiinire. Bagambire enshonga ahabw’enki nooyanga, reero obashungise oti: (“Naaba ningira ngu muri abanyabwengye abarikubaasa kwetantara okureetsa!”)
Baagumizamu nibakujuma, batsigeho ogyende! Ijuka ngu, waagumaho nibeeyongyera kukugyemesereza. Waabatsigaho, nooyoreka ngu torikwenda abandi kukuhindura.
Okuba ow’amazima, torikubaasa kweshereka okugyemeserezibwa. Kwonka noobaasa kucwamu eki orikwenda kukora, ogambe okumariira kwawe, kandi oyetegyekye, ahakuba niiwe orikuba oine kwecweramu!
