Twena nitwetenga sente kubaasa kureeberera amaka gaitu. (Enfumu 30:8) Ahabw’okuba, esente nizikora nk’oburinzi. (Omubuurizi 7:12) Abashweraine nibabaasa kugumirwa kugaaniira aha bikwatiraine n’esente, kwonka mutaikiriza esente kureeta oburemeezi omu bushwere bwanyu. (Abaefeso 4:32) Abari omu bushwere bashemereire kwesigana kandi bakakwatanisa baaba nibacwamu oku baraakorese esente zaabo.

EKI BAIBULI ERIKWEGYESA: “N’oha omuriimwe owaakuba naayenda kwombeka omunaara, atabanze kushutama akabariirira eby’emirimo yaagwo, akamanya ku araabe aine eby’okuguheza?” (Luka 14:28) Ni kikuru kucwamu hamwe oku muraakorese esente zaanyu. (Amosi 3:3) Mwine kucwamu ebi murikwetenga kandi mukareeba yaaba esente ezi mwine nizibaasa kubigura. (Enfumu 31:16) Okugira ngu mwine esente tikirikumanyisa ngu mugure ebintu ebi mutarikwetenga. Mushemereire kuteeraho kwetantara amabanja. Kandi ni kirungi kukoresa sente ezi mwine zonka.—Enfumu 21:5; 22:7.

EKI MURIKUBAASA KUKORA:

• Mwatsigazaho sente aha muheru gw’okwezi, mucwemu hamwe eki muraazikorese

• Mwaba mwine eibanja mucwemu hamwe oku murikubaasa kutuubya aha nshohoza. Nk’eky’okureeberaho, nimubaasa kutandika kwetekyera, omu mwanya gw’okurya omu hoteeri

EKI BAIBULI ERIKWEGYESA: ‘Ti turikukora ebirikusiimwa omu maisho ga Mukama kwonka, kureka n’omu maisho g’abantu.’ (2 Abakorinso 8:21) Ou ori nawe omu bushwere mugambire amazima aha bikwatiraine n’esente ezi orikutaasya hamwe n’ezi orikushohoza.

Ni kikuru butoosha kuguma noogaaniira n’ou ori nawe omu bushwere waaba nooza kucwamu aha nshonga nkuru ezirikukwata aha sente zaanyu. (Enfumu 13:10) Okugaaniira hamwe aha ku muraakorese esente zaanyu, nikiija kubahwera kugira obusingye omu bushwere bwanyu. Esente ezi orikutaasya otazireeba nk’ezaawe wenka, beitu nk’ez’eka yaanyu.—1 Timoseo 5:8.

EKI MURIKUBAASA KUKORA:

• Mwine kwikirizana aha sente ezi buri omwe arikubaasa kukoresa atabandize kubuuza

• Mutategyereza esente kubanza kubareetera oburemeezi reero mukabona kuzigaaniiraho