OKUGARUKAYO
EISHOMO 8
Okugumisiriza
Omusingye: ‘Okukunda nikugumisiriza.’—1 Kor. 13:4.
Eki Yesu Yaakozire
1. Reeba VIDIYO, nari shoma Yohaana 7:3-5 na 1 Abakorinso 15:3, 4, 7. Bwanyima oyetegyereze ebibuuzo ebirikukurataho:
Nitwegyera ki Ahari Yesu?
2. Twine kugumisiriza, ahakuba abantu abamwe nikibatwarira obwire buraingwa kwikiriza amakuru marungi kukira abandi.
Tooreza Yesu
3. Teeraho kukoresa ogundi muringo. Omuntu yaaba ataikiriize kwega Baibuli ahonaaho, otamugyemesereza. Omu bwire obuhikire, koresa vidiyo nari ebicweka ebimwe kumuhwera kwetegyereza ekirikutwarirwa omu kwega Baibuli, n’oku arikubaasa kugasirwa.
4. Otagyeragyeranisa abantu. Buri muntu n’ow’omutaano. Ow’eka yaawe nari ou orikugarukira yaaba naatimwimwa kwega Baibuli, nari kwikiriza enyegyesa ya Baibuli, manya ahabw’enki kiri kityo. Hariho enyegyesa y’ediini ei aineho enyehurira z’amaani? Naagyemeserezibwa abanyabuzaare nari abataahi? Muhe obwire bw’okuteekateeka aha bi omugambiire, n’okureeba oku Baibuli eri ey’omugasho.
5. Shaba aha bikwatiraine n’omuntu orikusiima amazima. Shaba Yehova kukuhwera kuguma oine amatsiko n’okwegyendesereza. Shaba okwetegyereza kumanya obu oine kurekyera aho kugarukira omuntu otarikusiima buzima.—1 Kor. 9:26.
