Waaba noyenda kuba munywani wa Ruhanga, n’oragirwa kukozesa ediini ei Ruhanga ari kusiima. Yesu akagira ngu “abaramya ab’amazima” baryaaramya Ruhanga bakwatananiise ‘n’amazima.’ (Yohaana 4:23, 24) Hariho omuringo gumwe gwonka gw’okuramya Ruhanga. (Abaefeso 4:4-6) Ediini y’amazima netaasya omu magara agatahwaho, kandi ediini ey’ebishuba netaasya omu kuhwerekyerera.—Matayo 7:13, 14.

N’obaasa kuzoora ediini ey’amazima ori kurebeera aha bantu abagirimu. Nk’oku Yehova ari murungi nabari kumuramya ab’amazima nibaragirwa kuba barungi. Nk’oku omuti murungi gw’omucungwa gwaana emicungwa mirungi, n’ediini ey’amazima erimu abantu barungi.—Matayo 7:15-20.

Banywani ba Yehova nibatamu Baiburi ekitinisa. Nibamanya ngu Baiburi neeruga ahari Ruhanga. Nibaikiriza ebi eri kugamba kurinda amagara gaabo, okushoborora oburemeezi bwaabo n’okubahweera kweega ebiri kukwaata ahari Ruhanga. (2 Timoseo 3:16) Nibagyezaho kugyendera aha bi bari kweega.

 Banywani ba Yehova nibooreka okukundana. Yesu akooreka okukunda abantu ari kubeegyesa ebiri kukwaata abari Ruhanga, ari kukiza ababaire barwaire. Abo, abari omu diini ey’amazima nibooreka rukundo ahari bagyenzi baabo. Okushushanaho na Yesu tibari kugaya booro nari abu batakushushana nabo. Yesu akagira ngu abantu baryamanya abeegi be kurugiirira ahari rukundo ei bari kworekana.—Yohaana 13:35.

Banywani ba Ruhanga nibaha eiziina rya Ruhanga, Yehova ekitiinisa. Omuntu ku yakwanga kukozesa eiziina ryaawe, akaaba munywani waawe ow’aha mara? Ngaaha! Twaagira munywani waitu nitukozesa eiziina rye kandi nitumugambaho ebintu birungi. Nahabwekyo abo abari kwenda kuba bwanywani ba Ruhanga bashemereire kukozesa eiziina rye kandi bagambire abandi ebiri kumukwataho. Yehova nayenda tukore tutyo.—Matayo 6:9; Abarooma 10:13, 14.

Okushushanaho na Yesu banywani ba Ruhanga nibeegyesa ebiri kukwaata aha Bukama bwa Ruhanga. Obukama bwa Ruhanga ni gavumenti y’omu iguru erihindura ensi Ekibanja kya Ruhanga. Banywani ba Ruhanga nibabagana n’abandi amakuru marungi, ag’Obukama bwa Ruhanga.—Matayo 24:14.

Abajurizi ba Yehova ni bagyezaho kuba banywani ba Ruhanga. Nibaha Baiburi ekitiniisa kandi nibakundana. Hoona nibakozesa kandi bahereza eiziina rya Ruhanga ekitinisa kandi beegyesa abandi aha by’Obukama bwa Ruhanga. Abajurizi ba Yehova ni bagyendera omu diini y’amazima obwiire obu.