Ruhanga nayenda ngu obe munywani we. Hariho obu orateekateekire ngu oryanywana Omuntu rugambwa omu nsi yoona? Abrahamu, ow’omu biro bya ira munonga akeetwa munywani wa Ruhanga. (Yakobo 2:23) Abandi abari kugambwaho omu Baiburi bakashemerererwa omukago gwa Ruhanga haza baagasirwa munonga. Ebiro ebi abantu kuruga omu bicweeka by’ensi byoona bahindukire banywani ba Ruhanga. Naiwe nobaasa kuba munywani wa Ruhanga.

Okuba munywani wa Ruhanga nikihitaho okunywana omuntu. Ruhanga tagwiisa kubi banywani be abeesigwa. (Zaaburi 18:25) Okuba munywani wa Ruhanga nikikira okugira amatungo. Omuntu ku ari kufa, abandi batwaara empiha ze. Kwonka abo abaine omukago na Ruhanga baine eky’eitungo ekitari kutwaarwa muntu n’omwe.—Matayo 6:19.

Abantu abamwe babaasa kugyezaho kukuzibira kweega ahari Ruhanga. N’abamwe omuri banywani baawe n’ab’omuka babaasa kukikora. (Matayo 10:36, 37) Abandi ku bakukushekyerera nari kukutiinatiinisa, yebuuze, ‘Ninyenda kushemeza oha—abantu nari Ruhanga?’ Teekateka ahari eki: Omuntu kuyaakukugira ngu okurya okurugyeho okaamwikiriza? Buzima tokubaasa! Okubaho noyetenga ebyokurya. Kwonka Ruhanga nabaasa kukubaisaho ebiro byoona! N’ahabw’ekyo otariikiriza omuntu weena kukuzibira kweega aha ku wakubaasa kuhinduka munywani wa Ruhanga.—Yohaana 17:3.