Nikyenda okufayo okugira omunywani; nikyenda okufayo okuguma naawe. Okufayo kwaawe okuhinduka kandi okuguma ori munywani wa Ruhanga nikwiija buzima kuheebwa omugisha. Yesu akagambira abo abamwiikiriiza ati: “Amazima garyabahindura ab’obusingye.” (Yohaana 8:32) Ekyo nikimayisa ki?

N’obaasa kugira obusingye hati. Nobaasa kuruga aha nyegyesa ezijwiire ez’ebishuba ebi Sitaani yajanjaarize. Nobaasa kuruga aha bushema obwijwiire omu magara g’abantu nyamwingi abatari kumanya Yehova. (Abarooma 8:22) Banywani ba Ruhanga hoona bakaruga aha ‘kutiina rufu.’—Abaheburaayo 2:14, 15.

N’obasa kugira obusingye omu nsi ya Ruhanga ensya. Ka n’obusingye buri kutangaaza obu ori kubaasa kugira omu biro ebiriija! Omu Kibanja kya Ruhanga omu nsi, haryabamu okuruga aha ntaro, endwaara n’obwiinazi okuruga omu bwooro n’enjara. Kuruga ahari bukuru na rufu. Kuruga omukutiina, okukwiita kubi, n’obutaringaaniza. Baiburi,  Ruhanga n’emugambaho eti: “Oshashaanura engaro zaawe, ohaazya ekintu kyona ekihuriire ebi kiri kwetenga.”—Zaaburi 145:16.

Banywani ba Ruhanga baryatuura ebiro byona. Amagara agatahwaho n’ekiconco ky’omuhendo eki Ruhanga ari heereza abo boona abasherura omukago gwe. (Abarooma 6:23) Banza oteekateekye aha magara agataine bugarukiro eki gakukubereire!

Oryaba oine obwiire kukoreramu ebintu bingi. Obundi shana okayenzire kweega okuzaanisa ekyooma kiri kweshongora. Nari shi okayenzire okweega okuteera ebishushani, nari okuba omubeizi. Nari shi okayenzire kweega aha by’enyamaisha nari ebimera. Nari nabwo okayenzire kuza kureeba amahanga gatari gamwe. Okugira amagara agatahwaho kiryareetera ebintu byoona kubaasika!

Oryaba oine obwiire bw’okugiriramu emikago mingi. Okutuura ebiro byona kiryabaasa kureetaho okumanya abandi baingi abaahindukire banywani ba Ruhanga. Oryahika aha kumanya ebiconco byaabo hamwe n’okumanya emicwe yaabo mirungi kandi nabo baryaaba banywani baawe. Oryabakunda nabo baryakukunda. (1 Abakorinso 13:8) Okugira amagara agatahwaho kiryakuherereza obwiire kunywana buri omwe, omu nsi yoona! Ekiri kukirira kimwe oburungi, omukago gwaawe na Yehova guryayeyongyera kuhamira kimwe obwo ebyasha by’emyaaka nibihingura. Gyezaho obe munywani wa Ruhanga ebiro byona!