Yehova tariikiriza ababi kuhwereekyereza Ekibanja kye. Banywani be bonka nibo barituuramu. Ababi baryaaba bata? Okweega ekigarukwamu, yetegyereze ekitebyo kya Noa ekihikire. Noa akabaho omu nkumi z’emyaka ehingwire. Akaba ari omushaija murungi owabaire buri kanya agyezaho kukora ebi Yehova ari kwenda. Abantu abandi omu nsi bakaba nibakora ebintu bibi. Nikwo Yehova kugambira Noa ku Yabaire naaza kureeta omwegyemure kuhwerekyereza abo boona ababi. Yagambira Noa kwombeka emeeri ngu uwe n’ekaye batafa haija Omwegyemure.—Okutandika 6:9-18.

Noa n’eka ye bakombeka emeeri. Noa akarabura abantu ku habeire nihaija kubaho Omwegyemure, kwonka tibaramuhurikiirize. Bakagumizamu ni bakora ebihagaro. Emeeri kuyahwiire, Noa yatatsyaamu enyamaishwa nawe n’eka ye nabo baataahamu. Bwanyima Yehova yareeta eihunga ry’amaani. Enjura ekagweera ebiro 40 nyomushana na nyekiro. Amaizi gashweeka ensi yoona.—Okutandika 7:7-12.

 Ababi bakahwerekyerera kwonka Noa n’eka ye baakajunwa. Yehova akabarabya gye omu Mwegyemure baaza omu nsi etakiine bubi bwoona. (Okutandika 7:22, 23) Baiburi n’egira ngu obwiire nibwija obu Yehova ari hwerekyerezaamu ogundi murundi abo abari kwanga kukora ebihikire. Abarungi tibari hwerekyerezibwa. Baryaturaho ebiro byoona omu Kibanja kya Ruhanga omu nsi.—2 Petero 2:5, 6, 9.

Obwire obu abantu baingi nibakora ebihagaro. Ensi eijwiremu emirabanamu. Yehova nayohereza Abajurizi be basya bwara kurabura abantu kwonka baingi tibari kwenda kuhurikiriza ebigambo bya Yehova. Tibari kwenda kuhindura entwaaza zaabo. Tibari kwenda kwikiriza Ruhanga ebyari kugamba aha bihikire n’ebigwiire. N’enki ekiribabaho? Nibaija kuhinduka eizooba rimwe? Abaingyi tibarihunduka. Obwiire nibwiija ababi bahwerekyerere obutagaruka kugira amagara.—Zaaburi 92:7.

Ensi teri hwerekyerezibwa, eryahindurwa ekibanja kya Ruhanga. Abo abari kuhinduka banywani ba Ruhanga baryatuura omu Kibanja kye ebiro byona.—Zaaburi 37:29.