Okuba munywani wa Ruhanga oshemereire kumweegaho. Banywani baawe nibamanya eiziina ryawe kandi barikozesa? Eego. Ruhanga nawe nayenda ku omanya kandi okakozesa eiziina rye. Eiziina rya Ruhanga ni Yehova. (Zaaburi 83:18; Matayo 6:9) Kandi oshemereire kwega ebi ari kukunda n’ebi ari kwanga. Oshemereire kumanya banywani be nibo baahi kandi abazigu be nibo baahi. Nikitwaara obwiire okumanya omuntu. Baiburi negira ngu n’eky’obwengye kutaho obwiire tukeega ahari Yehova.—Abaefeso 5:15, 16.

Banywani ba Ruhanga bakora ebiri kumushemeza. Teekateeka ahari banywani baawe. Ku wakubatwaza kubi, waakora ebi bari kwanga, nibaija kugumizamu bari banywani baawe? Ngaaha! Omuringo nigwo gumwe, wayenda kuba munywani wa Ruhanga, oshemereire kukora ekiri kumushemeza.—Yohaana 4:24.

Ti diini zoona eziri kwombeka omukago na Ruhanga. Yesu munywani wa Ruhanga ow’ahamara akagamba aha mihanda ebiri. Omuhanda ogumwe ni muhango haza gwijwirwemu abantu. Ogwo nigutaasya omu kuhwerekyerera. Omuhanda ogundi gufunzire n’abari kugugyenderamu ni bakye. Omuhanda ogwo nigutaasya omu magara agatahwaho. Eki nikimanyisa ngu wayenda kugira omukago gwa Ruhanga oshemereire kweega omuhanda ogw’ohikire kumuramizamu.—Matayo 7:13, 14.