N’obaasa kweega ahari Yehova ori kushoma Baiburi. Ira munonga Ruhanga akatoranamu abantu kuhandiika ebiteekateeko bye. Ebihandiiko ebyo nibyeetwa Baiburi. Eri igyenda nitweega ahari Ruhanga turikushoma Baiburi. Ahabwa Baiburi kubamu ekigambo kya Yehova nari obutumwa, hoona n’eyeetwa Ekigambo kya Ruhanga. Tubaasa kwiikiriza ebi Baiburi eri kugamba ahabwokuba Yehova tabeiha. ‘N’ekigumire Ruhanga kubeiha.’ (Abaheburaayo 6:18) Ekigambo kya Ruhanga kirimu amazima.—Yohaana 17:17.

Aha bwaitu Baiburi ni kimwe aha biconco bya Ruhanga eby’omuhendo. Eri nk’ebaruha ei Ishe w’abaana abaari kukunda yakubahandiikira. Netugambira aha ndagano ya Ruhanga ey’okuhindura ensi omwanya gw’okutuuramu oguri kutangaaza—ekibanja kya Ruhanga. Netugambira ebi yakoreire abaana be abeesigwa omu biro bya ira ebi ari kubakorera hati kandi n’ebi araija kubakorera. Kandi hoona netuhweera okuhezaho oburemeezi bwaitu, n’okubona okushemererwa.—2 Timoseo 3:16, 17.

 Abajurizi ba Yehova ni banywani ba Ruhanga; nibaija kukuhweera kwetegyereza ebi Baiburi eri kwegyesa. Bagambire ku ori kwenda kwega Baiburi. Eki tibari kukushaba sente kukikora. (Matayo 10:8) Okwongyeerera ahari ekyo, nobaasa kuza omu nteerane z’Ekikristaayo. Ezi nizibaho omu myanya ey’okuramizamu eri kweetwa Kingdom Hall. Ku waakuza omu nteerane z’Ekikristaayo, ahonaaho noija kurahuka kutunguka omu kumanya Ruhanga.

N’obaasa kweega ahari Ruhanga okurugirira aha biyahangire. Eky’okureeberaho Baiburi neegira: “Ruhanga akahanga eiguru n’ensi.” (Okutandika 1:1) Obu Yehova yahanga “eiguru” akakora eizooba. Mbwenu ekyo nikitugambira ki ahari Ruhanga? Nikitugambira ku Yehova aine obushoborozi bwingi. Kushanga ngu akabaasa kukora ekintu ky’amaani nk’eizooba. Hoona nikitumanyisa ngu Yehova n’omunyabwengye nk’oku kyabaire nikyetengyesa obwengye kukora eizooba eriri kuhereza obutagasi hamwe n’ekyeererezi haza ritaraare.

Ebihangwa bya Yehova nibyoreka ku atukunda. Teekateeka aha miringo yebijuma yoona eri omu nsi. Yehova akaabaire yatutereireho omuringo nka gumwe gw’ebijuma—nari obutagutaho. Omu mwanya gwakyo, Yehova akataho ebika bingi by’ebijuma omuunshusha y’emiringo mingi, omu buhango, erangi, n’obunuzi. Eki nikyooreka ku Yehova atari Ruhanga w’okukunda kwonka, baitu hoona ku ari efura, ori, kuteekateeka kandi ow’embabazi.—Zaaburi 104:24.