Omukago nigukomoka omuri rukundo. Ahoori kweyongyera kweega ahari Yehova rukundo yaawe ahari we neyeyongyera. Okukunda Ruhanga kwaawe kwaaba nikukura n’ekyetengo ky’okumuheereza nakyo nikiija kukura. Eki nikiija kukureetera okuhinduka omweegi wa Yesu Kristo. (Matayo 28:19) Wayeteerana n’eka eshemereirwe ey’Abajurizi ba Yehova nobaasa kureeba omukago gwa Ruhanga ebiro byona. N’oragirwa kukora ki?

N’oragirwa kworeka okukunda Ruhanga kwawe obwo ori kworobera ebiragiro bye. “Ahakuba oku nikwo kukunda Ruhanga, itwe okworobera ebiragiro bye; kandi ebiragiro bye tibirus[t]ya.”—1 Yohaana 5:3.

Gyendera aha bi ori kwega. Yesu akatebya ekitebyo ekiri kworeka gye eki. Omushaija omunyabwengye akombeka enju aha rukiri. Omushaija omushema eye yagyombeka aha mushenyi. Eihunga ry’amaani ku ryaizire enju eyayombekirwe aha rukiri terakumbagaire, kwonka eyayombekirwe aha mushenyi okukumbagara kwaayo kukaba okw’amaani. Yesu akagira ngu abo abari kuhurira ebyeegyeso bye bakabigyendaraho ni nk’omushaija omunyabwengye owayombekire aha rukiri. Kwonka abari kuhurira ebyeegyeso bye batabigyendereho ni nk’omu shaija omushema owayombekire aha mushenyi. Noyenda oshushane na mushaija ki?—Matayo 7:24-27.

Okwehayo. Eki nkimanyisa ngu nooza ahari Yehova omu kushaba omugambire ku ori kwenda kukora ebi akunda ebiro byona. Okukora ebi Ruhanga akunda nikimanyisa ku ori omweegi wa Yesu Kristo.—Matayo 11:29.

Okubatizibwa. “Mbwenu otegyereize ki? Imuka, obatizibwe, oyogye ebibi byawe, otakire eiziina rye.”—Ebyakozirwe 22:16.

Gumira kimwe omu kuheereza Ruhanga. “Kyona eki muraakore, mukikore mwihire aha mutima, nk’abari kukorera Yehova kunu ti bantu.”—Abakolosai 3:23.