Okuhinduka munywani wa Ruhanga n’ekintu ekiri kuhitira kimwe byoona ebyakukubaho. Ruhanga naija kukwegyesa oku wakushemererwa n’okwerinda; naija kukwiiha omu nyikiriza nyingi ezitahikire n’ebikorwa ebiri kuhutaaza. Naija kuhurikiza eshaara zaawe. Naija kukuhweera kugira obusingye obw’omunda n’obwesigye. (Zaaburi 71:5; 73:28) Ruhanga naija kukuha emikono omu bwiire bw’oburemeezi. (Zaaburi 18:18) Kandi Ruhanga nakuhereza ekirabo eky’amagara agatahwaho.—Abarooma 6:23.

Obwo ori kwirira haihi na Ruhanga noija kwirira haihi na banywani be. Nibaija nabo kuba banywani baawe. Buzima nibaija kukubera bakuru baawe na banyanyoko. Nibaija kushemererwa kukweegyesa ebiri kukwaata ahari Ruhanga, kandi bakuhweere obwo bari kukwongyeramu amaani.

Tituri kwingana na Ruhanga. Obwo ori kusherura omukago na Ruhanga, oshemereire kwetegyereza ekintu kimwe ekikuru. Omukago na Ruhanga tiguri mukago gw’amaingane. We ni mukuru munonga ow’obwengye bwingi kandi ow’obushoborozi bw’amaani okutukira. N’Omutegyeki waitu ohikiriire. Nahabwekyo ku turabe nitwenda kuba banywani be nituragirwa kumuhurikiza kandi tukore ebi ari kutugambira kukora. Eki buri kanya nikiija kuhwera aha bw’oburungi bwaitu.—Isaaya 48:18.