Omu kushoma akatabo aka, otangaire kureeba ngu Baibuli neikirizana na saayansi? Baingi nibatangaara. Kandi nibatangaara kureeba ngu omu Baibuli tiharimu ebintu bingi ebi ediini nyingi zirikugira ngu birimu. Nk’eky’okureeberaho, bamwe nibagira ngu Ruhanga akahanga ensi n’akaabunga omu biro mukaaga eby’eshaaha 24. Nangwa, omu Baibuli tiharimu ekirikuhakanisa okuteebereza kw’abanyasaayansi baingi aha myaka ei akaabunga nari ensi bimazireho. a

Ekindi, oku Baibuli erikugamba omu bugufu oku Ruhanga yaataireho ebiine amagara omu nsi nikibaasisa abanyasaayansi kwongyera kucondooza. Baibuli neegira ngu Ruhanga akahanga ebiine amagara byona, kandi ngu bikahangwa “omu miringo yaabyo.” (Okutandika 1:11, 21, 24) Ebigambo ebi nibibaasa kuba bitarikwikirizana n’enshoboorora zimwe za saayansi, beitu etari saayansi eine obuhame. Ebyafaayo bya saayansi nibyoreka ngu enshoboorora niziija kandi zihanguura, kwonka amazima nigagumaho.

Kwonka hariho abantu baingi, abatarikwenda kushwijuma Baibuli ahabw’okugira ngu batamirwe ediini. Omu diini nyingi nibareebamu oburyarya, obushomankuzi, n’emihondano. Kwonka shi n’eky’oburyo kucwera Baibuli orubanja ahabw’emitwarize ya bamwe abarikugira ngu ebi barikwegyesa nimwo birikuruga? Abanyasaayansi baingi ab’amazima kibareeteire obwoba kureeba oku abantu bamwe enshaarizi barikukoresa enyegyesa ngu ebintu bikahinduka kuruga omu bindi kushagika ebigyendererwa byabo by’okushoroora. Mbwenu shi n’eky’obwengye kwegamiza enyegyesa egyo aha nshonga ezo? Buzima kihikire kushwijuma enyegyesa ezo kandi zikagyeragyeranisibwa n’obuhame oburiho.

Nitukuhiga naiwe kushwijuma Baibuli yaawe. Noobaasa kutangaara kumanya oku enyegyesa zaayo zirikutaana aha z’ebibiina by’ediini. Baibuli omu mwanya gw’okuhimbisiriza entaro n’obushaarizi bw’enganda, neeyegyesa ngu abaheereza ba Ruhanga baine kwangira kimwe entaro na rwango erikureetaho obushaarizi nk’obwo. (Isaaya 2:2-4; Matayo 5:43, 44; 26:52) Baibuli omu mwanya gw’okwegyesa enyegyesa ezitaine buhame, neeyoreka ngu obuhame ni bukuru kubaasa kutunga okwikiriza okwabuzima kandi okubaasa kw’okushoboorora nshonga nikwetengyesa omu kuheereza Ruhanga. (Abarooma 12:1; Abaheburaayo 11:1) Baibuli omu mwanya gw’okuturemesa kugira ekihika ky’okwenda kumanya, neetuhiga kucondooza aha bibuuzo bigumire ebi abantu barikwebuuza.

Nk’eky’okureeberaho, oreebuurizeho ngu, ‘ku haraabe hariho Ruhanga, ahabw’enki naareka ebintu bibi kubaho?’ Baibuli neegarukamu ekibuuzo ekyo, n’ebindi bingi omu muringo ogurikureeta okumarwa. b Nitukuhiga kwigutsya ekyetengo kyawe ky’okumanya amazima. Noobaasa kutunga eby’okugarukamu ebirikushemeza, kandi ebirikwetegyerezibwa gye ebirikwegamira aha buhame. Kandi eki tikirikubaho ahabwa butandu.