Yehova naayenda ngu abashweraine bagume bari abeesigwa aha ndagaano yaabo ey’obushwere. Obu yaabaire naagaita omushaija n’omukazi ab’okubanza, Yehova akagira ati: ‘Omushaija ashemereire kuguma n’omukazi we kandi bombi bakaba omubiri gumwe.’ Bwanyima, Yesu Kristo akagarukamu ebigambo ebyo kandi yaayongyeraho ati: “N’ahabw’ekyo eki Ruhanga yaateeraine hamwe, omuntu atarikitaanisa.” (Okutandika 2:24; Matayo 19:3-6) N’ahabw’ekyo, Yehova na Yesu nibareeba abashweraine nk’abashemereire kuguma hamwe okwihaho omwe aharibo yaafa. (1 Abakorinso 7:39) Obu obushwere eri entebeekanisa ya Ruhanga, okugaitururwa tikushemereire kutwarwa nk’enshonga nkye. Buzima Yehova  naayanga okugaitururwa okutarikwegamira aha Byahandiikirwe.—Malaki 2:15, 16.

Ni nshonga eki ey’omu Byahandiikirwe erikubaasa kurugiirirwaho okugaitururwa? Yehova naayangira kimwe ebikorwa by’obushambani byona. (Okutandika 39:9; 2 Samueli 11:26, 27; Zaaburi 51:4) Buzima, naareeba obushambani nk’ekintu kibi munonga kandi aikiriza abashweraine kugaitururwa omwe aharibo yaashambana (Okumanya ebirikutwarirwa omu by’obushambani, reeba Eshuura 9, akacweka 7, akarikushoboorora aha by’obushambani.) Yehova naaha omuntu obugabe kwecweramu yaaba aguma na mutaahi we oshambaine nari kugaitururwa. (Matayo 19:9) N’ahabw’ekyo, omuntu yaacwamu kugaitururwa na mutaahi we oshambaine, naaba ataakora kintu eki Yehova arikwanga. Kwonka ekibiina Ekikristaayo tikirikuhiga omuntu weena kugaitururwa. Buzima, embeera ezimwe nizibaasa kureetera omuntu kuguma na mutaahi we oshambaine n’okukira munonga yaaba ayeteisize buzima. N’obu kiraabe kiri kityo, abo abarikwecweramu kugaitururwa barikwihirira aha Byahandiikirwe bashemereire kwikiriza byona ebiraarugyemu.—Abagalatia 6:5.

Omu mbeera ezimwe ezigumire munonga, Abakristaayo abamwe bacwiremu kugaitururwa nari kwangana n’obu haakuba hatabaireho bushambani. Omu nshonga nk’egyo, Baibuli neeyoreka gye ngu ogwo owaayangana “agumire aho atashwerwa ondiijo nari shi agarukane na iba.” (1 Abakorinso 7:11) Omukristaayo nk’ogwo naaba atarikwikirizibwa kuriima ondiijo ow’okushwera nari kuriimwa kushwerwa. (Matayo 5:32) Yetegyereze zimwe aha mbeera ezigumire munonga ezi abamwe baihiriireho kwangana.

Okwanga nkana kureeberera ab’omu ka yaawe. Eka neebaasa kuba enyoro, eburwe ebirikwetengyesa ebikuru ahabw’omushaija kwanga kureeberera ab’omu ka ye kandi obwo arikubaasa. Baibuli neegira eti: “Omuntu weena, otarikuhwera . . . ab’omu ka ye, biri ayehakaine okwikiriza, kandi naaba ari mubi okukira otarikwikiriza.” (1 Timoseo 5:8) Omushaija nk’ogwo yaayanga kuhindura aha mitwarize ye, omukazi  yaaba naayenda kurinda amagara ge n’ag’abaana be, naabaasa kucwamu kwangana. Kwonka abareeberezi Abakristaayo bashemereire kwetegyereza yaaba kwo Omukristaayo ayangire nkana kureeberera eka ye. Omukristaayo yaayanga nkana kureeberera ab’omu ka ye, naabaasa kubingwa omu kibiina.

Okubonabonesa munonga ou ori nawe omu bushwere. Omwe aha bashweraine naabaasa kuba enshaarizi, kite amagara ga mutaahi we omu kabi. Orikutwariza kubi mutaahi we yaaba ari Omukristaayo, abareeberezi b’ekibiina bashemereire kucondooza kuhamya yaaba kwo n’amazima. Ekiniga kingi n’emitwarize y’obushaarizi ni bimwe ebirikurugiirirwaho omuntu okubingwa omu kibiina.—Abagalatia 5:19-21.

Okuremesa ondiijo kwejumba omu kuramya okw’amazima. Omwe aha bashweraine naabaasa kuguma naateeraho kuremesa mutaahi we kwejumba omu kuramya okw’amazima nari naabaasa kumugyema kuhenda ebiragiro bya Ruhanga. Omu nshonga nk’egi, orikubonabonesibwa naabaasa kucwamu kwangana, gwaba nigwo muringo gwonka ‘ogw’okworoberamu Ruhanga okukira abantu.’—Ebyakozirwe 5:29.

Omu nshonga zoona ez’amaani nk’ezi ezaagambwaho, tihaine oshemereire kugyemesereza ogwo orikutwarizibwa kubi kwangana nari kuguma n’ou ashweraine nawe. N’obu Abakristaayo abakuzire omu by’omwoyo n’abareeberezi barikubaasa kubaha obuhabuzi kuruga omu Baibuli, tibarikubaasa kumanya byona ebirikukwata aha mushaija n’omukazi we. Yehova wenka niwe arikuba naabimanya. N’eky’amazima, omukazi nari omushaija Omukristaayo naaba atarikuha Ruhanga nari obushwere ekitiinisa, yaahangusya oburemeezi bw’omu ka ye kugira ngu atsigyeho mutaahi we. Yehova naamanya ebirikuba bireetsireho okwangana n’obu omuntu yaakuteeraho kubishereka. Buzimazima, “ebintu byona bishuurwirwe nibireebwa butunu omu maisho g’Ogwo oshoboorora ebyaitu.” (Abaheburaayo 4:13) Kwonka embeera y’akabi nk’egyo yaagumaho, tihaine oshemereire kucwera orubanja Omukristaayo, yaacwamu kutsigaho ou ashweraine nawe. N’obu kiraabe kiri kityo, “twena turyayemerera omu maisho g’ekitebe ky’eiramuriro ekya Ruhanga.”—Abarooma 14:10-12.