Ti bintu bingi ebirikubaasa kutusaasa munonga nk’okureeba omunyabuzaare nari munywani waitu naabingwa omu kibiina ahabw’okushiisha kandi akanga kweteisa. Oku turikutwara obuhabuzi obu Baibuli erikuha aha nshonga egi nikworeka oku turikukunda Ruhanga n’oku turikwesiga entebeekanisa ye egi. * Teekateeka aha bibuuzo ebimwe ebirikwebuuzibwa aha nshonga egi.

Tushemereire kutwariza tuta omuntu obingirwe omu kibiina? Baibuli neegira eti: ‘Mutarikwatanisa n’omuntu orikwetwa ow’eishe-emwe, ku araabe ari omushambani, nari omwetengi, nari orikuramya ebishushani, nari omujumi, nari omusinzi, nari omwambuzi; orikushusha atyo, n’okurya mutarirya nawe.’ (1 Abakorinso 5:11) Aha bikwatiraine n’omuntu weena ‘orikurenga aha nyegyesa ya Kristo atagigumiremu,’ nitushoma tuti: “Mutarimutaasya omu nju, n’obu kwakuba okumuramutsya; ahakuba orikumuramutsya aryaba akwataniise nawe omu micwe ye emibi.” (2 Yohaana 9-11) Titurikukwatanisa nari kugaaniira aha by’omwoyo n’ababingirwe omu kibiina. Watchtower ey’Okwamwenda 15, 1981, aha rupapura 25, ekagira eti: “Okwakura omuntu nikyo kintu ky’okubanza ekirikubaasa kurugamu okugaaniira nawe nari okukora omukago nawe. Tukaayenzire kwakura omuntu obingirwe omu kibiina?”

Nikyetengyesa buzima okwetantarira kimwe ababingirwe omu kibiina? Eego, kandi ahabw’enshonga nyingi. Ey’okubanza, nikyoreka ngu nitwesiga Yehova n’Ekigambo kye. Titurikworobera Yehova obu kirikuba kyorobi bwonka, kureka nitumworobera n’obu kirikuba kigumire munonga. Rukundo ei twiniire Ruhanga neetuhiga kworobera ebiragiro bye byona, turikukimanya ngu n’ow’oburingaaniza, n’owa rukundo kandi ngu okukuratira ebiragiro bye nikirugamu ebirungi bingi. (Isaaya 48:17; 1 Yohaana 5:3) Enshonga ya kabiri, itwe n’ab’omu kibiina ku turikwetantara kukwatanisa n’enkozi y’ebibi etarikweteisa, nituguma turi abeecumi omu by’omwoyo n’omu mitwarize kandi kirinda n’eiziina ry’ekibiina. (1 Abakorinso 5:6, 7) Eya kashatu, okuhamira aha misingye  ya Baibuli nikibaasa n’okugasira omuntu orikuba abingirwe. Ku turikushagika okucwamu kw’abareeberezi abahurikiize enshonga ye, nikibaasa kukwata aha mutima gw’enkozi y’ebibi orikuba ayangire obuhwezi bw’abareeberezi. Ab’eishe-emwe bagyenzi be okutakwatanisa nawe nikibaasa kumuhwera ‘kwegarukamu,’ areebe obuhango bw’ekibi kye, kandi ateereho kugarukira Yehova.—Luka 15:17.

Kandi shi omunyabuzaare ku yaakubingwa omu kibiina? Omu mbeera nk’egyo, nikibaasa kugyeza obwesigwa bw’ab’omu ka egyo ahari Ruhanga ahabw’omukago ogu barikuba baine nawe. Tushemereire kutwariza tuta omunyabuzaare obingirwe omu kibiina? Omu katabo aka, titurikubaasa kugamba ahari byona ebishemereire kukorwa, kwonka ka tugambe aha bintu bibiri ebikuru.

Obumwe, obingirwe naabaasa kuba ari omunyabuzaare murikutuura hamwe omu ka emwe. Obu okubingwa kwe kutarikumucwa aha b’omu ka yaabo, naabaasa kuguma naakwatanisa n’ab’omu ka yaabo kandi nibakorera hamwe emirimo eya butoosha. Kwonka ahabw’okushiisha kwe, omuntu ogwo naaba acwire omukago ogw’eby’omwoyo ogu abaire aine n’ab’omu ka egyo abari omu kwikiriza. N’ahabw’ekyo, ab’omu ka egyo abakiri abeesigwa nibaba batakikwatanisa nawe omu bintu ebiine akakwate n’okuramya Yehova. Nk’eky’okureeberaho, ab’omu ka egyo baaba bari nawe omu kuramya kw’eka tarikwikirizibwa kugira eki yaagamba. Kwonka obingirwe yaaba ari omwana okirikureebererwa abazaire be, nibaba bakiine obujunaanizibwa bw’okumwegyesa n’okumuhana. N’ahabw’ekyo, abazaire be nibabaasa kutaho entebeekanisa okwega nawe Baibuli. *—Enfumu 6:20-22; 29:17.

Omu mbeera ezindi, omunyabuzaare obingirwe naabaasa kuba atarikutuura n’ab’eka yaabo. N’obu obumwe kirikubaasa kwetengyesa kukwatanisa nawe kubaasa kugira eki mwakora omu ka, okukwatanisa nk’okwo kushemereire kugira obugarukiro. Ab’omu ka egyo abeesigwa tibashemereire kwekwatsakwatsa kugira ngu bakwatanise n’omunyabuzaare obingirwe ou batarikutuura nawe. Kureka, obwesigwa bwabo ahari Yehova n’ekibiina kye nibubareetera  kuhamira aha ntebeekanisa y’omu Byahandiikirwe ey’okubinga omuntu omu kibiina. Okuhamira aha ntebeekanisa egi nikuhwera orikuba asiisire, kandi naabaasa n’okugasirwa omu kuhanwa oku atungire. *—Abaheburaayo 12:11.