1, 2. Okubatizibwa n’obwire bw’okushemererwa ahari baahi?

KU ORAABE oheereize Yehova kumara emyaka mingi, ohuriire embazo nyingi ezirikukwata aha kubatizibwa ezirikuheebwa omu nteerane empango ez’Abajurizi ba Yehova. Kwonka, n’obu waakuba otwire nooza omu nteerane ezo, noobaasa kuba nookikwatwaho buri kureeba abo abarikuza kubatizibwa abarikuba bashutami omu ntebe z’omumaisho, nibeemerera kworeka ngu beteekateekire kubatizibwa. Omu shaaha egyo, nihabaho okushemererwa omu barikuba bahurikiize orubazo, kandi nibateera omu ngaro bashemereirwe. Noobaasa kuragarwa amarira ahabw’okushemererwa kureeba abantu abandi abacwiremu kuza aha rubaju rwa Yehova. Ka nitushemererwa munonga omu bwire nk’obwo!

² N’obu turaabe nitureeba abantu bakye abarikubatizibwa omu kicweka kyaitu omu mwaka, baamaraika bo baine omugisha gw’okureeba boona abarikubatizibwa omu nsi. Noobaasa kuteekateeka aha ‘kushemererwa okurikubaho omu iguru,’ baamaraika baareeba abantu nk’enkumi itaano omu nsi yoona buri saabiiti nibeeyongyera aha kicweka ekirikureebwa eky’ekibiina kya Yehova? (Luka 15:7, 10) Buzima, baamaraika nibashemererwa ku barikureeba okweyongyera oku!—Hagai 2:7.

3. Ahabw’enki Sitaane naashoba “nk’entare erikutsinda,” kandi naayenda kukora ki?

³ Kwonka, hariho ebyahangirwe eby’omwoyo ebitarikushemererwa byareeba abantu abo nibabatizibwa. Sitaane na  baadaimoni nibaguubwa kubi baareeba obukumi bw’abantu nibanga ensi egi eijwire obubi. Nikibagwisa kubi ahabw’okuba Sitaane akagira ngu tihariho muntu orikuheereza Yehova ahabw’okumukunda buzima, kandi ngu tihariho orikubaasa kuguma ari omwesigwa yaaba naagyezibwa. (Shoma Yobu 2:4, 5.) Omuntu ku arikwehayo ahari Yehova, ekyo nikyoreka ngu Sitaane n’omubeihi. Sitaane buri saabiiti naaba ari nk’orikuteerwa enkumi z’empi ahamaisho. Tikirikutangaaza okureeba ngu “naashoba nk’entare erikutsinda, naasherura ou araarye”! (1 Petero 5:8) “Entare” egi eyeteekateekire kuturya omu by’omwoyo, kutureetera kushiisha omukago gwaitu na Ruhanga, nangwa n’okugumaraho.—Zaaburi 7:1, 2; 2 Timoseo 3:12.

4, 5. (a) Yehova akateeraho Sitaane obugarukiro bw’emiringo mikuru ebiri eha? (b) Omukristaayo ow’amazima naabaasa kugira bwesigye ki?

 ⁴ N’obu turaabe niturwana n’omuzigu orikutiinisa, titushemereire kutiina. Ahabw’enki? Ahabw’okuba hariho emiringo ebiri mikuru ei Yehova arikworekamu ngu ‘entare egyo erikutsinda’ eine obugarukiro. Emiringo ebiri egyo n’eha? Ogw’okubanza, Yehova akaranga ngu “omutwe muhango” ogw’Abakristaayo ab’amazima nibaija kuhonokaho aha ‘kubonabona kwingi.’ (Okushuuruurwa 7:9, 14) Ebi Ruhanga arikuranga nibihikiirira. N’ahabw’ekyo, Sitaane naakimanya ngu tarikubaasa kusingura abantu ba Ruhanga boona.

⁵ Ogwa kabiri nigubaasa kureeberwa gye omu mazima agaagambirwe omwe aha bashaija ba Ruhanga abeesigwa aba ira. Nabi Azaria akagambira Omugabe Asa ati: “Ruhanga ari hamwe naimwe, mwaba muri hamwe nawe.” (2 Obusingye 15:2; shoma 1 Abakorinso 10:13.) Eby’okureeberaho bingi ebihandiikirwe nibyoreka ngu ira, Sitaane akaba aremwa kusingura abaheereza ba Ruhanga abaabaire baguma haihi na Ruhanga. (Abaheburaayo 11:4-40) Omu bunaku obu, Omukristaayo orikuguma haihi na Ruhanga naija kubaasa kwangira Omuregi kandi amusingure. Nangwa, n’Ekigambo kya Ruhanga nikituhamiza kiti: “Murwanise Sitaane, aryabahunga.”—Yakobo 4:7.

6. Sitaane naarwanisa ata buri Mukristaayo okwe?

⁶ Sitaane tarikubaasa kusingura orutaro oru, kwonka naabaasa kutusingura itwe nk’abantu twaba tutagumire nitureeba. Sitaane naamanya ngu naabaasa kutusingura yaashiisha omukago gwaitu na Yehova. Eki naateeraho kukikora ata? Arikuturwanisa n’amaani, buri omwe okwe, kandi arikukoresa emitego ye. Ka tushwijume emitego ya Sitaane egi.

7. Ahabw’enki Sitaane naarwanisiza kimwe abantu ba Yehova?

⁷ Okutahiirira okw’amaani. Entumwa Yohaana akagira ati: ‘Ensi yoona eri omu butegyeki bw’Omubi ogwo.’ (1 Yohaana 5:19) Ebigambo ebyo nibirabura Abakristaayo boona ab’amazima. Obu Sitaane yaaherize kutwara abantu boona ababi, hati naabaasa  kwongyera amaani omu kurwanisa abo abaamurugireho, nibo baheereza ba Yehova. (Miika 4:1; Yohaana 15:19; Okushuuruurwa 12:12, 17) Aine ekiniga kingi ahabw’okuba naamanya ngu atsigaizeyo obwire bukye. Ayongyeire amaani omu kurwana kwe. Omu bunaku obu, Sitaane naaturwanisa n’amaani maingi agyendereire kumaraho omukago gwaitu na Yehova.

8. Entumwa Paulo akaba naamanyisa ki obu yaagira ngu “nitufukaana” n’emyoyo mibi?

⁸ Okufukaana na buri omwe ahariitwe. Entumwa Paulo akarabura Abakristaayo bagyenzi be ati: “Niturwana [omu Rugriika nitufukaana] . . . n’amahe g’emyoyo emibi ey’omu myanya y’omu iguru.” (Abaefeso 6:12) Ahabw’enki Paulo yaakoreise ekigambo “okufukaana”? N’ahabw’okuba kiine amakuru g’okukwatana omu mikono muhikaine. N’ahabw’ekyo, okukoresa ekigambo ekyo, Paulo akooreka ngu buri omwe omuriitwe aine kuteeraho kurwanisa emyoyo emibi. Yaaba nitutuura omu ihanga ei barikwikiririza munonga omu myoyo emibi nari ei batarikugiikiririzamu, titushemereire kwebwa ngu obu twayehayo ahari Yehova, tukatandika okurwana okwo. Omuntu weena ku arikwehayo akaba Omukristaayo, tarikubaasa kwetantara okurwana oku. Tikirikutangaaza okureeba ngu Paulo akeehanangiriza Abakristaayo omuri Efeso emirundi eshatu ‘kwemerera bahamire’!—Abaefeso 6:11, 13, 14.

9. (a) Ahabw’enki Sitaane na baadaimoni barikukoresa “emitego” mingi? (b) Ahabw’enki Sitaane naateeraho kushiisha emiteekateekyere yaitu, kandi nitubaasa kumwangira tuta? (Reeba akabokisi “ Yetantare Obugobya Bwa Sitaane!”) (c) Ni mutego ki ogu Sitaane arikukoresa ogu turikuza kushwijuma?

⁹ Emitego. Paulo naahiga Abakristaayo kwemerera bahamire okubaasa kwerinda ‘emitego’ ya Sitaane. (Abaefeso 6:11) Yetegyereze ngu Paulo akakoresa ekigambo ekirikworeka ngu emitego egyo eriho omu bwingi. Emyoyo emibi terikukoresa mutego gumwe, kureka neekoresa mingi. Abaheereza ba Ruhanga abamwe abagumire bahamire bakasingura okugyezibwa kw’omuringo gumwe basingwirwe okw’omuringo ogundi. N’ahabw’ekyo, Omuregi na baadaimoni nibateeraho kwetegyereza emitwarize ya buri omwe kumanya ahu aine obweremwa. Bwanyima  nibakoresa obweremwa bwona obu turikuba twine omu by’omwoyo. Kwonka ekirungi, nitubaasa kumanya emitego y’Omuregi emingi, ahabw’okuba neegambwaho omu Baibuli. (2 Abakorinso 2:11) Omu shuura z’akatabo aka ez’enyima, tukagamba aha mitego egyo, nk’okukunda eby’obutungi, emikago mibi, n’eby’obushambani. Hati ka tushwijume omutego gwa Sitaane ogundi, eby’obufumu.

10. (a) Eby’obufumu niki? (b) Yehova naatwara ata eby’obufumu, kandi iwe noobitwara ota?

¹⁰ Omuntu yaayejumba omu by’obufumu, naaba naakwatanisa n’emyoyo emibi. Okuragura ebiribaho, okucecera, okuroga, n’okubuuza abafu, ni bimwe aha by’obufumu. Nitukimanya gye ngu Yehova naatwara eby’obufumu nk’ekintu ‘ekirikunugwa.’ (Eky’Ebiragiro 18:10-12; Okushuuruurwa 21:8) Kandi nk’oku turikumanya ngu tushemereire ‘kwangira kimwe ebibi,’ ti kihikire itwe okukwatanisa n’emyoyo emibi. (Abarooma 12:9) Ka nikiba kiri ekikorwa kibi munonga twayehakana Yehova, Tataitwe ow’omu iguru!

11. Ahabw’enki nikuba kuri okusingura kw’amaani ahari Sitaane ku yaakutubeihabeiha tukejumba omu by’obufumu? Ha eky’okureeberaho.

¹¹ Kwonka, ahabw’okugira ngu Yehova tarikwendera kimwe abaheereza be kwejumba omu by’obufumu, Sitaane amaririire kureetera bamwe omuriitwe kubyejwanzyamu. Sitaane ku arikubeihabeiha Omukristaayo akakwatanisa na baadaimoni, naaba yaatunga obusinguzi bw’amaani. Ahabw’enki? Teekateeka aha kugyeragyeranisa oku: Omuserukare ku yaakubeihwabeihwa akaruga omu mahe agu arimu kandi akagareebya akaza omu g’abazigu abarikubarwanisa, orikwebembera abazigu naashemererwa. Nangwa naabaasa kugamba aha muntu ogwo nk’ekiconco, okwenda kugwisa kubi obaire naakurira omuserukare ogwo omu mahe agu arugiremu. Nikyo kimwe, Omukristaayo ku arikwejumba omu by’obufumu ayekundiire kandi arikukimanya, naaba yaaruga ahari Yehova kandi  yaayeta ahansi y’obushoboorozi bwa Sitaane. Teekateeka aha kushemererwa oku Sitaane arikutunga kworeka omuntu ogwo nk’ekiconco ekirugire omu kurwana! Omuriitwe hariho owaakwenzire kuha Sitaane obusinguzi nk’obwo? Ngaaha buzima! Tituri ndeebya.

12. Ni mutego ki ogu Sitaane arikukoresa okuhindura emiteekateekyere yaitu aha by’obufumu?

¹² Twayangira kimwe eby’obufumu, Sitaane tarikwija kutusingura arikubikoresa. N’ahabw’ekyo, naamanya ngu ashemereire kuhindura emiteekateekyere yaitu. Ata shi? Naasherura emiringo y’okuhabisamu Abakristaayo abamwe ngu bahikye n’aha ‘kweta ekirungi ekibi, n’ekibi ekirungi.’ (Isaaya 5:20) Okukora ekyo, Sitaane butoosha naakoresa gumwe aha mitego ye ei araakoreiseho, naakoresa ebibuuzo kureetaho okubanganisa.

13. Sitaane akoreise ata ebibuuzo okureetaho okubanganisa?

¹³ Yetegyereze oku Sitaane ira yaakoreise omutego ogwo. Omuri Edeni akabuuza Haawa ati: ‘N’eky’amazima, Ruhanga akagira ngu mutarirya aha muti gwona ogw’omuri eki kibanja?’ Omu bunaku bwa Yobu, Sitaane akabuuza ati omu ruteerane rwa baamaraika omu iguru: ‘Noogira ngu Yobu atiinira busha Ruhanga?’ Kandi obu Yesu yaatandika okubuurira kwe omu nsi, Sitaane akamugira ati: ‘Ku oraabe ori omwana wa Ruhanga, gambira amabaare aga gahindukye eby’okurya.’ Obu Sitaane yaagyeza Yesu, akateeraho kuhakanisa ebigambo ebi Yehova wenyine yaagambire saabiiti nka mukaga enyimaho: ‘Ogu n’Omwana wangye ou nkunda, kandi ou nshemerererwa munonga’!—Okutandika 3:1; Yobu 1:9; Matayo 3:17; 4:3.

14. (a) Sitaane naakoresa ata omutego gwe ogw’okureetaho okubanganisa aha bikwatiraine n’eby’obufumu? (b) Hati nituza kushwijuma ki?

¹⁴ Omu bunaku obu, Omuregi naakoresa omuringo nk’ogwo kureetaho okubanganisa aha bikwatiraine n’akabi akari omu  by’obufumu. Eky’obusaasi, abaasize kusingura omu kureetaho okubanganisa omu biteekateeko by’abaheereza ba Ruhanga abamwe. Batandikire kwebuuza yaaba buzima eby’obufumu ebimwe ni bibi. Omu muringo nk’ogwo, nibagira ngu ‘hoona n’eky’amazima?’ (2 Abakorinso 11:3) Tukaahwera tuta abantu nk’abo kuhindura aha miteekateekyere yaabo? Nitubaasa kuhamya tuta ngu omutego gwa Sitaane ogwo tigwakora ahariitwe? Okugarukamu, ka tureebe ebintu bibiri ebi Sitaane asiisire n’eby’obufumu. Nibyo eby’okweshemeza hamwe n’eby’obujanjabi.

15. (a) Abantu b’omu mahanga g’omuri Buraaya na Amerika nibatwara bata eby’obufumu? (b) Abakristaayo abamwe basiisirwe bata emiteekateekyere y’ensi erikukwata aha by’obufumu?

¹⁵ Okukira munonga omu mahanga ga Buraaya na Amerika, emiguriko, oburogo n’endiijo miringo ey’eby’obufumu nibagireeba nk’etari mibi. Zaavidiyo, ebitabo, puroguraamu z’aha tiivi n’emizaano y’aha kompyuta nibyeyongyera kworeka ebikorwa bya baadaimoni nk’ebirikushemeza, nk’eby’obwengye kandi nk’ebitari by’akabi aha muntu. Zaavidiyo ezimwe n’ebitabo ebirimu ebirikukwata aha miguriko bikanyiire kimwe, n’abarikubikunda munonga batandikireho ebigombe. Buzima, baadaimoni babaasize kusingura omu kushwekyerera akabi akari omu miguriko. Kwonka shi eky’okutwara eby’obufumu nk’ebitari by’akabi kikwatsire n’aha Bakristaayo? Emiteekateekyere ya bamwe esiisirwe eby’obufumu. Mu muringo ki? Nk’eky’okureeberaho, Omukristaayo omwe ku yaaherize kureeba vidiyo eyaabaire neekwata aha miguriko, akagira ati: “Ndeebire vidiyo egyo, kwonka tinyejumbire mu bikorwa by’obufumu.” Ahabw’enki emiteekateekyere nk’egyo eri ey’akabi?

16. Ahabw’enki n’eky’akabi okutoorana eby’okweshemeza ebirikukwata aha bikorwa by’obufumu?

¹⁶ N’obu haraabe hariho entaaniso ahagati y’okwejumba omu by’obufumu n’okubireeba, ekyo buzima tikirikumanyisa ngu okubireeba ti ky’akabi. Ahabw’enki? Teekateeka ahari eki: Ekigambo kya Ruhanga nikyoreka ngu n’obu yaakuba Sitaane nari  baadaimoni tibarikubaasa kumanya ebi turikuteekateeka. * N’ahabw’ekyo, nk’oku kyaba kyagambirweho, okubaasa kumanya ebiteekateeko byaitu n’ahu twine obweremwa omu by’omwoyo, baadaimoni baine kwetegyereza gye ebi turikukora, otwariiremu n’eby’okweshemeza ebi turikutoorana. Emitwarize y’Omukristaayo yaayoreka ngu naakunda zaavidiyo nari ebitabo ebirikukwata aha kubandwa, oburogo, ebikorwa bya baadaimoni nari ebindi ebikwatiraine na baadaimoni, naaba naaha baadaimoni obutumwa. Naaba naabooreka ahu obweremwa bwe buri. Omu kumugarukamu, baadaimoni nibabaasa kwongyera kufukaana nawe barikwihirira aha bweremwa obu ayorekire, okuhitsya baamusingura. Nangwa bamwe abarikukunda eby’obufumu, bakabanza kubireebera omu by’okweshemeza ebirimu emiguriko na bwanyima baayejumbira kimwe omu by’obufumu byenyine.—Shoma Abagalatia 6:7.

17. Ni mutego ki ogu Sitaane arikubaasa kukoresa okuhabya abo abarwaire?

¹⁷ Sitaane tarikukoresa ekyetengo kyaitu eky’okweshemeza kyonka, kureka naakoresa n’ekyetengo kyaitu eky’okwenda kutunga obujanjabi. Ata shi? Omukristaayo ou amagara ge garikweyongyera kuba mabi bwanyima y’okuteeraho kusherura ekirikubaasa kumutambira kwonka bikarema, naabaasa kuhwamu amaani. (Mako 5:25, 26) Ekyo nikibaasa kuha Sitaane na baadaimoni omugisha kumuhabya. Nibamanya gye ngu Ekigambo kya Ruhanga nikirabura aha kusherura obuhabuzi aha ‘barikuhwera abakora ebitari by’okuhikiirira.’ (Isaaya 31:2) Okubaasa kureetera Omukristaayo kutakuratira okurabura okwo, baadaimoni nibabaasa kutega omuntu ogwo orwaire kusherura obujanjabi oburikutwariramu okukoresa amaani agatarikwetegyerezibwa, nari eby’obufumu, ekintu eky’akabi munonga. (Isaaya 1:13) Omutego ogwo ogwa baadaimoni gwaheza kukora, nigushiisha omukago gwe na Yehova. Mu muringo ki?

18. Ni bujanjabi ki obu Omukristaayo ashemereire kwanga, kandi n’ahabw’enki?

 ¹⁸ Yehova akarabura ati Abaisraeli abaabaire batandikire ‘kukoresa amaani agatarikwetegyerezibwa’: “Ku muritega emikono yaanyu, ndyabaima amaisho; nangwa n’obu muriguma nimushaba hakye-hakye, tindibahurira.” (Isaaya 1:15) Butoosha nitwenda kwetantara ekintu kyona ekirikubaasa kureetera Yehova kutahurira okushaba kwaitu n’okutatuha obuhwezi, n’okukira munonga twaba turwaire. (Zaaburi 41:3) N’ahabw’ekyo, haaba hariho ekirikworeka ngu omuringo gw’okuragurirwa nari omubazi ogurikukoresibwa nigubaasa kuba gwine akakwate n’eby’obufumu, Omukristaayo ow’amazima ashemereire kugwanga. * (Matayo 6:13) Omukristaayo yaakora atyo, naija kuguma naahwerwa Yehova.—Reeba akabokisi “ Buzima Ebi N’eby’Obufumu?” aha rupapura 194.

19. (a) Omuregi abeihire abantu bahika n’aha kwikiriza ki aha bikwatiraine n’amaani agu aine? (b) Ni bitebyo ki ebi Abakristaayo ab’amazima bashemereire kwetantara?

¹⁹ N’obu abantu nyamwingi omu mahanga ga Buraaya n’Amerika baraabe nibatwara amaani ga  Sitaane nk’agatari g’akabi kahango, kwonka omu mahanga agandi tikwo kiri. Omu mahanga agandi, Omuregi abeihabeihire abantu baingi baahika n’aha kwikiriza ngu aine amaani agarikukira aha gu aine buzima. Abantu abamwe, obwire bwona nibaba batiinire emyoyo emibi. Hariho ebitebyo bingi ebirikukwata aha bikorwa by’amaani ebya baadaimoni. Ebitebyo nk’ebyo butoosha nibigambwaho n’okushemererwa; abantu nibashemererwa kubihurira. Tushemereire kwejumba omu kubuzya ebitebyo nk’ebyo? Ngaaha, abaheereza ba Ruhanga ow’amazima nibetantara ekyo ahabw’enshonga nkuru ibiri.

20. Omuntu naabaasa ata kubuzya ebishuba bya Sitaane obundi atakigyendereire?

²⁰ Eky’okubanza, omuntu yaabuzya ebitebyo ebirikukwata aha bi baadaimoni bakozire, naaba naahwera Sitaane omu kuhabisa abantu. Ata shi? Ekigambo kya Ruhanga nikihamya ngu Sitaane naabaasa kukora eby’okutangaaza, kwonka nikirabura ngu naakoresa ‘obumanyiso bw’ebishuba’ hamwe “n’obugobya.” (2 Abatesalonika 2:9, 10) Obu Sitaane ari omubeihi mukuru,  naamanya oku arikubaasa kureetera abantu abarikukunda eby’obufumu kwikiriza ebintu ebitahikire. Abantu nk’abo bataine kubanganisa nibaikiriza ngu bareebire kandi baahurira ebintu bimwe, kandi nibabaasa kubitebya nk’amazima. Ebitebyo byabo, abandi nibaguma nibabigambaho bongyeramu. Omukristaayo ku yaajanjaaza ebitebyo nk’ebyo, omu muringo ogwo naaba naakora ebi Omuregi, “ishe w’ebishuba” akunda. Naaba naajanjaaza ebishuba bya Sitaane.—Yohaana 8:44; 2 Timoseo 2:16.

21. Tushemereire kuta omutima aha kugaaniira ahari ki?

²¹ Ekya kabiri, nangwa n’obu Omukristaayo yaakuba yaabaire naatahirirwa emyoyo emibi, ashemereire kwetantara okuguma naagambira abaikiriza bagyenzi be ebitebyo ebirikukwata aha bintu nk’ebyo. Ahabw’enki? Nitwehanangirizibwa tuti: “Amaisho [tugahangye] Yesu wenka, owaatandikire okwikiriza kwaitu.” (Abaheburaayo 12:2) Buzima tushemereire kuta omutima ahari Kristo, atari Sitaane. Ni kikuru okumanya ngu obu Yesu yaabaire ari omu nsi, akaba atatebeza abeegi be ebitebyo ebirikukwata aha myoyo emibi, n’obu araabe yaabaire naabaasa kubagambira bingi ebirikukwata aha bi Sitaane yaabaire naabaasa kukora n’ebi atarikubaasa kukora. Omu mwanya gw’ekyo, akata omutima munonga aha makuru g’Obukama. N’ahabw’ekyo, omu kutooreza Yesu n’entumwa, nitwenda kuta omutima aha kugaaniira aha ‘by’amaani ebikozirwe Ruhanga.’—Ebyakozirwe 2:11; Luka 8:1; Abarooma 1:11, 12.

22. Nitubaasa kukora ki ekiraagumizemu kureeta ‘okushemererwa omu iguru’?

²² N’amazima, Sitaane naakoresa emitego etari emwe, otwariiremu eby’obufumu, okuteeraho kushiisha omukago ogu twine na Yehova. Kwonka ku turikwangira kimwe ekibi tukahamira aha kirungi, titurikwija kuha Sitaane omwanya kutumara amaani omu kumariirira kwaitu kwangira kimwe eby’obufumu eby’omuringo gwona. (Shoma Abaefeso 4:27.) Teekateeka aha ‘kushemererwa kwingi okurikwija kubaho omu iguru’ twagumizamu ‘kwemerera tutasingwirwe bugobya bwa Sitaane’ okuhitsya yaacwekyerezibwa!—Luka 15:7; Abaefeso 6:11.