1, 2. Tushemereire kucwamu tuta aha bikwatiraine n’eby’okweshemeza?

TEERA akashushani oriyo nooza kurya ekijuma kinuzire kwonka oyetegyereza ngu ekicweka kyakyo kimwe kijunzire. Okaakora ki? Noobaasa kucwamu kurya ekijuma kyona n’ahajunzire; nari kukinaga kyona, nari kusharaho ahajunzire reero okarya ekicweka ekirungi. Iwe okaacwamu ki?

² Omu muringo gumwe, eby’okweshemeza biri nk’ekijuma ekyo. Obumwe, noobaasa kwenda kwejumba omu by’okweshemeza, kwonka noomanya ngu bingi ebiriho ebiro ebi ni bibi, n’okujunda bijunzire. Mbwenu, okaakora ki? Abamwe nibabaasa kucwamu kwikiriza ebibi kandi beejumbe omu by’okweshemeza byona ebiri omu nsi egi. Abandi nibabaasa kwanga eby’okweshemeza byona okuhamya ngu tibaareeba kintu kyona eky’akabi. Abandi bo nibabaasa kwanga eby’okweshemeza ebibi kwonka obumwe beejumbe omuri ebyo ebiri haakiri. Oshemereire kucwamu ota kubaasa kwerindira omu kukunda kwa Ruhanga?

3. Hati nituza kushwijuma ki?

³ Baingi ahariitwe nibabaasa kwetantara eby’okweshemeza ebibi kwonka obumwe beejumbe omuri ebyo ebiri haakiri. Nitumanya ngu ni kikuru okweshemeza, kwonka nitwenda kweshemeza n’ebirungi byonka. N’ahabw’ekyo, nitwenda kureeba oku turikubaasa kumanya eby’okweshemeza ebirungi n’ebitari birungi. Kwonka, ka tubanze tushwijume oku eby’okweshemeza ebi turikutooranaho birikubaasa kukwata aha mukago gwaitu na Yehova.

4. Okwehayo kwaitu kushemereire kukwata kuta aha by’okweshemeza ebi turikutoorana?

⁴ Enyimaho, Omujurizi wa Yehova okaikwire owaabatiziibwe omuri 1946 akagira ati: “Nimpamya ngu naabaho baaba nibaha buri rubazo rw’abarikuza kubatizibwa kandi ngu naahurikiza gye orikushusha oti niinye ndikuba ninza kubatizibwa.” Ahabw’enki yaacwiremu atyo? Akashoboorora ati; “Okuguma ninyeijutsya okwehayo kwangye kimpwereire munonga kuguma ndi omwesigwa.” Hatariho kubanganisa noikirizana nawe. Okweijutsya ngu okaraganisa Yehova ngu noija kumuheereza ebiro byona eby’amagara gaawe, nikiija kukuhiga kugumisiriza. (Shoma Omubuurizi 5:4.) Buzima, okuteekateeka munonga aha kwehayo kwawe nikwija kukwata aha muringo ogu orikureebamu obuheereza bw’Ekikristaayo n’ebindi bintu otwariiremu n’eby’okweshemeza. Entumwa Paulo akahamya amazima aga obu yaahandiikira Abakristaayo b’omu bunaku bwe ati: ‘Ku muraabe nimurya nari nimunywa nari nimukora ekintu kyona, mukore byona okuhimbisisa Ruhanga.’—1 Abakorinso 10:31.

5. Abaleevi 22:18-20 nihatuhwera hata kureeba okurabura okuri omu Abarooma 12:1?

⁵ Buri kintu kyona eki orikukora kiine akakwate n’orikuramya Yehova. Omu baruha ye ei yaahandiikire Abarooma, Paulo akakoresa  ebigambo by’amaani kuhamiza abaikiriza bagyenzi be amazima aga. Akabehanangiriza ati: ‘Muheyo emibiri yaanyu kuba ebitambo ebihuriire, ebirikwera, kandi ebirikusiimwa Ruhanga, nikwo kuheereza kwanyu oku mushemereire kumuha.’ (Abarooma 12:1) Omubiri gwawe nigutwariramu ebiteekateeko byawe, omutima gwawe, n’amaani agu oine. Ebi byona noobikoresa omu kuheereza Ruhanga. (Mako 12:30) Paulo akagamba aha kuheereza n’omutima gumwe nk’ekitambo. Ekigambo ekitambo kirimu okurabura. Omu Biragiro bya Musa, ekitambo kyona ekyabaire kiba kitari kirungi, Ruhanga akaba atakisiima. (Abaleevi 22:18-20) Nikyo kimwe, n’obuheereza bw’Omukristaayo bwaba bwine oku butashemeire, Ruhanga tarikubusiima. Kwonka shi, eki nikibaasa kubaho kita?

6, 7. Omukristaayo naabaasa kushiisha ata omubiri gwe, kandi n’enki ekirikubaasa kurugamu?

⁶ Paulo akahiga Abakristaayo omuri Rooma ati: ‘Mutaikiriza engingo zaanyu [ebicweka by’emibiri yaanyu] kuzikoresa eby’okutahikiirira.’ Paulo kandi akabagambira ‘kwita ebikorwa by’omubiri.’ (Abarooma 6:12-14; 8:13) Enyimaho omu baruha ye, akaha eby’okureeberaho ‘eby’ebikorwa by’omubiri’ nk’ebyo. Aha bikwatiraine n’okushiisha kw’abantu, nitushoma tuti: ‘Akanwa kaabo kaijwire okukyeena.’ ‘Amaguru gaabo garahukira okusheesha eshagama.’ ‘Tibata mutima aha kutiina Ruhanga.’ (Abarooma 3:13-18) Omukristaayo naaba naashiisha omubiri gwe ku arikukoresa “engingo ze,” nari ebicweka bye by’omubiri kukora ebibi. Nk’eky’okureeberaho, Omukristaayo omu bunaku obu yaareeba ebintu bibi akigyendereire, nk’ebishushani by’eby’obushambani, nari vidiyo z’obushaarizi, naaba ‘naahayo amaisho gye kushiisha’ kandi naaba naashiisha omubiri gwe gwona. Okuramya kwe kwona nikuba kuri ekitambo ekitashemeire kandi Ruhanga tarikukwikiriza. (Eky’Ebiragiro 15:21; 1 Petero 1:14-16; 2 Petero 3:11) Ebirikuruga omu kutoorana eby’okweshemeza ebitashemeire ka ni bibi!

 ⁷ Buzima, eby’okweshemeza ebi Omukristaayo arikutoorana nibibaasa kumurugiramu ebibi nari ebirungi. N’ahabw’ekyo, nitwenda kutoorana eby’okweshemeza ebiraahunde ekitambo kyaitu ahari Ruhanga beitu bitari ebiraakishiishe. Hati ka tureebe oku turikubaasa kumanya eby’okweshemeza ebirungi n’ebibi.

8, 9. (a) Okutwarira hamwe, eby’okweshemeza nibibaasa kuba eby’emiringo ebiri eha? (b) Ni by’okweshemeza bya muringo ki ebi turikwetantara, kandi n’ahabw’enki?

⁸ Okutwarira hamwe, eby’okweshemeza nibibaasa kuba eby’emiringo ebiri. Ogw’okubanza, n’eby’okweshemeza ebi Abakristaayo barikuragiirwa kwetantara. Ogundi, n’eby’okweshemeza ebi Abakristaayo barikubaasa kwanga nari kwikiriza. Ka tutandikye n’omuringo ogw’okubanza, eby’okweshemeza ebi Abakristaayo barikuragiirwa kwetantara.

⁹ Nk’oku kirikworekwa omu Shuura 1, eby’okweshemeza ebimwe birimu ebikorwa ebi Baibuli etarikwikiriza. Nk’eky’okureeberaho, teekateeka aha mikura ya Intaneeti emwe na zaavidiyo, n’ebimwe ebirikworekwa aha tiivi n’ebyeshongoro ebirimu endwano nari eby’obufumu nari ebirimu ebirikwitsa enshoni, nari ebirikushagika eby’obushambani. Ahabw’okugira ngu eby’okweshemeza nk’ebyo ebirikureebwa nk’ebihikire nibihenda emisingye nari ebiragiro bya Baibuli, Abakristaayo ab’amazima bashemereire kubyetantara. (Ebyakozirwe 15:28, 29; 1 Abakorinso 6:9, 10; Okushuuruurwa 21:8) Ku orikwetantara eby’okweshemeza ebibi nk’ebyo, nooyoreka Yehova ngu buzima ‘nooyangira kimwe ebibi’ kandi ngu butoosha ‘nooyetantara okukora ebibi.’ Omu muringo ogwo, nooba oine ‘okwikiriza okutarimu buryarya.’—Abarooma 12:9; Zaaburi 34:14; 1 Timoseo 1:5.

10. Ni miteekateekyere ki ey’akabi erikukwata aha by’okweshemeza, kandi ahabw’enki n’ey’akabi?

¹⁰ Abamwe nibabaasa kuteekateeka ngu okwejumba omu  by’okweshemeza ebirikworeka emicwe mibi, ti ky’akabi aharibo. Nibabaasa kugira bati: ‘Nimbaasa kubireeba aha tiivi nari ahari vidiyo, kwonka tindikubaasa kubikora.’ Emiteekateekyere nk’egyo tehikire kandi n’ey’akabi. (Shoma Yeremia 17:9.) Ku turaabe nitushemezibwa okureeba ebi Yehova arikwanga, mbwenu buzima nituba ‘nitwangira kimwe ebibi’? Twaguma nitwejumba omu bintu ebirikworeka emicwe mibi, nibiija kutushiisha. (Zaaburi 119:70; 1 Timoseo 4:1, 2) Okwemanyiiza kureeba ebintu bibi nk’ebyo haine oku kurikukwata aha bi turikukora nari aha ku turikureeba emitwarize y’abandi emibi.

11. Ebiri omu Abagalatia 6:7 bihikiriire bita aha bikwatiraine n’eby’okweshemeza?

¹¹ Eki buzima kibaireho. Abakristaayo abamwe bakozire ebibi ahabw’okuguma nibeejumba omu by’okweshemeza ebibi. Ebirugiremu bibeegyeise ngu “ebi omuntu abiba nibyo agyesha.” (Abagalatia 6:7) Kwonka ebibi nk’ebyo ebirikurugamu nibibaasa kwetantarwa. Ku oraabibe ebirungi omu biteekateeko byawe, noija kugyesha ebirungi oshemereirwe.—Reeba akabokisi “ Ni by’Okweshemeza bya Muringo Ki Ebi Nshemereire Kwejumbamu?” aha rupapura 67.

12. Abagalatia 6:5 nihakwata hata aha by’okweshemeza, kandi ni buhabuzi ki obu twine oburikuhwera buri omwe kwecweramu?

¹² Ka twetegyereze omuringo gwa kabiri, eby’okweshemeza ebirimu ebikorwa ebi Baibuli etarikuzibira nari kugambaho butunu. Buri Mukristaayo yaaba naatoorana eby’okweshemeza eby’omuringo nk’ogwo, aine kwecweramu eki arikureeba ngu kishemeire. (Shoma Abagalatia 6:5.) Kwonka, ekyo tikirikumanyisa ngu nituba tutaine eky’okutuhabura. Baibuli erimu emisingye nari amazima agarikutuhwera kumanya emiteekateekyere ya Yehova. Twagyendera aha misingye egyo, nitwija kumanya ‘ebi Yehova arikwenda’ omu  bintu byona, otwariiremu n’eby’okweshemeza.—Abaefeso 5:17.

13. Niki ekiraije kutuhiga kwetantara eby’okweshemeza ebitarikushemeza Yehova?

¹³ Nitwetegyereza gye ngu Abakristaayo boona tibaine kumanya kurikwingana aha bikwatiraine n’emicwe, kandi tibarikucwamu ebirikushushana. (Abafilipi 1:9) Kandi, Abakristaayo nibakimanya ngu boona tibarikukunda by’okweshemeza ebirikushushana. N’ahabw’ekyo, tutakaateekateeka  ngu Abakristaayo boona nibaija kucwamu ebirikushushana. Kwonka n’obu kiraabe kiri kityo, oku turaayeyongyere kukuratira obuhabuzi bwa Ruhanga, nikwo turikwija kweyongyera kwetantara eby’okweshemeza ebitarikushemeza Yehova.—Zaaburi 119:11, 129; 1 Petero 2:16.

14. (a) Niki eki tushemereire kuteekateekaho twaba nitutoorana eby’okweshemeza ebi turayejumbemu? (b) Nitubaasa kuguma nitwebembeza tuta eby’omwoyo?

¹⁴ Waaba nootoorana eby’okweshemeza ebi oraayejumbemu, hariho enshonga nkuru endiijo ei oshemereire kuteekateekaho. Obwire bwawe. N’obu eby’okweshemeza ebi orikucwamu kwejumbamu byakuba biri birungi, obwire obu orikumara omu bintu nk’ebyo nibworeka ebi orikwebembeza. Aha Bakristaayo, ebintu eby’omwoyo nibyo bikuru munonga. (Shoma Matayo 6:33.) Mbwenu shi, noobaasa kukora ki kuhamya ngu waaguma nooyebembeza eby’omwoyo? Entumwa Paulo akagira ati: “Mwerinde, mumanye oku murikugyenda, mutagyenda nk’abataine bwengye, kureka nk’abanyabwengye, mutafiisa busha” obwire. (Abaefeso 5:15, 16) Buzima, waatuubya aha bwire obu orikumara omu by’okweshemeza, nikiija kukuhwera kutunga obwire bwingi bw’okukora ‘ebintu ebirikukira’ obukuru, nibyo eby’omwoyo.—Abafilipi 1:10.

15. Ahabw’enki n’eky’obwengye kwegyendesereza munonga twaba nitutoorana eby’okweshemeza?

¹⁵ Kandi n’eky’obwengye okwegyendesereza munonga waaba nootoorana eby’okweshemeza. Ekyo nikimanyisa ki? Garuka oteekateekye aha ky’okureeberaho ky’ekijuma. Okubaasa kwetantara kurya ekijunzire, torikusharaho ahanjunzire honka, kureka noosharaho n’ekicweka ekyehinguririize ahajunzire. N’eky’obwengye kwegyendesereza munonga omu kutoorana eby’okweshemeza. Omukristaayo omunyabwengye tarikwetantara eby’okweshemeza ebirikuhenda emisingye ya Baibuli byonka, beitu n’ebyo ebitarikwetegyerezibwa gye nari ebirimu ebintu ebimwe  ebirikubaasa kushiisha omukago gwaitu na Yehova. (Enfumu 4:25-27) Okukuratira obuhabuzi bw’omuri Baibuli nikwija kukuhwera kukora ekyo.

16. (a) Nitubaasa kworeka tuta ngu twine emiteekateekyere ya Yehova aha bikwatiraine n’emicwe? (b) Okukuratira emisingye y’omu Baibuli nikubaasa kuhinduka kuta ekintu eki orikukora butoosha?

¹⁶ Abakristaayo ab’amazima baaba nibatoorana eby’okweshemeza ebi barayejumbemu, nibabanza baateekateeka aha ku Yehova arikubireeba. Baibuli neetumanyisa emiteekateekyere ya Yehova n’emitindo ye. Nk’eky’okureeberaho, Omugabe Sulemaani naayoreka ebintu bingi ebi Yehova arikwanga nka, “orurimi orubeiha, emikono esheesha eshagama y’abataine rubanja, omutima oguteekateeka enaama mbi, ebigyere ebirahukira ekibi.” (Enfumu 6:16-19) Oku Yehova arikureeba ebintu kushemereire kukukwataho kuta? ‘Omuhandiiki wa zaaburi naagira ati: “Imwe abakunda [Yehova], mwangye obubi.” (Zaaburi 97:10) Eby’okweshemeza ebi orikwejumbamu bishemereire kworeka ngu buzima nooyanga ebi Yehova arikwanga. (Abagalatia 5:19-21) Kandi guma noijuka ngu ebi orikukorera omu mubonano otari n’abantu abandi nibyoreka eki ori buzima. (Zaaburi 11:4; 16:8) N’ahabw’ekyo, ku oraabe oine ekyetengo ky’okworeka emiteekateekyere ya Yehova aha micwe, butoosha noija kucwamu ebirikuhikaana n’emisingye ya Baibuli. Noija kuguma noocwamu otyo butoosha.—2 Abakorinso 3:18.

17. Tutakatooraine eby’okweshemeza, ni bibuuzo ki ebi tushemereire kwebuuza?

 ¹⁷ Niki ekindi eki orikubaasa kukora kuhamya ngu eby’okweshemeza ebi orikutoorana nibihikaana n’emiteekateekyere ya Yehova? Teekateeka aha kibuuzo eki: ‘Eki nikiija kunkwataho kita hamwe n’omukago gwangye na Ruhanga?’ Nk’eky’okureeberaho, otakacwiremu kureeba vidiyo ezimwe, banza oyebuuze oti: ‘Ebi ndikuza kureeba nibiija kureetera omutima gwangye kuunshinja?’ Ka tureebe emisingye erikukwata aha nshonga egyo.

18, 19. (a) Omusingye oguri omu Abafilipi 4:8 nigubaasa kutuhwera guta kumanya yaaba eby’okweshemeza ebi turikwejumbamu ni birungi? (b) Ni misingye ki endiijo erikubaasa kutuhwera kutoorana eby’okweshemeza ebirungi? (Reeba obugambo obw’ahansi.)

¹⁸ Omusingye mukuru nigushangwa omu Abafilipi 4:8, ogurikugira guti: ‘Byona eby’amazima, byona ebishemereire kuheebwa ekitiinisa, byona eby’oburyo, byona ebishemeire, byona ebirikushemeza, byona ebirikusiimwa, ku haraabe hariho oburungi, ku haraabe hariho ebishemeire kuhimbisibwa, mube nibyo mwateekateekaho.’ Paulo akaba atarikugamba aha bikwatiraine n’okweshemeza, kureka aha kuteekateeka kw’omu mutima, okushemereire kukwata aha birikushemeza Ruhanga. (Zaaburi 19:14) Kwonka nabwo, ebigambo bya Paulo nibibaasa kukora n’aha bikwatiraine n’eby’okweshemeza. Bita shi?

¹⁹ Yebuuze oti: ‘Zaavidiyo, n’emizaano y’ahari vidiyo, ebyeshongoro, n’ebindi eby’okweshemeza ebi ndikwejumbamu nibita omu biteekateeko byangye ebintu “byona ebishemeire”?’ Nk’eky’okureeberaho, waaheza kureeba vidiyo, niki eki orikutsigara nooteekateekaho munonga? Byaba biri birungi, ebishemeire, kandi ebirikugaruramu amaani, manya ngu okweshemeza okwo kwaba kuri kurungi. Kwonka, vidiyo ei waareeba yaakureetera kuteekateeka aha bintu ebitashemeire, manya ngu okweshemeza okwo kwaba kutari  kurungi, kureka kwaba kuri okw’akabi. (Matayo 12:33; Mako 7:20-23) Ahabw’enki? Ahabw’okuba okuteekateeka aha bintu ebitashemeire nikikuteganisa omu mutima, nikishiisha omuntu waawe ow’omunda otendekirwe Baibuli kandi kishiisha n’omukago gwawe na Ruhanga. (Abaefeso 5:5; 1 Timoseo 1:5, 19) Ahabw’okugira ngu okweshemeza nk’okwo n’okw’akabi ahariiwe, mariirira kukwetantara. * (Abarooma 12:2) Ba nk’omuhandiiki wa zaaburi owaashabire Yehova ati: “Ohindure amaisho gangye, garekye kureeba ebitaine mugasho.”—Zaaburi 119:37.

20, 21. 1 Abakorinso 10:23, 24 nihagamba ki aha bikwatiraine n’eby’okweshemeza ebirungi?

²⁰ Paulo akooreka omusingye mukuru gw’omu Baibuli ogu tushemereire kuteekateekaho twaba twine ebi turikwenda kwecweramu. Akagira ati: “Byona nibiikirizibwa, kwonka ti byona ebirikwombeka. Omuntu weena arekye kwesherurira ebye ahabwe, kureka asherure eby’okuhwera mutaahi we.” (1 Abakorinso 10:23, 24) Omusingye ogu nigukwata guta aha kutoorana eby’okweshemeza ebirungi? Oshemereire kwebuuza oti: ‘Eby’okweshemeza ebi ndatoorane nibiza kukwata bita aha bandi?’

²¹ Omuntu waawe ow’omunda naabaasa kukwikiriza kwejumba omu by’okweshemeza ebimwe ebi orikureeba ‘nk’ebirungi’ nari ebirikwikirizibwa. Kwonka, waareeba ngu ab’eishe-emwe abamwe, omuntu waabo ow’omunda tarikubaikiriza kwejumba omu by’okweshemeza nk’ebyo, naiwe noobaasa kucwamu kubireka. Ahabw’enki? Ababw’okuba torikwenda ‘kukora ekibi ahari Kristo,’ nari ‘aha b’eishe-emwe’, orikubareetera kugumirwa kuba abeesigwa ahari Ruhanga nk’oku Paulo yaagambire. Ta omutima aha kurabura  oku: ‘Mwetantare okugwisa kubi abandi.’ (1 Abakorinso 8:12; 10:32) Abakristaayo ab’amazima obunaku obu nibakuratira obuhabuzi bwa Paulo oburikukwata aha kwetantara eby’okweshemeza ebirikubaasa kuba biri ‘birungi’ kwonka ‘bitarikwombeka.’—Abarooma 14:1; 15:1.

22. Ahabw’enki Abakristaayo nibaikiriza emiteekateekyere y’abandi aha bintu ebi omuntu ashemereire kwecweramu?

²² Hariho ogundi omuringo ogw’okworekamu ngu nitufayo ahari bagyenzi baitu. Omukristaayo ou omuntu we ow’omunda orikumuzibira kwejumba omu by’okweshemeza ebimwe, tashemereire kuteekateeka ngu Abakristaayo boona omu kibiina baine kukuratira emiteekateekyere ye aha bikwatiraine n’eby’okweshemeza ebirungi. Ku yaakuteekateeka atyo, naaba ari nk’omuvugi wa motoka ori aha ruguuto nyeigyendwa orikwenda ngu boona abarikuvugira omu ruguuto orwo bavugire ahari sipidi ei we arikwenda. Omuntu nk’ogwo buzima naaba atahikire. Rukundo y’Ekikristaayo eshemereire kumuhiga kuha ab’eishe-emwe bagyenzi be ekitiinisa, abu emiteekateekyere yaabo erikukwata aha by’okweshemeza etarikushushana n’eye, kwonka etarikuhenda misingye y’Ekikristaayo. Yaakora atyo, okwetegyereza kwe ‘nikumanywa abantu boona.’—Abafilipi 4:5; Omubuurizi 7:16.

23. Noobaasa kuhamya ota ngu waatoorana eby’okweshemeza ebirungi?

²³ Mbwenu, noobaasa kuhamya ota ngu waatoorana eby’okweshemeza ebirungi? Yetantare eby’okweshemeza byona ebibi, ebirimu ebikorwa bibi ebitarikwikirizibwa omu Baibuli. Kuratira emisingye ya Baibuli ei turikubaasa kugyenderaho twaba nitutoorana eby’okweshemeza ebitarikugambwaho butunu omu Baibuli. Yetantare eby’okweshemeza ebirikushiisha omuntu waawe ow’omunda, kandi reka eby’okweshemeza ebirikubaasa kugwisa kubi bagyenzi baawe okukira munonga ab’eishe-emwe. Okumariirira kwawe kukora otyo, nikwija kuhaisa Ruhanga ekitiinisa kandi kukurindire omu kukunda kwe, iwe n’eka yaawe.