Ebaruha Kuruga aha Kakiiko Akareeberezi
“Mushemereire kuba abeegyesa.” (Heb. 5:12) Teekateeka ahari eki! Yehova Omwegyesa orikukirayo omu nsi n’omu iguru naatushaba kwegyesa abandi ebirikumukwataho! Okwegyesa abantu ebirikukwata ahari Yehova omu ka, omu kibiina, n’omu kubuurira n’obujunaanizibwa bw’omuhendo kandi obw’amaani. Niki ekiraatuhwere kuba abeegyesa barungi?
Eky’okugarukamu nikishangwa omu bigambo ebi entumwa Paulo yaahandiikire Timoseo ati: “Oyezirikye kushomera abantu Ebyahandiikirwe, n’okubuurira, n’okwegyesa.” Paulo akoongyeraho ati: “Omu kukora otyo, noija kwejuna kandi ojune n’abarikukuhurira.” (1 Tim. 4:13, 16) Twine obutumwa oburikukiza amagara obw’okubagana n’abantu. N’ahabw’ekyo ni kikuru kwongyera kwega kushoma gye n’okwegyesa gye. Akatabo aka katebeekanisiibwe kutuhwera kukora ekyo. Yetegyereze bimwe ebirimu:
Ekyahandiikirwe ekijuriziibwe ahari buri rupapura n’omusingye ogurikuhikaana n’eishomo, nari n’obuhabuzi bw’okugyenderaho
Yehova niwe ‘Mwegyesa’ Orikukirayo. (Isa. 30:20) N’obu akatabo aka karaabe nikaza kukuhwera kwega kushoma gye n’okwegyesa gye, toshemereire kwebwa ngu Yehova niwe Bukomooko bw’obutumwa bwaitu, kandi niwe arikweyiriza haihi abantu. (Yoh. 6:44) N’ahabw’ekyo, butoosha mushabe akuhe omwoyo gurikwera. Guma nookoresa gye Ekigambo kye. Muhimbise beitu kutari kwehimbisa. Teeraho kuhwera abakuhurikiize kumukunda.
Ohairwe omugisha gw’okumanyisa abantu obutumwa bukuru. Twine obwesigye ngu waayesiga ‘amaani agu Ruhanga’ arikukuha, noija kuba omwegyesa murungi.—1 Pet. 4:11.
Abeegyesa bagyenzi baanyu,
Akakiiko Akareeberezi ak’Abajurizi ba Yehova
