1, 2. Abantu baingi nibakira kwebuuza ki?

NITUKIRA kuhurira amakuru ngu eihunga ry’amaani ricwekyereize ekyaro. Omushaija oine embundu ateire amasasi omu kanisa, yaita abantu baingi. Nari ngu omukazi aitsirwe ekookoro yaatsigaho abaana bataano.

² Ebintu bibi nk’ebyo ku birikubaho, abantu baingi nibabuuza bati: “Ahabw’enki?” Baingi nibeebuuza ahabw’enki ensi eijwire rwango n’okubonabona. Naiwe oreebuurize otyo?

3, 4. (a) Ni kibuuzo ki eki Habakuuki yaabuurize? (b) Yehova akamugarukamu ata?

³ Baibuli neegamba aha baheereza ba Ruhanga abeesigwa abaabuurize ebibuuzo nk’ebyo. Nk’eky’okureeberaho, nabi Habakuuki akabuuza Yehova ati: “Ahabw’enki nondeebesa ebitahikire n’eby’eitima? Okuhwerekyerera n’obubisha biri omu maisho gangye, entongane n’empaka ziri ahaiguru?”—Habakuuki 1:3.

⁴ Ebiri omu Habakuuki 2:2, 3, nibyoreka oku Ruhanga yaagarukiremu ekibuuzo kya Habakuuki n’oku yaamuraganiise kushoboorora enshonga. Yehova naakunda munonga abantu be. Baibuli neegira eti: “Naabataho omutima.” (1 Petero 5:7) Ruhanga naayangira kimwe kureeba abantu nibabonabona kukira oku itwe turikukyanga. (Isaaya 55:8, 9) N’ahabw’ekyo, ka tushwijume ekibuuzo eki: Ahabw’enki omu nsi harimu okubonabona kwingi?

5. Abeebembezi b’amadiini abaingi nibagira ngu n’oha orikureetaho okubonabona, kwonka Baibuli neeyegyesa ki?

⁵ Abeebembezi b’amadiini nibakira kwegyesa ngu n’ekigyendererwa kya Ruhanga abantu kubonabona. Abamwe nibabaasa kugira ngu Ruhanga niwe arikureetaho byona ebirikuhika aha bantu otwariiremu n’ebihikiirizi, kandi ngu titurikubaasa kumanya ahabw’enki naakora ekyo. Abandi nibabaasa kugira ngu abantu boona otwariiremu n’abaana bato, nibafa kugira ngu baze kutuura na Ruhanga omu iguru. Kwonka ekyo buzima tikihikire. Yehova tiwe arikureetaho ebintu bibi. Baibuli neegira eti: “Nikikabure Ruhanga okukora ebitahikire, ow’obushoboorozi bwona okukora kubi.”—Yobu 34:10.

6. Ahabw’enki abantu baingi nibateekateeka ngu Ruhanga niwe arikureetaho okubonabona omu nsi?

⁶ Abantu baingi nibagira ngu Ruhanga niwe arikureetaho okubonabona ahabw’okuba nibateekateeka ngu niwe mutegyeki w’ensi egi. Kwonka nk’oku twayegire omu Shuura ya 3, omutegyeki w’ensi egi ni Sitaane Omuregi.

7, 8. Ahabw’enki hariho okubonabona kwingi omu nsi?

⁷ Baibuli neegira eti: ‘Ensi yoona eri omu butegyeki bw’Omubi.’ (1 Yohaana 5:19) Omutegyeki w’ensi egi, Sitaane ni mubi kandi n’omushaarizi. Niwe ‘arikuhabisa ensi yoona.’ (Okushuuruurwa 12:9) Abantu baingi nibamutooreza. Egyo n’enshonga emwe ahabw’enki ensi eijwire ebishuba, obwangane, n’okwitana.

⁸ Hariho enshonga ezindi ahabw’enki hariho okubonabona kwingi omu nsi. Adamu na Haawa ku baagomire, bakahunguza abaana baabo ekibi. Ahabw’ekibi, abantu nibareetera bataahi baabo kubonabona. Nibakira kwetwara nk’abarikukira abandi. Nibarwana, nibeejumba omu ntaro, kandi nibatwariza kubi abandi.  (Omubuurizi 4:1; 8:9) Obumwe abantu nibabonabona ‘ahabw’obunaku n’ebihikiirizi.’ (Omubuurizi 9:11) Ku barikuba bari omu mwanya mubi omu bwire bubi, butandu n’ebindi bintu bibi nibibaasa kubahikaho.

9. Niki ekirikutuhamiza ngu Yehova aine enshonga ehikire erikumureetera kuba akirekireho okubonabona?

⁹ Yehova tiwe arikureeta okubonabona omu nsi. Tiwe arikureetaho entaro, okuhenda ebiragiro, n’okutwariza kubi abandi. Ruhanga tiwe arikureetaho ebihikiirizi nk’emitsitsa, eihunga, n’emyegyemure. Kwonka noobaasa kwebuuza oti: ‘Yehova ku araabe niwe arikukizayo amaani, ahabw’enki atarikuzibira ebintu bibi bikareka kubaho?’ Nitumanya ngu Ruhanga naatufaho munonga, n’ahabw’ekyo ashemereire kuba aine enshonga ehikire ahabw’enki akirekireho okubonabona.—1 Yohaana 4:8.

10. Sitaane akahakanisa ata Yehova?

¹⁰ Omu musiri Edeni, Omuregi akahabisa Adamu na Haawa. Sitaane akabeiherera Ruhanga ngu n’omutegyeki mubi. Akaba ari nk’orikugira ngu Ruhanga haine ekintu kirungi eki asherekire Adamu na Haawa. Sitaane akaba naayenda ngu baikirize ngu naaza kubategyeka gye okukira Yehova, kandi ngu tibarikumwetenga kuba omutegyeki waabo.—Okutandika 3:2-5; reeba Ebirikukiraho 27.

11. Ni kibuuzo ki eki twine kugarukamu?

¹¹ Adamu na Haawa bakagomera Yehova, kandi baatandika kukora ebyabo. Bakaba nibateekateeka ngu baine obushoboorozi bw’okweteeraho emitindo erikukwata aha kihikire n’ekigwire. Yehova akaba naabaasa kworeka ata ngu abagomi aba bagwire, kandi ngu niwe arikumanya ekirungi ekitushemereire?

12, 13. (a) Ahabw’enki Yehova ataracwekyereize abagomi ahonaaho? (b) Ahabw’enki Yehova yaarekire Sitaane kuba omutegyeki w’ensi egi n’abantu kwetegyeka?

 ¹² Yehova taracwekyereize Adamu na Haawa ahonaaho. Omu mwanya gw’ekyo, akabareka ngu bazaare. Reero Yehova akareka abaana baabo kwecweramu ou barikwenda ngu abe omutegyeki waabo. Yehova akaba naayenda ngu ensi eijure abantu abahikiriire, kandi ekyo kikaba nikiza kubaho n’obu Omuregi yaakukozire ki.—Okutandika 1:28; Isaaya 55:10, 11.

¹³ Sitaane arikuhakanisa Yehova hakaba hariho obukaikuru n’obukaikuru bwa baamaraika. (Yobu 38:7; Danieli 7:10) Yehova akaha Sitaane obwire kworeka yaaba ebi yaamugambireho byabaire bihikire. Akareka n’abantu kutaho zaagavumenti barikwebemberwa Sitaane, kureeba yaaba nizibaasa kusingura hatariho buhwezi bwa Ruhanga.

14. Okuhinguraho kw’obwire kworekire ki?

¹⁴ Kumara emyaka mingi, abantu batwire nibateeraho kwetegyeka, kwonka baremirwe. Kyeyorekire butunu ngu Sitaane n’omubeihi. Abantu nibeetenga obuhwezi bwa Ruhanga. Nabi Yeremia akaba ahikire obu yaagira ati: “Ai Mukama, nimmanya ngu omuhanda gw’omuntu tiguba mu bushoboorozi bwe, kandi omuntu weena ogyenda tabaasa kwehabura mu rugyendo rwe ahu yaahika hoona.”—Yeremia 10:23.

15, 16. (a) Ahabw’enki Yehova arekire okubonabona kugumaho kumara obwire buraingwa? (b) Ahabw’enki Yehova atakaihireho oburemeezi obu Sitaane areetsireho?

¹⁵ Ahabw’enki Yehova arekireho okubonabona kumara obwire buraingwa? Kandi ahabw’enki atarikuzibira  ebintu bibi kubaho? Hahingwireho obwire buraingwa kworeka ngu obutegyeki bwa Sitaane buremirwe. Abantu batwire nibateeraho kutaho zaagavumenti kwonka tibatungire businguzi bwona. N’obu haraabe hariho entunguuka omu bya sayansi n’eby’obwengye, kwonka obutari buringaaniza, obworo, obubi, n’entaro byeyongyereire kimwe okukira ira. Buzima titurikubaasa kwetegyeka tukaba gye tutaine Ruhanga.

¹⁶ Kwonka, Yehova takaihireho oburemeezi obu Sitaane areetsireho. Ku ogire ngu ekyo naakikora, kikaabaire nikimanyisa ngu Ruhanga naashagika obutegyeki bwa Sitaane, kandi buzima ekyo tarikubaasa kukikora. Kikaareeteire n’abantu kuteekateeka ngu nibabaasa kugira obusinguzi barikwetegyeka. Kwonka ekyo n’ekishuba, kandi Yehova akaba atarikubaasa kushagika ekishuba ekyo. Tarikubaasa kubeiha.—Abaheburaayo 6:18.

17, 18. Yehova naija kukorera ki oburemeezi oburetsirweho Sitaane?

¹⁷ Mbwenu shi Yehova naabaasa kwihaho ebibi ebireetsirweho obugomi bwa Sitaane n’abantu? Eego. Ebintu byona nibibaasika ahari Ruhanga. Yehova niwe arikumanya obu araamareho oburemeezi oburetsirweho Sitaane. Naija kuhikiiriza ekigyendererwa kye eky’okuhindura ensi Paradiso. Abo boona abari omu “bituuro” naija kubazoora. (Yohaana 5:28, 29) Abantu tibarikwija kugaruka kurwara nari kufa. Yesu naija kwihaho oburemeezi bwona oburetsirweho Sitaane. Yehova naija kukoresa Yesu “kuhwerekyereza emirimo ya Sitaane.” (1 Yohaana 3:8) Buzima twine omugisha ahakuba Yehova atwire naatugumisiririza ngu tubaase kumumanya kandi tucwemu ngu abe Omutegyeki waitu. (Shoma 2 Petero 3:9, 10.) N’obu turikubonabona naatuhwera kugumisiriza.—Yohaana 4:23; shoma 1 Abakorinso 10:13.

 ¹⁸ Yehova tarikutugyema kumutoorana kuba omutegyeki waitu. Akaha abantu ekiconco ky’okwecweramu. Ka tureebe oku ekiconco eki kiri eky’omugasho ahariitwe.

19. Yehova atuhaire kiconco ki eky’omuhendo, kandi ahabw’enki twine kukisiima?

¹⁹ Ekiconco ky’omutaano eki Yehova atuhaire nikitubaasisa kuba ab’omutaano aha nyamaishwa. Nizikora ebintu ahabw’obwengye obwazihangiirwemu, kwonka itwe nitubaasa kucwamu eki turikwenda, kandi nitubaasa n’okucwamu kushemeza Yehova. (Enfumu 30:24) Kandi, tituri nk’ebyoma ebirikukora ebi byakoreirwe kukora byonka. Twine obugabe obw’okwecweramu oku turikwenda ngu tube, ou turikwenda ngu abe munywani waitu, n’eki turikwenda ngu tukore. Yehova naayenda ngu tugire okushemererwa.

20, 21. Noobaasa kucwamu ota omu muringo gw’obwengye?

²⁰ Yehova naayenda ngu tumukunde. (Matayo 22:37, 38) Ni nk’omuzaire orikushemererwa kuhurira omwana we naagira ngu “niinkukunda,” arikukigamba kuruga aha mutima beitu atagyemirwe. Yehova akatuha obugabe bw’okwecweramu kumuheereza nari kutamuheereza. Sitaane, Adamu na Haawa bakacwamu kutaheereza Yehova. Noija kukoresa ota ekiconco kyawe eky’okwecweramu?

²¹ Koresa obugabe bwawe bw’okwecweramu kuheereza Yehova. Hariho obukaikuru bw’abantu abandi abacwiremu kushemeza Yehova bakanga Sitaane. (Enfumu 27:11) Noobaasa kukora ki hati, kwija kuba omu nsi ya Ruhanga ensya ku araiheho okubonabona kwona? Eshuura erikukurataho neija kugarukamu ekibuuzo ekyo.