1, 2. Ahabw’enki Baibuli n’ekiconco ky’omutaano kuruga ahari Ruhanga?

NOOHURIRA ota munywani waawe yaakuha ekiconco? Nooba oine ekihika ky’okufunduura okareeba eki yaakuha, kandi nooshemererwa ahabw’okugira ngu munywani waawe yaakuteekateekaho. Buzima noomusiima ahabw’ekiconco ekyo.

² Baibuli n’ekiconco kuruga ahari Ruhanga. Neetumanyisa ebintu ebi tutarikubaasa kushanga ahandi. Nk’eky’okureeberaho, neetugambira ngu Ruhanga akahanga eiguru, ensi, omushaija n’omukazi abaabandize. Erimu emisingye erikubaasa kutuhwera twaba twine oburemeezi. Baibuli neetworeka oku Ruhanga arikwija kuhikiiriza ekigyendererwa eky’okuhindura ensi omwanya murungi. Buzima Baibuli n’ekiconco ekirikushemeza!

3. Omu kwega Baibuli noija kwetegyereza ki?

³ Waayega Baibuli, noija kwetegyereza ngu Ruhanga naayenda ngu obe munywani we. Waaguma nooyega ebirikumukwataho, noija kweyongyera kuba munywani we.

4. Niki ekirikukushemeza aha Baibuli?

⁴ Baibuli evunwirwe omu ndimi nka 2,600, kandi hateirwe obuhumbi bwa Baibuli. Abantu abarikurenga ebicweka 90 ahari igana omu nsi, nibabaasa kushoma Baibuli omu ndimi zaabo. Baibuli ezirikurenga aha kahumbi niziheebwa abantu buri sabiiti! Buzima, tihariho kindi kitabo ekiri nka Baibuli.

5. Ahabw’enki turikubaasa kugira ngu Baibuli ‘ehandiikisiibwe Ruhanga’?

⁵ Baibuli ‘ehandiikisiibwe Ruhanga.’ (Shoma 2 Timoseo  3:16.) Kwonka abamwe nibabaasa kugira ngu ‘abantu nibo baagihandiikire, mbwenu shi neeruga ahari Ruhanga mu muringo ki?’ Baibuli neegarukamu eti: ‘Abantu bakaba bagamba ebyaruga ahari Ruhanga, nibakoresibwa omwoyo gurikwera.’ (2 Petero 1:21) Eki kiri nk’oku mukuru w’eishomero yaakugambira omuhandiiki we kuhandiika ebaruha. Ebaruha egyo neeba erimu ebiteekateeko by’oha? Buzima neeba erimu ebiteekateeko bya mukuru w’eishomero, beitu bitari by’omuhandiiki. Omu muringo nigwo gumwe, Baibuli erimu obutumwa kuruga ahari Ruhanga, beitu butari bw’abantu abaagihandiikire. Ruhanga akabahwera kuhandiika ebiteekateeko bye. N’ahabw’ekyo, Baibuli buzima ‘n’ekigambo kya Ruhanga.’—1 Abatesalonika 2:13; reeba Ebirikukiraho 2.

6, 7. Ahabw’enki nitubaasa kugira ngu ebiri omu Baibuli nibiikirizana?

⁶ Kikatwara emyaka erikurenga 1,600 kuhandiika Baibuli. Abaagihandiikire bakabaho omu bwire butarikushushana. Abamwe bakaba beegire munonga kandi abandi bakaba bateegire. Nk’eky’okureeberaho, omwe akaba ari omushaho. Abandi bakaba bari abahingi, abajubi b’eby’enyanja, abariisa b’entaama, baanabi, abaramuzi n’abagabe. N’obu abaahandiikire Baibuli baraabe baabaire batarikushushana, byona ebirimu nibiikirizana. Terikugamba ekintu omu shuura emwe kandi ekagamba ekirikutaana nakyo omu shuura endiijo. *

⁷ Eshuura z’okubanza omu Baibuli nizishoboorora oku oburemeezi bwatandikire, kandi eshuura ezirikuhererukayo nizooreka oku Ruhanga araiheho oburemeezi obwo arikuhindura ensi paradiso. Baibuli erimu ebyafaayo by’abantu ebyabaireho enkumi n’enkumi z’emyaka enyima, kandi ebyafaayo ebyo nibyoreka ngu Ruhanga atwire naahikiiriza ekigyendererwa kye.

8. Ha eby’okureeberaho ebirikworeka ngu Baibuli neehikaana n’ebya sayansi ebihikire.

⁸ Baibuli terahandiikirwe kwegyesa aha bya sayansi, nari kuba ekitabo ky’okukoresa omu mashomero, kwonka ebi erikugamba aha sayansi bihikire. Buzima ekyo nikyoreka ngu Baibuli neeruga ahari Ruhanga. Nk’eky’okureeberaho, ekitabo ky’Abaleevi kirimu obuhabuzi obu Ruhanga yaabaire aha Abaisraeli kuzibira endwara kujanjaara. Ebi bikahandiikwa kare abantu batakamanyire oku obukooko burikureeta endwara. Kandi Baibuli neegira ngu ensi  ehanikirwe ahari busha. (Yobu 26:7) N’obu abantu baabaire nibagira ngu ensi etereire, Baibuli ekagira ngu ensi eri nk’embumburi.—Isaaya 40:22.

9. Ahabw’okugira ngu abaahandiikire Baibuli bakagamba amazima, nikituhwera kwetegyereza ki?

⁹ Kandi ebi Baibuli erikugamba aha byafaayo bihikire. Kwonka ebitabo by’ebyafaayo tibihikire gye, ahabw’okuba abaabihandiikire bakaba batarikugamba mazima. Nk’eky’okureeberaho, tibarikworeka obu amahanga gaabo gaasingurwa omu ntaro. Kwonka abaahandiikire Baibuli bakaba bagamba amazima n’obu Abaisraeli baabaire basingurwa omu rutaro. Bakahandiika n’aha nshobe zaabo. Nk’eky’okureeberaho, omu kitabo ky’Okubara, Musa naatugambira ngu akakora enshobe y’amaani, kandi ngu Ruhanga akamuhana. (Okubara 20:2-12) Okugamba amazima kw’abaagihandiikire nikworeka ngu neeruga ahari Ruhanga. Ekyo nikimanyisa ngu tuhikire kwesiga ebiri omu Baibuli.

10. Ahabw’enki obuhabuzi bwa Baibuli burikutuhwera n’omu bunaku obu?

¹⁰ Baibuli ekahandiikisibwa Ruhanga kandi eine “omugasho gw’okwegyesa omuntu, n’okumuhana n’okumuhabura.” (2 Timoseo 3:16) Buzima, obuhabuzi oburi omu Baibuli nibutuhwera hati. Yehova naamanya obuhangwa bwaitu, n’ahabw’ekyo naayetegyereza oku turikuteekateeka n’oku turikwehurira. Naatumanya kukira oku turikwemanya, kandi naayenda ngu tushemererwe. Naamanya ekirungi n’ekitari kirungi ahabwaitu.

11, 12. (a) Yesu akaha buhabuzi ki oburungi omuri Matayo eshuura 5 okuhika aha ya 7? (b) Ebindi ebi turikubaasa kwega omu Baibuli ni biiha?

¹¹ Omuri Matayo eshuura ya 5 okuhika aha ya 7, nitushangamu  obuhabuzi burungi bwa Yesu oburikukwata aha kushemererwa, oku twine kukwatanisa n’abandi, oku twine kushaba, n’oku twine kutwara esente. N’obu Yesu araabe yaahaire obuhabuzi obu emyaka 2000 enyima, na hati nibukora, kandi n’obw’omugasho.

¹² Kurabira omu Baibuli Yehova naatwegyesa emisingye erikutuhwera kugira amaka marungi, kuba abakozi barungi n’okutuura n’abandi omu busingye. Emisingye ya Baibuli neebaasa kuhwera buri muntu n’obu yaakuba naatuura nkahi nari aine buremeezi ki.—Shoma Isaaya 48:17; reeba Ebirikukiraho 3.

13. Isaaya akagira ngu niki ekyabaire nikiija kuhika aha rurembo Babulooni?

¹³ Obunabi bw’omu Baibuli obwingi, bwahikiriire. Nk’eky’okureeberaho, nabi Isaaya akagira ngu orurembo Babulooni rukaba nirwija kucwekyerezibwa. (Isaaya 13:19) Akooreka gye oku orurembo orwo rwabaire nirwija kusingurwa. Orurembo Babulooni rukaba rwetoroirwe omugyera n’engo mpango. Kwonka Isaaya akagira ngu omugyera gukaba nigwija kwoma n’enyigi z’engo zirekwe ziigwire. Amahe gakaba nigaija kutaaha omu rurembo garutaahirire hatariho kurwana. Kandi Isaaya akagira ngu omushaija owaabaire naayetwa Kuuro niwe yaabaire naija kusingura Babulooni.—Shoma Isaaya 44:27–45:2; reeba Ebirikukiraho 4.

14, 15. Obunabi bwa Isaaya bukahikiirira buta?

¹⁴ Bwanyima y’emyaka 200 obunabi obu buherize kuhandiikwa, eihe rikaija kutaahirira Babulooni. N’oha owaabaire aryebembeire? N’omugabe wa Buperesi orikwetwa Kuuro, nk’oku obunabi bwabaire nibugamba. Buri kimwe ekirikukwata aha bunabi obu kikaba nikiza kuhikiirira.

¹⁵ Omu kiro ekyo obu amahe gaataahirira orurembo,  Abababulooni bakaba baine obugyenyi. Bakaba nibahurira baine oburinzi ahabw’ebisiika bihango by’orurembo n’omugyera. Aheeru y’orurembo, Kuuro n’amahe ge bakatimba oruhazo kubaasa kutuubya amaizi g’omugyera. Amaizi gakatuuba gaaba makye munonga kyabaasisa abaserukare Abaperesi kwambuka. Kwonka shi amahe ga Kuuro gakaba nigaija kuraba gata aha bisiika bya Babulooni? Nk’oku obunabi bwabaire nibugira, enyingi z’orurembo zikaguma  ziigwire, abaserukare baataahamu hataine ekirikubateganisa.

16. (a) Isaaya akagira ngu niki ekyabaire nikiija kuhika ahari Babulooni? (b) Nitumanya tuta ngu obunabi bwa Isaaya bukahikiirira?

¹⁶ Isaaya akagira ngu tihaine owaabaire naija kugaruka kutuura omu Babulooni. Akahandiika ati: “Terigaruka kutaahwamu, nari okutuurwamu obusingye bwona; Abaharabu tibariteerayo mahema gaabo, kandi n’abariisa tibarizaagizayo amagana gaabo.” (Isaaya 13:20) Mbwenu shi obunabi obu bukahikiirira? Ahu Babulooni yaabaire eyombekirwe, mahiro nka 50 bukiizi-bwa-buryo bwa Baghdad, omuri Iraq hati n’amatongo. Nangwa na hati, tihaine orikutuurayo. Yehova akeeyerera Babulooni “n’ekyeyerezo ekirikuhwerekyereza.”—Isaaya 14:22, 23. *

17. Ahabw’enki turikubaasa kwesiga ebi Ruhanga yaaraganiise byona?

¹⁷ Ahabw’okugira ngu obunabi bwingi obw’omu Baibuli bwahikiriire, nitubaasa kwesiga eki Baibuli erikugamba aha biro by’omumaisho. Nitubaasa kuhamya ngu Yehova  naija kuhikiiriza eki yaaraganiise eky’okuhindura ensi paradiso. (Shoma Okubara 23:19.) Buzima, twine amatsiko ‘g’amagara agatahwaho agu Ruhanga otabaasa kubeiha yaaturaganiise iranaira.’—Tito 1:2. *

18. Paulo akashoboorora ata aha ‘kigambo kya Ruhanga’?

¹⁸ Tihariho ekitabo ekindi ekiri nka Baibuli. Neikirizana, kandi ebi erikugamba aha sayansi n’aha byafaayo bihikire. Neetuha obuhabuzi burungi, kandi erimu obunabi bwingi obwahikiriire. Kwonka Baibuli erimu ekirikukira ahari ekyo. Entumwa Paulo akahandiika ati: “Ekigambo kya Ruhanga kiine amagara n’amaani.” Eki nikimanyisa ki?—Shoma Abaheburaayo 4:12.

19, 20. (a) Baibuli neekuhwera eta omu kweshwijuma? (b) Noobaasa kworeka ota ngu noosiima Baibuli?

¹⁹ Baibuli neebaasa kuhindura emitwarize yaawe. Neebaasa kukuhwera kweshwijuma okeemanya. Neebaasa kukuhwera kumanya ebiteekateeko byawe n’enyehurira zaawe. Nk’eky’okureeberaho, nitubaasa kuba nituteekateeka ngu nitukunda Ruhanga. Kwonka kubaasa kworeka ngu buzima nitumukunda, twine kugyendera aha ki Baibuli erikwegyesa.

²⁰ Baibuli buzima neeruga ahari Ruhanga. Naayenda ngu ogishome, oyegye ebirimu kandi ogikunde. Yoreka ngu noosiima ekiconco eki, kandi gumizamu noogyega. Obwo nibwo oraayetegyereze ekigyendererwa kya Ruhanga ahabw’abantu. Omu shuura erikukurataho, noija kwega ebirikukwata aha kigyendererwa ekyo.