1. N’oha owaatuhaire amagara?

YEHOVA ni “Ruhanga ohuriire.” (Yeremia 10:10) Niwe Muhangi waitu, kandi atuhaire amagara. Baibuli neegira eti: “Niiwe waahangire byona; ahabw’okukunda kwawe bikahangwa kandi byabaho.” (Okushuuruurwa 4:11) Eego, Yehova naayenda ngu tugire amagara. Amagara n’ekiconco kirungi kuruga ahariwe.—Shoma Zaaburi 36:9.

2. Nitubaasa kuba tuta abasinguzi?

² Yehova naatuha ebi turikwetenga kubaasa kuba abahuriire, nk’eby’okurya n’amaizi. (Ebyakozirwe 17:28) Kwonka ekirikukirayo, naayenda ngu twaba tuhuriire tugume twine okushemererwa. (Ebyakozirwe 14:15-17) Kubaasa kuba abasinguzi, twine kworobera ebiragiro bya Ruhanga.—Isaaya 48:17, 18.

3. Yehova akakorera ki Kaini ahabw’okwita Abeeli?

³ Baibuli neeyoreka ngu amagara g’abantu n’ag’omuhendo ahari Yehova. Nk’eky’okureeberaho, obu Kaini mutabani wa Adamu na Haawa yaagirira omurumuna Abeeli ekiniga kingi munonga, Yehova akamurabura ngu akaba aine kurinda ekiniga kye. Kwonka Kaini akeehuzya okurabura okwo, yaagumizamu aine ekiniga “yaagurukira Abeeli omurumuna, yaamwita.” (Okutandika 4:3-8) Yehova akafubira Kaini ahabw’okwita Abeeli. (Okutandika 4:9-11) N’ahabw’ekyo ekiniga na rwango n’eby’akabi, ahabw’okuba nibibaasa kutureetera kuba enshaarizi nari abainazi. Omuntu ori atyo tarikubaasa kutunga amagara agatahwaho. (Shoma 1 Yohaana 3:15.) Kubaasa kushemeza Yehova, twine kukunda abantu boona.—1 Yohaana 3:11, 12.

4. Kimwe aha Biragiro ebi Ruhanga yaahaire Abaisraeli nikitwegyesa ki aha kiconco ky’amagara?

 ⁴ Bwanyima y’emyaka mingi, Yehova akooreka ngu naatwara amagara nk’ag’omuhendo obu yaaha Musa ebiragiro ikumi. Kimwe aharibyo nikigira kiti: “Otariita.” (Eky’Ebiragiro 5:17) Omuntu ku yaabaire aita mugyenzi we akigyendereire, nawe akaba aitwa.

5. Ruhanga naatwara ata okwihamu enda?

⁵ Ruhanga naatwara ata okwihamu enda? Buzima, n’amagara g’omwana otakazairwe, Yehova naagatwara nk’ag’omuhendo. Omu Biragiro ebi Yehova yaahaire Abaisraeli, akagira ngu omuntu yaahutaaza omukazi oine enda kandi omwana we akafa, omuntu ogwo nawe aitwe. (Shoma Okuruga 21:22, 23; Zaaburi 127:3.) Eki nikimanyisa ngu okwihamu enda ni kibi.—Reeba Ebirikukiraho 28.

6, 7. Nitworeka tuta ngu nitutwara amagara nk’ag’omuhendo?

⁶ Nitubaasa kworeka tuta ngu nitutwara amagara gaitu n’ag’abandi nk’ag’omuhendo? Tutarikukora ekintu kyona ekirikuta amagara gaitu nari ag’abandi omu kabi. N’ahabw’ekyo nitwetantara kukoresa etaabe nari amairungi nari emibazi y’ekitokooza bwongo, ahabw’okuba nibibaasa kutwita nari bitukore kubi.

⁷ Ruhanga akatuha amagara n’omubiri kandi tushemereire kubikoresa nk’oku arikwenda. N’ahabw’ekyo twine kureeberera gye emibiri yaitu. Twaba tutakozire tutyo, nitwija kuba abatashemeire omu maisho ga Ruhanga. (Abarooma 6:19; 12:1; 2 Abakorinso 7:1) Titurikubaasa kuramya Yehova, owaatuhaire amagara, twaba tutarikutwara amagara nk’ag’omuhendo. N’obu kyakuba kigumire kucwa omuze mubi, Yehova naija kutuhwera twateeraho kugucwa, ahakuba nituba nitutwara amagara nk’ag’omuhendo.

8. Nitwija kukora ki kwetantara kuta amagara gaitu n’ag’abandi omu kabi?

 ⁸ Twaheza kwega ngu amagara n’ekiconco ky’omuhendo. N’ahabw’ekyo Yehova naayenda ngu twetantare kuta amagara gaitu nari ag’abandi omu kabi. Eki nitukyoreka kurugiirira aha muringo ogu turikuvugamu emotoka, piki, nari ebindi biiruka. Nitwetantara emizaano y’akabi nari erimu obushaarizi. (Zaaburi 11:5) Kandi nituteeraho kureeba ngu enju zaitu tizaaba z’akabi. Yehova akaragiira Abaisraeli ati: “Ku oryombeka enju nsya, ote aha mutwe gwayo eky’okuzibira abantu kugwa, [nari ekisiika kigufu] kigyehinguririze, orekye kureetera enju yaawe orubanja rw’eshagama ahabw’omuntu kugihanukaho, akagwa ahansi.”—Eky’Ebiragiro 22:8.

9. Twine kutwariza tuta enyamaishwa?

⁹ Nangwa n’oku turikutwariza enyamaishwa nakyo ni kikuru ahari Yehova. Naatwikiriza kwita enyamaishwa kutunga eky’okurya n’eky’okujwara, nari enyamaishwa yaaba eri ey’akabi aha magara gaitu. (Okutandika 3:21; 9:3; Okuruga 21:28) Kwonka titurikwenda kutwariza kubi enyamaishwa nari kuziitira eryo.—Enfumu 12:10.

10. Nitumanya tuta ngu eshagama neejwekyera amagara?

¹⁰ Yehova naatwara eshagama nk’erikwera ahabw’okuba neejwekyera amagara. Bwanyima ya Kaini kwita omurumuna Abeeli, Yehova akagira Kaini ati: “Eiraka ry’eshagama ya murumuna waawe nirimpururiza omu itaka.” (Okutandika 4:10) Eshagama ya Abeeli ekaba neejwekyera amagara ge, kandi Yehova akafubira Kaini ahabw’okwita Abeeli. Bwanyima y’Omwegyemure gw’omu bunaku bwa Noa, nabwo Yehova akooreka ngu eshagama neejwekyera amagara. Yehova akaragiira Noa n’ab’eka ye kurya enyama y’enyamaishwa. Akagira ati: “Ebirikwegyendesa byona  ebiine amagara biryaba eby’okurya byanyu; mbibahaire byona nk’oku naabahaire ebirikumera.” Kwonka, hariho ekintu kimwe eki Yehova yaabaragiire kutarya. Akabagira ati: “Mutarirya enyama n’amagara gaayo, niyo shagama yaayo.”—Okutandika 1:29; 9:3, 4.

11. Ni kiragiro ki ekirikukwata aha shagama eki Ruhanga yaahaire eihanga rya Israeli?

¹¹ Bwanyima y’emyaka nka 800 Yehova aherize kuha Noa ekiragiro ky’okutarya eshagama, akaragiira abantu be ati: “Kandi omuntu weena omu Baisraeli nari ow’omu banyamahanga obashuhuukiiremu, oriita enyamaishwa erikuriibwa nari enyonyi ahiigire, ayate eshagama yaayo ahansi agishwekye eiju. Akongyeraho ati: “Mutarirya eshagama.” (Abaleevi 17:13, 14) Nabwo Yehova akaba naayenda ngu abantu be batware eshagama nk’erikwera. Bakaba baine kurya enyama beitu etari shagama. Ku baabaire baita enyamaishwa erikuriibwa, bakaba bashuka eshagama yaayo ahansi.

12. Abakristaayo nibatwara bata eshagama?

¹² Bwanyima y’emyaka Yesu aherize kufa, entumwa n’abareeberezi omu kibiina Ekikristaayo omuri Yerusaalemu bakateeranira hamwe kucwamu bimwe aha biragiro ebyabaire bihairwe Abaisraeli, ebi Abakristaayo baabaire baine kukuratira. (Shoma Ebyakozirwe 15:28, 29; 21:25.) Nabwo Yehova akabahwera kwetegyereza ngu naatwara eshagama nk’ey’omuhendo, kandi bakaba baine kugitwara nk’erikwera. Abakristaayo aba ira bakaba batarikubaasa kurya nari kunywa eshagama nari kurya enyama erimu eshagama. Ku baakukikozire, kikaabaire kibi nk’okuramya ebishushani nari obushambani. Kuruga obwo, Abakristaayo ab’amazima batwire nibanga kurya nari kunywa eshagama. Kandi shi obunaku obu? Nabwo Yehova naayenda ngu tutware eshagama nk’erikwera.

13. Ahabw’enki Abakristaayo batarikwikiriza kuteebwamu eshagama?

 ¹³ Mbwenu shi eki nikimanyisa ngu Abakristaayo tibashemereire kwikiriza kuteebwamu eshagama? Eego. Yehova akaturagiira kutarya nari kunywa eshagama. Ka tugire ngu omushaho yaakugambira kureka ebirikusinza, mbwenu shi noobitaatsya omu mubiri orikubirabya omu kikatu? Ngaaha buzima! Nikyo kimwe, ekiragiro ky’okutarya eshagama nikimanyisa ngu titushemereire kwikiriza kuteebwamu eshagama.—Reeba Ebirikukirayo 29.

14, 15. Ahabw’enki ni kikuru Abakristaayo kuha ekitiinisa amagara kandi bakoorobera Yehova?

¹⁴ Kandi shi omushaho yaagira ngu buzima waaba otaikiriize kuteebwamu eshagama noija kufa? Buri muntu aine kwecweramu yaaba aine kworobera ekiragiro kya Ruhanga ekirikukwata aha shagama. Abakristaayo nibaha ekitiinisa ekiconco ky’amagara ekyatuhairwe Ruhanga, kandi nitwikiriza emiringo endiijo ey’obujanjabi kubaasa kuguma tuhuriire, kwonka titurikwikiriza kuteebwamu eshagama.

¹⁵ Nituteeraho kuguma twine amagara marungi, kwonka ahabw’okugira ngu amagara n’ag’omuhendo ahari Ruhanga, titurikwikiriza kuteebwamu eshagama. Ni kikuru kworobera Yehova okukira okwenda kwongyera aha buhangaazi bw’amagara gaitu turikumugomera. Yesu akagira ati: “Omuntu weena orikwenda kukiza amagara ge aryagabuza; kandi weena orikubuza amagara ge ahabwangye, aryagakiza.” (Matayo 16:25) Nitwenda kworobera Yehova ahabw’okuba nitumukunda. Yehova naamanya ekirungi eki turikwetenga, kandi nitutwara amagara nk’ag’omuhendo kandi agarikwera, nk’oku arikwenda.—Abaheburaayo 11:6.

16. Ahabw’enki abaheereza ba Ruhanga nibamworobera?

¹⁶ Abaheereza ba Ruhanga abeesigwa bamaririire kworobera ekiragiro kye ekirikukwata aha shagama. Tibarikurya  shagama nari kuginywa, kandi tibarikwikiriza kugiteebwamu baaba nibajanjabwa. * Kwonka, nibaikiriza obujanjabi obundi kubaasa kukiza amagara gaabo. Nibaikiririza kimwe ngu Omuhangi w’amagara n’eshagama naamanya ekirungi eki barikwetenga. Noikiriza ngu naamanya ekirungi eki orikwetenga?

17. Omuri Israeli, ni nkoresa ki y’eshagama yonka ei Yehova Ruhanga yaabaire naikiriza?

¹⁷ Omu Biragiro ebi Ruhanga yaahaire Musa, akagira Abaisraeli ati: “Amagara g’omubiri gaba omu shagama; nikyo naagibaheera kushukwa aha itambiro ngu erihiirire amagara gaanyu; [nari, ngu mushabe okusaasirwa ahakuba] eshagama niyo erihiirira.” (Abaleevi 17:11) Abaisraeli ku baabaire bashiisha, bakaba bashaba Yehova kubasaasira barikuhayo ekitambo ky’enyamaishwa, kandi barikushaba n’omunyamurwa kushuka emwe aha shagama y’enyamaishwa aha itambiro omu hekalu. Abaisraeli bakaba nibaikirizibwa kukoresa eshagama omu muringo ogu gwonka.

18. Ekitambo kya Yesu nikitubaasisa kwija kutunga ki?

¹⁸ Obu Yesu yaija omu nsi, akahayo amagara ge nari eshagama ye kuza omu mwanya gw’ebitambo by’enyamaishwa ngu tusaasirwe ebibi byaitu. (Matayo 20:28; Abaheburaayo 10:1) Amagara ga Yesu gakaba gari ag’omuhendo, ku yaagarukire omu iguru bwanyima y’okuzooka, Yehova akaabaasa kuha abantu boona omugisha gw’okutuuraho ebiro byona.—Yohaana 3:16; Abaheburaayo 9:11, 12; 1 Petero 1:18, 19.

19. Twine kukora ki twaba nitwenda kutagira rubanja “ahabw’eshagama y’abantu boona”?

 ¹⁹ Twine okushemererwa kwingi ahabw’ekiconco ky’amagara eki Yehova Ruhanga atuhaire! Kandi nitwenda kugambira abantu ngu baikiririza omuri Yesu, nibaija kutuuraho ebiro byona. Nitukunda abantu, kandi nitukora kyona ekirikubaasika kubeegyesa oku barikubaasa kutunga amagara agatahwaho. (Ezekieli 3:17-21) Kandi nk’entumwa Paulo, naitwe nitwija kugira tuti: “Ndi mwere ahabw’eshagama y’abantu boona, ahakuba tindatiinire kubagambira naama yoona eya Ruhanga.” (Ebyakozirwe 20:26, 27) Buzima, nitworeka ngu nituha amagara n’eshagama ekitiinisa, twagambira abandi ebirikukwata ahari Yehova n’oku amagara gari ag’omuhendo ahariwe.