ESHUURA YA IKUMI NA ITAANO
Okuramya Ruhanga omu Muringo Oguhikire
1. N’oha oine kutugambira omuringo oguhikire gw’okuramya Ruhanga?
AMADIINI maingi nigagira ngu nigeegyesa amazima agarikukwata ahari Ruhanga. Kwonka ekyo tikihikire, ahakuba amadiini nigeegyesa ebintu ebitarikushushana ebirikukwata ahari Ruhanga n’oku tushemereire kumuramya. Nitubaasa kumanya tuta omuringo oguhikire gw’okuramya Ruhanga? Yehova niwe wenka orikubaasa kutugambira oku tushemereire kumuramya.
2. Noobaasa kumanya ota omuringo oguhikire ogw’okuramya Ruhanga?
2 Yehova atuhaire Baibuli kugira ngu tubaase kwega omuringo oguhikire ogw’okumuramya. N’ahabw’ekyo yega Baibuli, kandi Yehova naija kukuhwera kugasirwa omu bi arikukwegyesa, ahakuba naakufaho.—Isaaya 48:17.
3. Ruhanga naayenda ngu tukore ki?
3 Abantu abamwe nibagira ngu Ruhanga naikiriza amadiini goona, kwonka ekyo tikyo Yesu yaatwegyeise. Yesu akagira ati: “Omuntu weena orikugira ati: Mukama wangye, Mukama wangye, tiwe aritaaha omu bukama bw’omu iguru, kureka orikukora ebi Tata ow’omu iguru akunda.” N’ahabw’ekyo, ni kikuru kwega ebi Ruhanga arikukunda kandi tukabikora. Eki ni kikuru ahakuba Yesu akagyeragyeranisa abantu abatarikworobera Ruhanga n’abantu “abakora eby’obugomi.”—Matayo 7:21-23.
4. Yesu akagamba ki aha kukora ebi Ruhanga arikukunda?
4 Yesu akagira ngu twaba nitwenda kukora ebi Ruhanga arikukunda, nitwija kuraba omu mbeera zigumire. Akagira ati: “Mutaahire omu irembo erifunzire; ahakuba eirembo eririkutaasya omu kucwekyerera rigarami, n’omuhanda gwaryo guba muhango, kandi n’abagutooramu baba baingi; kwonka eirembo eririkutaasya omu magara rifunzire, n’akahanda kaaryo kagumire, n’abakazoora baba bakye.” (Matayo 7:13, 14) Eirembo erifunzire nari omuringo oguhikire ogw’okuramya Ruhanga niguhitsya omu magara agatahwaho. Eirembo erigarami nari omuringo ogutahikire ogw’okuramya Ruhanga niguhitsya omu kucwekyerera. Kwonka Yehova tarikwenda ngu hagire omuntu weena owaacwekyerera. Naaha buri muntu weena omugisha gw’okwega ebirikumukwataho.—2 Petero 3:9.
OMURINGO OGUHIKIRE OGW’OKURAMYA RUHANGA
5. Noobaasa kumanya ota abo abarikuramya Ruhanga omu muringo oguhikire?
5 Yesu akagira ngu nitubaasa kumanya abo abarikuramya Ruhanga omu muringo oguhikire. Nitubamanya turikushwijuma ebi barikwikiriza n’emitwarize yaabo. Yesu akagira ati: “Muryabamanyira aha byana byabo.” Kandi akongyeraho ati: “Omuti gwona omurungi gwana ebyana birungi.” (Matayo 7:16, 17) Kwonka abaheereza ba Ruhanga nibateeraho kukora ebihikire. Hati nituza kureeba oku turikubaasa kumanya abo abarikuramya Ruhanga omu muringo oguhikire.
6, 7. Ahabw’enki okuramya okw’amazima nikwegamira ahari Baibuli, kandi nitwega ki ahari Yesu?
6 Okuramya kwaitu kushemereire kuba nikwegamira aha Baibuli. Baibuli neegira eti: ‘Ebyahandiikirwe byona, bihandiikisiibwe omwoyo gwa Ruhanga, biine omugasho gw’okwegyesa omuntu, n’okumuhana, n’okumuhabura, n’okumutendeka omu by’okuhikiirira, ngu omuntu wa Ruhanga abone kuba ohikire buzima, oine byona ebishemereire omurimo gwona omurungi.’ (2 Timoseo 3:16, 17) Entumwa Paulo akahandiikira Abakristaayo arikugira ati: “Ku mwahuriire ekigambo ky’engiri ya Ruhanga eki twabagambiire, mwakyakiira; kandi timwakyakiira nk’ekigambo ky’abantu, kureka nk’ekigambo kya Ruhanga.” (1 Abatesalonika 2:13) Okuramya okw’amazima nikwegamira aha Kigambo kya Ruhanga, Baibuli. Tikurikwegamira aha biteekateeko by’abantu, emigyenzo, nari ekintu kyona.
7 Ebi Yesu yaayegyeise byona bikaba nibiruga omu Kigambo kya Ruhanga Baibuli. (Shoma Yohaana 17:17.) Akaba naajuriza Ebyahandiikirwe. (Matayo 4:4, 7, 10) Abaheereza ba Yehova ab’amazima nibatooreza Yesu barikukoresa Baibuli omu kwegyesa kwabo.
8. Yesu akatwegyesa ki aha bikwatiraine n’okuramya Yehova?
8 Tushemereire kuramya Yehova wenka. Zaaburi 83:18 nihagira hati: “Bamanye ngu niiwe wenka orikwetwa Yehova, okira boona, kandi otegyeka ensi yoona.” Yesu akaba naayenda ngu abantu bamanye Ruhanga, kandi akabeegyesa eiziina rya Ruhanga. (Shoma Yohaana 17:6.) Yesu akagira ngu twine kuramya Yehova Ruhanga waitu kandi tukaba niwe twaheereza wenka. (Matayo 4:10) N’ahabw’ekyo, itwe abaheereza ba Ruhanga ab’amazima twine kutooreza Yesu. Nituramya Yehova wenka, tukoresa eiziina rye, kandi turyegyesa abandi tubagambira n’ebi arikuraganisa kutukorera.
9, 10. Nitubaasa kworeka tuta ngu nitukundana?
9 Twine kugirira abantu rukundo eyaabuzima. Yesu akeegyesa abeegi be kuguma nibakundana. (Shoma Yohaana 13:35.) Yaaba turi abooro nari abagaiga, ei turikuruga, ei twakuriire, oruganda rwaitu tibishemereire kuturemesa kukunda abandi. Okukundana kwaitu kushemereire kutureetera kukwatanisa n’ab’eishe-emwe. (Abakolosai 3:14) Titurikwejumba omu ntaro kuza kwita abantu. Baibuli neegira eti: “Ekyo nikyo kimanyisa abaana ba Ruhanga n’abaana ba Sitaane; weena otakora by’okuhikiirira ti wa Ruhanga, n’obu yaakuba otakunda mwene ishe.” Kandi neegaruka egira eti: “Tukundane, turekye kuba nka Kaini owaabaire ari ow’Omubi, akaita omurumuna.”—1 Yohaana 3:10-12; 4:20, 21.
10 Nitukoresa obwire bwaitu, amaani gaitu, n’ebintu byaitu kuhwerahwerana n’okugumyana. (Abaheburaayo 10:24, 25) Nituteeraho ‘kukora gye abantu boona.’—Abagalatia 6:10.
11. Ahabw’enki nitwikiriza Yesu nk’omuhanda ogurikuhitsya ahari Ruhanga?
11 Twine kworobera Yesu ahakuba niwe muhanda ogurikuhitsya ahari Ruhanga. Baibuli neegira eti: “Kandi tihariho ondiijo ou twakuboneramu okujunwa, ahakuba tihariho rindi iziina ahansi y’eiguru eryahairwe abantu, erishemereire kutujuna.” (Ebyakozirwe 4:12) Omu Shuura ya 5 ey’akatabo aka, tukeega ngu Yehova akoohereza Yesu kuhayo amagara ge nk’ekitambo ahabw’abantu abeesigwa. (Matayo 20:28) Yehova akatoorana Yesu kuba Omugabe oraategyeke ensi. Egi niyo nshonga ahabw’enki Baibuli neegira ngu twine kworobera Yesu, twaba nitwenda kutunga amagara agatahwaho.—Shoma Yohaana 3:36.
12. Ahabw’enki tutarikwejumba omu by’obutegyeki?
12 Titushemereire kwejwanzya omu by’obutegyeki. Yesu taraayejumbire omu by’obutegyeki. Obu yaabaire naahozesibwa, akagambira Pilaato omutegyeki Omurooma ati: “Obugabe bwangye ti bw’ensi egi.” (Shoma Yohaana 18:36.) Nka Yesu, nitushagika Obukama bwa Ruhanga obw’omu iguru, n’ahabw’ekyo hoona ahu turikutuura, titurikwejwanzya omu by’obutegyeki. Kwonka, Baibuli neeturagiira “kworobera abakama abarikutegyeka,” nizo gavumenti. (Abarooma 13:1) Nitworobera ebiragiro by’eihanga eri turikutuuramu. Kwonka abantu ku barikutaho ebiragiro ebirikuturemesa kworobera ebiragiro ebya Ruhanga, nitutooreza entumwa ezaagizire ziti: “Tushemereire kworobera Ruhanga okukira abantu.”—Ebyakozirwe 5:29; Mako 12:17.
13. Nitubuurira ki aha bikwatiraine n’Obukama bwa Ruhanga?
13 Nitwikiriza ngu Obukama bwa Ruhanga nibwo buraamareho oburemeezi omu nsi. Yesu akagira ngu amakuru marungi g’Obukama gakaba nigaija kubuurirwa omu nsi yoona. (Shoma Matayo 24:14.) Tihariho gavumenti y’abantu erikubaasa kukora eki Obukama bwa Ruhanga buraatukorere. (Zaaburi 146:3) Yesu akatwegyesa kushaba ngu Obukama bwa Ruhanga bwije. Akagira ati: “Obukama bwawe bwije; ebi okunda bikorwe omu nsi nk’oku bikorwa omu iguru.” (Matayo 6:10) Baibuli neegira ngu Obukama bwa Ruhanga nibwija kucwekyereza gavumenti z’abantu zoona, kandi bwo nibwija kugumaho ebiro byona.—Danieli 2:44.
14. Nooteekateeka ngu ni baahi abarikuramya Ruhanga omu muringo oguhikire?
14 Bwanyima y’okwega enshonga ezi, noobaasa kwebuuza oti: ‘Ni baahi abarikwegyesa ebiri omu Baibuli? Ni baahi abarikugambira abandi eiziina rya Ruhanga? Ni baahi abarikukundana munonga, kandi bakaikiriza ngu Ruhanga akoohereza Yesu kutujuna? Ni baahi abatarikwejumba omu by’obutegyeki? Ni baahi abarikubuurira ngu Obukama bwa Ruhanga bwonka nibwo burikwija kwihaho oburemeezi bwaitu?’ Buzima n’Abajurizi ba Yehova.—Isaaya 43:10-12.
NOIJA KUKORA KI?
15. Twine kukora ki twaba nitwenda ngu Ruhanga asiime okuramya kwaitu?
15 Tikirikumara kwikiriza ngu Ruhanga ariho. Nangwa na baadaimoni nibaikiriza ngu Ruhanga ariho, kwonka tibarikumworobera. (Yakobo 2:19) Ku turaabe nitwenda ngu Ruhanga asiime okuramya kwaitu, twine kwikiriza ngu ariho, kandi tukakora ebi arikuturagiira.
16. Ahabw’enki twine kwangira kimwe okuramya okw’ebishuba?
16 Twine kwangira kimwe ediini z’ebishuba, twaba nitwenda ngu Ruhanga asiime okuramya kwaitu. Nabi Isaaya akahandiika ati: “Murugye ahagati yaarwo, mweyeze.” (Isaaya 52:11; 2 Abakorinso 6:17) Niyo nshonga ahabw’enki tushemereire kwangira kimwe ekintu kyona ekiine akakwate n’okuramya kw’ebishuba.
17, 18. “Babulooni orurembo Orukuru” niki, kandi ahabw’enki abantu baine kururugamu ahonaaho?
17 Ediini y’ebishuba niki? N’ediini yoona erikwegyesa abantu kuramya Ruhanga omu muringo ogurikutaana n’ebiri omu Kigambo kye. Baibuli neegira ngu ediini z’ebishuba zoona nizeetwa “Babulooni Orurembo Orukuru.” (Okushuuruurwa 17:5) Ahabw’enki? Bwanyima y’Omwegyemure gw’omu bunaku bwa Noa, omu rurembo Babulooni hakatandikaho enyegyesa nyingi ezigwire. Enyegyesa ezi ezigwire zikajanjaara omu nsi yoona. Nk’eky’okureeberaho, abantu abaabaire nibatuura Babulooni bakaba nibaramya baaruhanga bashatu omuri omwe. Ebiro ebi, amadiini maingi nigeegyesa ngu Ruhanga n’obushatu, kwonka Baibuli neeyoreka gye ngu hariho Ruhanga omwe wenka ow’amazima, Yehova, kandi ngu Yesu n’Omwana we. (Yohaana 17:3) Abababulooni bakaba nibaikiriza ngu hariho ekintu ekirikuruga omu muntu kikaguma kihuriire omubiri gwaheza kufa, kandi ngu nikibaasa kubonabona omu muriro ogutaraara. Buzima ekyo tikihikire.—Reeba Ebirikukiraho 14, 17, na 18.
18 Ruhanga akagira ngu omu bwire butari bwa hare ediini zoona ez’ebishuba niziija kucwekyerezibwa. (Okushuuruurwa 18:8) Nooyetegyereza ahabw’enki abantu bashemereire kuruga omu diini z’ebishuba ahonaaho? Yehova Ruhanga naayenda ngu okore ekyo obwire butakahweireyo.—Okushuuruurwa 18:4.
Waacwamu kuheereza Yehova, nooyegaita aha bantu abari omu ka emwe omu nsi yoona
19. Waacwamu kuheereza Yehova, naija kukureeberera ata?
19 Waacwamu kuruga omu diini y’ebishuba okaza kuheereza Yehova, bamwe ahari banywani baawe, nari ab’eka yaanyu nibabaasa kutakwetegyereza, kandi nibabaasa n’okukuhiiganisa. Kwonka Yehova tarikubaasa kukutsigaho. Noija kwegaita aha bukaikuru bw’abantu abarikukundana abari nk’eka emwe omu nsi yoona, kandi noija kugira amatsiko g’okutuura omu nsi ya Ruhanga ensya. (Mako 10:28-30) Obundi bamwe ahari banywani baawe abarikukuhakanisa ahabw’okucwamu kwawe kuheereza Yehova, bwanyima nibabaasa kucwamu kwega Baibuli.
20. Ahabw’enki ni kikuru kuramya Ruhanga omu muringo oguhikire?
20 Obwire butari bwa hare, Ruhanga naija kwihaho obubi bwona, kandi Obukama bwe nibwija kutegyeka ensi yoona. (2 Petero 3:9, 13) Obwo ka nibwija kuba obwire burungi! Buri omwe naija kuramya Yehova nk’oku arikwenda ngu tumuramye. N’ahabw’ekyo, ni kikuru ahariiwe kugira eki waakora hati, kandi okacwamu kuramya Ruhanga omu muringo oguhikire.
