1. Noobaasa kuba oine kiteekateeko ki bwanyima y’okwega akatabo aka?

OMU kwega akatabo aka, omanyire amazima agari omu Baibuli, agarikukwata aha magara agatahwaho agu Ruhanga arikuturaganisa, embeera y’abafu, n’amatsiko g’okuzooka. (Omubuurizi 9:5; Luka 23:43; Yohaana 5:28, 29; Okushuuruurwa 21:3, 4) Noobaasa kuba waatandikire kuza omu nteerane z’Abajurizi ba Yehova, kandi noikiriza ngu ediini yaabo ehikire. (Yohaana 13:35) Noobaasa kuba waatandikire kugira omukago murungi na Yehova, kandi omaririire kumuheereza. Kwonka  noobaasa kuba nooteekateeka oti: ‘Hati nshemereire kukora ki kuheereza Ruhanga?’

2. Ahabw’enki omushaija Omuesiopia yaabaire naayenda kubatizibwa?

² Omuesiopia owaabaire ariho obu Yesu yaabaire ari omu nsi, akaba aine ekiteekateeko nk’ekyo. Bwanyima y’obwire Yesu aherize kubatizibwa, omwegi wa Yesu orikwetwa Filipo akabuurira omushaija ogwo. Filipo akamuhwera kwetegyereza ngu Yesu niwe Mesia. Ebi Omuesiopia yaayegire bikamuhika aha mutima yaagira ati: “Reeba, amaizi ngaga! Ekirikunzibira kubatizibwa niki?”—Ebyakozirwe 8:26-36.

3. (a) Ni kiragiro ki eki Yesu yaahaire abakuratsi be? (b) Omuntu ashemereire kubatizibwa ata?

³ Baibuli neekyoreka gye ngu waaba nooyenda kuheereza Yehova, oine kubatizibwa. Yesu akagambira abakuratsi be ati: ‘Mugyende omu mahanga goona, muhindure abantu abeegi nimubabatiza.’ (Matayo 28:19) Yesu akataho eky’okureeberaho arikubatizibwa. Akaibikwa weena omu maizi, tarashukirweho otwizi tukye aha busyo. (Matayo 3:16) Obunaku obu Omukristaayo yaabatizibwa, aine kwibikwa omu maizi weena.

4. Ku orikubatizibwa nooba nooyoreka ki abandi?

⁴ Ku orikubatizibwa, nooba waayoreka abandi ngu buzima nooyenda kuba munywani wa Ruhanga kandi ngu nooyenda kumuheereza. (Zaaburi 40:7, 8) N’ahabw’ekyo noobaasa kwebuuza oti: ‘Nshemereire kukora ki kubaasa kubatizibwa?’

5. (a) Oine kubanza kukora ki otakabatiziibwe? (b) Ahabw’enki ni kikuru kuza omu nteerane z’Ekikristaayo?

⁵ Otakabatiziibwe oine kumanya Yehova na Yesu. Waatandikire kumanya Yehova na Yesu orikwega Baibuli.  (Shoma Yohaana 17:3.) Kwonka ekyo tikirikumara. Baibuli neegira ngu oine ‘kwijuzibwa okumanya okuhikire’ okw’ebi Yehova arikukunda. (Abakolosai 1:9) Enteerane z’Abajurizi ba Yehova niziija kukuhwera kugira omukago murungi na Yehova. Egyo n’emwe aha nshonga nkuru ahabw’enki oine kuza omu nteerane butoosha.—Abaheburaayo 10:24, 25.

6. Oine kuba noomanya ebintu birikwingana ki omu Baibuli kubaasa kubatizibwa?

⁶ Yehova tarikugira ngu oine kumanya ebintu byona ebiri omu Baibuli otakabatiziibwe. Taragizire ngu Omuesiopia aine kubanza yaamanya ebiri omu Byahandiikirwe byona reero, akabona kubatizibwa. (Ebyakozirwe 8:30, 31) Buzima nitwija kuguma nitwega ahari Ruhanga ebiro byona. (Omubuurizi 3:11) Kwonka kubaasa kuba ohikire kubatizibwa, oine kumanya enyegyesa za Baibuli ezirikutandikirwaho kandi okaziikiriza.—Abaheburaayo 5:12.

7. Okwega Baibuli kukuhwereire kuta?

⁷ Baibuli neegira eti: “Otarikwikiriza tarikubaasa kushemeza Ruhanga.” (Abaheburaayo 11:6) N’ahabw’ekyo oshemereire kuba oine okwikiriza otakabatiziibwe. Baibuli neegira ngu abantu abamwe omuri Korinso eya ira ku baahuriire amakuru agu abakuratsi ba Yesu baabuuriire, ‘bakaikiriza, baabatizibwa.’ (Ebyakozirwe 18:8) Naiwe, okwega Baibuli kukuhwereire kwikiriza ebi Ruhanga arikuraganisa n’okwikiriza ekitambo kya Yesu ekirikubaasa kutujuna ekibi n’okufa.—Yoshua 23:14; Ebyakozirwe 4:12; 2 Timoseo 3:16, 17.

8. Niki ekiraakuhigye kugambira abandi ebi orikwega?

⁸ Waaba nooyega Baibuli teeraho kureeba oku  erikukuhwera, waakora ekyo okwikiriza kwawe nikuhama. Noija kugira ekihika ky’okugambira abandi ebi orikwega. (Yeremia 20:9; 2 Abakorinso 4:13) Kwonka shi oshemereire kugambira baahi?

9, 10. (a) Ni baahi abu orikubaasa kutandikiraho kubuurira ebi orikwega? (b) Oshemereire kukora ki waaba nooyenda kubuurira n’ekibiina?

⁹ Ebi orikwega noobaasa kubigambiraho ab’eka yaanyu, banywani baawe, abataahi, nari abu orikukora nabo. Buzima ekyo ni kirungi, kwonka butoosha kikore omu muringo gw’embabazi na rukundo. Bwanyima noija kutandika kubuurira n’ekibiina ky’Abajurizi ba Yehova. Waareeba ngu oyeteekateekire kubuurira, noobaasa kugambira Omujurizi wa Yehova orikukwegyesa Baibuli ngu nooyenda kubuurira n’ekibiina. Orikukwegyesa yaareeba ngu oyeteekateekire, kandi ngu noogyendera aha mitindo ya Baibuli, iwe nawe nimwija kukigaaniiraho n’abareeberezi b’ekibiina babiri.

¹⁰ Niki eki muragaaniireho n’abareeberezi abo? Abareeberezi abo nibaija kugamba naiwe kureeba yaaba nooyetegyereza enyegyesa za Baibuli ezirikutandikirwaho kandi nooziikiriza, ku oraabe nootwaza nk’oku Baibuli erikwegyesa, kandi buzima ku oraabe nooyenda kuba omwe aha Bajurizi ba Yehova. Ijuka ngu abareeberezi nibafayo aha bari omu kibiina, otwariiremu naiwe, n’ahabw’ekyo otatiina kugamba nabo. (Ebyakozirwe 20:28; 1 Petero 5:2, 3) Bwanyima y’okugaaniira n’abareeberezi, nibaija kukumanyisa yaaba ohikire kutandika kubuurira n’ekibiina.

11. Ah’abw’enki ni kikuru munonga kukora empindahinduka otakatandikire kubuurira n’ekibiina?

¹¹ Kwonka obumwe, abareeberezi nibabaasa kukugambira ngu hariho empindahinduka ezindi ezi  oine kukora kubaasa kuba ohikire kubuurira n’ekibiina. Ah’abw’enki ni kikuru kukora empindahinduka ezo? Ahakuba nitubuurira abandi ebirikukwata ahari Ruhanga, nituba nitujwekyera Yehova, n’ahabw’ekyo twine kutwaza omu muringo ogurikumuhaisa ekitiinisa.—1 Abakorinso 6:9, 10; Abagalatia 5:19-21.

12. Ahabw’enki abantu boona baine kweteisa?

¹² Hariho n’ebindi ebi oshemereire kukora otakahikire aha kubatizibwa. Entumwa Petero akagira ati: “Mweteise, muhindukye, ebibi byanyu biragazibwe.” (Ebyakozirwe 3:19) Okweteisa nikimanyisa ki? Nikimanyisa okwefuuza, okashaasha munonga ahabw’ebibi ebi okozire. Nk’eky’okureeberaho, waaba otwire nooyejumba omu by’obushambani, nooba oine kweteisa. Kandi n’obu waakuba otwire nooteeraho kukora ebihikire nabwo oshemereire kweteisa, ahakuba twena nitushobya kandi twine kushaba Ruhanga kutusaasira.—Abarooma 3:23; 5:12.

13. Okuhinduka nikimanyisa ki?

¹³ Mbwenu shi okwefuuza ahabw’ebibi ebi waakozire kyonka nikimara? Ngaaha. Ahabw’okuba Petero akagira ngu oine ‘kuhinduka.’ Eki nikimanyisa ngu oshemereire kurekyera kimwe ebikorwa bibi, kandi okamariirira kukora ebihikire. Kubaasa kukyetegyereza gye, yeshushanirize ngu oriyo nooza omu kicweka ekindi omurundi gw’okubanza. Bwanyima y’akaanya kakye okareeba ngu waahaba. Niki eki oine kukora? Hatariho kubanganisa nooyemerera, ohinduka, ogaruka enyima, reero otoora omu muhanda oguhikire. Nikyo kimwe, waaba nooyega Baibuli noobaasa kushanga ngu oine emitwarize nari ebikorwa bibi ebi oine kuhindura okakora  ebihikire. Ba oyeteekateekire kukora empindahinduka, reero otandikye kukora ebihikire.

14. Omuntu naayehayo ata ahari Ruhanga?

¹⁴ Ekindi kintu kikuru eki oshemereire kukora otakabatiziibwe, n’okwehayo ahari Yehova. Ku orikwehayo ahari Yehova, noomuraganisa omu kushaba ngu nooza kumwemariraho, kandi ngu noija kuguma nookora ebi arikukunda ahabw’okumanya ngu ekyo nikyo kirikukirayo obukuru.—Eky’Ebiragiro 6:15.

15, 16. Niki ekirikuhiga omuntu kwehayo ahari Ruhanga?

¹⁵ Okuraganisa kuheereza Yehova wenka, ni nk’okuraganisa kutuura n’omuntu ou orikukunda, ebiro byona. Ka tugire ngu omwojo atandikire kuriima omwishiki arikwenda kumushwera. Omwojo yaayeyongyera kumanya gye omwishiki ogwo, naamukunda kandi ayenda kuza nawe omu bushwere. N’obu okucwamu oku kuraabe kuri kukuru, omwojo naaba ayeteekateekire kwikiriza obujunaanizibwa obu, ahakuba naakunda omwishiki.

¹⁶ Ku orikweyongyera kwega ebirikukwata ahari Yehova, noomukunda kandi oyenda kukora kyona ekirikubaasika kumuheereza. Eki nikikuhiga kumushaba okamuraganisa kumuheereza. Baibuli neegira ngu weena orikwenda kukuratira Yesu Kristo, aine ‘kweyangisa.’ (Mako 8:34) Ekyo nikimanyisa ki? Nikimanyisa ngu nooba nooyenda kwebembeza okworobera Yehova. Ebi Yehova arikwenda ni bikuru munonga okukira ebyetengo n’ebigyendererwa byawe.—Shoma 1 Petero 4:2.

17. Ahabw’enki abamwe batarikwehayo ahari Yehova?

¹⁷ Abamwe nibatiina kwehayo ahari Yehova ahabw’okutiina  ngu nibabaasa kuremwa kuhikiiriza okuraganisa kwabo kumuheereza. Nibatiina kukora kubi Yehova, nari nibateekateeka ngu baaba bateehaireyo ahariwe, tarikubaasa kubajunaana ahabw’ebi barikukora.

18. Niki ekiraakuhwere kutatiina ngu noija kuremwa kuhikiiriza ebi waaraganiise Yehova?

¹⁸ Rukundo ei oiniire Yehova, neija kukuhwera kwehayo ahariwe otaine kutiina ngu noija kuremwa. Ahabw’okugira ngu noomukunda noija kuteeraho kukora kyona ekirikubaasika kuhikiiriza ebi waaraganiise. (Omubuurizi 5:4; Abakolosai 1:10) Torikwija kuteekateeka ngu okukora ebi Yehova arikukunda kigumire. Entumwa Yohaana akahandiika ati: “Oku nikwo kukunda Ruhanga, itwe okworobera ebiragiro bye; kandi ebiragiro bye tibirusya.”—1 Yohaana 5:3.

19. Ahabw’enki otashemereire kutiina kwehayo ahari Yehova?

¹⁹ Tikirikukwetengyesa kuba ohikiriire kubaasa kwehayo ahari Yehova. Yehova tarikutushaba kukora ebi tutarikubaasa. (Zaaburi 103:14) Naija kukuhwera kukora ekihikire. (Isaaya 41:10) Yesigye Yehova n’omutima gwawe gwona, kandi nawe naija kuguma “naatebeekanisa emihanda yaawe yoona.”—Enfumu 3:5, 6.

20. Waaheza kwehayo ahari Ruhanga, niki ekindi eki oine kukora?

²⁰ Nooteekateeka ngu oyeteekateekire kwehayo ahari Yehova? Waaheza kwehayo ahari Yehova, hariho ekindi eki oine kukora. Oine kubatizibwa.

21, 22. Noobaasa kworeka ota abandi okwikiriza kwawe?

²¹ Manyisa omuhikaanisa w’akakiiko k’abareeberezi ngu oyehaireyo ahari Yehova kandi ngu nooyenda kubatizibwa. Naija kutebeekanisa kugira ngu bamwe aha bareeberezi bakuhwere kweijutsya zimwe aha  nyegyesa za Baibuli ezirikutandikirwaho. Abareeberezi aba ku barikwikirizana ngu buzima ohikire kubatizibwa, nibaija kukumanyisa obu oraabatizibwe haabaho oruteerane oruhango orw’Abajurizi ba Yehova. Aha ruteerane oruhango, nihaheebwa orubazo orurikushoboorora amakuru g’okubatizibwa. Omugambi orikuha orubazo oru, bwanyima naashaba abo abarikuza  kubatizibwa kugarukamu ebibuuzo bibiri ebyorobi. Waagarukamu ebibuuzo ebyo, nooba waayoreka abantu abandi okwikiriza kwawe.—Abarooma 10:10.

²² Bwanyima y’ekyo noobatizibwa. Noyibikwa weena omu maizi. Ku orikubatizibwa nooba waayoreka abandi ngu oyehaireyo ahari Yehova, kandi ngu hati ori omwe aha Bajurizi ba Yehova.

23. Nikimanyisa ki okubatizibwa ‘omu iziina rya Isheboona, n’ery’Omwana n’ery’omwoyo gurikwera’?

²³ Yesu akagira ngu abeegi be bakaba nibaija kubatizibwa ‘omu iziina rya Isheboona n’ery’Omwana n’ery’omwoyo gurikwera.’ (Shoma Matayo 28:19.) Eki nikimanyisa ki? Nikyoreka ngu noikiriza obushoboorozi bwa Yehova na Yesu Kristo, kandi ngu nooyetegyereza oku Yehova arikukoresa omwoyo gwe ogurikwera kuhikiiriza ebigyendererwa bye.—Zaaburi 83:18; Matayo 28:18 Abagalatia 5:22, 23; 2 Petero 1:21.

24, 25. (a) Okubatizibwa nikujwekyera ki? (b) Nitwija kwega ahari ki omu shuura erikuhererukayo?

²⁴ Okubatizibwa nikujwekyera ekintu kikuru munonga. Ku orikwibikwa weena omu maizi, nikyoreka ngu waita emitwarize yaawe eya ira nari ngu waagireka. Ku orikuruga omu maizi nikyoreka ngu waatandika embeera nsya, kandi ngu waatandika kukora ebi Ruhanga arikukunda. Nikyoreka ngu noija kugumizamu nooheereza Yehova. Ijuka ngu nooba oteehaireyo aha bantu, ekibiina, nari omurimo. Kureka nooba ohaireyo amagara gaawe ahari Yehova.

²⁵ Okwehayo nikiija kukuhwera kwongyera kugira omukago murungi na Ruhanga. (Zaaburi 25:14) Kwonka eki tikirikumanyisa ngu omuntu naija kujunwa ahabw’okubatizibwa. Entumwa Paulo akahandiika ati: ‘Mugume nimukorerera okujunwa kwanyu mwine obwoba n’okutetema.’ (Abafilipi 2:12) Okubatizibwa n’entandikiro y’okuheereza Yehova. Kwonka shi noobaasa kuguma ota oine omukago murungi na Yehova? Eshuura erikuhererukayo omu katabo aka neeza kugarukamu ekibuuzo eki.