1, 2. Ni bibuuzo ki ebi abantu barikukira kubuuza?

ABAANA nibabuuza ebibuuzo bingi. Noobaasa kubashobororera ekintu, kwonka bagarukye bakubuuze ngu ahabw’enki? Kandi ku orikuteeraho kubagarukamu, nabwo nibabaasa kukubuuza ngu kwonka shi ahabw’enki?

² Yaaba turi bato nari bakuru, twena nitubuuza. Nitubaasa kwebuuza aha bikwatiraine n’eby’okurya, ebijwaro nari ebi twine kugura. Nari nitubaasa kuba twine ebibuuzo bikuru ebirikukwata aha kubaho kw’abantu nari aha biro by’omumaisho. Kwonka ku turikuba tutatungire eby’okugarukamu ebihikire, nitubaasa kurekyera aho kubuuza.

3. Ahabw’enki baingi nibateekateeka ngu tibarikubaasa kutunga eby’okugarukamu by’ebibuuzo byabo ebikuru?

³ Mbwenu shi Baibuli erimu eby’okugarukamu by’ebibuuzo ebikuru? Abamwe nikwo barikuteekateeka, kwonka nibagira ngu Baibuli egumire munonga kwetegyereza. Nibabaasa kugira ngu abeegyesa n’abeebembezi b’ediini nibo barikumanya eby’okugarukamu. Kandi abamwe nibatiina ngu nibaija kuhemuka baikiriza ngu tibarikumanya eby’okugarukamu. Iwe nooteekateeka ki?

4, 5. Noobaasa kuba nooyebuuza bibuuzo ki, kandi ahabw’enki oine kusherura eby’okugarukamu byabyo?

⁴ Shana naiwe obumwe nooyebuuza oti: Ekigyendererwa ky’okubaho niki? Niki ekirikwija kumbaho ku ndafe? Ruhanga n’owa muringo ki? Yesu omwegyesa orikumanywa gye akagira ngu mugume nimushaba, muryaheebwa, mugume nimusherura, muryazoora, mugume nimwiguza, muryaigurirwaho. (Matayo 7:7) Guma noobuuza kuhitsya waatunga eby’okugarukamu ebi orikwesiga.

 ⁵ Ku oraagume ‘noosherura’ omu Baibuli, noija kutunga eby’okugarukamu. (Enfumu 2:1-5) Eby’okugarukamu ebirimu tibigumire kwetegyereza. Ebi oraayege nibiija kukureetera kushemererwa hati bikuhe n’amatsiko aha biro by’omumaisho. Ka tutandikye n’ekibuuzo ekiteganiise abantu baingi.

6. Ahabw’enki abantu abamwe nibateekateeka ngu Ruhanga tarikubafaho baaba nibabonabona?

⁶ Abantu baingi nibateekateeka ngu Ruhanga tarikutufaho. Nibagira ngu Ruhanga kuri naafayo, ensi ekaabaire ey’omutaano. Hati nitureeba ensi eijwiremu entaro, rwango, n’okubonabona. Abantu nibarwara, babonabona, kandi bafa. Abamwe nibeebuuza bati: ‘Ruhanga ku araabe naatufaho, ahabw’enki atarikwihaho okubonabona kwona?’

7. (a) Abeebembezi b’ediini nibeegyesa bata abantu baingi ngu Ruhanga taine saasi? (b) Ahabw’enki turikuhamya ngu Ruhanga tiwe arikureetaho ebintu bibi?

⁷ Abeebembezi b’ediini obumwe nibareetera abantu kuteekateeka ngu Ruhanga taine saasi. Ku harikubaho ekintu kibi, nibagira ngu n’ekigyendererwa kya Ruhanga. Nibagira ngu naaba naayenda ngu kibeho. Ku barikugamba bati, nibaba nibacwera Ruhanga orubanja. Kwonka Baibuli neeyegyesa ngu Ruhanga tiwe bukomooko bw’obubi. Yakobo 1:13 nihooreka ngu Ruhanga tarikugyeza muntu weena arikukoresa ebintu bibi. Nihagira hati: “Omuntu weena ku araayohibwe arekye kugira ati: Naayohibwa [nari, naagyezibwa] Ruhanga; ahakuba Ruhanga tayohibwa kibi, kandi nawe tayosya muntu.” Eki nikimanyisa ngu n’obu Ruhanga araabe atarikuzibira ebintu bibi kubaho, tiwe arikubireetaho. (Shoma Yobu 34:10-12.) Ka tureebe eky’okureeberaho.

8, 9. (a) Ahabw’enki nikiba kitahikire kucwera Ruhanga orubanja ahabw’oburemeezi bwaitu? Ha Eky’okureeberaho.

 ⁸ Teekateeka aha mutsigazi okirikutuura n’abazaire be. Ishe naamukunda munonga kandi akamwegyesa kucwamu gye. Bwanyima omutsigazi ogwo agomera ishe acwamu kuruga omu ka. Ahu yaaza aguma naakora ebintu bibi kandi atunga oburemeezi. Mbwenu shi noija kucwera ishe orubanja ahabw’ebibaireho ahabw’okugira ngu tarazibiire mutabani kuruga omu ka? Ngaaha buzima! (Luka 15:11-13) Nk’omuzaire ogwo, Ruhanga tarikuzibira abantu ku barikucwamu kumugomera bakakora ebintu bibi. Kwonka baahikwaho oburemeezi, tushemereire kwijuka ngu Ruhanga tiwe abureetsire. Nikiba kitahikire kucwera Ruhanga orubanja.

⁹ Hariho enshonga ehikire ahabw’enki Ruhanga atakaihireho ebintu bibi. Omu Shuura ya 11, noija kwega eki Baibuli erikwegyesa aha nshonga egi. Kwonka gira obuhame ngu Ruhanga naatukunda, kandi tashemereire kuteebwaho orubanja ahabw’oburemeezi obu turikutunga. Nangwa, niwe wenka orikubaasa kwihiraho kimwe oburemeezi.—Isaaya 33:2.

10. Ahabw’enki turikuhamya ngu Ruhanga naija kumaraho ebireetsirweho abantu babi?

¹⁰ Ruhanga n’orikwera. (Isaaya 6:3) Buri kimwe eki arikukora n’ekirikwera, tikiine kamogo, kandi ni kirungi. N’ahabw’ekyo nitubaasa kumwesiga. Abantu bo tikwo bari batyo. Obumwe nibakora ebitahikire. Nangwa n’omutegyeki orikwesigwa, taine bushoboorozi bw’okwihaho ebibi ebirikureetwaho abantu babi. Tihaine oine amaani nk’aga Ruhanga. Naabaasa kandi naija kumaraho ebibi ebireetsirweho abantu babi. Naija kumariraho kimwe ebibi byona.—Shoma Zaaburi 37:9-11.

11. Ruhanga naayehurira ata waaba noobonabona?

¹¹ Ruhanga naayehurira ata ku arikureeba ebirikuba omu nsi, otwariiremu n’oburemeezi obu oine? Baibuli neeyegyesa ngu Ruhanga ‘naakunda’ oburingaaniza. (Zaaburi 37:28) N’ahabw’ekyo, naafayo munonga aha bihikire n’ebitahikire. Naayangira kimwe kureeba abantu nibabonabona. Baibuli neegira ngu ‘akaguubwa kubi omu mutima gwe’ ku yaareebire obubi bwijwire ensi ira. (Okutandika 6:5, 6) Ruhanga tarikuhinduka. (Malaki 3:6) Baibuli neegira ngu Ruhanga buzima naakufaho.—Shoma 1 Petero 5:7.

12, 13. (a) Ahabw’enki nitukunda abandi, kandi nitwehurira tuta twareeba okubonabona okuri omu nsi? (b) Ahabw’enki turikuhamya ngu Ruhanga naija kwihaho okubonabona n’obutari buringaaniza?

¹² Kandi Baibuli neegira ngu Ruhanga akatuhanga omu kishushani kye. (Okutandika 1:26) Eki nikimanyisa ngu Ruhanga akatuhanga twine emitwarize nk’eye. N’ahabw’ekyo ku oraabe noohurira kubi waareeba abantu abataine rubanja nibabonabona, Ruhanga we naahurira kubi munonga yaareeba nibabonabona. Eki nitukimanya tuta?

¹³ Baibuli neeyoreka ngu ‘Ruhanga ni rukundo.’ (1 Yohaana 4:8) Buri kimwe eki Ruhanga arikukora, naakikora ahabwa rukundo. Twine rukundo ahabw’okuba Ruhanga nawe agiine. Teekateeka ahari eki: Ku ogire ngu oine amaani, okaihireho okubonabona kwona n’obutari buringaaniza oburi omu nsi? Buzima okaakikozire, ahabw’okuba nookunda abantu. Kandi shi we Ruhanga? Aine amaani, kandi ahabw’okugira ngu naatukunda, naija kwihaho okubonabona kwona n’obutari buringaaniza.  Gira obuhame ngu ebi Ruhanga arikuraganisa byona ebyagambwaho aha ntandikiro y’akatabo aka nibiija kuhikiirira. Kwonka kubaasa kuhamiza kimwe ngu nibiija kuhikiirira, oine kwongyera kumanya ebirikukwata ahari Ruhanga.

14. Eiziina rya Ruhanga ni riiha, kandi nitumanya tuta ngu twine kurikoresa?

¹⁴ Waaba nooyenda kuba munywani w’omuntu, niki eki orikubanza kumugambira? N’eiziina ryawe. Ruhanga shi aine eiziina? Amadiini maingi nigagira ngu eiziina rye ni Ruhanga nari Mukama, kwonka aga ti maziina. N’ebitiinisa, “nk’omugabe” nari “purezidenti.” Ruhanga atumanyiise ngu eiziina rye ni Yehova. Zaaburi 83:18 nihagira hati: “Bamanye ngu niiwe wenka orikwetwa Yehova, okira boona, kandi otegyeka ensi yoona.” Abahandiiki ba Baibuli bakakoresa eiziina rya Ruhanga emirundi enkumi n’enkumi. Yehova naayenda ngu omanye eiziina rye kandi orikorese. Naakugambira eiziina rye kugira ngu obe munywani we.

15. Eiziina Yehova riine makuru ki?

¹⁵ Eiziina rya Ruhanga, Yehova riine amakuru maingi. Nirimanyisa ngu Ruhanga  naahikiiriza buri kintu kyona eki arikuraganisa kandi naahikiiriza ebigyendererwa bye. Tihaine ekirikubaasa kumuremesa. Yehova wenka niwe aine eiziina eri. *

16, 17. Ebitiinisa ebi nibimanyisa ki? (a) “ow’Obushoboorozi Bwona”? (b) “Mukama otahwaho”? (c) “Omuhangi”?

¹⁶ Ebiri omu Zaaburi 83:18 nibigira biti: ‘Niiwe wenka Okira Boona.’ Kandi, Okushuuruurwa 15:3 nihagira  hati: “Mukama Ruhanga ow’Obushoboorozi Bwona, ebi waakozire ni bikuru kandi n’eby’okutangaaza.” Ekitiinisa “ow’Obushoboorozi Bwona” nikimanyisa ki? Nikimanyisa ngu Yehova aine amaani maingi kukira omuntu weena omu nsi. Omuri 1 Timoseo 1:17, Yehova naayetwa “Mukama otahwaho.” Ekitiinisa “Mukama otahwaho” nikimanyisa ngu atuuraho. Zaaburi 90:2 nihooreka ngu atwireho okwiha obusingye bwona n’okuhitsya obusingye bwona. Ekyo ka nikitangaaza!

¹⁷ Yehova niwe Muhangi wenka. Okushuuruurwa 4:11 nihagira hati: “Mukama Ruhanga waitu, oshemereire kuhimbisibwa n’okuheebwa ekitiinisa n’obushoboorozi, ahabw’okuba niiwe waahangire byona; ahabw’okukunda kwawe bikahangwa kandi byabaho.” Buzima, Yehova akahanga baamaraika abari omu iguru, enyonyoozi eziri omu mwanya, ebijuma ebiri aha miti, eby’enyanja ebiri  omu nyanja, na buri kimwe eki orikubaasa kuteekateekaho!

18. Ahabw’enki abantu abamwe nibateekateeka ngu tibarikubaasa kuba banywani ba Ruhanga, kwonka Baibuli neeyegyesa ki ahari eki?

¹⁸ Abantu abamwe ku barikushoma aha mitwarize mirungi ya Yehova, nibateekateeka bati: ‘Ruhanga aine amaani maingi, ni mukuru munonga, ari hare munonga, mbwenu shi ahabw’enki aine kunfaho?’ Kwonka shi okwo nikwo Ruhanga arikwenda ngu twehurire? Ngaaha buzima. Yehova naayenda tumwirire haihi. Baibuli neegira ngu ‘tari hare n’omuntu weena omuriitwe.’ (Ebyakozirwe 17:27) Ruhanga naayenda ngu omwirire haihi, kandi naaraganisa ngu ‘nawe naija kukwirira haihi.’—Yakobo 4:8.

19. (a) Nitubaasa kuba tuta banywani ba Yehova? (b) Ni mitwarize ki eya Yehova ei orikukunda munonga?

¹⁹ Noobaasa kuba ota munywani wa Ruhanga? Yesu akagira ati: “Aga nigo magara agatahwaho, okumanya Iwe Ruhanga omwe ow’amazima, n’Ogwo ou waatumire Yesu Kristo.” (Yohaana 17:3) Waagumizamu nooyega, noija kumanya Yehova na Yesu. Kandi bwanyima noija kutunga amagara agatahwaho. Nk’eky’okureeberaho, twaherize kwega ngu “Ruhanga ni rukundo.” (1 Yohaana 4:16) Kwonka aine emitwarize mirungi mingi endiijo. Baibuli neegira ngu Yehova ni “Ruhanga ow’okusaasira n’embabazi, otarahuka kugira ekiniga.” (Okuruga 34:6) Yehova ni ‘murungi kandi naarahuka kusaasira.’ (Zaaburi 86:5) Naagumisiriza kandi n’omwesigwa. (2 Petero 3:9; 1 Abakorinso 1:9) Noija kweyongyera kwega aha mitwarize ye mirungi waaguma nooshoma omu Baibuli ebirikumukwataho.

20-22. (a) Nitubaasa kwirira haihi tuta na Ruhanga ku turaabe tutarikubaasa kumureeba? (b) Oine kukora ki abandi baaba nibenda ngu orekyere aho kwega Baibuli?

 ²⁰ Noobaasa kwirira haihi ota Ruhanga ku oraabe otarikubaasa kumureeba? (Yohaana 1:18; 4:24; 1 Timoseo 1:17) Ku orikushoma ebirikukwata ahari Yehova omu Baibuli, noomanya ngu n’owaabuzima. Waaguma nooyeyongyera kwega ebirikukwata ahari Yehova, nooyeyongyera kumukunda, kandi noohurira ori haihi nawe.

²¹ Noija kwetegyereza ngu Yehova ni Tataitwe. (Matayo 6:9) Akatuha amagara, kandi naayenda ngu naitwe tugire amagara marungi nk’oku kirikubaasika. Eki nikyo omuzaire oine rukundo arikwendeza abaana be. (Zaaburi 36:9) Buzima, Baibuli neeyegyesa ngu noobaasa kuba munywani wa Yehova. (Yakobo 2:23) Ekyo kiteekateekyeho. Yehova, Omuhangi w’ebintu byona naayenda ngu obe munywani we!

²² Abantu abamwe nibabaasa kwenda ngu orekyere aho kwega Baibuli. Nibabaasa kutiina ngu noija kuruga omu diini yaawe. Kwonka otaikiriza omuntu weena kukuremesa kuba munywani wa Yehova. Niwe munywani murungi orikukirayo ou orikubaasa kugira.

23, 24. (a) Ahabw’enki oine kugumizamu noobuuza ebibuuzo? (b) Nituza kwega ahari ki omu shuura erikukurataho?

²³ Waaba nooyega Baibuli, hariho ebintu ebi otaraayetegyereze. Otatiina kubuuza ebibuuzo nari kusherura obuhwezi. Yesu akagira ngu twine kuba abacureezi, nk’abaana bato. (Matayo 18:2-4) Kandi abaana nibabuuza ebibuuzo bingi. Ruhanga naayenda ngu otungye eby’okugarukamu. N’ahabw’ekyo yega Baibuli n’obwegyendesereza kuhamya ngu ebi orikwega n’amazima.—Shoma Ebyakozirwe 17:11.

²⁴ Omuringo murungi gw’okwega ahari Yehova n’okushwijuma Baibuli. Omu shuura erikukurataho, nitwija kureeba ahabw’enki Baibuli neetaana aha bitabo ebindi.