1-3. (a) Ahabw’enki omuzaire naahamya ngu omwana we acumire gye? (b) Ahabw’enki Yehova naayenda ngu abarikumuheereza babe abeecumi?

TEERA akashushani omukazi ariyo naatebeekanisa omutabani muto kuza aha ishomero. Naahamya ngu yaamunaabisa kandi yaamujweka ebijwaro ebicumire gye. Eki nikihwera omwana kuguma aine amagara marungi, kandi abandi nibareeba ngu abazaire be nibamufaho.

² Yehova Tataitwe, naayenda ngu tube abeecumi kandi abashemeire. (Zaaburi 18:26) Yehova naamanya ngu  okuguma turi abeecumi nikitugasira. Kandi twaguma turi abeecumi, nitumuhimbisisa.​—Ezekieli 36:22; shoma 1 Petero 2:12.

³ Okuba abeecumi nikimanyisa ki? Kandi ah’abw’enki okuba abeecumi n’eky’oburungi bwaitu? Twaba nitugarukamu ebibuuzo ebi, ka tuteereho kureeba ahu twine kukora empindahinduka.

4, 5. (a) Ahabw’enki tushemereire kuguma turi abeecumi? (b) Ebyahangirwe nibitwegyesa ki aha bikwatiraine n’oku Yehova arikureeba obwecumi?

⁴ Nitwega kuba abeecumi kandi abashemeire twatooreza Yehova. (Abaleevi 11:44, 45) Enshonga nkuru ahabw’enki twine kuba abeecumi n’ahabw’okugira ngu nitwenda ‘kutooreza Ruhanga.’​—Abaefeso 5:1.

⁵ Ebyahangirwe nibyoreka gye oku Yehova arikutwara obwecumi. Akataho entebeekanisa y’obuhangwa erikuguma neeboneza amaizi n’omwoya. (Yeremia 10:12) Teekateeka aha miringo mingi erikworeka oku ensi erikuguma neeyegaruza busya nangwa n’obu obumwe abantu barikugishiisha. Nk’eky’okureeberaho Yehova akahanga obukooko bukye munonga, obu tutarikubaasa kureeba n’amaisho. Obukooko obu nibuhindura ebintu eby’obutwa biba ebitari by’akabi. Egi n’entebeekanisa erikutangaaza. Nangwa n’abanyasaayansi nibakoresa bumwe aha bukooko obu kuboneza emyanya erofahaziibwe.​—Abarooma 1:20.

6, 7. Ebiragiro bya Musa bikaba nibyoreka bita ngu abaheereza ba Yehova baine kuba abeecumi?

⁶ Ebiragiro ebi Yehova yaahaire Abaisraeli kurabira omuri Musa nibituhwera kumanya ahabw’enki ni kikuru kuba abeecumi. Nk’eky’okureeberaho, Yehova kubaasa kusiima okuramya kw’abantu, bakaba baine  kucuma gye emibiri yaabo. Aha Izooba ry’Okurihiirira Ebibi, omunyamurwa omukuru akaba aine kwoga emirundi ebiri. (Abaleevi 16:4, 23, 24) Kandi abanyamurwa bakaba baine kubanza baanaaba engaro zaabo n’ebigyere byabo batakahaireyo ebitambo. (Okuruga 30:17-21; 2 Obusingye 4:6) Omu mbeera ezimwe, ekifubiro ky’okugomera ebiragiro ebirikukwata aha bwecumi kukaba kuri okwitwa.​—Abaleevi 15:31; Okubara 19:17-20.

⁷ Kandi shi obunaku obu? Ebiragiro ebyo nibibaasa kutwegyesa bingi ebirikukwata aha mitindo ya Yehova. (Malaki 3:6) Bikaba nibyoreka gye ngu abarikuramya Yehova baine kuba abeecumi. Emitindo ya Yehova tehindukire. N’obunaku obu naayenda ngu abarikumuramya bagume bari abeecumi, kandi abashemeire.​—Yakobo 1:27.

8. Twine kuba abeecumi mu miringo ki?

⁸ Okurugiirira aha miteekateekyere ya Yehova, okuba omwecumi nikikira aha kuboneza emibiri yaitu, ebijwaro byaitu, n’amaka gaitu. Nikikwata aha magara gaitu goona. Nikitwariramu okuramya kwaitu, emicwe yaitu, n’ebiteekateeko byaitu. Eego, Yehova kubaasa kutureeba nk’abarikwera, twine kuba abeecumi, kandi abashemeire omu miringo yoona.

9, 10. Nikimanyisa ki okuba abashemeire omu kuramya kwaitu?

⁹ Okuramya okurikwera. Titushemereire kwejwanzya omu kuramya okw’ebishuba omu muringo gwona. Obu Abaisraeli baabaire bari abahuuku omuri Babulooni bakaba beetooroirwe abantu abarikwejumba omu kuramya kw’ebishuba okurimu ebihagaro. Isaaya akaranga ngu Abaisraeli bakaba nibaija kugaruka Yerusaalemu, bagarureho okuramya okushemeire. Yehova akabagira ati: ‘Murugyemu, mutakora aha kintu kyona ekitashemeire!  Murugye aha gati yaarwo, mugume mweyerize.’ Okuramya kwabo kukaba kutaine kubamu enyegyesa, emicwe, n’emigyenzo y’ediini y’ebishuba ey’Abababulooni.​—Isaaya 52:11.

¹⁰ Abakristaayo ab’amazima nabo baine kwetantara ediini y’ebishuba hati. (Shoma 1 Abakorinso 10:21.) Omu nsi yoona, emigyenzo mingi, ebikorwa, n’enyikiriza, nibikomooka omu nyegyesa z’ediini z’ebishuba. Nk’eky’okureeberaho, omu mahanga maingi, abantu nibaikiriza ngu hariho ekintu ekitarikufa ekiri omu muntu ekirikugumizamu kihuriire bwanyima y’okufa, kandi hariho emigyenzo mingi erikwegamira aha nyikiriza egi. (Omubuurizi 9:5, 6, 10) Abakristaayo ab’amazima baine kwetantara emigyenzo nk’egi. Abanyabuzaare nibabaasa kutugyemesereza kwejumba omu migyenzo emwe ahari egi. Kwonka ahabw’okugira ngu nitwenda kuguma turi abashemeire omu maisho ga Yehova, titurikwija kwikiriza abandi kutugyemesereza kugyejumbamu.​—Ebyakozirwe 5:29.

11. Nikimanyisa ki okuba abashemeire omu mitwarize yaitu?

¹¹ Emitwarize eshemeire. Yehova kubaasa kureeba ngu turi abeecumi, twine kwetantara eby’obushambani eby’omuringo gwona. (Shoma Abaefeso 5:5.) Kurabira omuri Baibuli, Yehova naatugambira ‘kwetantara obushambani.’ Naakyoreka gye ngu abarikwejumba omu by’obushambani kandi bakanga kweteisa, tibarikwija ‘kuhungura Obukama bwa Ruhanga.’​—1 Abakorinso 6:9, 10, 18; reeba Ebirikukiraho 22.

12, 13. Ahabw’enki twine kuba abashemeire omu biteekateeko?

¹² Ebiteekateeko ebishemeire. Ebikorwa nibikira kuruga omu biteekateeko. (Matayo 5:28; 15:18, 19) Ebiteekateeko byaitu byaba bishemeire, nibiija kutureetera kutwaza omu muringo ogushemeire. Ahabw’okugira  ngu tituhikiriire, obumwe nitugira ebiteekateeko bitahikire. Kwonka twabigira twine kubyangira ahonaaho. Twaba tutakozire tutyo, haahinguraho obwire omutima gwaitu nigubaasa kuba ogutashemeire. Nitubaasa kwenda kukora ebintu ebi turikuba nituteekateekaho. Omu mwanya gw’ekyo, twine kuta omu biteekateeko byaitu ebintu ebishemeire. (Shoma Abafilipi 4:8.) N’ahabw’ekyo twine kwetantara eby’okweshemeza ebirimu ebikorwa by’enshoni nari eby’obushaarizi. Nitwegyendesereza omu kutoorana eby’okushoma, eby’okureeba n’ebi turikugambaho.​—Zaaburi 19:8, 9.

¹³ Kubaasa kuguma omuri rukundo ya Ruhanga, twine kuba abashemeire omu kuramya kwaitu, omu micwe, n’omu biteekateeko. Kwonka kandi ni kikuru ahari Yehova ngu tube abeecumi n’omu by’omubiri.

14. Ahabw’enki ni kikuru kuba abeecumi omu by’omubiri?

¹⁴ Ku turikuguma tucumire gye emibiri yaitu n’ebintu byaitu, nitugasirwa hamwe n’abantu abu turikutuura nabo. Nitwehurira gye kandi n’abantu abandi nibaija kukunda kuba naitwe. Kwonka hariho enshonga endiijo enkuru eshemereire kutureetera kuba abeecumi omu by’omubiri. Twaba abeecumi nituhimbisisa Yehova. Teekateeka aha ky’okureeberaho eki: Omwana orikukira kuba ari omurofa naabaasa kujumisa abazaire be. Nikyo kimwe, twaba tutarikufayo kuguma turi abeecumi, nitubaasa kujumisa Yehova. Paulo akagira ati: ‘Nikyo turikwerindira kutateeza omuntu weena entsibo, ngu obuheereza bwaitu burekye kugaywa, kureka omuri byona nitweyoreka nk’abashemereire kuba abaheereza ba Ruhanga.’​—2 Abakorinso 6:3, 4.

15, 16. Nitubaasa kukora ki kuguma turi abeecumi?

 ¹⁵ Omubiri n’ebijwaro byaitu. Tushemereire kwemanyiiza kuba abeecumi obwire bwona. Nk’eky’okureeberaho, nitwoga buri izooba kyaba nikibaasika. Nitunaaba engaro na saabuuni n’amaizi, okukira munonga twaba nituza kuteeka nari kurya, na twaba nituruga omu toireti, nari twakwata ekintu ekirofa. Okunaaba engaro nikibaasa kureebeka nk’ekintu kikye, kwonka nikizibira obukooko obw’akabi kujanjaara. Kandi nikibaasa n’okukiza amagara gaitu. N’obu twakuba tutaine toireti z’omu nju, nabwo obubi nibubaasa kuziikwa omu itaka. Abaisraeli aba ira bakaba bataine toireti z’omu nju, n’ahabw’ekyo bakaba baine kuziika obubi omu itaka hare n’eka nari eiziba.​—Eky’Ebiragiro 23:12, 13.

¹⁶ Tikirikwetengyesa ngu ebijwaro byaitu bibe biri  eby’esente nyingi, ebiri aha murembe, nari eby’emishono ehangire. Kureka bishemereire kuba bicumire gye kandi bishemeire. (Shoma 1 Timoseo 2:9, 10.) Butoosha, nitwenda ngu endeebeka yaitu ehimbisise Yehova.​—Tito 2:10.

17. Ahabw’enki twine kurinda amaka gaitu n’ebitwetooroire kuguma bicumire gye?

¹⁷ Amaka gaitu na byona ebigeetooroire. Hoona ei turikutuura, twine kurinda amaka gaitu kuguma gacumire gye. Twine kuhamya ngu emotoka zaitu, piki, egaari, nari ekiiruka kyona eki turikukoresa kuza omu nteerane nari omu kubuurira, nibireebeka gye. Ahakuba omu kubuurira, nitukira kugamba aha mbeera nungi eziraabe omu paradiso omu nsi etarimu burofa. (Luka 23:43; Okushuuruurwa 11:18) Endeebeka y’amaka gaitu na byona ebigeetooroire nibibaasa kworeka ngu nitwetebeekanisa hati kwija kutuura omu nsi ensya eraabe etarimu burofa.

18. Ahabw’enki nitwenda kurinda omwanya gwaitu gw’okuramizamu kuguma nigureebeka gye?

¹⁸ Omwanya gwaitu gw’okuramizamu. Nitworeka ngu obwecumi n’ekintu kikuru ahariitwe turikureeberera gye omwanya gwaitu gw’okuramizamu, yaaba n’Ekyombeko ky’Obukama nari emyanya y’enteerane empango. Abantu ku barikwija aha Kyombeko ky’Obukama omurundi gw’okubanza, nibakira kureeba oku kicumire gye. Eki nikihaisa Yehova ekitiinisa. Twena omu kibiina twine omugisha gw’okuhwera omu kuboneza Ekyombeko ky’Obukama, n’okukihunduuza kuguma nikireebeka gye.​—2 Obusingye 34:10.

19. Twine kwetantara ki, kandi n’ahabw’enki?

¹⁹ N’obu Baibuli eraabe etarikugamba butunu emize  mibi yoona ei twine kwetantara, neetuha emisingye erikutuhwera kwetegyereza oku Yehova arikureeba emize nk’egyo. Tarikwenda ngu tureetse, tukorese kubi amaarwa nari emibazi. Twaba turi banywani ba Ruhanga, nitwija kwetantara kukora ebintu ebi. Ahabw’enki? Ahakuba nituha ekitiinisa ekiconco ky’amagara. Emize egi neebaasa kucwa bugufu amagara gwaitu, kushiisha omubiri gwaitu, nari ekore kubi abu turikutuura nabo. Abantu baingi nibateeraho kureka emize mibi egi ahabw’oburungi bw’amagara gaabo. Kwonka itwe banywani ba Yehova, rukundo ei tumwiniire niyo erikutuhiga kucwa emize egyo. Omukazi omwe akagira ati: “Ndikuhwerwa Yehova, nkeyihaho oburofa bwona, naacwa emize yangye. . . . Ningira nkaba ntarikubaasa kukora empindahinduka ezi ahabwangye.” Ka tushwijume emisingye etaano ya Baibuli erikubaasa kuhwera omuntu kucwa emize mibi.

20, 21. Yehova naayenda ngu tweyiheho mize ki?

²⁰ “Nk’oku twine ebyaraganisiibwe ebyo, abarikukundwa, tweyozyeho oburofa bwona obw’aha mubiri n’obw’omu mwoyo, nituhikiiriza okwera omu kutiina Ruhanga.” (2 Abakorinso 7:1) Yehova naayenda ngu twetantare ebikorwa ebirikushiisha omubiri gwaitu nari ebiteekateeko byaitu.

²¹ Enshonga nkuru erikutureetera ‘kweyozyaho oburofa bwona’ neeshangwa omu 2 Abakorinso 6:17, 18. Yehova naatugambira ngu turekye kukora nari kukwata ‘aha kintu kyona ekitashemeire.’ Reero naaraganisa ati: ‘Niinyija kubaakiira. Kandi niinyija kuba Shoimwe, naimwe mube batabani bangye na bahara bangye.’ Eego, Yehova naija kutukunda nk’oku ishe abaana arikukunda abaana be, twayetantara ekintu kyona ekirikutureetera kuba abarofa nari abatashemeire.

22-25. Ni misingye ki y’Ebyahandiikirwe erikubaasa kutuhwera kwetantara emize mibi?

 ²² ‘Kunda [Yehova] Ruhanga waawe n’omutima gwawe gwona, n’amagara gaawe goona, n’obwengye bwawe bwona.’ (Matayo 22:37) Eki nikyo kiragiro kikuru ekirikukira ebindi byona. (Matayo 22:38) Twine kukunda Yehova omu bwijwire. Mbwenu shi nitubaasa kumukunda omu bwijwire tuta twaba nitukora ekintu ekirikubaasa kucwa amagara gaitu bugufu, nari ekirikushiisha obwongo bwaitu? Omu mwanya gw’okukora ekintu nk’ekyo, nitukora kyona ekirikubaasika kworeka ngu nituha ekitiinisa amagara agu Yehova atuhaire.

²³ “[Yehova naaha] abantu boona amagara n’omwitsyo na buri kintu kyona.” (Ebyakozirwe 17:24, 25) Mbwenu shi munywani waawe yaakuha ekiconco ky’omuhendo, noija kukinaga nari kukishiishagura? Amagara n’ekiconco ky’omuhendo kuruga ahari Yehova. Nitusiimira kimwe ekiconco eki. N’ahabw’ekyo, nitukoresa amagara gaitu omu muringo ogurikuhimbisisa Yehova.​—Zaaburi 36:9.

²⁴ ‘Kunda mutaahi waawe nk’oku orikwekunda.’ (Matayo 22:39) Emize mibi terikukora kubi abarikuba bagiine bonka. Neebaasa kukora kubi abu turikukunda abarikukira kuba bari naitwe. Nk’eky’okureeberaho, waaba nootuura omu nju emwe n’omureetsi, noobaasa kurwara ahabw’okwitsya omwika gwa tsigara. Kwonka waacwa emize mibi, nooyoreka ngu nookunda abu orikutuura nabo.​—1 Yohaana 4:20, 21.

²⁵ ‘Guma noobaijutsya kworobera abategyeki n’abaine obushoboorozi.’ (Tito 3:1) Omu mahanga maingi, okugira emibazi emwe nari okugikoresa nikihenda ebiragiro. Obu Yehova arikuturagiira kworobera gavumenti, twine kworobera ebiragiro nk’ebyo.​—Abarooma 13:1.

26. (a) Twine kukora ki Yehova kubaasa kusiima okuramya kwaitu? (b) Ahabw’enki okuba abeecumi omu maisho ga Ruhanga nikyo kirikukirayo oburungi?

 ²⁶ Twaba nitwenda kuba banywani ba Yehova, nikibaasa kutwetengyesa kugira empindahinduka ezi twakora. Twaba turi ab’okuzikora, twine kutandika ahonaaho. Tikyorobi kucwa emicwe mibi, kwonka okugicwa nikibaasika! Yehova naaturaganisa kutuhwera. Naagira ati: “Niinye [Yehova] Ruhanga waawe orikukwegyesa eby’okukugasira, nkakwebembera omu muhanda ogu oshemereire kutoora.” (Isaaya 48:17) Twakora kyona ekirikubaasika kuguma turi abeecumi kandi abashemeire, nitubaasa kuhamya ngu nituhaisa Ruhanga waitu ekitiinisa.