Ahariimwe abarikukunda Yehova Ruhanga n’Ekigambo kye, Baibuli:

Yesu akagira ngu ‘nimwija kumanya amazima, n’amazima nigaija kubahindura ab’obusingye.’ (Yohaana 8:32) Teekateeka oku waayehuriire obu waabanza kumanya amazima ga Baibuli! Okashemererwa kumanya ngu omu nsi egi eijwiremu ebishuba noobaasa kwega amazima.​—2 Timoseo 3:1.

Yehova Ruhanga naayenda ngu tumanye amazima. Kandi ahabw’okugira ngu nitukunda abantu, nituba nitwenda kubagambira aha mazima aga. Kwonka okuheereza Ruhanga nikitwariramu ebintu bingi. Itwe Abakristaayo twine kuteeraho kutwaza gye ahakuba nitworobera emitindo ya Yehova. Yesu akashoboorora oku turikubaasa kuhamya ngu nitukunda Ruhanga. Akagira ati: ‘Ku muraayorobere ebiragiro byangye, nimwija kuguma omu kukunda kwangye, nkaanye oku ntuura niinyorobera ebiragiro bya Tata, nkaguma omu kukunda kwe.’​—Yohaana 15:10.

Yesu buzima naakunda Ishe, kandi naakora byona ebi Ishe arikumushaba kukora. Buri izooba twaguma nitutooreza Yesu, Yehova naija kutukunda kandi nitwija kugira okushemererwa. Yesu akagira ati: “Ku muraabe nimumanya ebyo, muhiiriirwe mwaba nimubikora.”​—Yohaana 13:17.

Twine amatsiko ngu ekitabo eki nikiija kukuhwera kugyendera aha mazima ga Baibuli n’okuba munywani wa Ruhanga. Nitushaba ngu oyongyere kukunda Ruhanga, kandi ogume omuri rukundo ye oine amatsiko ‘g’amagara agatahwaho.’​—Yuda 21.