1, 2. Nitubaasa kukora ki kuguma omuri rukundo ya Ruhanga?

TWENA nitwenda kugira amagara marungi n’amaani. N’ahabw’ekyo nituteeraho kurya eby’okurya birungi, kutendeka emibiri yaitu butoosha, n’okugireeberera. N’obu eki kiraabe nikyetengyesa okutamu amaani, ebirikurugamu ni birungi, n’ahabw’ekyo nitugumizamu nitukikora. Kwonka nitwenda kugira amagara marungi n’amaani omu muringo ogundi.

² N’obu turaabe twine entandikwa nungi y’okuteeraho kumanya Yehova, twine kugumizamu nituhamya omukago gwaitu nawe. Obu Yuda yaahiga Abakristaayo kwerindira “omu kukunda kwa Ruhanga,” akashoboorora oku barikubaasa kukikora. Akabagira ati: “Mweyombekye aha musingi gw’okwikiriza kwanyu okurikwera munonga.” (Yuda 20, 21) Mbwenu shi nitubaasa kugira tuta okwikiriza kuhami?

3-5. (a) Sitaane naayenda ngu otware ota emitindo ya Yehova? (b) Nooreeba ota ebiragiro bya Yehova n’emisingye ye?

³ Ni kikuru kuba noohamiza kimwe ngu emitindo ya Yehova niyo erikukirayo oburungi. Sitaane naayenda kukureetera kuteekateeka ngu emitindo ya Yehova egumire munonga kugyorobera, kandi ngu nooshemererwa waayeteeraho  emitindo y’ekihikire n’ekigwire. Obu Sitaane yaabeiha ekishuba ky’okubanza omu musiri Edeni, akateeraho kureetera abantu kwikiriza ekishuba ekyo. (Okutandika 3:1-6) Kandi na hati naakikora obucweka eihembe kubeiha abantu.

⁴ Mbwenu shi Sitaane ahikire? Tugire ngu emitindo ya Yehova n’amaremesa? Ngaaha. Nk’eky’okureeberaho, ka tugire ngu oriyo noogyendagyenda omu irindiro ry’enyamaishwa rirungi munonga, reero okareeba ekisiika kiraingwa kyehinguririize omwanya gumwe. Obundi noobaasa kwebuuza oti: ‘Ahabw’enki omwanya ogu bagutaireho ekisiika eki?’ Kwonka omu kaanya kakye, ohurira ekicuncu nikitoontoma enyima y’ekisiika. Hati noija kutwara ota ekisiika ekyo? Buzima noija kushemererwa ahabw’okugira ngu ekisiika ekyo nikikurinda kutariibwa ekicuncu! Emisingye ya Yehova eri nk’ekisiika ekyo, kandi Omuregi ari nk’ekicuncu. Ekigambo kya Ruhanga nikiturabura kiti: “Mwerinde, mugume nimureeba. Sitaane omuzigu waanyu naashooba nk’entare erikutsinda, [erikutoontoma] naasherura ou araarye.”​—1 Petero 5:8.

⁵ Yehova naayenda ngu tugire amagara marungi nk’oku kirikubaasika. Tarikwenda ngu tubeihwe Sitaane. Niyo nshonga ahabw’enki atuhaire ebiragiro n’emisingye ye kuturinda n’okutureetera okushemererwa. (Abaefeso 6:11) Yakobo akahandiika ngu “ogwo orikwetegyereza ebiragiro ebihikire eby’obusingye, akabyezirikira” naija kutunga okushemererwa omu kukora kwe.​—Yakobo 1:25.

6. Nitubaasa kuhamya tuta ngu emiringo ei Yehova arikukora ebintu niyo erikukirayo oburungi?

⁶ Twakuratira obuhabuzi bwa Yehova, nitugira embeera nungi, kandi omukago gwaitu nawe nigweyongyera kuhama. Nk’eky’okureeberaho, nitugasirwa twaikiriza kuguma nitumushaba emirundi mingi. (Matayo 6:5-8; 1 Abatesalonika 5:17) Nitushemererwa twayorobera obuhabuzi bwe obw’okuteeranira hamwe kumuramya n’okugumyana,  kandi tukeejumbira kimwe n’omu murimo gw’okubuurira n’okwegyesa abantu. (Matayo 28:19, 20; Abagalatia 6:2; Abaheburaayo 10:24, 25) Twateekateeka aha ku ebintu ebi bituhweraire kugira okwikiriza kuhami, nitwongyera kuhamya ngu emiringo ei Yehova arikukoramu ebintu niyo erikukirayo oburungi.

7, 8. Niki ekiraatuhwere kuteerarikirira okugyezibwa okurikubaasa kubaho omu biro by’omumaisho?

⁷ Nitubaasa kutiina ngu omu biro by’omumaisho nitwija kugyezibwa munonga omu kwikiriza kwaitu. Ku kiraabeho okagira okutiina nk’okwo, ijuka ebigambo bya Yehova ebirikugira ngu niinye Yehova ‘Ruhanga waawe orikukwegyesa eby’okukugasira, nkakwebembera omu muhanda ogu oshemereire kutoora. Waayorobera ebiragiro byangye, obwo obusingye bwawe nibwija kuba nk’omugyera, n’okuhikiirira kwawe kube nk’ebingonzi by’enyanja.’​—Isaaya 48:17, 18.

 ⁸ Twayorobera Yehova, obusingye bwaitu nibwija kuba nk’omugyera ogutarikwoma, kandi nitwija kugumizamu nitukora ebihikire nk’oku ebingonzi by’enyanja birikugumizamu nibyeshuka aha nkungu y’enyanja. N’obu twakutunga buremeezi ki, nitubaasa kuguma turi abeesigwa. Baibuli neegira ngu tambikira Yehova ‘omutwara gwawe [oburemeezi bwawe,] nawe naija kuguma naakukwatirira, tarikwija kwikiriza ohikiriire kutengyetsibwa.’​—Zaaburi 55:22.

9, 10. Nikimanyisa ki okuba okuzire omu by’omwoyo?

⁹ Waahamya omukago gwawe na Yehova, noija ‘kugumizamu nookura’ omu by’omwoyo. (Abaheburaayo 6:1) Okukura omu by’omwoyo nikimanyisa ki?

¹⁰ Titurikuba Abakristaayo abakuzire omu by’omwoyo ahabw’okugira ngu turi bakuru omu myaka. Kubaasa kuba abakuzire omu by’omwoyo, twine kuhindura Yehova munywani waitu orikukirayo, kandi tukateeraho kureeba enshonga nk’oku arikuzireeba. (Yohaana 4:23) Paulo akahandiika ati: ‘Abarikukuratira eby’omubiri nibata omutima aha by’omubiri, kwonka abarikukuratira omwoyo nibata omutima aha by’omwoyo.’ (Abarooma 8:5) Omuntu okuzire omu by’omwoyo tarikuta omutima aha kweshemeza nari aha bugaiga. Omu mwanya gw’ekyo, naata omutima aha kuheereza Yehova kandi naacwamu gye omu bi arikukora. (Enfumu 27:11; shoma Yakobo 1:2, 3.) Tarikwikiriza abandi kumugyemesereza akahika aha kukora ekigwire. Omuntu okuzire omu by’omwoyo naaba naamanya ekihikire kandi naaba amaririire kukikora.

11, 12. (a) Paulo akagamba ki aha kubaasa kw’okwetegyereza okw’Abakristaayo? (b) Okuba Omukristaayo okuzire omu by’omwoyo nikushushana kuta n’okuba omuzaani w’emizaano?

¹¹ Nikyetengyesa kukora n’amaani kubaasa kukura omu  by’omwoyo. Entumwa Paulo akahandiika ngu “eby’okurya ebigumire bishemereire abakuru,” abu okubaasa kwabo okw’okwetegyereza barikukutendeka kurabira omu kukukoresa “kutaanisa ekirungi n’ekibi.” (Abaheburaayo 5:14) Ekigambo okutendeka nikibaasa kutureetera kuteekateeka aha kutendekwa kw’omuzaani w’emizaano.

¹² Twareeba omuzaani oine obukoryo bw’amaani, nitumanya ngu akamara obwire arikutendekwa kubaasa kugira obukoryo obwo. Naaba atarazairwe ari omuzaani w’emizaano. Omwana ku arikuzaarwa, naaba atarikumanya omuringo oguhikire ogw’okukoresamu emikono ye n’amaguru ge. Kwonka bwanyima y’obwire, naayega kukoresa emikono ye kukwata ebintu, kandi naakoresa n’amaguru ge kugyenda. Yaatunga okutendekwa, naabaasa kuba omuzaani w’emizaano. Omu muringo nigwo gumwe, omuntu yaamara obwire arikutendekwa naabaasa kuba Omukristaayo okuzire omu by’omwoyo.

13. Niki ekirikwija kutuhwera kugira emiteekateekyere nk’eya Yehova?

¹³ Omu kitabo eki, tureebire oku turikubaasa kugira emiteekateekyere nk’eya Yehova, n’okureeba ebintu nk’oku arikubireeba. Twegire ngu twine kusiima emitindo ya Yehova kandi tukagikunda. Twaba nitucwamu, nitwebuuza tuti: ‘Ni biragiro ki nari emisingye kuruga omu Baibuli erikukwata aha mbeera egi? Nimbaasa kubigyenderaho nta? Yehova naayenda ngu nkore ki?’​—Shoma Enfumu 3:5, 6; Yakobo 1:5.

14. Twine kukora ki kubaasa kwombeka okwikiriza kwaitu?

¹⁴ Titurikwenda kurekyera aho kwikiririza omuri Yehova, kureka nitwenda kugumizamu nitwombeka okwikiriza kwaitu. Nk’oku okurya eby’okurya by’ekiriisa kurikuhwera omubiri kugira amaani, n’okwega ebirikukwata ahari Yehova nikutuhwera kwombeka okwikiriza kwaitu kukahama. Obu twatandika kwega Baibuli, tukeega amazima makuru  agarikutandikirwaho agarikukwata ahari Yehova n’emitindo ye. Kwonka haahinguraho obwire, nituba twine kwetegyereza ebintu eby’omunda. Eki nikyo Paulo yaabaire naamanyisa obu yaagira ati: “Eby’okurya ebigumire bishemereire abakuru.” Twaguma nitugyendera aha bintu ebi turikwega, nitugira obwengye. Baibuli neegira eti: “Obwengye n’ekintu kikuru.”​—Enfumu 4:5-7; 1 Petero 2:2.

15. Ahabw’enki ni kikuru kuba nitukundira kimwe Yehova n’ab’eishe-emwe na banyaanyazi-itwe?

¹⁵ Omuntu naabaasa kuba aine amaani n’amagara marungi, kwonka kubaasa kuguma atyo, naamanya ngu naaba aine kugumizamu naayereeberera gye. Omu muringo nigwo gumwe, omuntu okuzire omu by’omwoyo naamanya ngu aine kukora n’amaani kuguma naahamya omukago gwe na Yehova. Paulo naatwijutsya ngu tugume nitweshwijuma ‘tureebe ku turaabe turi omu kwikiriza’ kandi tugume ‘nitwegyeza twenka’ kumanya eki turi. (2 Abakorinso 13:5) Kwonka nabwo, okugira okwikiriza kuhami kyonka tikirikumara. Twine kugumizamu nitwongyera ahari rukundo ei twiniire Yehova n’ab’eishe-emwe na banyaanyazi-itwe. Paulo akagira ngu ‘n’obu naakugira obwengye bwona, kandi n’obu naakugira okwikiriza kwona, okurikumbaasisa kwihaho enshozi, kwonka ntaine’ rukundo, nkaabaire ndi busha.​—1 Abakorinso 13:1-3.

16. Sitaane naayenda ngu twehurire tuta?

¹⁶ Sitaane naayenda kutureetera kuteekateeka ngu tituri barungi kubaasa kushemeza Yehova. Naayenda ngu tuhwemu amaani reero tuteekateekye ngu tihaine ekirikubaasa kwihaho oburemeezi bwaitu. Tarikwenda ngu twesigye Abakristaayo bagyenzi baitu, kandi tarikwenda ngu tushemererwe. (Abaefeso 2:2) Sitaane naamanya ngu emiteekateekyere egwire neebaasa kutushiisha, kandi eshiishe n’omukago  gwaitu na Ruhanga. Kwonka Yehova atuhaire ekintu ekirikubaasa kutuhwera kurwanisa emiteekateekyere egwire. Atuhaire amatsiko.

17. Okugira amatsiko ni kikuru kita?

¹⁷ Omu 1 Abatesalonika 5:8, Baibuli neegyeragyeranisa amatsiko gaitu n’enkofiira erikurinda omutwe gw’omuserukare omu kurwana. Neegira ngu enkofiira egyo “n’amatsiko g’okujunwa.” Okugira amatsiko omu bi Yehova arikuraganisa nikibaasa kurinda ebiteekateeko byaitu, kandi kituhwere kutagira ebiteekateeko bibi.

18, 19. Amatsiko gakahwera gata Yesu kuguma ahami?

¹⁸ Amatsiko gakahwera Yesu kuguma ahami. Omu kiro ekyahereerukireyo ari omu nsi, akahikwaho embeera zigumire zikurataine. Munywani we ow’aha mara akamureebya. Ondiijo akamwehakana ngu tarikumumanya. Abandi bakamutsigaho baahunga. Abantu b’eihanga rye bakeesharinga, barikushaba ngu bamwite bamuhanike aha muti. Niki ekyamuhweraire  kwemera embeera zigumire ezi? “Ahabw’okushemererwa okwatairweho omu maisho ge” akeemera omuti gw’okubonaboneraho, yaagaya “enshoni zaagwo, kandi hati ashutami aha rubaju rwa buryo rw’ekitebe ky’Obukama bwa Ruhanga.”​—Abaheburaayo 12:2.

¹⁹ Yesu akaba naamanya ngu yaaguma ari omwesigwa, naija kuhimbisisa Ishe kandi ayorekye ngu Sitaane n’omubeihi. Amatsiko aga gakamuhwera kugira okushemererwa kwingi. Kandi akaba naamanya ngu juba naija kugaruka abe na Ishe omu iguru. Amatsiko aga gakamuhwera kugumisiriza. Nka Yesu, twine kuta omutima aha matsiko gaitu. Nigaija kutuhwera kugumisiriza n’obu haakubaho ki.

20. Niki ekirikubaasa kukuhwera kuguma oine emiteekateekyere mirungi?

²⁰ Yehova naareeba okwikiriza n’okugumisiriza kwawe. (Isaaya 30:18; shoma Malaki 3:10.) Naaraganisa kukuha “ebi omutima gwawe gurikwetenga.” (Zaaburi 37:4)  N’ahabw’ekyo guma otaire ebiteekateeko byawe aha matsiko. Sitaane naayenda ngu ohwe amatsiko, kandi oteekateekye ngu ebi Yehova arikuraganisa tibirikwija kuhikiirira. Kwonka toine kwikiriza emiteekateekyere egwire nk’egyo! Waareeba ngu amatsiko gaawe gariyo nigatuuba, shaba Yehova kukuhwera. Ijuka ebigambo ebiri omu Abafilipi 4:6, 7: ‘Muteemereza omutima aha kintu kyona, kureka omuri byona mumanyise Ruhanga ebi murikwetenga omu kushaba n’okweshengyereza, kandi musiime. Kandi obusingye bwa Ruhanga oburengire okwetegyereza kw’omuntu weena, nibwija kuguma burinde emitima yaanyu n’obwengye bwanyu omuri Kristo Yesu.’

21, 22. (a) Yehova ainiire ensi kigyendererwa ki? (b) Omaririire kukora ki?

²¹ Gira obwire bw’okuteekateeka aha biro by’omumaisho ebirikushemeza. Juba, buri omwe ohuriire naija kuba naaramya Yehova. (Okushuuruurwa 7:9, 14) Teekateeka aha mbeera nungi eziraabe omu nsi ensya. Niziija kuhita ekintu kyona eki turikubaasa kuteekateeka! Sitaane, baadaimoni be, n’ebikorwa bibi byona nibiija kuhwaho. Torikwija kurwara, kandi torikwija kufa. Kureka, noija kuba noimuka buri izooba oine amaani maingi, kandi oshemereirwe ahabw’okuba ohuriire. Abantu boona nibaija kukorera hamwe kuhindura ensi paradiso. Buri omwe naija kuba aine eby’okurya n’omwanya ogutarimu kabi. Abantu nibaija kuba batari nshaarizi nari ebihanda, kureka nibaija kuba nibatwarizana gye. Bwanyima, abantu boona omu nsi nibaija kugira “obusingye bw’abaana ba Ruhanga obw’ekitiinisa.”​—Abarooma 8:21.

²² Yehova naayenda ngu omuhindure munywani waawe orikukirayo. N’ahabw’ekyo, kora kyona ekirikubaasika kumworobera n’okumwirira haihi buri izooba. Buzima, twena ka tugume omuri rukundo ya Ruhanga ebiro byona!​—Yuda 21.