1-3. (a) Abantu baingi nibatwara bata emirimo yaabo? (b) Nituza kugarukamu bibuuzo ki omu shuura egi?

ABANTU omu nsi yoona nibakora munonga kwebaisaho n’ab’omu maka gaabo. Kwonka baingi tibarikukunda emirimo yaabo, nangwa n’abamwe nibaba batarikwenda kuza aha murimo buri izooba. Ku oraabe nikwo orikwehurira otyo, noobaasa kukora ki kureetera omurimo gwawe kuba ogurikushemeza? Noobaasa kukunda ota omurimo gwawe?

² Baibuli neeyoreka ngu n’ekiconco ‘kya Ruhanga omuntu weena okurya n’okunywa’ n’okushemezibwa ebi arikukora omu bweziriki byona. (Omubuurizi 3:13) Yehova akatuhanga twine ekyetengo ky’okukora. Naayenda ngu ebi turikukora bitureetere okushemererwa.​—Shoma Omubuurizi 2:24; 5:18.

³ Mbwenu shi, niki ekirikubaasa kutuhwera kukunda emirimo yaitu? Ni mirimo ya muringo ki ei Abakristaayo baine kwetantara? Nitubaasa kuringaaniza tuta emirimo yaitu n’okuramya Yehova? Ni murimo ki ogurikukirayo obukuru ogu twine kukora?

4, 5. Yehova naatwara ata okukora?

⁴ Yehova naakunda kukora. Okutandika 1:1 nihagira  hati: “Omu kutandika Ruhanga akahanga eiguru n’ensi.” Ruhanga ku yaaherize kuhanga ensi na byona ebigirimu, akagira ngu bikaba biri “birungi munonga.” (Okutandika 1:31) Omuhangi waitu akatunga okumarwa ahabw’ebi yaahangire.​—1 Timoseo 1:11.

⁵ Yehova na hati naakikora. Yesu akagira ati: “Tata naakikora na hati.” (Yohaana 5:17) N’obu turaabe tutarikumanya eby’omuhendo byona ebi Yehova atwire naakora, nitumanya bimwe aharibyo. Atwire naarundaana abarikwija kutegyeka omu Bukama bwe hamwe n’Omwana we, Yesu Kristo. (2 Abakorinso 5:17) Yehova naakora n’obweziriki kwebembera abantu n’okubareeberera. Kurabira omu murimo gw’okubuurira omu nsi yoona, obukaikuru bw’abantu bamanyire Yehova, kandi baine amatsiko g’okutuuraho ebiro byona omu paradiso omu nsi.​—Yohaana 6:44; Abarooma 6:23.

6, 7. Yesu atwire ari omukozi wa muringo ki?

⁶ Yesu naakunda okukora nka Ishe. Atakaizire omu nsi, akaba ari “omukozi mukuru” wa Ruhanga, kandi akeejumba omu kuhanga ebintu byona eby’omu iguru n’omu nsi. (Enfumu 8:22-31; Abakolosai 1:15-17) Kandi akagumizamu naakora n’obweziriki obu yaabaire ari omu nsi. Omu butsigazi bwe, akaba aine omwoga murungi gw’okubaija, obundi arikukora ebibaizirwe n’okwombeka amaju. Yesu akaba naamanya kubaija gye, reero yaamanywa ‘nk’omubaizi.’​—Mako 6:3.

⁷ Kwonka, omurimo gwa Yesu omukuru omu nsi gukaba guri ogw’okubuurira amakuru marungi n’okwegyesa abantu ebirikukwata ahari Yehova. Akaba aine kuhendera obuheereza bwe omu myaka eshatu n’ekicweka, kandi akaba naakora n’obweziriki kuruga omu kasheeshe kare munonga, kuhitsya nyekiro munonga. (Luka  21:37, 38; Yohaana 3:2) Yesu akagyenda mahiro nyingi munonga omu nguuto z’omucuucu, arikubuurira abantu baingi amakuru marungi nk’oku kirikubaasika.​—Luka 8:1.

8, 9. Ahabw’enki Yesu yaabaire naakunda ebi arikukora?

⁸ Yesu akaba naatwara okukora omurimo gwa Ruhanga nk’okurya eby’okurya. Omurimo ogu gukaba nigumuha amaani. Ebiro ebimwe akaba akora munonga aburwa n’obwire bw’okurya eby’okurya. (Yohaana 4:31-38) Omu mbeera zoona akaba naahwera abandi kwega ebirikukwata ahari Ishe. Niyo nshonga ahabw’enki yaabaire naabaasa kugambira Yehova ati: “Nkuhaisize ekitiinisa omu nsi, ahabw’okuba omurimo ogu wampaire kukora nguhikiriize.”​—Yohaana 17:4.

⁹ Buzima, bombi Yehova na Yesu n’abeeziriki omu kukora, kandi nibatunga okushemererwa n’okumarwa omu kukora kwabo. Nitwenda kutooreza “Ruhanga,” kandi nitwenda n’okuteeraho kukuratira Yesu nk’oku kirikubaasika. (Abaefeso 5:1; 1 Petero 2:21) Niyo nshonga ahabw’enki nitukora n’obweziriki nk’oku kirikubaasika omu buri kimwe eki turikukora.

10, 11. Niki ekirikubaasa kutuhwera kugira emiteekateekyere mirungi aha mirimo yaitu?

¹⁰ Abaheereza ba Yehova, nitukora n’amaani kwebaisaho n’ab’omu maka gaitu. Nitwenda ngu emirimo yaitu etureetere kutunga okushemererwa, kwonka obumwe tikwo kirikuba. Mbwenu shi noobaasa kukora ki omurimo gwawe gwaba gutarikukushemeza?

¹¹ Gira emiteekateekyere mirungi. Nitubaasa kutahindura omwanya ogu turikukoreraho nari obwire obu  turikumara nitukora, kwonka nitubaasa kuhindura emiteekateekyere yaitu. Okwetegyereza eki Yehova arikwenda ngu tukore nikibaasa kutuhwera. Nk’eky’okureeberaho, naayenda ngu omutwe gw’eka areeberere eka ye arikubaha ebirikwetengyesa nk’oku arikubaasa. Nangwa, Baibuli neegira ngu omuntu orikuremwa kureeberera ab’omu ka ye “naaba ari mubi okukira otarikwikiriza.” (1 Timoseo 5:8) Ku oraabe ori omutwe gw’eka, buzima nookora munonga kureeberera ab’eka yaawe. Yaaba nookunda omurimo ogu orikukora nari otarikugukunda, kimanye ngu waareeberera eka yaawe, nooba nooshemeza Yehova.

12. Okuba abeeziriki kandi ab’amazima omu kukora nikitugasira kita?

¹² Ba omweziriki kandi ow’amazima. Eki nikibaasa kukuhwera kukunda omurimo gwawe. (Enfumu 12:24; 22:29) Ahakuba waaba omweziriki kandi ow’amazima mukama waawe naija kukwesiga. Abantu nibakunda abakozi ab’amazima, ahakuba tibarikwija kwiba esente zaabo, ebintu byabo, nari obwire bwabo. (Abaefeso 4:28) Kandi okukira munonga, Yehova naakimanya waaba omweziriki kandi ow’amazima. Noobaasa kugira “omutima ogutarikweshinja” ahabw’okumanya ngu nooshemeza Ruhanga ou orikukunda.​—Abaheburaayo 13:18; Abakolosai 3:22-24.

13. Niki ekindi ekirikubaasa kuruga omu kuba ab’amazima aha murimo?

¹³ Manya ngu emitwarize yaawe aha murimo neehimbisisa Yehova. Egi n’enshonga endiijo erikutureetera kushemezibwa emirimo ei turikukora. (Tito 2:9, 10) Nikibaasa kureetera ou orikukora nawe kwenda kwega Baibuli ahabw’emitwarize yaawe mirungi.​—Shoma Enfumu 27:11; 1 Petero 2:12.

14-16. Nooba oine kuteekateeka ahari ki waaba noocwamu omurimo ogu oraakore?

¹⁴ Baibuli terimu mushororongo gw’emirimo ei Abakristaayo baine kukora n’ei bataine kukora. Kwonka harimu emisingye erikubaasa kutuhwera kucwamu gye aha bikwatiraine n’emirimo. (Enfumu 2:6) Turikwihirira aha misingye ya Baibuli, nitubaasa kwebuuza ebibuuzo ebiri ahaifo.

 ¹⁵ Omurimo ogu nigwija kundeetera kukora ekirikugwisa kubi Yehova? Nitumanya ebikorwa ebi Yehova arikwanga, nk’okwiba n’okubeiha. (Okuruga 20:4; Ebyakozirwe 15:29; Abaefeso 4:28; Okushuuruurwa 21:8) N’ahabw’ekyo nituba abeegyendesereza twetantara kukora omurimo gwona ogurikuhenda emitindo ya Yehova.​—Shoma 1 Yohaana 5:3.

¹⁶ Omurimo ogu nigushagika ekikorwa eki Yehova arikwanga? Nk’eky’okureeberaho, ka tugire ngu otungire omurimo gw’okwakiira abantu aha irwariro eririkwihamu enda? Ti kigwire kukora nk’omwakiizi w’abantu omu irwariro. Kwonka noomanya oku Yehova arikwehurira omuntu yaihamu enda. N’obu oraabe tiiwe orikwihamu enda, kwonka shi kurugiirira aha miteekateekyere ya Yehova torikureeba ngu naiwe nooba oine orubanja?​—Okuruga 21:22-24.

17. Niki ekirikubaasa kutuhwera kucwamu ebirikushemeza Yehova?

¹⁷ Twagyendera aha misingye ya Baibuli, nitwija kutendeka okubaasa kwaitu kw’okwetegyereza kituhwere kutaanisa ekirungi n’ekibi nk’oku kirikworekwa omu Abaheburaayo 5:14. Yebuuze oti: ‘Naikiriza omurimo ogu, nigubaasa kuteeza abandi entsibo? Omurimo ogu nigwija kunyetengyesa kutsigaho omukundwa wangye n’abaana bangye kuza omu ihanga erindi? Ekyo nikiija kubakwataho kita?’

18. Ahabw’enki obumwe kitoorobi kwebembeza eby’omwoyo?

¹⁸ Nikibaasa kuguma kwebembeza okuramya Yehova omu ‘biro ebi eby’emperu eby’akabi kaingi’ ebigumire kwemera. (2 Timoseo 3:1) Okutunga omurimo kandi okaguma nagwo tikyorobi. Twine kureeberera amaka gaitu, kwonka nitumanya ngu okuramya kwaitu kwine kuza  omu mwanya gw’okubanza. Titushemereire kwebembeza okusherura eby’obugaiga. (1 Timoseo 6:9, 10) Nitubaasa kwebembeza tuta ebintu ebirikukira obukuru, kandi tukareeberera n’amaka gaitu?​—Abafilipi 1:10.

19. Okwesiga Yehova nikutuhwera kuta kutagwera orubaju aha bikwatiraine n’okukora?

¹⁹ Yesigire kimwe Yehova. (Shoma Enfumu 3:5, 6.) Nitumanya ngu Ruhanga naamanya byenyini ebi turikwenda, kandi naatufaho munonga. (Zaaburi 37:25; 1 Petero 5:7) Ekigambo kye nikigira kiti: “Mutarigira omutima ogurikukunda empiiha, ebi mwine bibe nibyo byabamara. Ahakuba [Ruhanga] akagira ati: Tindikutsigaho, kandi tindikuhemukaho na kakye.” (Abaheburaayo 13:5) Yehova tarikwenda ngu tugume twerarikiriire aha bikwatiraine n’okureeberera amaka gaitu. Kumara emyaka mingi atwire naayoreka ngu naabaasa kuhwera abaheereza be omu byetengo byabo. (Matayo 6:25-32) N’obu twakuba nitukora omurimo gwa muringo ki, tushemereire kutunga obwire bw’okweyegyesa Ekigambo kya Ruhanga butoosha, kubuurira amakuru marungi, n’okuza omu nteerane z’Ekikristaayo.​—Matayo 24:14; Abaheburaayo 10:24, 25.

20. Nitubaasa kworobya tuta embeera zaitu?

²⁰ Gira eriisho ryorobi. (Shoma Matayo 6:22, 23.) Eki nikimanyisa okworobya embeera zaitu kugira ngu tute omutima aha kuheereza Yehova. Nitumanya ngu kigwire kwebembeza eby’okweshemeza, okusherura esente, n’ebintu ebiri aha murembe omu mwanya gw’omukago gwaitu na Ruhanga. Mbwenu shi, niki ekiraatuhwere kuta ebintu ebikuru omu mwanya gw’okubanza? Twine kuteeraho kwetantara amabanja. Ku oraabe oine eibanja hati, kora entebeekanisa kurituubya nari kurishashura ryona. Twaba tutegyendesereize, eby’obugaiga nibibaasa  kutwara obwire bwaitu bwingi n’amaani, reero tuburwe obwire bw’okushaba, kweyegyesa, n’okuza omu kubuurira. Omu mwanya gw’okwikiriza eby’obugaiga kureetera embeera zaitu kuguma, twine kwega kumarwa n’ebikuru ebirikwetengyesa, ‘nk’eby’okurya n’eby’okujwara.’ (1 Timoseo 6:8) Kandi embeera yoona ei turaabe turimu, ni kirungi kweshwijuma kureeba oku turikubaasa kwongyera kuheereza gye Yehova.

21. Ahabw’enki twine kumanya eki twine kuta omu mwanya gw’okubanza?

²¹ Ta ebikuru omu mwanya gw’okubanza. Twine kukoresa  gye obwire bwaitu, amaani gaitu, n’ebintu byaitu. Twaba tutegyendesereize, ebintu ebitari bikuru nk’obwegyese nari esente, nibiija kutwara obwire bwaitu obw’omuhendo. Yesu akagira ati: “Mubanze musherure Obukama.” (Matayo 6:33) Ebi turikucwamu, emize yaitu, ebi turikukora buri izooba, n’ebigyendererwa byaitu, nibibaasa kworeka eki turikuta omu mwanya gw’okubanza.

22, 23. (a) Abakristaayo twine murimo ki ogurikukirayo obukuru? (b) Niki ekiraatuhwere kukunda emirimo yaitu?

²² Okuheereza Yehova n’okubuurira abandi amakuru marungi, nigwo murimo ogurikukirayo obukuru ogu twine kukora. (Matayo 24:14; 28:19, 20) Nka Yesu, nitwenda kukora kyona eki turikubaasa omu murimo ogu. Abamwe bagiire omu myanya ahu ababuurizi barikwetengwa munonga. Abandi beegire endimi ezindi kugira ngu babuurire abantu abarikugamba endimi ezo. Gaaniiraho n’abo ababaasize kukora ebintu ebyo obabuuze oku babaasize kubikora. Nibaija kukugambira ngu beeyongyeire kugira okushemererwa n’okumarwa.​—Shoma Enfumu 10:22.

²³ Obunaku obu, baingi ahariitwe nitumara eshaaha nyingi aha murimo nari aha mirimo erengire ahari gumwe, kubaasa kuhwera amaka gaitu kutunga ebikuru ebirikwetengyesa. Eki Yehova naakimanya, kandi naasiima buri kimwe eki turikukora kureeberera amaka gaitu. N’ahabw’ekyo ka tugumizemu nitutooreza Yehova na Yesu turikuba abeeziriki omu kukora emirimo yaitu. Kandi ka tugume nitwijuka ngu omurimo gwaitu omukuru n’okuheereza Yehova hamwe n’okubuurira amakuru marungi g’Obukama. Eki nikiija kutuhwera kugira okushemererwa okwabuzima.