1. Yesu akaba ayerarikiriire ahari ki omu kiro ekyahereerukireyo atakaitsirwe?

OMU kiro ekyahereerukireyo Yesu atakaitsirwe, akaba naamanya ngu ari haihi kutsigaho abeegi be, kandi akaba ayerarikiriire aha biro byabo by’omumaisho. Akabagambira ati: “Timuri b’ensi.” (Yohaana 15:19) Bwanyima, akabashabira, arikugambira Ishe ati: “Ti b’ensi, nk’oku naanye ntari w’ensi.” (Yohaana 17:15, 16) Yesu akaba naamanyisa ki?

2. “Ensi” ei Yesu yaagambireho niki?

²“Ensi” ei Yesu yaagambireho, n’abantu abatarikumanya Ruhanga, abari ahansi y’obutegyeki bwa Sitaane. (Yohaana 14:30; Abaefeso 2:2; Yakobo 4:4; 1 Yohaana 5:19) Nitubaasa kwetantara tuta kuba “ab’ensi”? Omu shuura egi, nituza kureeba emiringo mingi. Nituhamira aha Bukama bwa Ruhanga, kandi nituguma tutaine rubaju omu by’obutegyeki. Nitwangira omwoyo gw’ensi. Nitweboneza kandi tujwara omu muringo ogushemeire, kandi nitugira emiteekateekyere eringaniire aha sente. Kandi nitujwara ekijwaro ky’eby’okwerindisa eki Ruhanga arikutuha.​—Reeba Ebirikukiraho 16.

3. Yesu akaba naatwara ata eby’obutegyeki?

³ Obu Yesu yaabaire ari omu nsi, akareeba abantu baine  oburemeezi bwingi n’embeera zigumire. Buzima akaba naabafaho kandi akaba naayenda kubahwera. Mbwenu shi akaba omwebembezi omu by’obutegyeki? Ngaaha. Akaba naamanya ngu eki abantu buzima barikwenda n’Obukama bwa Ruhanga, nari gavumenti ya Ruhanga. Yesu akaba naija kuba Omugabe w’Obukama obwo, kandi nibwo yaabaire naakira kubuuriraho. (Danieli 7:13, 14; Luka 4:43; 17:20, 21) Yesu tarayejumbire omu by’obutegyeki, kandi tihaine kibiina ky’eby’obutegyeki eki yaashagikire. Obu yaabaire ari omu maisho g’omwebembezi Omurooma Pontio Pilaato, akagira ati: “Obugabe bwangye ti bw’ensi egi.” (Yohaana 18:36) N’abeegi be nabo bakaba batarikwejwanzya omu by’obutegyeki. Ekitabo On the Road to Civilization kikagira ngu Abakristaayo aba ira “bakaba batarikubaasa kwebembera ofiisi y’eby’obutegyeki.” N’obunaku obu, Abakristaayo ab’amazima nikwo barikutwaza batyo. Nituhamira aha Bukama bwa Ruhanga kandi nituguma tutaine rubaju omu nshonga z’eby’obutegyeki omu nsi egi.​—Matayo 24:14.

4. Abakristaayo ab’amazima nibashagika bata Obukama bwa Ruhanga?

⁴ Omujwekyerwa w’eihanga naaba naajwekyera eihanga rye omu ihanga erindi, n’ahabw’ekyo tarikwejwanzya omu by’obutegyeki omu ihanga eri arikutuuramu. Abashukirweho omwoyo gurikwera abaine amatsiko g’okuza omu iguru kutegyeka na Yesu, bari omu mbeera niyo emwe. Paulo akahandiikira Abakristaayo abashukirweho omwoyo gurikwera ati: “Turi entumwa omu mwanya gwa Kristo.” (2 Abakorinso 5:20) Abashukirweho omwoyo gurikwera nibajwekyera gavumenti ya Ruhanga. Tibarikwejwanzya omu nshonga z’eby’obutegyeki n’eza gavumenti z’ensi egi. (Abafilipi 3:20) Omu mwanya gw’ekyo, nibahwera obukaikuru bw’abantu kwega ebirikukwata  ahari gavumenti ya Ruhanga. ‘Ab’entaama ezindi’ abaine amatsiko g’okutuura omu nsi ebiro byona, nibashagika abashukirweho omwoyo gurikwera. Nabo tibarikushagika orubaju rwona omu by’obutegyeki. (Yohaana 10:16; Matayo 25:31-40) Buzima, tihariho Mukristaayo ow’amazima orikwejwanzya omu by’obutegyeki eby’ensi egi.​—Shoma Isaaya 2:2-4.

5. Ni nshonga ki emwe erikureetera Abakristaayo kwanga kuza omu ntaro kurwana?

⁵ Abakristaayo ab’amazima nibareeba abaheereza ba Ruhanga bagyenzi baabo nk’ab’eka yaabo, kandi baine obumwe n’obu baraabe nibaruga omu mahanga nari ebicweka bitarikushushana. (1 Abakorinso 1:10) Twaza omu rutaro, nituba niturwanisa ab’eka yaitu, ab’eishe-emwe bagyenzi baitu, abu Yesu yaaturagiire kukunda. (Yohaana  13:34, 35; 1 Yohaana 3:10-12) Kandi, Yesu akagambira abeegi be kukunda n’abazigu baabo.​—Matayo 5:44; 26:52.

6. Abaheereza ba Yehova abeehaireyo ahariwe nibareeba bata gavumenti z’abantu?

⁶ N’obu itwe Abakristaayo turaabe nituguma tutaine rubaju omu by’obutegyeki, nituteeraho munonga kuba abatuuzi barungi. Nk’eky’okureeberaho, nitworeka ngu nituha gavumenti ekitiinisa turikworobera ebiragiro byayo, turikushashura n’emishoro. Kwonka butoosha nituhamiza kimwe ngu ‘ebya Ruhanga twabiha Ruhanga.’ (Mako 12:17; Abarooma 13:1-7; 1 Abakorinso 6:19, 20) ‘Ebya Ruhanga’ nibitwariramu okumukunda, okumworobera, n’okumuramya. Nitwikiriza kufeerwa n’amagara gaitu omu mwanya gw’okugomera Yehova.​—Luka 4:8; 10:27; shoma Ebyakozirwe 5:29; Abarooma 14:8.

7, 8. “Omwoyo gw’ensi” niki, kandi nigureetera abantu kukora ki?

⁷ Okwetaanisa aha nsi erikwebemberwa Sitaane nikimanyisa okwanga kwebemberwa ‘omwoyo gw’ensi.’ Omwoyo gw’ensi n’emiteekateekyere hamwe n’emitwarize erikuruga ahari Sitaane, kandi nigwo gurikwebembera abantu abatarikuheereza Yehova. Kwonka Abakristaayo nibeetantara emiteekateekyere egi. Nk’oku Paulo yaagizire, ‘itwe omwoyo ogu twahairwe ti gw’ensi egi, kureka n’omwoyo ogurikuruga ahari Ruhanga.’​—1 Abakorinso 2:12; Abaefeso 2:2, 3; reeba Ebirikukiraho 17.

⁸ Omwoyo gw’ensi nigureetera abantu kuba abarikweyendeza, ab’amaryo, kandi abagomi. Nigubareetera kuteekateeka ngu tikirikubeetengyesa kworobera Ruhanga. Sitaane naayenda ngu abantu bakore buri kimwe eki barikwenda batarikuteekateeka aha biraarugyemu. Naayenda kureetera abantu kwikiriza ngu ‘ebi omubiri  gurikwetenga, n’ebi amaisho garikwetenga’ nibyo birikukirayo obukuru. (1 Yohaana 2:16; 1 Timoseo 6:9, 10) Okukira munonga Omuregi naateeraho munonga kuhabisa abaheereza ba Yehova arikwenda ngu bagire emiteekateekyere nk’eye.​—Yohaana 8:44; Ebyakozirwe 13:10; 1 Yohaana 3:8.

9. Omwoyo gw’ensi nigubaasa kutukwataho guta?

⁹ Omwoyo gw’ensi guri buri hamwe omu nsi, nk’omwoya ogu turikwitsya. Twaba tutakozire munonga kwangira omwoyo ogu, nigwija kutushiisha. (Shoma Enfumu 4:23.) Eki nikibaasa kutandika omu miringo etarikureebwa butunu, obundi turikwikiriza emiteekateekyere y’abantu abatarikuramya Yehova. (Enfumu 13:20; 1 Abakorinso 15:33) Nari omwoyo gw’ensi nigubaasa kutushiisha kurabira omu birikwitsa enshoni, abantu abeehagwire aha mazima, nari emizaano erimu okuhayahayana.​—Reeba Ebirikukiraho 18.

10. Nitubaasa kwetantara tuta omwoyo gw’ensi?

¹⁰ Mbwenu shi nitubaasa kwetantara tuta kwebemberwa omwoyo gw’ensi? Twine kuguma haihi na Yehova kandi tukaikiriza kukuratira obwengye bwe. Twine kumushaba obutoosha kutuha omwoyo gurikwera, kandi tukeejumbira kimwe omu buheereza bwe. Yehova niwe arikukizayo amaani omu nsi n’omu iguru. Nitubaasa kuhamya ngu naija kutuhwera kwangira omwoyo gw’ensi.​—1 Yohaana 4:4.

11. Omwoyo gw’ensi gureeteire abantu kujwara bata?

¹¹ Kandi nitworeka ngu tituri b’ensi kurugiirira aha ku turikujwara n’oku turikweboneza. Abantu baingi omu nsi nibajwara kugira ngu bareebwe, kureetera abandi kugira  ebyetengo bibi, kworeka omwoyo gw’obugomi, nari kweyoreka ahabw’esente ezi baine. Kwonka abamwe tibarikufayo oku barikureebeka. Nibabaasa kucwamu kujabirira nari kuba abarofa. Titurikwenda kwikiriza emiteekateekyere nk’egyo eyaagambwaho yoona kukwata aha mijwarire yaitu n’oku turikweboneza.

12, 13. Ni misingye ki eshemereire kutuhwera kucwamu ebi turaajware?

¹² Itwe abaheereza ba Yehova nitwenda kujwara ebirikureebeka gye, ebicumire gye, kandi ebirikuhikaana n’omukoro ogu turiho. Ahabw’okugira ngu ‘nitutiina  Ruhanga,’ nitujwara omu muringo ogurikworeka ngu tucureire kandi tutebeekaine omu biteekateeko.​—1 Timoseo 2:9, 10; Yuda 21.

¹³ Emijwarire yaitu neekwata aha ku abandi barikureeba Yehova n’abaheereza be. Nituba nitwenda kukora ‘byona kuhimbisisa Ruhanga.’ (1 Abakorinso 10:31) Okuba tucureire nikitwariramu okufayo aha nyehurira z’abandi n’ebiteekateeko byabo. N’ahabw’ekyo twaba nitucwamu ebi turaajware nari oku turaayeboneze, nitwijuka ngu okucwamu kwaitu nikukwata aha bantu abandi.​—1 Abakorinso 4:9; 2 Abakorinso 6:3, 4; 7:1.

14. Tushemereire kuteekateeka ahari ki twaba nitutoorana ebi turaajware omu buheereza bwaitu obw’Ekikristaayo?

¹⁴ Nitujwara tuta twaba nituza omu nteerane zaitu nari omu kubuurira? Nitwetaho omutima munonga? Ebijwaro byaitu nibireetera abandi kukwatwa enshoni? Mbwenu shi nituteekateeka ngu oku turikujwara nikutukwataho twenka, tikurikukwata aha bandi? (Abafilipi 4:5; 1 Petero 5:6) Amazima gari ngu, omu buhangwa nituba nitwenda kureebeka gye, kwonka buzima ebintu ebirikutureetera kukundwa, n’emitwarize yaitu ey’Ekikristaayo. Egi niyo mitwarize ei Yehova arikutaho omutima ku arikutureeba. Emitwarize egi neeyoreka ekiri ‘omunda omu mutima, eky’obuguzi bwingi omu maisho ga Ruhanga.’​—1 Petero 3:3, 4.

15. Ahabw’enki Yehova atarikutugambira ebijwaro byenyini ebi twine kujwara n’oku twine kweboneza?

¹⁵ Yehova tatuhaire omushororongo gw’ebiragiro ebirikukwata aha bi twine kujwara n’ebi tutaine kujwara. Omu mwanya gw’ekyo, atuhaire emisingye ya Baibuli, erikubaasa kutuhwera kucwamu gye. (Abaheburaayo 5:14) Naayenda ngu twaba nitucwamu omu bintu ebihango n’ebikye, twihirire ahari rukundo ei tumwiniire hamwe  n’abandi. (Shoma Mako 12:30, 31.) Omu nsi yoona, Abajurizi ba Yehova nibajwara omu miringo etarikushushana kurugiirira aha ntwaza yaabo n’eki buri omwe arikukunda. Enjwara egi neeboneza abantu kandi neebareetera kugira obunanukye.

16. Emiteekateekyere y’ensi aha sente neetaana eta n’eki Yesu yaayegyeise, kandi nitubaasa kwebuuza bibuuzo ki?

¹⁶ Sitaane naayenda ngu abantu bateekateekye ngu esente n’ebintu nibireeta okushemererwa, kwonka abaheereza ba Yehova nibamanya ngu ekyo tikihikire. Nitwesigira kimwe ebigambo bya Yesu ebi: “Amagara g’omuntu tigari  mu bwingi bw’ebintu ebi aine.” (Luka 12:15) Esente tizirikubaasa kutureetera kugira okushemererwa okwabuzima. Tizirikubaasa kutuha abanywani abaabuzima, obusingye bw’omu biteekateeko obwabuzima, nari amagara agatahwaho. Amazima gari ngu nitwetenga ebintu ebimwe, kandi nitwenda kubaho tushemereirwe. Kwonka Yesu akatwegyesa ngu nitutunga okushemererwa twagira omukago murungi na Ruhanga, kandi tukeebembeza okuramya kwaitu. (Matayo 5:3; 6:22) Yebuuze oti: ‘Nyine emiteekateekyere nk’ey’abantu b’ensi aha sente? Esente nikyo kintu kikuru eki ndikukira kuteekateekaho nari kugambaho?’​—Luka 6:45; 21:34-36; 2 Yohaana 6.

17. Noogasirwa ota waayetantara emiteekateekyere y’ensi aha sente?

¹⁷ Twata omutima aha kuheereza Yehova, kandi tukeetantara emiteekateekyere y’ensi aha sente, nituba abantu abaine ekigyendererwa. (Matayo 11:29, 30) Nitwija kutunga okumarwa n’obusingye omu biteekateeko n’omu mutima. (Matayo 6:31, 32; Abarooma 15:13) Nitwija kuba tutarikwerarikirira munonga aha kugira ebintu. (Shoma 1 Timoseo 6:9, 10.) Nitwija kutunga okushemererwa okurikuruga omu kuha abandi. (Ebyakozirwe 20:35) Kandi eki nikiija kutubaasisa kutunga obwire bwingi bw’okuba n’abu turikukunda. Nitubaasa n’okubyama gye.​—Omubuurizi 5:12.

18. Sitaane naateeraho kukora ki?

¹⁸ Sitaane naateeraho kwita omukago gwaitu na Yehova, n’ahabw’ekyo twine kukora buri kimwe ekirikubaasika kugurinda. Niturwana “n’amahe g’emyoyo emibi.” (Abaefeso 6:12) Sitaane na baadaimoni tibarikwenda ngu tushemererwe nari tugumeho ebiro byona. (1 Petero 5:8)  Abazigu aba ab’amaani nibaturwanisa, kwonka Yehova naabaasa kutuhwera kubasingura!

19. Abaefeso 6:14-18 nihashoboorora hata ekijwaro ky’eby’okwerindisa eky’Abakristaayo?

¹⁹ Ira abaserukare bakaba nibajwara ekijwaro ky’eby’okwerindisa baaba nibarwana omu rutaro. Naitwe, twine kujwara ekijwaro ky’eby’okwerindisa eki Yehova atuhaire. (Abaefeso 6:13) Ekijwaro eki nikiija kuturinda. Abaefeso 6:14-18 nihagamba aha kijwaro eki hati: ‘[N’ahabw’ekyo mwemerere muhamire], mwezirikire amazima omu nda nk’orukoba, mujware eky’okuhikiirira nk’ekyoma ky’okwekingiza omu kifuba, mujware enkaito ez’okweteekateeka kugamba engiri y’obusingye, kandi ahari ebyo byona mukwatireho engabo [mpango] y’okwikiriza, ei murikubaasa kuraarisa emyambi y’omuriro yoona ey’Omubi. Kandi mujware enkofiira ey’okujunwa [nari shi amatsiko], na rurara y’omwoyo, nikyo kigambo kya Ruhanga, mushabire omu mwoyo obutoosha omu kushaba kw’emiringo yoona n’okweshengyereza.’

20. Tushemereire kukora ki ekijwaro kyaitu ky’eby’okwerindisa kubaasa kutuhwera?

²⁰ Omuserukare yaayebwa kimwe aha by’okwerindisa bye akareka ekicweka kimwe ky’omubiri gwe kitarinzirwe, nikyo omuzigu arikwija kuhutaaza. Twaba nitwenda ngu eby’okwerindisa ebi biturinde, tushemereire kwijuka kujwara buri kimwe aharibyo. Twine kubijwara obwire bwona, kandi tubirinde bigume biri omu mbeera nungi. Okurwana kwaitu nikwija kugumizamu kuhitsya obu Sitaane araacwekyerezibwe hamwe n’abarikumushagika, na baadaimoni. (Okushuuruurwa 12:17; 20:1-3) N’ahabw’ekyo twaba niturwanisa ebyetengo bibi nari obweremwa bwaitu obumwe, titushemereire kuhwa amatsiko!​—1 Abakorinso 9:27.

21. Nitubaasa kusingura tuta okurwana kwaitu?

 ²¹ Itwe ahabwaitu titurikukiza Omuregi amaani. Kwonka ahabw’obuhwezi bwa Yehova, turi ab’amaani kumukira! Kubaasa kuguma turi abeesigwa, twine kushaba Yehova, twegye Ekigambo kye, kandi tuteeranire hamwe n’Abakristaayo bagyenzi baitu. (Abaheburaayo 10:24, 25) Ebintu ebi nibiija kutuhwera kuguma tuhamiire ahari Ruhanga, kandi tweteekateekire kurwanirira okwikiriza kwaitu.

22, 23. (a) Nitubaasa kuguma tuta tweteekateekire kurwanirira okwikiriza kwaitu? (b) Nituza kushwijuma ki omu kicweka ekirikukurataho?

²² Twine kuba tweteekateekire kurwanirira okwikiriza kwaitu obwire bwona. (Yohaana 15:19) Omu nshonga ezimwe, Abajurizi ba Yehova nibacwamu ebirikutaana n’eby’abantu abandi omu miringo mingi. Yebuuze oti: ‘Buzima ninyetegyereza ahabw’enki tutarikukora ekintu nanka? Nimpamiza kimwe ngu obuhabuzi bwa Baibuli n’obw’omwambari omwesigwa kandi ow’obwengye buhikire? Nikinyesiimisa kuba omwe aha Bajurizi ba Yehova? (Zaaburi 34:2; Matayo 10:32, 33) Nimbaasa kushoboororera abandi enyikiriza zangye?’​—Matayo 24:45; Yohaana 17:17; shoma 1 Petero 3:15.

²³ Omu mbeera nyingi, eki turikuba twine kukora kwetaanisa aha nsi nikiba nikireebwa butunu. Kwonka obumwe, nikiba kitarikureebwa butunu. Sitaane naateeraho kututega omu miringo mingi. Omutego gumwe ogu arikukoresa n’eby’okweshemeza. Nitubaasa kutoorana tuta eby’okweshemeza omu muringo gw’obwengye? Nituza kureeba enshonga egyo omu kicweka ekirikukurataho.