1, 2. Ahabw’enki twine kwegyendesereza twaba nitutoorana eby’okweshemeza?

TEERA akashushani oriyo nooza kurya ekijuma kwonka oyetegyereza ngu ekicweka kyakyo kijunzire. Noija kukora ki? Noija kugumizamu nookirya? Noija kukinaga? Nari noija kusharaho ekicweka ekijunzire reero orye ekicweka ekirungi?

² Omu miringo mingi eby’okweshemeza biri nk’ekijuma ekyo. Bimwe aharibyo nibibaasa kureeta okushemererwa, kwonka ebirikukira obwingi biijwiremu ebikorwa  by’obushambani, obushaarizi, nari baadaimoni. Mbwenu shi waaba nootoorana eby’okweshemeza noogira ngu, “niinye nyine kucwamu? Nimbaasa kutoorana eby’okweshemeza ebi ndikwenda”? Nari noogira ngu “eby’okweshemeza byona ni bibi”? Nari nooyegyendesereza omu kutoorana eby’okweshemeza, oyetantara ebibi reero oyejumba omu birungi?

3. Tushemereire kuteekateeka ahari ki twaba nitutoorana eby’okweshemeza?

³ Twena nitukunda kuhuumuraho n’okweshemeza kwonka nituba twine kutoorana gye ebi turaayejumbemu. N’ahabw’ekyo, twine kwebuuza oku eby’okweshemeza ebi turikwejumbamu birikukwata aha mukago gwaitu na Yehova.

4. Ni musingye ki gwa Baibuli ogurikubaasa kutuhwera omu kutoorana eby’okweshemeza?

⁴ Ku turikwehayo ahari Yehova, nitumuraganisa ngu nituza kumuheereza n’amagara gaitu goona. (Shoma Omubuurizi 5:4.) Kandi nitumuraganisa ngu nitwija ‘kukora byona kumuhimbisisa.’ (1 Abakorinso 10:31) Eki nikimanyisa ngu nituba twehaireyo ahari Ruhanga n’obu turikuba turi omu kahuumuro nari twaba nitwejumba omu by’okweshemeza, butari obu turikuba turi omu nteerane nari omu kubuurira bwonka.

5. Tushemereire kuramya Yehova mu muringo ki?

⁵ Buri kintu kyona eki turikukora nikikwata aha kuramya kwaitu. Entumwa Paulo akashoboorora eki, obu yaagira ati: ‘Muheyo emibiri yaanyu kuba ebitambo ebihuriire, ebirikwera, kandi ebirikusiimwa Ruhanga.’ (Abarooma 12:1) Yesu akagira ati: “Okunde [Yehova] Ruhanga waawe n’omutima gwawe gwona, n’obwengye  bwawe bwona, kandi n’amaani gaawe goona.” (Mako 12:30) Butoosha nituba nitwenda kuha Yehova ekirikukirayo oburungi. Omuri Israeli eya ira, abantu bakaba baine kuhayo ebitambo by’enyamaishwa eziboneire ezitaine kamogo. Ekitambo ku kyabaire kiba kiine akamogo koona, Ruhanga akaba atakisiima. (Abaleevi 22:18-20) Omu muringo nigwo gumwe, Ruhanga naabaasa kutasiima okuramya kwaitu. Eki nikibaasa kubaho kita?

6, 7. Eby’okweshemeza ebi turikutoorana nibibaasa kukwata bita aha kuramya kwaitu?

⁶ Yehova naatugambira ati: ‘Mwine kuba abarikwera, ahabw’okuba nyowe ndi orikwera.’ (1 Petero 1:14-16; 2 Petero 3:11) Yehova naikiriza okuramya kwaitu kwaba kuri okurikwera, nari okushemeire. (Eky’Ebiragiro 15:21) Okuramya kwaitu tikurikubaasa kuba okushemeire twaba nitukora ebintu ebi Yehova arikwanga, nk’eky’okureeberaho twaba nitwejumba omu bushambani, obushaarizi, nari eby’obufumu. (Abarooma 6:12-14; 8:13) Kandi nikigwisa kubi Yehova twatoorana eby’okweshemeza ebirimu ebikorwa nk’ebyo. Ekyo nikibaasa kureetera okuramya kwaitu kutasiimwa Yehova, kandi nikibaasa n’okushiisha omukago gwaitu nawe.

⁷ Mbwenu shi nitubaasa kuba tuta abeegyendesereza twaba nitutoorana eby’okweshemeza? Ni misingye ki erikubaasa kutuhwera kumanya eby’okweshemeza ebihikire n’ebitahikire?

8, 9. (a) Nitwetantara eby’okweshemeza bya muringo ki, kandi ahabw’enki?

⁸ Hariho eby’okweshemeza by’emiringo mingi obunaku obu. Bimwe aharibyo Abakristaayo nibabaasa kubyejumbamu, kwonka ebirikukira obwingi  tibirikwikirizibwa. Ka tureebe bimwe aha by’okweshemeza ebi twine kwetantara.

⁹ Vidiyo nyingi, emikura, emizaano y’aha tiivi nari kompyuta, n’ebyeshongoro nibiba biijwiremu obushambani, obushaarizi n’obufumu. Ebintu bibi nibikira kworekwa nk’ebitaine kabi kandi ebirikushemeza. Kwonka Abakristaayo nibeetantara eby’okweshemeza ebitarikuhikaana n’emitindo ya Yehova ehikire. (Ebyakozirwe 15:28, 29; 1 Abakorinso 6:9, 10) Twayetantara eby’okweshemeza nk’ebyo nitworeka Yehova ngu buzima nitwanga ebibi.​—Zaaburi 34:14; Abarooma 12:9.

10. Twaguma nitwejumba omu by’okweshemeza ebibi niharugamu ki?

¹⁰ Kwonka abamwe nibateekateeka ngu okwejumba omu by’okweshemeza ebirimu obushaarizi, obushambani, nari obufumu, ti ky’akabi. Nibateekateeka bati: ‘Biine kabi ki? Nyowe tindikubaasa kukora ebintu ebi.’ Twagira emiteekateekyere nk’egi, nituba nitwebeiha. Baibuli neegira eti: “Omutima n’engobya okukira ebintu byona, gwine endwara etarikutambwa.” (Yeremia 17:9) Twayejumba omu by’okweshemeza ebi Yehova arikwanga, mbwenu shi nitubaasa kugira ngu nitwanga ebintu ebyo? Twaguma nitwejumba omu by’okweshemeza by’omuringo nk’ogwo, nitwija kutandika kubireeba nk’ebitaine nshonga. Haahinguraho obwire, omuntu waitu w’omunda naija kurekyera aho kuturabura twaba turi haihi kucwamu kubi.​—Zaaburi 119:70; 1 Timoseo 4:1, 2.

11. Ebiri omu Abagalatia 6:7 nibibaasa kutuhwera bita omu kutoorana eby’okweshemeza?

¹¹ Ekigambo kya Ruhanga nikituhabura kiti: ‘Ebi omuntu arikubiba nibyo arikugyesha.’ (Abagalatia 6:7) Amazima  gari ngu twayejumba omu by’okweshemeza ebitashemeire, bwanyima nitubaasa kutandika kubikora. Nk’eky’okureeberaho, hariho bamwe ababaasize kugwa omu bushambani ahabw’okuguma nibareeba eby’okweshemeza ebibi. Kwonka Yehova naatuha obuhabuzi oburikutuhwera kutoorana gye eby’okweshemeza.

12. Niki ekiraatuhwere kucwamu gye twaba nitutoorana eby’okweshemeza?

¹² Eby’okweshemeza ebimwe Yehova tarikubisiima na kakye, kandi nitumanya ngu twine kubyetantara. Kandi shi byaba bitarikureebwa butunu ngu ni bibi? Yehova tatuhaire omushororongo gw’ebiragiro ebirikukwata aha bi twine kureeba n’ebi tutaine kureeba, ebi twine kuhurira, n’ebi twine kushoma. Kureka, naayenda ngu tukorese omuntu waitu w’omunda otendekirwe Baibuli. (Shoma Abagalatia 6:5.) Yehova atuhaire emisingye, nigo mazima agarikworeka oku arikureeba enshonga. Emisingye egi neetuhwera kutendeka omuntu waitu w’omunda. Neetuhwera kumanya ebi ‘Yehova arikwenda,’ kugira ngu tubone kucwamu ebirikumushemeza.​—Abaefeso 5:17.

13. Ahabw’enki Abakristaayo barikubaasa kutoorana eby’okweshemeza ebitarikushushana, kwonka niki eki boona baine kutwara nka kikuru?

¹³ Obumwe Omukristaayo naatoorana eby’okweshemeza ebirikutaana aha bya mugyenzi we. Ahabw’enki? Ahakuba nitukunda ebintu bitarikushushana. Kandi eki omuntu omwe arikwikiriza kwejumbamu nikibaasa kuba nikitaana aha ky’ondiijo. N’obu kiraabe kiri kityo, Abakristaayo boona baine kucwamu gye barikwihirira aha misingye ya Baibuli. (Abafilipi 1:9) Emisingye egi  neetuhwera kutoorana eby’okweshemeza ebirikusiimwa Yehova.​—Zaaburi 119:11, 129; 1 Petero 2:16.

14. (a) Niki eki twine kutwara nka kikuru aha bikwatiraine n’okukoresa obwire bwaitu? (b) Ni buhabuzi ki obu entumwa Paulo yaahaire Abakristaayo?

¹⁴ Ekindi eki twine kuteekateekaho n’obwire obu turikumara omu by’okweshemeza. Eki nikibaasa kutuhwera kureeba oku turikutwara eby’okweshemeza. Okuheereza Yehova Abakristaayo nikyo barikukirayo kutwara nka kikuru. (Shoma Matayo 6:33.) Kwonka twaba tutegyendesereize, eby’okweshemeza mporampora nibibaasa kutwara obwire bwaitu bwingi. Entumwa Paulo akarabura ati: “Mwerinde, mumanye oku murikugyenda, mutagyenda nk’abataine bwengye, kureka nk’abanyabwengye,  mutafiisa busha” obwire. (Abaefeso 5:15, 16) N’ahabw’ekyo, twine kweteeraho obugarukiro aha bikwatiraine n’obwire obu turikumara omu by’okweshemeza, kandi twine kuhamya ngu butoosha twaguma nitwebembeza obuheereza bwaitu.​—Abafilipi 1:10.

15. Nitubaasa kwerinda tuta eby’okweshemeza ebirikubaasa kushiisha omukago gwaitu na Yehova?

¹⁵ Buzima, titushemereire kwejumba omu by’okweshemeza ebi Yehova arikwanga. Kandi shi eby’okweshemeza ebi turikuteekateeka ngu nibibaasa kuba bitari birungi? Nabwo tushemereire kwegyendesereza? Teekateeka ahari eki. Ka tugire ngu oriyo noogyenda omu kahanda akari omu rushozi, mbwenu shi noija kuguma noogyendera aha rubaju rw’akahanda ako? Ngaaha. Waaba nootwara amagara nk’ag’omuhendo, noija kwetantara kugata omu kabi. Nikyo kimwe na twaba nitutoorana eby’okweshemeza. Ekigambo kya Ruhanga nikitugira kiti: “Iha ekigyere kyawe omu bubi.” (Enfumu 4:25-27) N’ahabw’ekyo, nitwetantara eby’okweshemeza ebi turikumanya ngu ni bibi, n’ebi turikwekyengyera ngu nibibaasa kuba bitari birungi, kandi ebirikubaasa kushiisha omukago gwaitu na Yehova.

16. (a) Ni bintu ki ebimwe ebi Yehova arikwanga? (b) Nitworeka tuta ngu nitwanga ebi Yehova arikwanga?

¹⁶ Omuhandiiki wa Zaaburi akahandiika ati: ‘Imwe abarikukunda [Yehova], mwangye obubi.’ (Zaaburi 97:10) Baibuli neetworeka emiteekateekyere ya Yehova n’oku arikwehurira. Yebuuze oku ebi orikwega birikubaasa kukuhwera kugira emiteekateekyere nk’eya Yehova. Nk’eky’okureeberaho, nitwega ngu Yehova naayanga ‘orurimi orurikubeiha, emikono erikusheesha eshagama  y’abataine rubanja, omutima ogurikuteekateeka enaama mbi, n’ebigyere ebirikurahukira ekibi.’ (Enfumu 6:16-19) Nitwega ngu twine kwetantara ‘obushambani, okuramya ebishushani, obufumu, eihari, ekiniga, obusinzi, okuraara enkyera n’ebindi nk’ebyo.’ (Abagalatia 5:19-21) Nooreeba oku emisingye ya Baibuli erikubaasa kukuhwera kutoorana gye eby’okweshemeza? Nitwenda kugyendera aha mitindo ya Yehova omu mbeera zoona, yaaba turi n’abandi nari turi twenka. (2 Abakorinso 3:18) Kandi eby’okweshemeza ebi orikwejumbamu waaba ori wenka nibyoreka eki ori buzima.​—Zaaburi 11:4; 16:8.

17. Waaba nootoorana eby’okweshemeza, ni bibuuzo ki ebi oine kwebuuza?

¹⁷ N’ahabw’ekyo, waaba nootoorana eby’okweshemeza, yebuuze oti: ‘Ebi ndikutoorana nibiija kushiisha omukago gwangye na Yehova? Nibiija kundeetera kweshinja?’ Ka tushwijume emisingye endiijo erikubaasa kutuhwera omu kutoorana eby’okweshemeza.

18, 19. (a) Ni buhabuzi ki obu entumwa Paulo yaahaire Abakristaayo? (b) Ni misingye ki erikubaasa kutuhwera kutoorana gye eby’okweshemeza?

¹⁸ Eby’okweshemeza ebi turikutoorana kwejumbamu nibyo birikuza omu biteekateeko byaitu. Entumwa Paulo akahandiika ati: “Byona eby’amazima, byona ebishemereire kuheebwa ekitiinisa, byona eby’oburyo, byona ebishemeire, byona ebirikushemeza, byona ebirikusiimwa, ku haraabe hariho oburungi, ku haraabe hariho ebishemereire kuhimbisibwa, mube nibyo mwateekateekaho.” (Abafilipi 4:8) Twata omu biteekateeko byaitu ebintu ebirungi, nitubaasa kugira tuti: “Ebigambo by’omu kanwa kangye, n’okuteekateeka kw’omu mutima gwangye bisiimwe omu maisho gaawe” ai Yehova.​—Zaaburi 19:14.

 ¹⁹ Yebuuze oti: ‘Ni bintu ki ebi ndikuta omu biteekateeko byangye? Bwanyima y’okureeba vidiyo nari omuzaano, ninguma nyine ebiteekateeko birungi? Ninguma nyine obusingye, n’omutima ogutarikweshinja? (Abaefeso 5:5; 1 Timoseo 1:5, 19) Nikikworobera kushaba Yehova? Nari nikikugumira? Bwanyima noogira ebiteekateeko by’obushaarizi nari obushambani? (Matayo 12:33; Mako 7:20-23) Eby’okweshemeza ebi ndikutoorana nibindeetera ‘kushushanisibwa n’ab’obusingye obu’?’ (Abarooma 12:2) Twaba ab’amazima omu kugarukamu ebibuuzo ebi, nibituhwera kumanya eki twine kukora kuhamya omukago gwaitu na Yehova. Nitwenda kushaba nk’omuhandiiki wa Zaaburi tuti: “Ohindure amaisho gangye, garekye kureeba ebitaine mugasho.” *​—Zaaburi 119:37.

20, 21. Ahabw’enki twine kufayo aha nyehurira z’abandi twaba nitutoorana eby’okweshemeza?

²⁰ Omusingye mukuru ogundi ogw’okuteekateekaho nigugira guti: “Byona nibiikirizibwa, kwonka ti byona ebirikwombeka. Omuntu weena arekye kwesherurira ebye ahabwe, kureka asherure eby’okuhwera mutaahi we.” (1 Abakorinso 10:23, 24) Okugira ngu twine obugabe bw’okukora ekintu tikirikumanyisa ngu twine tukikore. Twine kuteekateeka aha ku ab’eishe-emwe na banyaanyazi-itwe baraakwatweho.

²¹ Omuntu waitu w’omunda tarikushushana n’ow’abandi. Nk’eky’okureeberaho, omuntu waawe w’omunda naabaasa kukwikiriza kureeba puroguraamu emwe  aha tiivi. Kwonka oshangye ngu omuntu w’omunda ow’ab’eishe-emwe abandi tarikubaikiriza kureeba puroguraamu niyo emwe. Noija kukora ki? N’obu waakuba oine obugabe kugireeba noobaasa kucwamu kutakikora. Ahabw’enki? Ahakuba torikwenda kugwisa kubi ow’eishe-emwe nari Kristo. (1 Abakorinso 8:12) Titurikwenda kukora ekintu kyona ekirikubaasa kuteeza ow’eishe-emwe ondiijo entsibo.​—Abarooma 14:1; 15:1; 1 Abakorinso 10:32.

22. Nitwija kworeka tuta ngu twine emiteekateekyere eringaniire kyahika aha bi Abakristaayo abandi barikucwamu?

²² Kandi shi, omuntu waawe w’omunda ku yaakuba atarikukwikiriza kureeba, kushoma, nari kukora ekintu eki omuntu ondiijo arikureeba nk’ekitaine nshonga? Waaba nookunda ow’eishe-emwe kandi orikumuha ekitiinisa, torikwija kumugyemesereza kucwamu nkaiwe. Omuvugi w’emotoka naamanya ngu abavugi abandi nibabaasa kuba nibavuga mporampora nari barikuvuga ekikumi kumukira, kwonka nabwo bagume bari abavugi barungi. Omu muringo nigwo gumwe, iwe n’ow’eishe-emwe ondiijo n’obu muraabe nimukuratira emisingye ya Baibuli erikushushana, aha by’okweshemeza ebirikwikirizibwa nimubaasa kugira emiteekateekyere etarikushushana.​—Omubuurizi 7:16; Abafilipi 4:5.

23. Niki ekiraatuhwere kutoorana gye eby’okweshemeza?

²³ Mbwenu shi, niki ekiraatuhwere kutoorana gye eby’okweshemeza? Twagyendera gye aha muntu waitu w’omuntu otendekirwe emisingye ya Baibuli, kandi tukafayo aha nyehurira z’ab’eishe-emwe bagyenzi baitu, nitwija kutoorana gye eby’okweshemeza. Kandi nitwija kushemererwa ahabw’okukora “byona kuhimbisisa Ruhanga.”