1. Nidiini ki eziri omu Afrika?

 HAIHI buri omwe omuri Afrika nayikiriza ngu nikikuru okuramya Ruhanga. Kwonka, tibarikwikirizana aha muringo gw’okumuramya. Abamwe nibaramiza omu muzigiti, abandi nibaza omubufuuha bw’emaandwa, kandi abandi baza omu kanisa ninga omu kereziya. Nikiba kitahikire okuteekateeka ngu hariho ediini ishatu zonka omuri Afrika. N’omu Basiramu namwo harimu ebiragiro n’enyikiriza zitarikushushana. Abarikuramiza omubufuuha nabo baine entaniso okurugirira ahu batwiire. Aba kuratira Yesu nabo baine obutakwatanisa. Waba otabariremu ezirikumanywa, hariyo obudiini diini obundi, bwingi.

2. (a) Nibintu ki ebirikutwara abantu omudiini ezitari zimwe? (b) N’enki ekitarikworeka ngu ediini yaitu n’eshemeza Ruhanga?

² Ahabw’enki abantu nibaramya nk’oku barikwenda? Abarikukira obwingi nibakurata abazaire baabo. Eby’akare na kare nabyo nibireetera omuntu kuramya omu muringo gwe. Ekitabo ekirikweetwa The Africans—A Triple Heritage nikigira ngu: “Obusiramu bukajanjara okuruga omu matemba ga Sahara bwebembeirwe amahanga agaizire nigahamba ensi, . . . Abakristaayo nabo bakajanjara omumashuma ga Sahara omu muringo nigwo gumwe. Abasiramu na ru rara, Abakristaayo n’embundu nikimanyisa ngu ediini zombi zikakozesa eby’okurwanisa eby’abaire biriho obwiire obwo kugyema abantu ediini.” Nahati tweena nitwikiriza ngu ediini yaitu n’eshemeza Ruhanga. Ediini terikubasa kuba ehikire ahabw’okuba ey’abazaire baitu ninga aha’bwokugyemwa amahanga agandi kugikuratira.

3-5. Ni ky’okureebeho ki ekirikutuyamba kureeba ngu, ti diini zona nizegyesa amazima?

³ Ediini zoona n’obuziraabe nizigira ngu nizo zirikwegyesa ekihikire ahari Ruhanga zoona tiziri kushushana. Nizegyesa eby’omutaano ahari Ruhanga, n’ebi ari kutwenza. Teekateeka ahari eki: Katugire ngu watunga omurimo omu kampuni mpango. Aha izooba ryawe ery’okubanza, wakimanya ngu mukama waawe tariho ari omu kuhumura. Wabuuza abakozi bashatu eky’okukora. Ow’okubanza yakugira ngu mukama wanyu nayenda oyeyerere. Owakabiri ngu osiige ebisiika erangi. Owakashatu yakugira ngu ogabe amabaruha.

⁴ Wayeyongera kubabuuza mukama wanyu oku arikushushana. Ow’okubanza yakugira ngu ni muraingwa, muto kandi omushaarizi. Ow’akabiri yakugira ngu ni mugufu, akuzire kandi ayine embabazi. Ow’akashatu yakugira ngu mukama wanyu n’omukazi. Nobaasa kuhendera, orikumanya ngu boona nibagamba ebishuba. Waaba noyenda kuhamya omurimo gwawe, n’oza kucondooza omanye mukama wawe oku ari kandi n’eki arikwenda okore.

⁵ N’ediini nikwo eri. Ahabw’okugira ebiteekateeko bitari bimwe ahari Ruhanga n’eki arikutwenza, tushemeraire kushwijuma ediini yaitu tuhamye ngu nituramya omu muringo ogu arikwenda. Nitubaasa kwega tuta amazima agarikukwata ahari Ruhanga?