1, 2. Ni ky’okureeberaho ki ekirikutworeka eky’etengo ky’omutindo twaba nitusharaho eby’ediini?

 NITUBAASA kumanya tuta Ruhanga? Nikyetengesa kukyebera ediini zoona? Tikirikubaasika. N’obu twakukikora, nitubaasa kumanya tuta enyegesa ehikire?

² Okurugirira aha miringo y’entaniso ei barikwegyesa mu ahari Ruhanga tushemeraire kumanya ekihikire, eky’omutindo, ekirikwikirizibwa abantu. Eky’okureeberaho: Habaho okuhakana omukatare okurikukwata aha buraingwa bw’omwenda. Orikuguza yagira ngu ni mita 3, kwonka omuguzi atari kwikiriza. Enshonga egi neterezibwa eta? Nibagupima n’orukoba.

3. Ahabw’enki Baibuli ekahandiikwa?

³ Hariho orukoba orurikupima eby’ediini? Eego, ni Baibuli. Ruhanga akahandiikisa Baibuli ngu abantu omunsi yoona, beege ebirikumukwataho. Obukaikuru n’obukaikuru bwa Baibuli butairwe omukyapa. Yavunurwa yoona, ninga omubicweeka, omundiimi zirikurenga ahari 2,100. Haihi buri muntu weena nabaasa kushoma amazima agarikukwata ahari Ruhanga omu rurimi rwe.

4. Nibintu ki ebiri omu Baibuli?

⁴ Baibuli n’ekiconco ky’omuhendo kuruga ahari Ruhanga. Netushoborora ebintu ebi tutakubaasize kumanya. N’etugambira abari omu butuuro bw’emyoyo.  N’eshuruura ebiteekateeko bya Ruhanga, emitwarize ye n’ekigyendererwa kye. N’etugambira oku akoragaine n’abantu okurenzya aha myaaka rukumi. N’etugambira ebiribaho omumaisho. N’etworeka okuturikubaasa kuzoora oruguuto orw’amagara agatahwaho.

5. Ni ky’okureeberaho ki ekirikworeka ngu Baibuli n’eikirizana na sayansi?

⁵ Hariho enshonga nyingi ahabw’enki nitwikiriza Baibuli. Ey’okubanza n’okugira ngu Baibuli n’eyikirizana na sayansi. Okuruga ira naira abantu omunsi yona bakaba nibateekateeka ngu ensi ebangiirwe ekintu. Omu Burengyera—Izooba ya Afrika, eky’okureeberaho, bakaba nibaikiriza ngu ensi ebangiirwe ekijoka kyezingire emirundi 3,500 ahaiguru yensi, kandi 3,500 ahansi yaayo. Kwonka, omukwikirizana na sayansi, omuhandiiki wa Baibuli omwe akagira ngu Ruhanga “ensi yaagihanika ahari busha.”​—Yobu 26:7.

6. N’enki ekirikuhamiza kimwe ku Baibuli yarugire ahari Ruhanga?

⁶ Ekirikuhamiza kimwe ku Baibuli yarugire ahari Ruhanga n’omuringo oguhikire ogu yahandiikirwemu erikuranga eby’omumaisho. Ahabw’obutashushana n’abarangi b’abantu, Ruhanga buzimazima naamanya eby’omumaisho, buri ky’agamba kihikirira.

7. Ni burangi ki omu Baibuli obw’ahikiriire ira munonga?

⁷ Amagana n’amagana g’ebyarangirwe bikahikirira kare. Eky’okureeberaho, nihakiburayo emyaaka 700, Baibuli ekaranga ngu Yesu aryazaarwa omu rurembo Betelehemu, kandi nikwo kyabiire. (Miika 5:2; Matayo 2:3-9) Wayongyera aha byarangirwe ahari Yesu ebindi, Baibuli ekagira ngu aryazaarwa omwishiki oshugaine, kandi bamureebye ahabw’ebicweka by’efeeza makumi ashatu. Nabyo bikahikirira. Tihariho omuntu ahabwe orikubaasa kuranga ebintu ebyo!​—Isaaya 7:14; Zekaria 11:12, 13; Matayo 1:22, 23; 27:3-5.

8. Niburangi ki obwa Baibuli oburikuhikirira hati kandi ebi nibihamya ki?

⁸ Ebingi ebyarangirwe omu Baibuli bi riyo nibihikirira omu bwiire bwaitu. Ahaifo hariho bimwe ahari byo:

•   “Eihanga riryateera erindi ihanga n’obugabe buryateera obundi; haryabaho emitsitsa y’amaani, n’enjara n’orufu omu myanya mingi.”​—Luka 21:10, 11.

•   ‘Obugomi kukanya.’​—Matayo 24:12.

•   “Omu biro by’aha mperu, . . . abantu baryaba abarikwekunda, abakunzi b’empiiha, . . . abarikugomera abazaire baabo, . . . abatarikweyangisa, enshaarizi, abarikwanga ebirungi, . . . abarikwekuza, abarikukunda kweshemeza bonka okukira Ruhanga.”​—2 Timoseo 3:1-5.

 Torikwikiriza ngu ebintu ebi biriyo nibibaho ebiro ebi? Amazima n’okuhikirira kw’ebyarangirwe nikworeka ngu Baibuli teri nk’ekitabo kya buriijo. Ekahandiikisibwa omwoyo wa Ruhanga!​—2 Timoseo 3:16.

9, 10. N’enki ekirikwooreka ngu Ruhanga taikirize abantu kuhindura Baibuli?

⁹ Katugire ngu ori mukama w’eikorero haza wahanika orupapura oruriho ebiragiro ebirikutegyeka abakozi. Omuzigu wawe ku yakuhindura ebiragiro ebyo, okakoraki? Tokagorora ebihindwiirwe ebyo? Omumuringo nigwo gumwe, Ruhanga tarikwikiriza abantu kuhindura amazima ag’Ekigambokye, Baibuli.

¹⁰ Abagyerizeho kuhindura ebi Ekigambo kya Ruhanga kirikwegyesa baremirwe. Ku turikugyeranisa Baibuli eyi twiine hati hamwe n’ezo ezabandize kushohora zoona nizishushana. Eki nikitworeka ngu Baibuli terahindwiirwe emyaaka egi yona.