1. N’enki ekirikubaho twirira “haihi [na] Ruhanga?”

 YEHOVA nakunda abo abari kumuheereza. Waaramya Yehova, naija kukuha emigisha hati hamwe n’omubiro by’omumaisho. Baibuli negira eti: “Mwirire haihi [na] Ruhanga, nawe abone kubairira haihi.”​—Yakobo 4:8.

2. Nitwirira tuta haihi na Ruhanga, eki nikireebuka kita omu shaara zaitu?

² Okwirira haihi na Ruhanga, nikimanyisa okwega kandi okagyendera aha Kigambo kye. Ku orashabe ori kugyendera aha by’arikwenda, Yehova naija kuhurira eshaara zaawe azigarukemu. Omutume Yohaana akahandiika ati: “Kandi obu nibwo bumanzi obu twine omuriwe [Ruhanaga], ngu ku tushaba ekintu kyona nk’oku akunda, atuhurira. Kandi ku turaabe nitumanya ngu atuhurira omuri byona ebi tushaba, nitumanya ngu tutungire ebi twamushabire.”​—1 Yohaana 5:14, 15.

3-7. Nitutunga tuta amagyezi ga Ruhanga, kandi nigatuyamba gata?

³ Waaguma noyirira haihi na Ruhanga, naza kukuha amagyezi kukuyamba kuraba omu magara aga buri iziooba. Baibuli negira eti: “Kwonka omuriimwe ku haraabe harimu obuzirwe obwengye, abushabe Ruhanga.”​—Yakobo 1:5.

⁴ Amagyezi agarikuruga ahari Ruhanga nigakuyamba gata? Omu muringo gumwe nigakuyamba, kumanya ebintu ebitarikushemeza Yehova. Nobaasa kweega aha bwaki ebintu ebi ni bibi kandi eki orikubaasa kukora ku byetantara. Amagyezi aga nigakuyamba kwetantara emirabanamu erikugweera abantu. Eky’okureeberaho, okworobera okuhabura kwa Ruhanga ngu tugume twezire nikituyamba obutatwaara enda tutakashweirwe, obutarwaara endwaara z’obushambani, obushweere obutashemeire ninga okutaana.

⁵ Ekindi n’enki eki amagyezi ga Ruhanga garikubaasa kukukorera? Nigakuyamba kushemererwa amagara gaawe. Okusharaho eby’omugasho, katugambe omu kukozesa kurungi esente zaawe. Nooza kutunga ebigyendererwa birungi obigyendereho omumwanya gw’okukuratira ebitarimu.

⁶ Amagyezi ga Ruhanga nigakuhindura omuntu ori kuturana gye n’abandi. Amaka gaawe, nigashemererwa. Noyombeka emikago mirungi n’abandi, otunga ekitiinisa. Obundi ori kukiheebwa abo abatari baheereza ba Ruhanga.

⁷ Amagyezi ga Ruhanga nigakureetera okureeba amagara ngu nimarungi. Oyega n’omuringo gw’okuraba omumaganya g’ensi. Oteireho, n’okureeba ebiro by’omu maisho n’amatsiko. Amatsiko aga nigareetera omuntu kugira amagara amarungi, omu mutima n’omu mubiri.​—Enfumu 14:30; Isaaya 48:17.

8. Waheereza Ruhanga tori kwija kutiina ki?

⁸ Waheereza Ruhanga ow’amazima, notunga obusingye otarikutiina emirabanamu yaabo aba tari kumuheereza. Torikwija kutiina abafiire, ahabwokuba nomanya ngu bari omu bituuro tibaine ki bari kumanya. Torikutiina kufa ahabw’okumanya ngu hariho amatsiko g’okuzooka. Kandi  ahabw’okumanya ngu Ruhanga nakiza boona amaani torikuza kutiina abarogi n’abacecezi.​—Yohaana 8:32.

9-11. N’oha orituura Omunsi Eboneire, kandi n’oha otarituuramu?

⁹ Wairira haihi na Ruhanga, torikwiija kutiina eby’omu maisho. Nk’oku twaheza kureeba, Baibuli ekaranga emirabanamu ei turikureeba omu nsi hati. Yehova natugira ngu ebintu ebi neby’akaanya bwaanya; Obukama bwa Ruhanga nibwiija kuhindura ensi egi ehinduke eboneire.​—Luka 21:10, 11, 31; 23:43.

¹⁰ Abo bonka abairire haihi na Yehova bakamuheereza nibo barituura Omunsi Eboneire. Baibuli negira eti: “Bwanyima y’akaanya kakye omubi aryaba atakiriho; Buzima oryamusherura aha mwanya gwe, oshangye atariho. Kwonka abacureezi baryahungura ensi, Beesiime ahabw’okugira obusingye bwingi.”​—Zaaburi 37:10, 11.

¹¹ Abo abarikwaanga kworobera ebiragiro bya Ruhanga ebihikirire baryahwerekyerera. (2 Abatesalonika 1:8, 9) Tibaribaho. Baryateeranwa hamwe na Sitaani omu kufa bataine matsiko g’okuzooka. (Okushuuruurwa 20:10, 14) Kwonka abo abarikweega ahari Yehova bakamuheereza baryatunga obusingye bwingi Omunsi Eboneire.

12. Baibuli negamba ki aha by’omu maisho?

¹² Yehova atebekanise ebintu ebirungi kubiheereza abo abari kumukunda! Iwe banza oreebe Ekigambo kye okukirikugamba aha Nsi Eboneire:

•   Omweru gw’ebyokurya: “Haryabaho omweru mwingi omu nsi, emyaka eryakondakonda omu misiri omu bibungo.”​—Zaaburi 72:16.

•   Amaju marungi: “Baryayombeka amaju bagatuuremu.”​—Isaaya 65:21.

•   Emirimo erikushemeza: “Nibashemererwa ebi emikono yaabo ekozire. Tibarihendekyera busha.”​—Isaaya 65:22, 23.

•   Tiharibaho kurwaara: “Kandi tihaine mutuuzi waayo origira ati: Ndwaire.”​—Isaaya 33:24.

•   Tiharibaho obutebaasa: “Obwo amaisho g’empumi garyahumuurwa, n’amatu g’ebifa-matu garyaigurwa; ekirema kiryaguruka nk’empara, n’orurimi rw’ekiteta rweshongore ahabw’okushemererwa.”​—Isaaya 35:5, 6.

•   Tiharibaho obusaasi, amaganya n’okufa: “[Ruhanga] aryaragaza amarira goona aha maisho gaabo; tiharibaho kufa bundi, n’obu, kwakuba okucura nari okurira nari obusaasi, ahakuba ebya ira biryaba bihweireho.”​—Okushuuruurwa 21:4.

•   Tiharibaho ngamba: “Amaraho engamba okuhika aha muheru gw’ensi.”​—Zaaburi 46:9.

•   Amagara agatahwaho: “Abahikiriire baryahungura ensi, Bagituuremu ebiro byona.”​—Zaaburi 37:29.

13. N’oha wenka orihindura ensi eboneire, kandi ahabwaki?

¹³ Abantu tibarikubaasa kureetaho empinduka nk’egi. Yehova niwe aine obushoborozi kukora kyona eki arikwenda kukora. Tihaine kirikubaasa kumuzibira kukora eki arikwenda kukora. Baibuli negira eti: “Tihariho ekirema Ruhanga.”​—Luka 1:37.

14. Nobaasa kuza ota omu ruguuto orw’amagara agatahwaho?

¹⁴ Arikukozesa Abajurizi be, Yehova nahereza abantu omunsi yoona omugisha “kutaahira omu irembo erifunzire” kandi bagyendere omu ruguuto oruri kubatwara kubahisya omumagara agatahwaho. Niiwe nobaasa kuba hamwe n’abantu aba abashemererwa kwikiriza okweetwa oku. Nobaasa ku kuratira ediini ey’amazima otunge emigisha ya Yehova ebiro n’ebiro!​—Matayo 7:13, 14.