“Ruhanga . . . aryaragaza amarira goona aha maisho gaabo; tiharibaho kufa bundi n’obu kwakuba okucura nari okurira nari obusaasi, ahakuba ebya ira biryaba bihweireho.”​—Okushuuruurwa 21:3, 4, Baibuli ey’Orunyankore-Rukiga, eya 1964.

Tiharigaruka kubaho okurwara nari okubonabona kwona.​—Isaaya 25:8; 33:24.

Okushemererwa n’ab’omu maka gaitu na banywani baitu ebiro byona.​—Zaaburi 37:11, 29.

Eego, ahabw’enshonga nka ibiri:

• Tihaine ekirikubaasa kuremesa Ruhanga kuhikiiriza eki arikuraganisa. Omu Baibuli, Yehova Ruhanga wenka niwe arikwetwa “ow’obushoboorozi bwona,” ahabw’okugira amaani agataine bugarukiro. (Okushuuruurwa 15:3) N’ahabw’ekyo naza kuhikiiriza eki yaaraganiise eky’okuhindura ensi ekaba nungi. Nk’oku Baibuli erikugira, “ahari Ruhanga byona nibibaasika.”​—Matayo 19:26.

• Ruhanga aine ekihika ky’okuhikiiriza ebi yaaraganiise. Nk’eky’okureeberaho, Yehova aine ekihika ky’okuzoora abaafiire.​—Yobu 14:14, 15.

  Baibuli neeyoreka ngu omwana wa Ruhanga, Yesu, akakiza abarwaire. Ahabw’enki yaabakirize? Akaba naakunda kukikora. (Mako 1:40, 41) Yesu akoorekyera kimwe emitwarize nk’eya Ishe arikugira ekihika ky’okuhwera abaabaire baine oburemeezi.​—Yohaana 14:9.

  N’ahabw’ekyo, twine amatsiko ngu Yehova na Yesu nibenda kutuhwera kugira okushemererwa okwabuzima omu biro by’omumaisho.​—Zaaburi 72:12-14; 145:16; 2 Petero 3:9.