N IMPAMYA ngu noikiriza ngu hariho abarikutukira, nari abaine amaani mingi kukira iwe naanye. Nooteekateeka ngu ni baahi abarikutukira?— Yehova Ruhanga naatukira. Kandi shi Omwana we, Omwegyesa Mukuru? Nawe shi naatukira?— Eego buzima naatukira.

Yesu akaba naatuura na Ruhanga omu iguru. Akaba ari Omwana wa Ruhanga ow’omwoyo nari maraika. Kwonka shi Ruhanga akahanga baamaraika abandi?— Eego, akahanga abandi baingi munonga. Baamaraika abo nabo nibatukira kandi baine amaani agarikukira agaitu.​—2 Petero 2:11 Danieli 7:10.

Noijuka eiziina rya maraika owaagambire na Mariamu?— Akaba naayetwa Gaburieli. Akagambira Mariamu ngu omwana ou araazaare naija kuba ari Omwana wa Ruhanga. Ruhanga akata amagara g’Omwana we ow’omwoyo omunda ya Mariamu kugira ngu abaase kuzaarwa nk’omwana omu nsi.​—Luka 1:26, 27.

Noikiriza eky’okutangaaza ekyo? Noikiriza ngu Yesu atakaizire omu nsi akaba naatuura na Ruhanga omu iguru?— Yesu nikwo yaagizire. Yesu akamanya ata ebintu ebyo? Obu yaabaire akiri muto, Mariamu naabaasa kuba yaamugambiire ebi Gaburieli yaagambire. Kandi, Yosefu naabaasa kuba yaagambiire Yesu ngu Ruhanga niwe yaabaire ari Ishe wenyine.

Obu Yesu yaabatizibwa, Ruhanga akeema omu iguru yaagira ati: “Ogu n’Omwana wangye.” (Matayo 3:17) Kandi ekiro ekyahererukireyo Yesu atakafiire, akashaba ati: “Taata, mpimbisa omu maisho gaawe  n’ekitiinisa ekyo eki naabaire nyine naiwe, ensi etakahangirwe.” (Yohaana 17:5) Yesu akashaba kugaruka kutuura na Ruhanga omu iguru. Akaba naabaasa kugaruka kutuura ata omu iguru?— Kikaba nikibaasika Yehova Ruhanga yaagaruka akamuhindura ekihangirwe eky’omwoyo, nari  maraika.

Hati niinyenda kukubuuza ekibuuzo kikuru. Mbwenu shi baamaraika boona ni barungi? Nooteekateeka ki?— Omu kubanza boona bakaba bari barungi. Bakaba bari barungi ahakuba Yehova niwe yaabahangire kandi buri kintu eki arikukora nikiba kiri kirungi. Kwonka omwe ahari baamaraika akaba mubi. Ekyo kikabaho kita?

Okutunga eky’okugarukamu, twine kwijuka obu Ruhanga yaahanga omushaija n’omukazi ab’okubanza Adamu na Haawa. Abantu abamwe nibagira ngu ebihandiikirwe ebirikukwata ahari Adamu na Haawa n’ebitebyo kwonka. Kwonka Omwegyesa Mukuru akaba naamanya ngu abantu abo bakabaho.

Ruhanga ku yaahangire Adamu na Haawa, akabata omu musiri murungi ogwabaire guri omu mwanya ogurikwetwa Edeni. Gukaba guri paradiso. Bakaba nibaija kugira abaana baingi, eka mpango kandi batuure omuri Paradiso ebiro byona. Kwonka hakaba hariho ekintu kikuru eki baabaire baine kwega. Nikyo tubaire twagambireho. Ka tureebe twaba nitukiijuka.

 Yehova akagambira Adamu na Haawa ngu bakaba baine obugabe kurya ebijuma eby’emiti y’omu kibanja nk’oku barikwenda. Kwonka hakaba hariho omuti gumwe ogu baabaire batashemereire kurya ebijuma byagwo. Ruhanga akabagambira ekyabaire nikiza kubaho ku baakuriire ebijuma byagwo. Akagira ati: ‘Buzimazima muryafa.’ (Okutandika 2:17) Adamu na Haawa bakaba baine kwega ki?—

Bakaba baine kwega kworoba. Okugira amagara nikurugiirira aha kworobera Yehova Ruhanga. Kikaba kitarikumara Adamu na Haawa okugamba kwonka ngu nibaija kumworobera. Omu bi baabaire nibakora bakaba baine kworeka ngu nibamworobera. Kuri noogira ngu bakorobera Ruhanga, bakaba nibaija kuba nibooreka ngu nibamukunda kandi ngu nibenda abe Omutegyeki waabo. Bakaba nibaija kugumaho omu Paradiso ebiro byona. Kwonka shi ku baakuriire aha muti, ekyo kikaayorekire ki?—

Kikaayorekire ngu buzima bakaba batarikusiima ebi Ruhanga yaabaire abahaire? Ku ogire ngu okaba oriyo, okaba noija kworobera Yehova?— Omu kubanza, Adamu na Haawa bakamworobera. Kwonka hariho owaabaire naabakira owaizire akabeiha Haawa. Akamureetera kugomera Yehova. Ogwo akaba ari oha?—

Baibuli neegira ngu enjoka ekagamba na Haawa.  Kwonka noomanya ngu enjoka terikubaasa kugamba. Kwonka niki ekyagibaasiise kugamba?— Maraika akareetera enjoka kureebeka nk’erikugamba. Kwonka buzima akaba ari maraika owaabaire naagamba. Maraika ogwo akaba atandikire kuteekateeka ebintu bibi. Akaba naayenda ngu Adamu na Haawa bamuramye kandi ngu bamworobere. Akaba naayenda kuza omu mwanya gwa Ruhanga.

N’ahabw’ekyo maraika ogwo akata ebiteekateeko bibi omuri Haawa. Kurabira omu njoka, akagambira Haawa ati: ‘Ruhanga tarabagambiire mazima. Timurikwija kufa mwarya aha muti ogwo. Nimwija kugira obwengye mube nka Ruhanga.’ Mbwenu iwe okaba noobaasa kwikiriza ebigambo ebyo?—

Haawa akatandika kukunda ekintu eki Ruhanga yaabaire atamuhaire. Akarya ekijuma ky’omuti ogu baabaire bazibiirwe. Na bwanyima yaaha Adamu nawe yaarya. Adamu taraikiriize ebi enjoka yaagambire. Kwonka ekyetengo kye ky’okuguma na Haawa kikaba kiri eky’amaani okukira rukundo ei yaabaire ainiire Ruhanga. Nawe yaarya aha muti.​—Okutandika 3:1-6; 1 Timoseo 2:14.

Niki ekyarugiremu?— Adamu na Haawa bakahinduka abatahikiriire, bakaikura, kandi baafa. Kandi ahabw’okugira ngu bakahinduka  abatahikiriire, abaana baabo boona bakaba bari abatahikiriire nabo bakaikura kandi baafa. Ruhanga akaba atabeihire. Okugira amagara agatahwaho buzima nikurugiirira aha kworobera Ruhanga. (Abarooma 5:12) Baibuli neetugambira ngu maraika owaabeihire Haawa naayetwa Sitaane Omuregi, kandi baamaraika abandi abaahindukire babi nibeetwa baadaimoni.​—Yakobo 2:19; Okushuuruurwa 12:9.

Mbwenu hati waayetegyereza ahabw’enki maraika murungi ou Ruhanga yaabaire ahangire yaahindukire mubi?— N’ahabw’okuba akatandika kuteekateeka ebintu bibi. Akaba naayenda kuza omu Mwanya gwa Ruhanga. Akaba naamanya ngu Ruhanga akaba agambiire Adamu na Haawa kuzaara abaana, kandi Sitaane akaba naayenda ngu abaana abo boona bamuramye. Omuregi naayenda kureetera buri omwe kugomera Yehova. N’ahabw’ekyo naateeraho kubatamu ebiteekateeko bibi.​—Yakobo 1:13-15.

Omuregi naagira ngu tihariho n’omwe buzima orikukunda Yehova. Naagira ngu iwe naanye titurikukunda Ruhanga kandi ngu buzima titurikwenda kukora ebi Ruhanga arikutugambira. Naagira ngu nitworobera Yehova twaba turi omu mbeera nungi bwonka. Mbwenu Omuregi ahikire? Nikwo turikutwaza tutyo?

Omwegyesa Mukuru akagira ngu Omuregi n’omubeihi. Yesu akooreka ngu buzima akaba naakunda Yehova arikumworobera. Yesu tarayorobeire Ruhanga obu ebintu byabaire nibigyenda gye bwonka. Akamworobera obwire bwona, nangwa n’obu abantu baabaire bamutwariza kubi. Akaguma ari omwesigwa ahari Yehova okuhitsya aha kufa. Egyo niyo nshonga ahabw’enki Ruhanga yaamuzoire kubaasa kugumaho ebiro byona.

Mbwenu omuzigu waitu omukuru n’oha?— Buzima ni Sitaane Omuregi. Noobaasa kumureeba?— Ngaaha buzima. Kwonka nitumanya ngu ariho kandi ngu aine amaani agarikukira agaitu. Kwonka n’oha orikukira Omuregi?— Ni Yehova Ruhanga. N’ahabw’ekyo nitumanya ngu Ruhanga naabaasa kuturinda.