OMU nsi n’oha oraaheereize Ruhanga omu muringo ogurikukirayo oburungi?— Ni Yesu Kristo. Nooteekateeka ngu nitubaasa kumutooreza?— Baibuli neegira ngu akatuteeraho eky’okureeberaho ky’okukuratira. Kandi naatweta ngu tube abeegi be.

Noomanya eki kirikumanyisa okuba omwegi wa Yesu?— Nikimanyisa ebintu bingi. Eky’okubanza, twine kwegyera ahariwe. Kwonka ekyo tikyo kyonka. Kandi twine kwikiririza kimwe n’ebi arikutugambira. Twakora ekyo, nitwija kukora ebi arikutugambira.

Abantu baingi nibagira ngu nibaikiririza omuri Yesu. Nooteekateeka ngu boona buzima n’abeegi be?— Ngaaha, abaingi ti beegi be. Nibabaasa kuba nibaza omu makanisa. Kwonka baingi aharibo tibakafayoga kwega ebi Yesu yaayegyeise. Buzima, abo bonka abarikukuratira eky’okureeberaho kya Yesu nibo beegi be.

Ka tugambe ahari bamwe abaabaire bari abeegi ba Yesu obu yaabaire ari omu nsi nk’omuntu. Omwe aha baabandize kuba abeegi be ni Filipo. Filipo akagyenda yaayeta munywani we Nasanaeli (kandi orikwetwa Batolomayo), ou orikureeba omu kishushani ashutami ahansi y’omuti. Nasanaeli ku yaizire ahari Yesu, Yesu yaamugira ati: ‘Reeba omushaija otaine buryarya, Omwisraeli kashushu.’ Nasanaeli akatangaara kandi yaamubuuza ati: ‘Iwe wammanyisibwa ki?’

Yesu akamugarukamu ati: ‘Filipo atakakwetsire, obu waaba ori ahansi y’omuti gw’omutiini, naakureeba.’ Nasanaeli  akatangaara ahabw’okureeba ngu Yesu akamanya henyine ahu yaaba ari, n’ahabw’ekyo akagira ati: “Ori Omwana wa Ruhanga! Ori Omugabe wa Israeli!”​—Yohaana 1:49.

Hariho bamwe abaabaire abeegi ba Yesu Filipo na Nasanaeli batakabaire abeegi ba Yesu. Nibo aba: Anderea na mukuru we Petero hamwe na Yohaana obundi na mukuru we Yakobo. (Yohaana 1:35-51) Kwonka bwanyima, abeegi aba bana bakagaruka aha murimo gwabo ogw’okujuba eby’enyanja. Eizooba rimwe Yesu ku yaabaire naagyendagyenda aha rubaju rw’enyanja ya Galilaaya, yaareeba Petero na Anderea nibatega obutimba bw’eby’enyanja omu nyanja. Yesu akabagira ati: “Mwije munkuratire.”

Yesu ku yaayeyongyeireyo omumaisho, yaareeba Yakobo na Yohaana. Bakaba bari omu bwato n’ishebo, nibabaziira obutimba bw’okutega  eby’enyanja. Nabo Yesu akabeeta ngu bamukuratire. Okaakozire ki ku ogire ngu niiwe Yesu yaayetsire? Okaabaasize kumukuratira ahonaaho?— Abashaija abo bakaba nibamanya gye Yesu. Bakaba nibamanya ngu akaba atumirwe Ruhanga. Ahonaaho bakatsigaho omurimo gwabo gw’okujuba eby’enyanja baakuratira Yesu.​—Matayo 4:18-22.

Mbwenu shi abashaija abo ku baahindukire abakuratsi ba Yesu, nikimanyisa ngu butoosha bakaguma nibakora ebihikire?— Ngaaha. Noobaasa kwijuka ngu eizooba rimwe abashaija abo bakagira empaka barikwebuuza ngu n’oha omukuru omuribo. Kwonka bakorobera Yesu kandi bakaba beteekateekire kuhindura aha miteekateekyere yaabo n’emicwe yaabo. Naitwe twaba tweteekateekire kuhindura aha miteekateekyere yaitu, nitubaasa kuba abeegi ba Yesu.

Yesu akeeta abantu ba buri muringo kuba abeegi be. Eizooba rimwe, omutsigazi omugaiga kandi omutegyeki akaija ahari Yesu yaamubuuza oku arikubaasa kutunga amagara agatahwaho. Omutsigazi ogwo ku yaagizire ngu akaba naayorobera ebiragiro bya Ruhanga kuruga omu buto bwe, Yesu akamugira ati: ‘Ija, onkuratire.’ Noomanya ekyabaireho?—

Omutsigazi ogwo ku yaamanyire ngu okuba omwegi wa Yesu nikyo kiine kutwarwa nka kikuru okukira okuba omugaiga, tarashemereirwe. Tarabaasize kuhinduka omwegi wa Yesu ahabw’okuba akaba naakunda esente munonga okukira Ruhanga.​—Luka 18:18-25.

Yesu bwanyima y’okubuurira nk’omwaka gumwe n’ekicweka, akatoorana 12 aha beegi be kuba entumwa. Entumwa bakaba bari abashaija abu Yesu yaayohereize omu bantu kukora omurimo gw’omutaano. Noomanya amaziina gaabo?— Ka tuteereho kwega amaziina ago. Reeba entumwa eziri omu kishushani, reero oreebe ku oraabe noobaasa kugamba amaziina gaabo. Teeraho kugamba amaziina gaabo kuruga omu mutwe gwawe.

Kwonka bwanyima, omwe aha ntumwa 12 akahinduka mubi. Akaba ari Yuda Iskaryota. Bwanyima, omwegi ondiijo akatooranwa kuba entumwa.  Noomanya eiziina rye?— Akaba ari Matiya. Bwanyima, Paulo na Barunaba nabo bakaba entumwa, kwonka bakaba batari bamwe aha ntumwa 12.​—Ebyakozirwe 1:23-26; 14:14.

Nk’oku twegire omu Shuura 1 ey’ekitabo eki, Yesu akaba naakunda abaana bato. Ahabw’enki yaabaire naabakunda?— Ahakuba akaba naamanya ngu nabo nibabaasa kuba abeegi be. Buzima, abaana obumwe nibagamba ebintu ebirikubaasa kureetera abakuru kwenda kuhurikiza n’okwenda kwega bingi ebirikukwata aha Mwegyesa Mukuru.

Abakazi baingi nabo bakahinduka abeegi ba Yesu. Abakazi abamwe bakagyenda nawe obu yaaza omu tauni ezindi kubuurira.  Abaagyenzire nawe ni, Mariamu Magadaleene, Yoana na Susaana. Nibabaasa n’okuba baamuhwereire okumutekyera eby’okurya n’okwozya emyenda ye.​—Luka 8:1-3.

Nooyenda kuba omwegi wa Yesu?— Guma noijuka ngu okugira ngu turi abeegi be kwonka tikurikutuhindura abeegi be. Twine kutwaza nk’abeegi be hoona ahu turaabe turi, beitu hatari mu nteerane z’Ekikristaayo zonka. Noobaasa kugamba emyanya emwe ahu kiri kikuru kutwaza nk’omwegi wa Yesu?—

Twine kukora ekyo twaba turi omuka. Kwonka ogundi omwanya ahu turikwetenga kukora ekyo n’ah’eishomero. Nyowe naiwe eki tutashemereire kwebwa, n’okugira ngu kubaasa kuba abeegi ba Yesu ab’amazima, twine kutwaza nk’oku yaabaire atwaza eizooba ryona kandi buri izooba hoona ahu turaabe turi.