NOOSHEMERERWA omuntu yaakukorera ekintu kirungi?— Abantu abandi nabo nibashemererwa omuntu yaabakorera ekintu kirungi. Twena nitushemererwa omuntu yaatukorera ekintu kirungi. Omwegyesa Mukuru ekyo akaba naakimanya, kandi obutoosha akaba ateeraho kukorera abantu ebirungi. Akagira ati: ‘Tindaizire kuheerezibwa kureka kuheereza.’​—Matayo 20:28.

Mbwenu shi twaba nitwenda kuba nk’Omwegyesa Mukuru, twine kukora ki?— Twine kuheereza abandi. Twine kubakorera ebintu birungi. N’eky’amazima abantu baingi ekyo tibarikukikora. Abantu baingi butoosha nibaba nibenda ngu abandi babaheereze. Eizooba rimwe abakuratsi ba Yesu nabo bakateekateeka batyo. Buri omwe akaba naayenda kuba omukuru nari orikukira abandi.

Eizooba rimwe Yesu akaba naagyenda n’abeegi be. Ku baaherize kutaaha omu rurembo Kaperenaumu, haihi n’Enyanja ya Garilaaya, baza omu nju. Yesu yaababuuza ati: “Mwaba nimuhakana ki omu muhanda?” Bakahunama ahakuba obu baabaire nibagyenda bakaba nibahakana ngu n’oha omukuru omuribo.​—Mako 9:33, 34.

 Yesu akaba naamanya ngu kikaba kitahikire omwe aha beegi be kuteekateeka ngu akaba naakira abandi. N’ahabw’ekyo nk’oku twayegire omu shuura y’okubanza ey’ekitabo eki, akeemereza omwana muto ahagati yaabo reero yaabagira ngu baine kuba abacureezi nk’omwana muto ogwo. Kwonka ekyo tibarabasize kukyegyeraho. Bwanyima Yesu atakafiire, akabeegyesa ekintu eki baabaire batarikwija kwebwa. Niki eki yaakozire?—

Boona ku baabaire bari hamwe nibarya, Yesu yaimuka aha meeza yaajuura omunagiro gwe. Atyo yaakwata etauro, yaagyezirika omunda. Yaakwata ebaafu yaagitamu amaizi. Abakuratsi be nibabaasa kuba baayebuurize eki yaabaire naaza kukora. Ku baabaire nibakyebuuza, Yesu yaabarabamu arikunaabisa buri omwe ebigyere. Reero yaaragaza ebigyere byabo n’etauro. Teekateeka ahari ekyo. Kuri waabaire oriyo, okaba noija kuhuurira ota?—

Abakuratsi be bakateekateeka ngu kikaba kitahikire Omwegyesa Mukuru kubaheereza omu muringo nk’ogwo. Bakakwatwa enshoni. Nangwa na Petero akabanza kwanga ngu Yesu atamunaabisa ebigyere. Kwonka Yesu akagira ngu kikaba kiri kikuru we okukora ekyo.

Omu bunaku obu titurikunaabisana ebigyere. Ekyo kikaba nikikorwa obu Yesu yaabaire ari aha omu nsi. Noomanya ahabw’enki?— Omu nsi ei Yesu n’abakuratsi be baabaire nibatuuramu, abantu bakaba nibajwara enkaito ezitarikushwekyera kimwe ebigyere. N’ahabw’ekyo ku baabaire bagyenda omu nguuto ezirimu omucuucu, ebigyere byabo bikaba bizaho omucuucu mwingi. Kikaba kiri ekikorwa ky’embabazi okunaabisa ebigyere abaija kukutaayaayira.

Kwonka aha murundi ogwo tihariho n’omwe aha beegi ba Yesu owaabaire ayeteekateekire kunaabisa ebigyere by’abandi. N’ahabw’ekyo Yesu akabibanaabisa. Omu kukora ekyo, Yesu akeegyesa abeegi be ekintu kikuru. Ekyo bakaba baine kukyega. Kandi naitwe omu bunaku obu twine kukyega.

 Noomanya eki yaabegyeise?— Yesu ku yaaherize kujwara omunagiro gwe kandi akashutama omu ntebe ye aha meeza, akabagira ati: “Nimumanya eki naabakorera? Muunyeta Omwegyesa kandi Mukama waanyu; kandi eki murikugamba nikyo, ahabw’okuba nikwo ndi. Mbwenu ku ndaabe naabanaabisa ebigyere, haza ndi Mukama waanyu kandi Omwegyesa waanyu, naimwe kibashemereire kunaabisana ebigyere.”​—Yohaana 13:2-14.

Omu kukora ekyo, Omwegyesa Mukuru akooreka ngu akaba naayenda ngu abakuratsi be baheerezane. Akaba atarikwenda ngu buri omwe ayefeho wenka. Akaba atarikwenda ngu bateekateekye ngu bakaba nibakira abandi barikwenda ngu babaheereze. Akaba naayenda ngu baheereze abandi beekundiire.

Mbwenu shi ekyo eki yaabeegyeise kikaba kitari kikuru?— Noija kuba nk’Omwegyesa Mukuru oheereze abandi?— Twena nitubaasa kugira ebintu ebi twakorera abandi. Ekyo nikiija kubashemeza. Kandi ekirungi munonga, nikiija kushemeza Yesu hamwe n’Ishe.

Okuheereza abandi tikigumire. Waataho omutima, noija kureeba ngu hariho bingi ebi orikubaasa kukorera abandi. Hati teekateeka ahari eki:  Hariho eki orikubaasa kukora okubaasa kuhwera nyoko? Buzima kimanye ngu iwe n’ab’omu ka yaanyu nyoko naabakorera ebintu bingi. Noobaasa kumuhwera?— Mubuuze eki orikubaasa kumuhwera.

Obundi noobaasa kutereeza ebintu aha meeza mutakashutamire nk’eka kurya. Nari noobaasa kuteguura ebintu mwaheza kurya. Abaana abamwe nibataha amaizi buri izooba. Kyona eki orikukora, noija kuba nooheereza abandi nka Yesu oku yaakozire.

Oine barumuna baawe na banyaanyoko abu orikubaasa kuheereza? Ijuka ngu Yesu, Omwegyesa Mukuru, akaheereza abakuratsi be. Waahwera barumuna baawe na banyaanyoko, noija kuba nootooreza Yesu. Niki eki orikubaasa kubakorera?— Noobaasa kubahwera kumanya kwenaabisa. Nari noobaasa kubahwera kujwara emyenda yaabo. Nari noobaasa kubahwera obaarire ebitanda byabo. Hariho ekindi eki orikubaasa kubakorera?—  Nibaija kukukunda, ebyo waabibakorera nk’oku abakuratsi ba Yesu baamukunzire.

Ah’eishomero nayo noobaasa kuheereza abantu abandi. Nibabaasa kuba bari abu orikushoma nabo nari omushomesa waawe. Omuntu yaaragarwa ebitabo bye, nikiba kiri ekikorwa ky’embabazi kumuhwera okabimwihiraho. Noobaasa kusiimuura orubaaho nari kuhwera omushomesa waawe omu muringo ogundi. Nangwa n’okutiiza omuntu akacumu nari ekaraamu nakyo n’ekikorwa ky’embabazi.

Obumwe abantu tibarikwija kutusiima twabakorera ebintu birungi. Nooteekateeka ngu ekyo kishemereire kutureetera kureekyeraho kukorera abantu ebirungi?— Ngaaha! Abantu baingi tibarayebarize Yesu ahabw’ebirungi ebi yaabakoreire. Kwonka ekyo tikiramureetaire kureekyeraho kukora ebirungi.

N’ahabw’ekyo tutarireka kuhwera abandi bantu. Ka tugume twijukye Omwegyesa Mukuru, Yesu, kandi butoosha tuteereho kutooreeza eky’okureeberaho kye.