NOOMANYA eki okushoroora omu bantu kirikumanyisa?— Okushoroora omu bantu nikimanyisa okwanga omuntu ahabw’okugira ngu tarikushushana naiwe nari ngu naagamba orurimi orutarikushushana n’orwawe. N’ahabw’ekyo orikushoroora omu bantu naagira ebiteekateeko bibi aha muntu atakamumanyire gye.

Nooteekateeka ngu kihikire okwanga omuntu otakamumanyire gye nari ahabw’okuba ngu n’ow’omutaano ahariiwe?— Ngaaha, okushoroora omu bantu tikihikire kandi ti kikorwa ky’embabazi. Titushemereire kushoroora abantu ahabw’okugira ngu tibarikushushana naitwe.

Teekateeka ahari eki. Hariho omuntu ou orikumanya otari w’erangi yaawe nari w’orurimi rwawe?— Noobaasa kuba noomanya abantu abatarikureebeka nkaiwe ahabw’okugira ngu bakatunga obuhuta nari baine endwara. Abantu abatarikushushana naiwe obainiire embabazi na rukundo?—

Twayorobera Omwegyesa Mukuru, Yesu Kristo, nitwija kuba abanyambabazi ahari buri omwe. Titushemereire kushoroora abantu ahabw’okugira ngu nibaruga omu ihanga erindi nari n’ab’erangi endiijo. Twine kubagirira embabazi. N’obu abantu boona baraabe eki batarikukiikiriza, nikyo Yesu yaayegyeise. Ka tukigambeho.

Omuyudaaya owaabaire naashoroora abantu abandi akaija ahari Yesu yaamubuuza ati: ‘Nshemereire kukora ki okuhungura amagara agatahwaho?’ Yesu akamanya ngu omushaija ogwo obundi akaba naayenda ngu amugire, ati obe omunyambabazi aha bantu b’erangi nari eihanga ryawe bonka. Omu mwanya gw’okugarukamu ekibuuzo ekyo, Yesu akabuuza omushaija ogwo ati: ‘Ebiragiro bya Ruhanga nibigira ngu twine kukora ki?’

 Omushaija akagarukamu ati: ‘Oine kukunda Mukama Ruhanga waawe n’omutima gwawe gwona, kandi oine kukunda na mutaahi waawe nk’oku orikwekunda.’ Yesu yaamugira ati: ‘Waagarukamu gye; guma nookora otyo, noija kutunga amagara agatahwaho.’

Kwonka, omushaija ogwo akaba atarikwenda kugirira abantu abandi embabazi. N’ahabw’ekyo akateeraho kusherura rwekwatso. Akabuuza Yesu ati: “Mutaahi wangye n’oha?” Akaba naayenda ngu Yesu agire ati: “Bataahi baawe nibanywani baawe” nari, “Abantu abarikushushana naiwe.” Okugarukamu ekibuuzo ekyo, Yesu akamutebeza ekitebyo ekirikukwata aha Muyudaaya n’Omusamaria. Ebi nibyo yaamutebeize.

Omushaija omwe akaba naaruga Yerusaalemu naza Yeriko. Omushaija ogwo akaba ari Omuyudaaya. Ku yaabaire naagyenda abashuma bamukwata. Bakamuteera bamunaga ahansi baatwara esente ze n’ebijwaro bye. Abashuma bakamuteera bamutsiga aha rubaju rw’enguuto ari haihi kufa.

Ku haahingwireho akaanya kakye, omunyamurwa nawe yaija arikuraba omu muhanda ogwo. Akareeba omushaija ogwo owaabaire ahutaaziibwe munonga. Ku ogire ngu okaba oriiwe, okaakozire ki?— Omunyamurwa ogwo we akaraba aharubaju orundi orw’omuhanda  yaagumizamu yaagyenda. N’okwemerera tarayemereire. Tihaine eki yaakozire kubaasa kuhwera omushaija ogwo.

Bwanyima hakaija omushaija ondiijo omunyadiini munonga. Akaba ari Omuleevi owaabaire naaheereza omu hekalu omuri Yerusaalemu. Nooteekateeka ngu akemerera kumuhwera?— Ngaaha. Akakora nk’eky’omunyamurwa yaakozire.

Aha muheru, hakaija Omusamaria. Noomureeba omu muhanda ariyo naija?— Akareeba Omuyudaaya araambiire ahansi aine obuhuta bw’amaani. Abasamaria baingi n’Abayudaaya bakaba batarikukundana na kakye. (Yohaana 4:9) Mbwenu shi Omusamaria akatsigaho omushaija ogwo atamuhwereire? Noogira ngu akeebuuza omu mutima gwe ati: ‘Ahabw’enki  nshemereire kuhwera Omuyudaaya ogu? We akabaasize kuumpwera ku ogire ngu niinye nyine obuhuta obu’?

Omusamaria akareeba omushaija ogwo araambiire aha rubaju rw’enguuto yaamusaasibwa. Akamanya ngu kikaba kitahikire kureka omushaija ogwo akafa. N’ahabw’ekyo akaruga aha ndogoya ye, yaahika ahu omushaija ogwo yaabaire ari yaatandika kumujanjaba ebironda. Akashuka amajuta na viinyo aha bironda bye. Eki kikaahwereire ebironda kukira. Reero yaashemba omwenda aha bironda by’omushaija ogwo.

Omusamaria n’obwegyendesereza akakiriza omushaija ogwo owaabaire aine obuhuta yaamuta aha ndogoya ye. Reero yaamutwara mporampora yaamuhitsya omu nju eyaabaire neeraarwamu abagyenyi nari hoteeri. Omusamaria akapangisiza omushaija ogwo omwanya gw’okuraaramu, kandi yaahayo n’eby’okumureeberera.

Bwanyima Yesu akabuuza omushaija ou yaabaire naagamba nawe ati: ‘Nooteekateeka ngu ahari abo abashaija bashatu n’oha owaabaire ari omutaahi murungi?’ Iwe nooteekateeka ngu n’oha owaabaire ari murungi? N’omunyamurwa, Omuleevi nari Omusamaria?—

Omushaija owaabaire naagamba na Yesu akagarukamu ati: ‘Omushaija owaayemereire akahwera ogwo owaabaire aine obuhuta niwe yaabaire ari omutaahi murungi.’ Yesu  akamugira ati: ‘Ohikire, naiwe gyenda okore otyo.’​—Luka 10:25-37.

Ekyo ka kyabaire kiri ekitebyo kirungi! Nikyoreka gye abu tushemereire kutwara nka bataahi baitu. Ti banywani baitu bonka. Kandi ti abo ab’erangi nk’eyaitu nari ab’orurimi rwaitu. Yesu akatwegyesa kugirira abantu boona embabazi tutarikwihirira ahu barikuruga, oku barikushusha nari orurimi oru barikugamba.

Yehova Ruhanga nawe n’omunyambabazi. Tarikushoroora mu bantu. Yesu akagira ati: ‘Shoimwe ori omu iguru; eizooba rye arijwisiza ababi n’abarungi, kandi agwisiza enjura abarungi n’abatari barungi.’ N’ahabw’ekyo, twine kuba abanyambabazi aha bantu boona nka Ruhanga.​—Matayo 5:44-48.

Mbwenu ku oraareebe omuntu ohutaire, noija kukora ki?— Kandi shi omuntu ogwo ku yaakuba naaruga omu eihanga erindi nari ari ow’erangi endiijo? Nabwo naaba ari mutaahi waawe, kandi nooba oine kumuhwera. Ku oraabe ori muto otarikubaasa kumuhwera, noobaasa kushaba omuntu omukuru kuhwera omuntu ogwo. Nari noobaasa kweta omuporiisi nari omwegyesa w’eishomero. Obwo nooba waaba omunyambabazi nk’omushaija Omusamaria.

Omwegyesa Mukuru naayenda ngu tube abanyambabazi. Naayenda ngu tuhwere abandi, tutarikwihirira aha ku bari. Niyo nshonga ahabw’enki yaatebize ekitebyo ekirikukwata aha Musamaria omunyambabazi.