TWENA nitwenda kugira okushemererwa, tikwo kiri?— Kwonka abantu baingi tibaine kushemererwa. Noomanya ahabw’enki?— N’ahabw’okuba tibarikumanya ekirikureeta okushemererwa. Nibateekateeka ngu okugira ebintu bingi nikyo kirikureeta okushemererwa. Kwonka ku barikutunga ebintu ebyo, okushemererwa oku barikutunga nikurahuka kuhwaho.

Hariho ekintu kikuru ekirikureeta okushemererwa. Omwegyesa Mukuru akagira ati: ‘Okugaba nikureeta okushemererwa kwingi okukira okuheebwa.’ (Ebyakozirwe 20:35) Mbwenu ekirikureeta okushemererwa niki?— Buzima, n’okugabira abandi kandi tukagira n’ebi twabakorera. Ekyo waaba nookimanya?—

Ka twongyere kukiteekateekaho. Mbwenu shi Yesu akagira ngu omuntu orikuheebwa ekiconco tarikushemererwa?— Ngaaha, tikwo yaagizire. Nookunda kutunga ebiconco, tikwo?— Buri omwe naakunda kubitunga.  Ku turikutunga ebintu birungi nitushemererwa.

Kwonka Yesu akagira ngu twagaba nitutunga okushemererwa kwingi. Mbwenu iwe nooteekateeka ngu n’oha ohaire abantu ebintu bingi okukira omuntu ondiijo weena?— Buzima, ni Yehova Ruhanga.

Baibuli neegira ngu Ruhanga niwe “aha abantu boona amagara n’omwitsyo na buri kintu kyona.” Naatuha enjura n’omushana kuruga omu iguru, kugira ngu ebimera bikure tutungye eby’okurya. (Ebyakozirwe 14:17; 17:25) Yehova ni Ruhanga ow’okushemererwa. Okuha abandi ebintu ni kimwe aha birikushemeza Ruhanga. Kandi twagira eki twaha abandi, nikibaasa kutureetera okushemererwa.

Mbwenu, niki eki turikubaasa kuha abandi?— Obumwe nitukoresa esente kugura ekiconco. Kyaba kiri ekiconco ekirikugurwa omu maduuka, nooba oine kukishashurira. Ka tugire ngu ekiconco nk’ekyo nikyo orikwenda kuha omuntu, nooba oine kuguma noobiika esente okuhitsya obu oraahityse ez’okukigura.

Kwonka ebiconco byona tibirikugurwa omu maduuka. Nk’eky’okureeberaho, aha izooba ry’omushana mwingi omuntu waamuha amaizi g’okunywa naaba gye. N’ahabw’ekyo waaha omuntu oine eiriho ekiconco nk’ekyo, noobaasa kutunga okushemererwa okurikuruga omu kugaba.

Obundi eizooba rimwe iwe na nyoko nimubaasa kuteeka obubanda. Buzima ekyo nikibaasa kukushemeza. Omu mwanya gw’okurya obubanda obwo bwona wenka okaakora ki ekirikubaasa kukureetera okushemererwa kwingi?— Buzima, obumwe noobaasa kubuha omwe ahari banywani baawe. Naiwe obumwe okaayenzire kukora otyo?—

 Omwegyesa Mukuru n’entumwa ze bakaba nibamanya okushemererwa okurikuruga omu kugaba. Noomanya eki baahaire abantu abandi?— Kikaba kiri ekintu ekirikukirayo omu nsi! Bakaba nibamanya amazima agarikukwata ahari Ruhanga, kandi amakuru marungi aga bakashemererwa kugabuurira abandi. Omu kubuurira kwabo bakaba bataikiriza muntu weena kubaha esente.

Eizooba rimwe entumwa Paulo ari na munywani we Luka omwegi wa Yesu bakabugana omukazi, nawe owaabaire naayenda kutunga okushemererwa okurikuruga omu kugaba. Bakamubugana aha rubaju rw’omugyera. Paulo na Luka bakazayo ahabw’okuba bakahurira ngu ogwo gukaba guri omwanya gw’okushabiramu. Kandi gakaba gari amazima, ahabw’okuba ku baahikireyo baashanga abakazi abamwe nibashaba.

Paulo akatandika kugambira abakazi abo amakuru marungi agarikukwata ahari Yehova Ruhanga n’Obukama bwe. Omwe aharibo akaba ari Ludia, kandi akabitaho omutima. Bwanyima, Ludia akaba naayenda kugira eki yaakora kworeka ngu buzima akakunda amakuru marungi agu yaahuriire. N’ahabw’ekyo akeshengyereza Paulo na Luka ati: “Ku muraabe mwansiima ngu ndi omwesigwa ahari Mukama, mwije omu nju yangye, mucumbikyemu.” Kandi akabaakiira omu ka ye.​—Ebyakozirwe 16:13-15.

Ludia akashemererwa kutaayaayirwa abaheereza ba Ruhanga abo omu ka ye. Akabakunda ahabw’okuba bakamuhwera kwega ahari Yehova na Yesu n’oku abantu barikubaasa kutuuraho ebiro byona. Kikamushemeza ahabw’okugira ngu akaha Paulo na Luka eby’okurya n’omwanya gw’okuhuumuriramu. Ahabw’okugira ngu Ludia buzima akagaba ayekundiire, akatunga okushemererwa. Ekyo nikyo twine kuguma nitwijuka. Omuntu naabaasa kutugambira ngu twine kugira ou twaha ekiconco. Kwonka buzima twagaba tuteekundiire, okugaba kwaitu tikurikwija kutureetera kushemererwa.

Nk’eky’okureeberaho, ku waakuba oine zaaswiti ezi waaba nooyenda kurya, reero nkakugambira ngu oine kuhaho omwana ondiijo, okaashemererwa kumuha aha zaaswiti ezo?— Kwonka shi ku waakuba oine  zaaswiti kandi okabugana munywani waawe ou orikukunda munonga? Waakyeteekateekyera ngu aha zaaswiti ezo oine kuhaho munywani waawe, ekyo tikikaakureetera okushemererwa?—

Obumwe nitukunda omuntu munonga tuhika n’aha kwenda kumuha buri kimwe eki twine. Oku turikweyongyera kukunda Ruhanga, nikwo tushemereire kuhurira turikwenda kumuha buri kimwe eki twine.

Omwegyesa Mukuru akaba naijuka omukazi omworo owaahaire Ruhanga kakye aku yaabaire aine koona. Akamureeba omu hekalu omuri Yerusaalemu. Akaba aine otunushu tubiri tukye; kandi nitwo yaabaire aine twonka. Kwonka twombi akatuta omu kabokisi nk’ekiconco kya hekalu. Tihaine owaamugyemire kuhayo. Abantu baingi aha baabaire bariho tibaramanyire eki omukazi ogwo yaakozire. Akahayo ayekundiire ahabw’okugira ngu buzima akaba naakunda Yehova. Okuhayo omu muringo ogwo kikamureetera okushemererwa.​—Luka 21:1-4.

Hariho emiringo mingi ei turikubaasa kugabamu. Noobaasa kuteekateeka emwe ahariyo?— Twaha abandi twekundiire, nitushemererwa. Niyo nshonga ahabw’enki Omwegyesa Mukuru arikutugambira ati: ‘Muteereho kuha abandi.’ (Luka 6:38) Twakora ekyo, nitureetera abandi kushemererwa. Kandi naitwe nitwija kushemererwa munonga.