HAINE oraakukozire ekintu kibi?— Akakutwariza kubi nari akakugambira ebigambo bibi?— Mbwenu shi naiwe oshemereire kumutwariza omu muringo mubi?—

Abantu baingi haagira owaabatwariza kubi, nibateeraho kuhoora enzigu. Kwonka Yesu akagira ngu tushemereire kusaasira abo abarikutushobeza. (Matayo 6:12) Kwonka shi omuntu yaatushobeza emirundi mingi? Tushemereire kumusaasira emirundi engahi?—

Ekyo nikyo Petero yaabaire naayenda kumanya. Eizooba rimwe Petero akabuuza Yesu ati: ‘Nyine kumusaasira emirundi mushanju?’ Kwonka emirundi mushanju neeba etarikumara. Yesu akagira ati: ‘Oine kumusaasira emirundi makumi mushanju emirundi mushanju’ yaaba akushobeize emirundi mingi nk’egyo.

Egyo ka n’emirundi mingi! Titurikwija kwijuka emirundi mingi ei omuntu arikuba atushagiize nari ebintu bibi bingi ebi arikuba atukoreire, tikwo? Kandi ekyo nikyo Yesu yaabaire naatugambira, ngu titushemereire kwijuka emirundi ei abandi batushagiize. Kandi baatushaba okusaasirwa, tushemereire kubasaasira.

Yesu akaba naayenda kworeka abeegi be oku kiri kikuru okusaasira abandi. N’ahabw’ekyo bwanyima y’okugarukamu  ekibuuzo eki Petero yaamubuurize, akatebeza abeegi be ekitebyo. Nooyenda kuhurira ekitebyo ekyo?—

Ira hakaba hariho omugabe murungi. Akaba aine embabazi nyingi. Obumwe akaba aguza abahuuku be esente ku baabaire baba nibeetenga obuhwezi. Kwonka obwire bukahika omugabe yaagambira abahuuku be abaabaire baine eibanja rye ngu bamushashure. Reero omwe aha bahuuku ou omugabe yaabaire naabanja esente zirikwingana obukaikuru  60, baamureeta omu maisho g’omugabe ogwo. Ezo ka zaabaire ziri esente nyingi!

Kwonka omuhuuku ogwo akaba akoreise esente zoona ataine z’okushashura omugabe. N’ahabw’ekyo omugabe akaragiira ngu omuhuuku ogwo bamuguze. Omugabe akagira ngu n’omukazi w’omuhuuku, abaana be n’ebintu ebi yaabaire aine byona biguzibwe. Reero ngu esente eziraarugyemu zishashurwe omugabe. Nooteekateeka ngu ebyo bikareetera omuhuuku ogwo kuhuurira ata?—

Akatsimba amaju omu maisho g’omugabe yaamweshengyereza ati: “Mukama wangye, nyihuza mpora, naanye ndyakwihura byona.” Kuri noogira ngu niiwe waabaire ori omugabe, okaba noija kukorera ki omuhuuku ogwo?— Omugabe akasaasibwa omuhuuku we. Atyo yaamusaasira. Akagambira omuhuuku ogwo ngu yaamusaasira esente ezo zoona ezi yaabaire naamubanja. Omuhuuku ogwo ka aine kuba yaashemereirwe!

Kwonka shi we omuhuuku ogwo akakora ki? Ku yaashohoire yaabugana omuhuuku ondiijo, ou yaabaire naabanja esente zirikwingana edenaari igana. Yaamukwata amaraka yaatandika kumuniga arikumugira ati: “Nyihura eibanja ryangye.” Nooreeba eki omuhuuku ogwo yaakozire, obwo omugabe yaaheza kumusaasira eibanja rihango munonga?—

Buzima omuhuuku ogwo owaabaire naabaanjibwa esente zirikwingana edenaari igana akaba ari omworo. Akaba atarikubaasa kushashura eibanja eryo ahonaaho. N’ahabw’ekyo omuhuuku ogwo akatsimba amaju, yaayeshengyereza omuhuuku mugyenzi we ati: ‘Nyabura ’we ngumisiririza, ninyija kukushashura.’ Mbwenu omushaija ogwo akaba atashemereire kugumisiririza omuhuuku mugyenzi we?— Kuri waabaire ori iwe okaba noija kukora ki?—

Omushaija ogwo akaba ataine mbabazi nk’ezi omugabe yaabaire aine. Akaba naayenda esente ze eshaaha egyo. Kandi ahabw’okugira ngu omuhuuku mugyenzi we akaba atarikubaasa kumushashura eshaaha egyo, akamuta omu kihome. Abahuuku abandi bakareeba ebyo byona  ebyabaireho, kandi tibiraabashemeize. Bakasaasibwa omuhuuku ogwo owaatairwe omu kihome. N’ahabw’ekyo bakagyenda baagambira omugabe ebyabaho.

Omugabe nawe ebyabaireho tibiraamushemeize. Akaguubwa kubi ahabw’omuhuuku ogwo owaayangire kusaasira mugyenzi we. Yaamweta yaamugira ati: ‘Iwe muhuuku mubi we, tinkusaasiire eibanja eri mbaire ninkubanja? Naiwe toshemereire kusaasira omuhuuku mugyenzi waawe?’

Omuhuuku ogwo owaabaire atarikusaasira ashemereire kuba yaabaire ayegyeire aha mugabe owaabaire aine embabazi. Kwonka tarayegire. N’ahabw’ekyo omugabe akaragiira ngu bamute omu kihome okuhitsya yaashashura esente ezo obukaikuru 60. Kwonka omu kihome akaba atarikubaasa kutunga esente z’okushashura omugabe. N’ahabw’ekyo akaba naija kugumamu okuhitsya yaafa.

Yesu arikuhendera ekitebyo ekyo, akagambira abakuratsi be ati: “Nikwo Tata ow’omu iguru aribagira atyo, ku muriba mutasaasiire bagyenzi baanyu, mwihire aha mutima.”​—Matayo 18:21-35.

 Yetegyereze ngu twena twine eibanja ahari Ruhanga. Ruhanga niwe yaatuhaire amagara agu twine. N’ahabw’ekyo eibanja eri twine ahari Ruhanga ni rihango waarigyeragyeranisa n’eri abantu abandi batwiniire. Eibanja eri batwiniire ni nk’ery’edenaari igana ezi omuhuuku yaabaire aine kwihura mugyenzi we. Kwonka eibanja eri twiniire Ruhanga ahabw’enshobe ezi turikukora ni nk’ery’obukaikuru 60 bw’esente ezi omuhuuku yaabaire aine kwihura omugabe.

Ruhanga aine embabazi nyingi. N’obu obumwe turaabe nitushobya, naatusaasira. Tarikutushashuza eibanja arikutucwekyereza. Kwonka eri n’eishomo eri twine kuguma nitwijuka: Ruhanga naatusaasira twaba nitusaasira abandi abarikutushobeza. Ekyo n’ekintu kikuru eki twine kuteekateekaho, tikwo?—

Mbwenu omuntu yaakukora kubi kwonka akakugira ngu nsaasira, noija kukora ki? Noija kumusaasira?— Kwonka shi yaakikora emirundi mingi? Nabwo noija kumusaasira?—

Twaba turi itwe abarikushaba okusaasirwa, nituba nitwenda ngu ou turikushaba okusaasirwa atusaasire, tikwo?— N’ahabw’ekyo naitwe tushemereire kukora nikyo kimwe. Titushemereire kumugira ngu twamusaasira kwonka, beitu tushemereire kumusaasira twihire aha mutima. Twakora ekyo, nitworeka ngu buzima nitwenda kuba abakuratsi b’Omwegyesa Mukuru.