HARIHO obu omuntu araakugambiire kukora ekintu ekitahikire?— Akateeraho kukugyemesereza ngu okikore? Nari akateeraho kukubeihabeiha ngu nikireeta okushemererwa ngu kandi buzima nikiba kitagwire okukikora?— Omuntu yaakora ekyo, naaba naateeraho kutureetera kwohibwa.

Twayohibwa tushemereire kukora ki? Mbwenu shi tushemereire kwikiriza tukakora ekitahikire?— Ekyo tikikaashemeza Yehova Ruhanga. Kwonka noomanya ou ekyo kirikubaasa kushemeza?— Eego, ni Sitaane Omuregi.

Sitaane n’omuzigu wa Ruhanga, kandi Sitaane n’omuzigu waitu. Titurikubaasa kureeba Sitaane ahabw’okuba n’ekihangirwe ky’omwoyo. Kwonka we naabaasa kutureeba. Eizooba rimwe Omuregi akagamba na Yesu, Omwegyesa Mukuru, kandi akateeraho kumwoha. Ka tureebe eki Yesu yaakozire. Reero nitwija kumanya ekihikire eki tushemereire kukora twayohibwa.

Yesu butoosha akaba akunda kukora ebi Ruhanga akunda. Eki akakyoreka butunu arikubatizibwa omu Mugyera Yorudani. Ahonaaho Yesu ku yaaherize kubatizibwa Sitaane yaateeraho kumwoha. Baibuli neegira ngu ‘eiguru rikakinguukira’ Yesu. (Matayo 3:16) Eki nikibaasa kuba nikimanyisa ngu Yesu eshaaha egyo akatandika kwijuka obu yaabaire ari n’Ishe omu iguru.

 Yesu ku yaaherize kubatizibwa yaaza omu ihamba kuteekateeka munonga aha bintu ebi yaabaire yaatandika kwijuka. Akamarayo ebiro makumi ana. Obwire obwo bwona Yesu taragizire kintu kyona eki yaarya, n’ahabw’ekyo akaba aine enjara y’amaani. Obwo nibwo Sitaane yaateeraho kumwoha.

Omuregi akamugira ati: “Ku oraabe ori Omwana wa Ruhanga, gambira amabaare aga gahindukye eby’okurya.” Omu obwire obwo obu yaabaire aine enjara, eby’okurya ka byakumunuriire! Kwonka shi Yesu akaba naabaasa kuhindura amabaare eby’okurya?— Eego, ekyo akaba naabaasa kukikora. Ahabw’enki? Ahabw’okuba Yesu Omwana wa Ruhanga akaba aine amaani g’omutaano.

Mbwenu okaahindwire eibaare eby’okurya ku ogire ngu Omuregi niiwe yaashabire ngu okikore?— Yesu akaba aine enjara. Mbwenu Yesu ti yaakubaire aine rwekwatso y’okukora ekyo omurundi gumwe gwonka?— Yesu akaba naamanya ngu kigwire okukoresa amaani ge omu muringo nk’ogwo. Yehova akaba ahaire Yesu amaani ago kugira ngu ahwere abantu kwirira haihi Ruhanga, beitu kutari kugakoresa ebye.

Omu mwanya gw’okukora ekyo, Yesu akagambira Sitaane ebihandiikirwe omuri Baibuli ebi: “Omuntu tatungwa by’okurya byonka, kureka n’ekigambo kyona ekiruga omu kanwa ka Ruhanga.” Yesu akaba naamanya ngu okukora ebirikushemeza Yehova ni kikuru okukira okugira eby’okurya.

 Kwonka Omuregi akateeraho ogundi murundi kureetera Yesu kwohibwa. Akamutwara omuri Yerusaalemu yaamwemereza aha mutwe gwa hekalu aharingwa. Reero Sitaane yaamugira ati: ‘Ku oraabe ori Omwana wa Ruhanga, guruka oyetsimbe ahansi; ahakuba kikahandiikwa ngu baamaraika ba Ruhanga baryakurinda orekye kuhikwaho akabi.’

Ahabw’enki Sitaane yaagambire atyo?— Akagamba atyo ngu Yesu akaayohibwa kukora ekintu ky’obushema. Kwonka nabwo aha murundi ogu Yesu tarayorobeire Sitaane. Akagira Sitaane ati: ‘Kikahandiikwa ngu: Otarigyeza Mukama Ruhanga waawe.’ Yesu akaba naamanya ngu kikaba kiri kibi okugyeza Yehova arikuta amagara ge omu kabi.

Kwonka nabwo, Sitaane tararekyeire aho. Ogundi murundi akatwara Yesu aha rushozi ruraingwa. Ku yaamuhikizeyo yaamworeka obukama nari obutegyeki bwona obw’ensi n’ekitiinisa kyabwo. Reero Sitaane yaagira Yesu ati: “Ku orainame, wandamya, biriya byona niinyija kubikuha.”

Teekateeka aha ki Omuregi yaaraganiise kuha Yesu. Mbwenu buzima obukama nari obutegyeki bwona bukaba buri obwa Sitaane?— Yesu tarahakaine ngu bukaba butari bwa Sitaane. Yesu akaahakaine ku ogire ngu bukaba butari bwa Sitaane. Eego, Sitaane buzima niwe mutegyeki w’amahanga goona ag’ensi. Na Baibuli neemweta “omutegyeki w’ensi egi.”​—Yohaana 12:31.

Okaakozire ki Omuregi ku yaakukuragaaniise kugira eki yaakuha ngu omuramye?— Yesu akaba naamanya ngu kikaabaire kigwire kuramya Omuregi nangwa n’obu Yesu yaakubaire naza kutunga ekihembo ky’amaani. N’ahabw’ekyo Yesu akagira ati: ‘Rugaho, Sitaane, ahabw’okuba Baibuli neegira ngu: Oramye Mukama Ruhanga waawe; obe niwe waaheereza wenka.’​—Matayo 4:1-10; Luka 4:1-13.

Naitwe nituhikwaho okwohibwa. Noomanya ebirikubaasa kutureetera kwohibwa?— Aha hariho eky’okureeberaho. Nyoko naabaasa kureeta eminekye erikureebeka gye y’okunywera ahari chai. Naabaasa kukugambira ngu otaryaho na gumwe okuhitsya eshaaha y’okunywa chai yaahika. Kwonka ahabw’okugira enjara, noobaasa kwohibwa kuryaho.  Mbwenu shi noija kworobera nyoko?— Sitaane we naayenda ngu otoorobera nyoko.

Ijuka ngu Yesu nawe akaba aine enjara y’amaani. Kwonka akaba naamanya ngu okworobera Ruhanga kikaba kiri kikuru munonga okukira okurya. Nooyoreka ngu nootooreza Yesu waakora eki nyoko yaakugambira.

Abaana abandi nibabaasa kukugambira ngu omire obujuma. Nibabaasa kukugira ngu obujuma obwo nibwija kukwongyera amaani. Kwonka  noobaasa kushanga ngu obujuma obwo n’omubazi. Nibubaasa kukurwaza nari bukwite. Nari omuntu naabaasa kukuha sigara, erimu emibazi y’ekitabura bwonko, kandi akugyemesereze kugireetsa. Noija kukora ki?—

Ijuka oku Yesu yaatwarize. Sitaane akateeraho kureetera Yesu kuta amagara ge omu kabi arikumugira ngu agurukye kuruga aha mutwe gwa hekalu. Kwonka Yesu akanga kukikora. Noija kukora ki omuntu yaakugyemesereza kukora ekintu ky’akabi?— Yesu tarayorobeire Sitaane. Kandi naiwe toshemereire kworobera omuntu orikuteeraho kukureetera kukora ebitahikire.

Eizooba rimwe noobaasa kugambirwa kuramya ekishushani, ekikorwa eki Baibuli erikutuzibira kukora. (Okuruga 20:4, 5) Omukoro gw’eishomero nigubaasa kuba nigutwariramu ekikorwa nk’ekyo. Nibabaasa n’okukugira ngu torikwija kugaruka ah’eishomero ryabo ku oraayangye kukikora. Okaakora ki?—

Nikiba kyorobi kukora ekihikire buri omwe yaaba naakikora. Kwonka okukora ekihikire nikiba kigumire munonga abandi baaba nibateeraho kutureetera kukora ekitahikire. Nibabaasa kugira ngu eki barikukora buzima ti kibi munonga. Kwonka oshemereire kwebuuza, Ruhanga we naakigambaho ki? Naamanya ekirungi munonga.

N’ahabw’ekyo abandi n’obu baakugamba ki, tushemereire kwetantara kukora ebi Ruhanga arikugira ngu ni bibi. Omu muringo ogwo nitwija kushemeza Ruhanga, beitu atari Muregi.