ABANTU abamwe nibagira ngu bo nibaikiririza omu bi barikubaasa kureeba byonka. Kwonka ekyo n’eky’obushema. Haine ebintu bingi ebiriho ebi tutakareebaga n’amaisho gaitu. Noobaasa kugamba kimwe aharibyo?—

Kandi shi omwoya ogu turikwitsya? Noobaasa kugukwata oguhurire?— Huuha omu ngaro zaawe. Haine eki waahurira?— Eego kiriho, kwonka torikubaasa kureeba omwoya ogwo, tikwo?—

Tuherize kugamba aha bihangirwe eby’omwoyo, ebi tutarikubaasa kureeba. Tureebire ngu ebimwe ni birungi kwonka ebindi ni bibi. Gamba bamwe aha baine omubiri gw’omwoyo abarungi abu tutarikubaasa kureeba.— Hariho Yehova Ruhanga, hariho Yesu na baamaraika abarungi. Kwonka shi hariho na baamaraika ababi?— Baibuli neegira ngu bariho. Ngambira eki obeegireho.—

Ekintu kimwe eki turikumanya n’okugira ngu baamaraika abarungi n’ababi boona nibatukiza amaani. Omwegyesa Mukuru akaba naamanya bingi ebirikukwata ahari baamaraika. Ahabw’okuba obu yaabaire atakazairwe nk’omwana omu nsi akaba ari maraika. Akaba naatuura na baamaraika abandi omu iguru. Akaba naamanya baamaraika baingi. Mbwenu shi baamaraika abo boona baine amaziina?—

Twegire ngu Ruhanga akaha enyonyoozi amaziina. N’ahabw’ekyo nitubaasa kuhamya ngu baamaraika boona nabo baine amaziina. Kandi nitumanya ngu nibabaasa kugaaniira hamwe ahabw’okuba Baibuli neegamba aha ‘rurimi rwa baamaraika.’ (1 Abakorinso 13:1) Nooteekateeka ngu baamaraika nibaba nibagaaniira ahari ki? Nooteekateeka ngu nibaba nibagaaniira ahariitwe abari omu nsi?—

 Nitumanya ngu baamaraika ba Sitaane, nibo baadaimoni, nibateeraho kutureetera kugomera Yehova. N’ahabw’ekyo nibagaaniira aha ku barikubaasa kukora ekyo. Nibenda ngu naitwe tube nkabo kugira ngu Yehova atatukunda. Kandi shi baamaraika ba Ruhanga abeesigwa? Nooteekateeka ngu nabo nibatugaaniiraho?— Eego, nibatugaaniiraho. Nibaba nibenda kutuhwera. Ka nkugambire oku bamwe ahari baamaraika ba Ruhanga baahwereire abantu abaabaire nibakunda Yehova kandi barikumuheereza.

Nk’eky’okureeberaho, hakaba hariho omushaija orikwetwa Danieli owaabaire naatuura omuri Babulooni. Omuri Babulooni abantu baingi bakaba batarikukunda Yehova. Bakataho n’ekiragiro ekyabaire nikireetera buri muntu oraashabe Yehova Ruhanga kufubirwa. Kwonka Danieli tararekire kushaba Yehova. Noomanya eki baamukozire?—

Abantu abo ababi bakakwata Danieli bamunaga omu kiina ky’entare. Omu kiina ekyo Danieli akaba arimu wenka n’entare eziine enjara. Mbwenu noomanya ekyabaireho?— Danieli  akagira ati: “Ruhanga wangye atumire maraika we, yaigara eminwa y’entare.” Entare tiziramukozireho kabi koona. Baamaraika nibabaasa kukorera abo abarikuheereza Yehova, ebintu birungi ebirikutangaaza.—Danieli 6:18-22.

Kandi hariho obwire obu Petero yaabaire ari omu kihome. Ijuka ngu Petero akaba ari munywani w’Omwegyesa Mukuru, Yesu Kristo. Abantu abamwe tibarashemereirwe obu Petero yaabagira ngu Yesu n’Omwana wa Ruhanga. N’ahabw’ekyo bakata Petero omu kihome. Abaserukare bakaba nibarinda Petero ngu atatoroka. Haine owaabaire naabaasa kumuhwera?—

Petero akaba abyami ahagati y’abarinzi babiri, kandi akaba akomirwe  enjegyere aha mikono. Kwonka Baibuli neegira eti: ‘Maraika wa Mukama yaija; omu kishengye haazamu ekyererezi yaateerateera Petero omu mbaju, yaamusisiimura, yaagira ati: Rahuka kwimuka.’

Ahonaaho enjegyere azaabaire zikomire emikono ya Petero zikaragara. Reero maraika yaamugira ati: ‘Jwara emyenda yaawe n’enkaito zaawe, kandi onkurate.’ Abarinzi tibarabaasize kuremesa Petero kugyenda ahakuba akaba naahwerwa maraika. Hakabaho ekintu ekirikutangaaza ku bahikire aha rwigi rw’ekyoma orw’eirembo ry’orurembo. Orwigi rukaiguka rwonka. Maraika ogwo akaiha Petero omu kihome ngu abaase kugumizamu arikubuurira.​—Ebyakozirwe 12:3-11.

Naitwe baamaraika ba Ruhanga nibabaasa kutuhwera?— Eego, nibabaasa. Mbwenu shi ekyo nikimanyisa ngu nibaija kuturinda kutahikwaho kabi koona?— Ngaaha, baamaraika tibarikuzibira kabi kutuhikaho twakora eby’obushema. Kwonka n’obu twakuba tutakozire bintu by’obushema, nitubaasa kuhikwaho akabi. Okuzibira akabi kutuhikaho tigwo murimo mukuru gwa baamaraika. Kureka, Ruhanga abahaire omurimo gw’okukora ogw’omutaano.

Baibuli neegamba ahari maraika orikugambira abantu omu nsi yoona ngu baramye Ruhanga. (Okushuuruurwa 14:6, 7) Ekyo maraika naakikora ata? Tugire ngu shi naagambira omu iguru n’eiraka rihango ngu abantu boona babaase kumuhurira?— Ngaaha, kureka abakuratsi ba Yesu omu nsi nibabuurira abandi ebirikukwata ahari Ruhanga, barikuhwerwa baamaraika. Baamaraika nibahamya ngu abo boona buzima abarikwenda kumanya ebirikukwata ahari Ruhanga baatunga omugisha gw’okubimanya. Twayejumba omu murimo ogwo ogw’okubuurira, baamaraika nibaija kutuhwera.

Kwonka shi abantu abatarikukunda Ruhanga ku baakutuhigaanisa? Kandi shi ku baakututwara omu kihome? Baamaraika nibaija kutuhwera kurekurwa?— Nibabaasa. Kwonka ekyo tibarikukikora butoosha.

Omukuratsi wa Yesu Paulo, omurundi gumwe akaba ari embohe. Akaba naagyendera omu bwato hariho eihunga ry’amaani. Kwonka baamaraika tibaramuhwereire kurekurwa ahonaaho. Ahabw’okuba hakaba hariho  abantu abandi abaabaire nibenda kumanya ebirikukwata ahari Ruhanga. Maraika akagira ati: “Paulo otatiina; oshemereire kwemerera omu maisho ga Kaisaari.” Paulo akaba aine kutwarwa ow’omutegyeki Kaisaari kugira ngu abaase kumubuurira. Baamaraika butoosha bakaba nibamanya ahu Paulo yaabaire aba ari, kandi bakaba baamuhwera. Naitwe nibaija kutuhwera, buzima twaba nituheereza Ruhanga.​—Ebyakozirwe 27:23-25.

Hariho ogundi murimo mukuru ogu baamaraika barikwija kukora, kandi bari haihi kugukora. Obwire bwa Ruhanga obw’okucwekyereza ababi buri haihi kuhika. Abo boona abaraabe batarikuramya Ruhanga ow’amazima nibaija kucwekyerezibwa. Abo abarikugira ngu tibarikubaasa kwikiriza ngu hariho baamaraika ahabw’okugira ngu tibarikubaasa kubareeba, nibaija kumanya ku bagwereire kimwe.​—2 Abatesalonika 1:6-8.

Ekyo nikiija kumanyisa ki ahariitwe?— Twaba turi aha rubaju rwa baamaraika ba Ruhanga, nibaija kutuhwera. Kwonka shi turi aha rubaju rwabo?— Nituba turi aha rubaju rwabo twaba nituheereza Yehova. Kandi twaheereza Yehova, nitwija kuba nitugambira abandi ngu nabo bamuheereze.