YEHOVA obumwe omu muringo gurikutangaaza naarinda abato n’abo abatarikubaasa kwerinda. Waaza omu bicweka by’omu kyaro, noobaasa kureeba omuringo gumwe ogu Yehova arikukoramu ekyo. Kwonka noobaasa kutarahuka kwetegyereza ekiriyo nikibaho.

Noobaasa kureeba ekinyonyi kyateekama haihi naiwe. Nikibaasa kureebeka nk’ekyatunga obuhuta. Wairira haihi nakyo, nikyeyongyera omu maisho kiri nk’ekihendekire ipapa. Kwonka okiguma nokikuratira nakyo kiguma nikyeyongyerayo. Reero bwanyima ekinyonyi ekyo kiguruka kigyenda. Buzima ipapa ryakyo tirihendekire! Noomanya eki ekinyonyi ekyo kyaba nikikora?—

Haihi n’ahu ekinyonyi ekyo kyateekama, haaba hariho ebyana byakyo byesherekire omu bunyaatsi. Ekinyonyi ekyo kyaba kitiinire ngu noija kureeba ebyana byakyo obundi obikore kubi. N’ahabw’ekyo kyayereebekyesa nk’ekihuteire ngu kibaase kurinda ebyana byakyo. Noomanya orikubaasa kuturinda nk’oku ekinyonyi kirikurinda ebyana byakyo?— Omuri Baibuli, Yehova naagyeragyeranisibwa n’ekinyonyi ekirikwetwa empungu, erikuhwera ebyana byayo.​—Eky’Ebiragiro 32:11, 12.

 Omwana wa Yehova ow’omuhendo munonga ni Yesu. Obu Yesu yaabaire ari omu iguru, akaba ari omuntu w’omwoyo aine amaani nk’Ishe. Akaba naabaasa kwerinda. Kwonka Yesu ku yaazairwe omu nsi nk’omwana, akaba atarikubaasa kwehwera. Akaba naayetenga oburinzi.

Kubaasa kuhikiiriza eki Ruhanga yaabaire naayenda akore omu nsi, Yesu akaba aine kubanza yaakura kandi akaba omuntu ohikiriire. Kwonka Sitaane, akateeraho kwita Yesu ekyo kitakabaireho. Okuteeraho kwita Yesu obu yaabaire akiri omwana n’emiringo ei Yehova yaamurinziremu n’ekitebyo kirikutangaaza. Nooyenda kukimanya?—

Yesu aherize kuzaarwa, Sitaane akareetera ekintu ekirikushusha nk’enyonyoozi kwaka ahaiguru omu Burugwa-izooba. Abashaija abaabaire nibeetwa abanyabwengye abarikwega aha by’enyonyoozi bakagyenda orugyendo ruraingwa barikukuratira enyonyoozi egyo kuhika Yerusaalemu. Ku baahikireyo baabuuza ahu owaabaire naaza kuba omugabe w’Abayudaaya yaabaire naaza kuzaarirwa. Ku baabuurize abashaija  abaabaire nibamanya eki Baibuli yaabaire neekigambaho bagarukamu bati: “Omuri Betelehemu.”​—Matayo 2:1-6.

Heroode omugabe mubi wa Yerusaalemu ku yaahuriire ngu hariho omugabe musya oherize kuzaarwa omu tauni ya haihi Betelehemu, akagambira abanyabwengye ati: “Musherure gye ogwo mwana; ku muraamubone, mugarukye mungambire.” Noomanya ahabw’enki Heroode yaabaire naayenda kumanya ahu Yesu yaabaire ari?— N’ahabw’okuba Heroode akaba aine eitima kandi arikwenda kwita Yesu.

Ruhanga akarinda ata Omwana we?— Abanyabwengye ku bareebire Yesu, baamuha ebiconco. Bwanyima Ruhanga  akarabura abanyabwengye omu kirooto kutagaruka owa Heroode. N’ahabw’ekyo bakagaruka owaabo barikurabira omu muhanda ogundi batarabire Yerusaalemu. Heroode ku yaamanyire ngu abanyabwengye bagarukireyo, yaaguubwa kubi munonga. Omu kuteeraho kwita Yesu, Heroode akaragiira ngu abaana b’aboojo boona abari omuri Betelehemu abari ahansi y’emyaka ebiri baitwe. Kwonka obwo Yesu akaba atakiriyo.

Noomanya oku Yesu yaakizire okwitwa okwo?— Abanyabwengye ku baagarukire owaabo, Yehova yaagambira Yosefu iba Mariamu ngu bagyende bahungire Misri. Obwo Heroode omushaija mubi akaba atakibaasa kwita Yesu. Bwanyima y’emyaka, Mariamu na Yosefu ku baarugire Misri, Ruhanga akaha Yosefu obuhabuzi obundi. Ruhanga akagambira Yosefu omu kirooto kuza Nazareesi ahu Yesu yaabaire atarikwija kuhikwaho kabi.​—Matayo 2:7-23.

Nooreeba oku Yehova yaarinzire Omwana we?— N’oha ou orikubaasa  kugira ngu ari nk’ebyana by’ekinyonyi ebisherekirwe nyinabyo nari nka Yesu obu yaabaire ari omwereere? Tiiwe?— Naiwe hariho abarikwenda kukuhitsyaho akabi. Noobamanya?—

Baibuli neegira ngu Sitaane ari nk’entare erikutsinda erikwenda kuturya. Nk’oku entare zirikukira kukwata enyamaishwa ento, Sitaane na baadaimoni be nabo nibakira kutaahirira abaana. (1 Petero 5:8) Kwonka Yehova naakiza Sitaane amaani. Yehova naabaasa kurinda abaana abarikumukunda nari aiheho akabi koona aku Sitaane arikubareetaho.

Nk’oku twareebire omu Shuura 10 noijuka eki Sitaane na baadaimoni be barikuteeraho kutureetera kukora?— Nibateeraho kutureetera kwejumba omu kuteerana oku Ruhanga arikwanga. Kwonka shi n’oha orikwikirizibwa kuteerana?— Omushaija n’omukazi abakuru kandi abashweraine nibo barikwikirizibwa kuteerana.

Kwonka eky’obusaasi, abantu bamwe abakuru nibateerana n’abaana. Ku barikukora ekyo, aboojo n’abaishiki nibabaasa kutandika kukora ebintu bibi ebi beegire kuruga aha bantu bakuru nk’abo. Kandi abaana abo nibatandika kukoresa ebicweka byabo by’omubonano omu muringo mubi. Ekyo nikyo kyabaireho ira omu rurembo Sodoma. Baibuli neegira ngu abantu b’omu rurembo orwo, abashaija ‘abato n’abakuru,’ bakaba nibenda kuteerana n’abashaija abaizire kutaayaayira Looti.​—Okutandika 19:4, 5.

N’ahabw’ekyo nk’oku Yesu yaabaire naayetenga oburinzi, naiwe nooyetenga kurindwa kugira ngu abantu bakuru n’abaana abandi batateerana naiwe. Butoosha, abantu nk’abo nibabaasa kwetwara nka banywani baawe. Nibabaasa n’okugira eki baakuha waabahamiza ngu eki barikwenda kukora naiwe torikwija kukigambira abandi. Kwonka abantu abo nibaba baine ebigyendererwa bibi nka Sitaane na baadaimoni be, kandi nibenda kweshemeza kwonka. Kandi nibaba nibenda kutunga okushemererwa okwo barikuteerana n’abaana. Ekyo buzima tikihikire!

 Noomanya oku barikubaasa kukikora?— Nibabaasa kuteeraho kukwatakwata ebicweka byawe by’omubonano. Nari nibabaasa kuhitsya ebicweka byabo by’omubonano aha byawe. Kwonka toshemereire kwikiriza omuntu weena kuzaanisa ebicweka byawe by’omubonano. Nangwa n’obu yaakuba ari nyoko, sho nari ou orikuzaarwa nawe. Ebicweka by’omubiri ebyo n’ebyawe wenka.

Noobaasa kurinda ota omubiri gwawe abantu abarikukora ebintu bibi nk’ebyo?— Eky’okubanza, otaikiriza omuntu weena kuzaanisa ebicweka byawe by’omubonano. Omuntu weena yaateeraho kukora ekyo, mugambire butunu omu iraka rihango oti: “Ekyo otagaruka kukikora! Ninza kukutabaariza!” Kandi omuntu ogwo yaakugira ngu waagamba ekyabaho nibaija kukukwatsa orubanja, ekyo otakiikiriza. Buzima tikwo kiri. Gyenda omutabaarize n’obu yaakuba ari muntu ki owaakikora. Oshemereire kumutabaariza n’obu yaakugira ngu eki muriyo nimukora tihaine ondiijo oine kukimanya. Nangwa omuntu ogwo n’obu yaakukuraganisa ebiconco birungi nari akakutiinatiinisa, oshemereire kugyenda okamutabaariza.

Toshemereire kugira obwoba, kwonka oine kwegyendesereza. Abazaire baawe baakurabura aha bantu nari emyanya erikubaasa kuba ey’akabi ahariiwe, oshemereire kuborobera. Waaborobera nooyetantara abantu babi abarikubaasa kukukora kubi.