KATUGIRE ngu noobaasa kukora buri kimwe eki orikwenda hataine orikukuzibira okaashemererwa? Haine obu orikuhuurira otarikwenda ngu omuntu akugambire eki oshemereire kukora? Hati, ngambira amazima eki orikuteekateeka.—

Kwonka shi ekyakubaire kirungi niki? Nooteekateeka ngu buzima n’eky’obwengye kukora buri kimwe eki orikwenda? Nari ku orikworobera sho na nyoko niharugamu ebirungi?— Ruhanga naagira ngu oine kworobera abazaire baawe, n’ahabw’ekyo haine kuba hariho enshonga nungi ahabw’enki oine kuboorobera. Ka tureebe yaaba nitubaasa kwetegyereza enshonga egyo.

Oine emyaka engahi?— Noomanya emyaka ei sho, nyoko, shwenkuru yaawe nari nyokwenkuru yaawe baine?— Baine emyaka mingi kukira eyaawe. Kandi oku omuntu arikweyongyera kukura nikwo arikweyongyera kwega ebintu bingi. Buri mwaka naahurira ebintu bingi areeba ebintu bingi kandi akora ebintu bingi. N’ahabw’ekyo abato nibabaasa kwegyera aha bantu bakuru.

Haine ou orikumanya ori muto ahariiwe?— Mbwenu torikumanya bingi kumukira?— Ahabw’enki orikumanya bingi okumukira?— N’ahabw’okugira ngu noomukira omu myaka. Omazire obwire bwingi orikwega ebintu kukira ogwo ou orikukiza emyaka.

 N’oha otwireho kumara obwire buraingwa kukukira nari kukira nyowe nari ondiijo muntu weena?— Ni Yehova Ruhanga. Naamanya bingi kukira nyowe naiwe. Kyona eki arikutugambira kukora, nituhamya ngu nikiba kihikire kukikora, n’obu kyakuba kitoorobi kukikora. Noomanya ngu nangwa n’Omwegyesa Mukuru omurundi gumwe okworoba tikiramworobeire?—

Omurundi gumwe Ruhanga akashaba Yesu kukora ekintu ekyabaire kigumire munonga. Yesu akashaba aha bikwatiraine n’enshonga egyo nk’oku turikureeba aha omu kishushani. Akashaba ati: “Ku oraabe noikiriza, onyiheho ekikopo eki.” Omu kushaba atyo, Yesu akooreka ngu kikaba kitoorobi obutoosha kukora ebi Ruhanga akunda. Kwonka Yesu akahendera ata okushaba kwe? Noomanya eki yaagambire?—

Yesu akahendera arikugira ati: “Kirekye kuba nk’oku ndikwenda, kureka nka Iwe oku orikwenda.” (Luka 22:41, 42) Yesu akaba naayenda ngu ebi Ruhanga akunda bibe nibyo byakorwa beitu bitari ebi we arikwenda. Kandi Yesu akagumizamu yaakora ebi Ruhanga akunda omu mwanya gw’ebi we yaabaire naateekateeka ngu nibibaasa kuba nibyo birungi.

Ekyo nitukyegaho ki?— Nitwega ngu ni kirungi butoosha kukora ebi Ruhanga arikutugambira, n’obu kyakuba kitoorobi okubikora. Kwonka haine ekindi eki turikwega. Nookimanya?— Nitwega ngu Ruhanga na Yesu tibari muntu omwe nk’oku abamwe barikugira. Yehova Ruhanga ni mukuru munonga kandi naamanya bingi okukira Omwana we Yesu.

Twayorobera Ruhanga, nituba nitworeka ngu nitumukunda. Baibuli neegira eti: “Oku nikwo kukunda Ruhanga, itwe okworobera ebiragiro bye.” (1 Yohaana 5:3) Hati ningira waayetegyereza ngu twena twine kworobera Ruhanga. Nooyenda kumworobera, tikwo?—

 Ka tushome omu Baibuli tureebe ebi Ruhanga arikugambira abaana kukora. Ka tushome eki Baibuli erikugamba omu Abaefeso eshuura 6, orunyiriri 1, 2, na 3. Nihagira hati: “Abaana, mworobere abazaire baanyu omuri Mukama, ahakuba nikyo kihikire. Tiina sho na nyoko; (ekyo nikyo kiragiro ky’okubanza ekirimu okuraganisibwa.) Obone kuba gye, okahangaara omu nsi.”

Yetegyereze ngu Yehova Ruhanga niwe arikukugambira kworobera sho na nyoko. ‘Okubatiina’ nikimanyisa ki? Nikimanyisa ngu oine kubaha ekitiinisa. Kandi Ruhanga naaraganisa ngu waayorobera abazaire baawe, noija “kuba gye.”

Ka nkugambire aha bantu abaacungwirwe ahabw’okugira ngu bakooroba. Abantu abo bakabaho ira omu rurembo ruhango orurikwetwa Yerusaalemu. Abantu baingi omu rurembo orwo bakaba batarikworobera Ruhanga, n’ahabw’ekyo Yesu akabarabura ngu Ruhanga akaba naaza kucwekyereza orurembo orwo. Kandi Yesu akabagambira oku baabaire nibabaasa kuhonokaho kuri baabaire nibakunda ekihikire. Akabagira ati: ‘Ku murireeba Yerusaalemu eyehinguririziibwe amahe, obwo muryamanya ngu okuhwerekyerera kwayo kuri haihi. Obwo nibwo bwire bw’okuruga omuri Yerusaalemu, mukahuungira omu nshozi.’​—Luka 21:20-22.

Buzima, nk’oku Yesu yaagambire, amahe gakaija kutaahirira Yerusaalemu. Amahe g’Abarooma gakehinguriza Yerusaalemu. Kwonka ahabw’enshonga zitarikumanywa, amahe gakagarukayo. Abantu abaingi bakateekateeka ngu tihakiriho kabi. N’ahabw’ekyo bakaguma omu rurembo orwo. Kwonka Yesu akaba abagambiire kukora ki?— Ku ogire ngu okaba nootuura omuri Yerusaalemu okaba noija kukora ki?— Abo abaikiririize kimwe ebi Yesu yaagambire bakatsigaho amaka gaabo baahungira omu nshozi ezaabaire ziri hare na Yerusaalemu.

Kumara omwaka gwona, tihaine kabi akahikire ahari Yerusaalemu. Omu mwaka gwa kabiri tihaine ekyabaireho. N’omu mwaka gwa kashatu, tihaine ekyabaireho. Abantu abamwe nibabaasa kuba baateekateekire  ngu abo abaahungire bakaba bari abashema. Kwonka omu mwaka gwa kana, amahe g’Abarooma gakagaruka. Gaayetooroora Yerusaalemu omurundi ogundi. Obwo hakaba hatakiriho kuhunga. Aha murundi ogu amahe gakacwekyereza orurembo orwo. Abantu baingi abaabaire bari omu rurembo orwo bakafa, kandi abandi baakwatwa baatwarwa nk’embohe.

Kwonka shi niki ekyahikire ahari abo abaayorobeire Yesu?— Tibarahikirweho kabi koona. Bakaba bari hare na Yerusaalemu. N’ahabw’ekyo okworoba kwabo kukabarinda.

Waaba noyorobera ebi barikukugambira, noogira ngu ekyo naiwe nikiija kukurinda?— Abazaire baawe nibabaasa kukugira ngu otarizaanira omu nguuto. Ahabw’enki nibakugambira okutakora ekyo?— N’ahabw’okugira ngu noobaasa kuteerwa motoka. Kwonka obumwe noobaasa kuteekateeka oti: ‘Hati eshaaha egi tihariyo motoka. Tindahikweho kabi.  Abaana abandi nibazaanira omu nguuto kwonka tinkareebaga bahikirweho akabi.’

Okwo nikwo abantu baingi omuri Yerusaalemu baateekateekire. Amahe g’Abarooma ku gaaherize kugyenda abantu baateekateeka ngu tiharaabeho kabi. Abandi bakaba nibatuura omu rurembo orwo. N’ahabw’ekyo nabo bakagumamu. Bakaraburwa, kwonka tibarafiireyo. N’ekyarugiremu, bakacwekyerezibwa.

Ka tureebe eky’okureeberaho ekindi. Orazaaniiseho obuti bw’ekibiriiti?— Nikibaasa kureebeka nk’ekirikushemeza waateera akati k’ekibiriiti okareeba omuriro nigwaka. Kwonka okuzaanisa obuti bw’ekibiriiti n’eky’akabi. Enju yoona neebaasa kukwatwa omuriro kandi nigubaasa kukwotsya ofe!

Ijuka ngu okworoba kumara obwire bukye tikirikumara. Kwonka waaba noyorobera abazaire baawe butoosha, ekyo nikiija kurinda amagara gaawe. Mbwenu n’oha orikugira ngu, ‘Abaana mworobere abazaire baanyu’?— Ni Ruhanga. Kandi ijuka ngu ekyo naakigamba ahabw’okuba naakukunda.