Hariho omuntu araakugambiire enaama?— * Baibuli neegamba aha “naama” erikuruga ahari Ruhanga. Neeyetwa enaama ahabw’okuba abantu bakaba batarikugimanya. Kandi na baamaraika bakaba nibenda kumanya gye enaama egi. Nooyenda kumanya enaama egi?—

Omu kutandika, Ruhanga akahanga omushaija n’omukazi. Omushaija akaba naayetwa Adamu kandi omukazi ari Haawa. Ruhanga akabata omu kibanja kirungi ekyabaire nikyetwa Edeni. Adamu na Haawa kuri baayorobeire Ruhanga, bo n’abaana baabo bakaba nibaija kuhindura ensi yoona paradiso. Kandi bakaba nibaija kutuura omu Paradiso ebiro byona. Kwonka noijuka eki Adamu na Haawa baakozire?—

Adamu na Haawa bakagomera Ruhanga, egyo niyo nshonga ahabw’enki hati tutarikutuura omu paradiso. Kwonka Ruhanga akagira ngu naija kuhindura ensi yoona paradiso, kandi ngu buri muntu naija kugumaho ebiro byona ashemereirwe. Ekyo akaba naaza kukikora ata? Okumara emyaka mingi, abantu bakaba batarikumanya oku yaabaire naaza kukikora. Egi ekaba eri enaama.

Yesu ku yaizire omu nsi, akongyera kwegyesa abantu ebirikukwata aha naama egi. Akagira ngu ekaba neekwata aha Bukama bwa Ruhanga. Yesu akagambira abantu kushaba ngu Obukama obwo bwije. Nibwija kuhindura ensi yoona paradiso.

Okumanya enaama egi kyakushemeza?— Ijuka ngu abo bonka abarikworobera Yehova nibo baraatuure omu Paradiso. Omu Baibuli harimu ebitebyo bingi ebirikukwata aha bashaija n’abakazi abaabaire niboorobera Yehova. Nooyenda kumanya ebirikubakwataho?— Ka tureebe bamwe aharibo n’oku turikubaasa kubatooreza.