EISHOMO 39
Eki Ruhanga Arikugamba aha Shagama
Eshagama ni nkuru munonga. Tihaine orikubaasa kuba ohuriire yaaba atagiine. Ruhanga Omuhangi waitu, aine obushoboorozi bw’okutugambira oku eshagama eine kukoresibwa. Naagamba ki aha shagama? Nitubaasa kugirya nari kugita omu mubiri? Kandi noobaasa kucwamu gye ota aha nshonga egi?
1. Yehova naagamba ki aha shagama?
Ira, Yehova akagambira abaheereza be ati: ‘Amagara g’ekihangirwe kyona gari omu shagama yaakyo.’ (Abaleevi 17:14) Yehova naagira ngu eshagama neejwekyera amagara. Obu amagara gari agarikwera, kandi ekiconco kuruga ahari Ruhanga, n’eshagama nayo n’erikwera.
2. Ni nkoresa ki y’eshagama ei Ruhanga arikwanga?
Yehova akaragiira abaheereza be ira Obukristaayo butakabaireho kutarya eshagama. (Shoma Okutandika 9:4 na Abaleevi 17:10.) Akahamya ekiragiro eki obu akakiiko akareeberezi kaagambira Abakristaayo ‘okureka eshagama.’—Shoma Ebyakozirwe 15:28, 29.
Nikimanyisa ki okureka eshagama? Omushaho yaakugambira kureka amaarwa, nikiba nikimanyisa ngu torikwija kuganywa. Kwonka shi noobaasa kurya eby’okurya ebirimu amaarwa, nari kwikiriza kugakutaatsyamu barikugarabya omu mitsi? Ngaaha buzima. Nikyo kimwe, ekiragiro kya Ruhanga eky’okureka eshagama nikimanyisa ngu titwine kuginywa, nari kurya enyama erimu eshagama. Kandi titwine n’okurya eby’okurya ebijwangizemu eshagama.
Kandi shi okukoresa eshagama omu by’obujanjabi? Emiringo emwe y’okuragurirwa neehenda ebiragiro bya Ruhanga. Egi neetwariramu okuta omu muntu eshagama yoona, nari ebicweka byayo ebihango, nk’obutafaari oburikutukura, obutafaari oburikwera, ebirikureetera eshagama kwekwata, n’orwizi rwayo. Kwonka nikibaasa kuba kitarikureebwa butunu yaaba okuragurirwa okumwe nikuhenda ebiragiro bya Ruhanga. Nk’eky’okureeberaho, okuragurirwa okumwe nikutwariramu okukoresa obucweka obukye obwihirwe omuri kimwe aha bicweka ebihango eby’eshagama. Okundi nikutwariramu okukoresa eshagama y’ogwo orikuba arwaire. Omu nshonga egi, buri omwe aine kwecweramu. a—Abagalatia 6:5.
SHWIJUMA GYE
Yetegyereze oku orikubaasa kucwamu aha bikwatiraine n’enkoresa y’eshagama omu kuragurirwa.
3. Omu kuragurirwa, cwamu ebirikushemeza Yehova
Aha bikwatiraine n’okuragurirwa noobaasa kucwamu ota ebirikuhikaana n’emiteekateekyere ya Yehova? Zaana VIDIYO, kumanya oku orikubaasa kugasirwa waagyendera aha buhabuzi oburikukurataho.
-
Shaba obwengye.—Yakobo 1:5.
-
Condooza aha misingye ya Baibuli kandi ogigyendereho.—Enfumu 13:16.
-
Manya emiringo y’okuragurirwa erikubaasa kutungwa omu kicweka kyanyu.
-
Toorana emiringo y’okuragurirwa ei orikubaasa kwikiriza.
-
Hamya ngu okucwamu kwawe nikwija kukureetera kuguma oine omutima ogutarikweshinja.—Ebyakozirwe 24:16. b
-
Kimanye ngu enshonga ezi oine kwecweramu orikwihirira aha muntu waawe w’omunda, tihaine n’omwe oine kukugambira eki oraacwemu, yaaba ou ori nawe omu bushwere, omureeberezi, nari orikukwegyesa Baibuli.—Abarooma 14:12.
-
Okucwamu kwawe kute omu buhandiikye.
4. Abajurizi ba Yehova nibasherura obujanjabi burungi
Nikibaasika kuhamira aha biragiro bya Ruhanga ebirikukwata aha shagama, kandi okaragurirwa gye otatairwemu shagama. Zaana VIDIYO.
Shoma Tito 3:2, kubaasa kugarukamu ekibuuzo eki:
-
Omu by’obujanjabi ahabw’enki twine kukwatanisa n’abashaho kandi tukabatwariza gye?
|
Ebitarikwikirizibwa |
Ebi Omukristaayo aine kwecweramu |
|---|---|
|
A. Orwizi rw’eshagama |
Ebirikwihwa omu rwizi rw’eshagama |
|
B. Obutafaari oburikwera |
Ebirikwihwa omu butafaari oburikwera |
|
C. Ebirikureetera eshagama kwekwata |
Ebirikwihwa omu birikureetera eshagama kwekwata |
|
D. Obutafaari oburikutukura |
Ebirikwihwa omu butafaari oburikutukura |
5. Okuragurirwa kwaba nikutwariramu obucweka bw’eshagama obukye
Eshagama eine ebicweka bina ebikuru, obutafaari oburikutukura, obutafaari oburikwera, ebirikureetera eshagama kwekwata, n’orwizi rw’eshagama. Ebicweka ebi birimu obucweka bwingi obundi obukye, oburikwetwa obucweka bw’eshagama. c Obucweka obu nibukoresibwa omu mibazi erikurwanisa endwara nari erikuzibira okujwa.
Kyahika aha bucweka bw’eshagama obukye, buri Mukristaayo naaba aine kwecweramu arikwihirira aha muntu we ow’omunda otendekirwe Baibuli. Abamwe nibabaasa kucwamu kwanga omubazi nari okuragurirwa okurikutwariramu obucweka bw’eshagama obukye. Kandi abamwe nibabaasa kwikiriza obucweka obu.
Waaba noocwamu, teekateeka aha kibuuzo eki:
-
Nimbaasa kushoboororera omushaho ahabw’enki niinyanga nari niinyikiriza bumwe aha bucweka obukye obw’eshagama?
OMUNTU NAABAASA KUBUUZA ATI: “Okwikiriza kuteebwamu eshagama kiine nshonga ki?”
-
Iwe nooteekateeka ki?
OMU BUGUFU
Yehova naayenda ngu twetantare okukoresa kubi eshagama.
Okweijutsya
-
Ahabw’enki Yehova naatwara eshagama nk’erikwera?
-
Nitumanya tuta ngu ekiragiro kya Ruhanga eky’okureka eshagama nikikwata n’aha kuteebwamu eshagama?
-
Noobaasa kucwamu gye ota aha bikwatiraine n’okuragurirwa okurikutwariramu okukoresa eshagama?
JUMBURA EBINDI
Oshemereire kuteekateeka ahari ki otakaikiriize okuragurirwa okurikutwariramu okukoresa eshagama eyaawe?
“Ebibuuzo Kuruga omu Bashomi” (Omunaara gw’Omurinzi, Okitoba 15, 2000)
Oine kuteekateeka ahari ki waaba noocwamu yaaba oraikirize kukoresa obucweka bw’eshagama obukye?
“Ebibuuzo Kuruga omu Bashomi” (Omunaara gw’Omurinzi, Gyuni 15, 2004)
Niki ekyareeteire omushaho kwikiriza ngu emiteekateekyere ya Yehova aha shagama ehikire?
“Nkaikiriza Eki Ruhanga Arikugamba aha Shagama” (Awake!, Desemba 8, 2003)
Manya oku abareeberezi abari aha Bukiiko bw’Eby’obujanjabi barikuhwera ab’eishe-emwe na banyaanyabo.
a Reeba Eishomo 35, “Oku Orikubaasa Kucwamu Gye.”
b Reeba enshonga ya 5, “Okuragurirwa Kwaba Nikutwariramu Obucweka bw’Eshagama Obukye,” n’Ebirikukiraho 3, “Okuragurirwa Okurikutwariramu Eshagama.”
c Abashaho abamwe nibareeba ebicweka bina ebikuru eby’eshagama nk’obucweka obukye. N’ahabw’ekyo, nikibaasa kukwetengyesa kubamanyisa butunu ngu torikubaasa kwikiriza kuteebwamu eshagama yoona, nari obutafaari oburikutukura, obutafaari oburikwera, ebirikureetera eshagama kwekwata, n’orwizi rw’eshagama.
Noobaasa Kukunda n'Ebi
EBIBUUZO EBIRIKUKIRA KUBUUZIBWA
Omushomo gw’Okwegyesa Baibuli ogw’Abajurizi ba Yehova Niki?
Omu ntebeekanisa ya busha ey’okuhikaanisa ebiteekateeko ey’Abajurizi ba Yehova, noobaasa kukoresa envunuura ya Baibuli yoona. Noobaasa kwega n’eka yaawe yoona nari kweta banywani baawe.
