Kuruga 2018, buri magaziini ey’okukoresa omu kubuurira neeba neegamba aha nshonga emwe. Magaziini ezi zoona nizishangwa omu by’Okukoresa omu Kwegyesa. N’ahabw’ekyo nitubaasa kuzikoresa omu kubuurira. Nitubaasa n’okutwara nkye omu nshaho zaitu twaba nituza aha rugyendo nari turikuza kugura ebintu. Titurikukoresa magaziini ezi kwegyesa abantu Baibuli, kwonka nizibaasa kureetera omuntu kwenda kwega bingi ebirikukwata ahari Ruhanga.

Bwanyima y’okugaaniira n’omuntu, mushomere ekyahandiikirwe reero ogambe aha mutwe gwa magaziini ogurikubaasa kumushemeza. Nk’eky’okureeberaho, yaaba naateeraho kureeberera eka ye nari aine amaganya, noobaasa kugira oti: “Haine ekicweka kirungi eki nshomire ekirikukwata aha nshonga egyo. Nimbaasa kukikworeka?” Waareeba ngu omuntu naayenda kumanya ebirikukiraho, noobaasa kumuha magaziini eteirwe nari ogimwoherereze aha simu nari tabuleti, n’obu waakuba waamubuurira omurundi gw’okubanza. N’obu ekigyendererwa kyaitu ekikuru kiraabe kitari eky’okugaba magaziini, nizibaasa kutuhwera kutunga abarikwenda kugyendera aha bi barikwega.​—Byak 13:48.